Whakatakinga

Ko te Pukapuka a Moromona tētahi pukapuka karaipiture tapu e rite ana ki te Paipera. He tuhituhinga ia o ngā mahinga a te Atua ki ngā iwi onamata o ngā Amerika e mau ana te raneatanga o te rongopai mau tonu.

I tuhia te pukapuka e ngā poropiti onamata tokomaha mā runga i te wairua o te poropititanga me te whakakitenga. Ko ā rātou kupu, i tuhia i runga i ngā papa kōura, i whakahuatia, i whakarāpopotohia e tētahi poropiti-kaihītōria i huaina ai ko Moromona. E kōrero ana te tuhituhinga mō ngā iwi nui rawa e rua. I takea mai tētahi i Hiruharama i te 600 M.K. nō muri iho ka weherua ki ngā iwi e rua, e mōhiotia ana ko ngā Nīwhai me ngā Rāmana. I tae tōmua rawa mai tērā atu i te wā i whakapōauau te Ariki i ngā arero i te Pourewa o Pāpera. E mōhiotia ana tēnei iwi ko ngā Iarere. Nō muri iho i ngā tau manomano, ka whakangaromia te katoa hāunga ko ngā Rāmana, ko rātou anō ētahi o ngā tūpuna o ngā Īnia Amerikana.

Ko te heipūtanga matua kua tuhia i te Pukapuka a Moromona ko te minitatanga kanohi ki te kanohi o te Ariki Ihu Karaiti i waenganui i ngā Nīwhai whai muri tata iho i Tōna aranga. E whakaputaina ana e ia ngā whakaakoranga o te rongopai, e whakamāramahia ana te mahere o te whakaoranga, e kī atu ana anō ki ngā tangata me aha e whiwhi ai i te maungārongo i tēnei oranga me te oranga tonutanga hei te oranga e haere mai nei.

I muri iho i tā Moromona whakamutu i ana tuhinga, ka tukuna atu ngā kōrero ki tana tama a Moronai, nāna anō āna ake kupu ruarua i tāpiri kātahi ka hunaia ake i te puke Kamōra. I te Hepetema, 21, 1823, ko taua Moronai pū anō, i taua wā he mea whakakorōriatia, he mea whakaarahia, i puta ki te aroaro o te Poropiti Hōhepa Mete me te tohutohu atu i a ia e pā ana ki te tuhinga onamata me tana whakapākehātanga mārika ki te reo Ingarihi.

Tukuna rawa atu ngā papa ki a Hōhepa Mete, nāna ia i whakapākehā mā runga i te takohatanga me te kaha o te Atua. Kua whakaputaina ināianei ki ngā reo maha hei mea hou, hei kaiwhakaatu anō ko Ihu Karaiti te Tama a te Atua ora, ā, kia whakaorangia ai te hunga katoa ka haere mai ki a Ia me te pupuri i ngā ture me ngā tikanga tapu o Tōna rongopai.

Ko tā te Poropiti Hōhepa Mete e pā ana ki tēnei tuhituhinga: “I kōrero atu au ki ngā teina, ko te Pukapuka a Moromona te pukapuka tika rawa atu i runga i te whenua, ko te kohatu kī o tō tātou whakapono, nā, ka tata ake te tangata ki te Atua mā te ngohengohe i ōna tikanga, i ō ētahi atu pukapuka.”

Hei āpiti atu ki a Hōhepa Mete, i tuku te Ariki i ētahi atu tekau mā tahi kia kite ai i ngā papa kōura mō rātou ake me te tū hei kaiwhakaatu motuhake i te pono me te mana o te Pukapuka a Moromona. Kua tāpirihia nei ō rātou whakaaturanga ā-tuhi e kīa nei “Ko te Whakaaturanga a ngā Kaiwhakaatu Tokotoru” rāua “Ko te Whakaaturanga a ngā Kaiwhakaatu Tokowaru.”

E tono ana mātou ki ngā tangata katoa kia pānuihia ai te Pukapuka a Moromona, kia whakaaroarohia i ō rātou ngākau te karere kei a ia, kātahi ka inoi ki te Atua, te Matua Ora Tonu, i runga i te ingoa o Ihu Karaiti mehemea he pono te pukapuka. Ko te hunga e whai atu ai i tēnei tohutohu me te inoi i runga i te whakapono ka whai whakaaturanga pono o tōna pono me tōna mana mā runga i te kaha o te Wairua Tapu. (Tirohia Moronai 10:3–5.)

Ko te hunga whaiwhakaaturanga tapu mā runga i te Wairua Tapu ka mōhio mā taua mana anō ko Ihu Karaiti te Kaiwhakaora o te Ao, ko Hōhepa Mete Tāna kaiwhakakite, poropiti hoki i ēnei rā whakamutunga, ā, ko Te Hāhi o Ihu Karaiti o te Hunga Tapu i ngā Rā o Muri nei tō te Ariki kīngitanga kua whakapūmauhia anōtia i runga i te whenua, hei whakarite mō te Haerenga Tuaruatanga mai a te Mīhaia.