1 Me yibi buch ni pi rran rokʼ Ether e immoy u lan e pi rran rokʼ Coriantumr; ma Coriantumr e ire pilung u gaʼangin yang e nam.

2 Ma Ether e ba profet rokʼ Somoel; ere Ether e yib u lan e pi rran rokʼ Coriantumr, nge tabab ko prophesy ngakʼ fapi gidiiʼ, ya dakiyog ni nge tileg ir ni bachan fare Kan ni Thothup rokʼ Somoel ni bay rokʼ.

3 Ere ri machib ni kakadbul, nge yaeni madaʼ nga napan ni ke aw e yalʼ nga butʼ, nibe tamilngeg ko fapi gidiiʼ ni nge michaenʼraed ngakʼ Got mar kalgaed ngaenʼraed ara dangay ma yira gatheayraed, ni be yoeg ngoraed nu dakean e mich e ra muguʼul gubin banʼen riy—

4 Ere, enra michaenʼ ngakʼ Got e rriyulʼ ni rayog ni nge athapeg rebe fayleng nib felʼ, arragon, ni boed rogon bangi banʼen u baʼani matʼaw i paʼ Got, nib athap ni ma yib u dakean e mich, ni ma yuluuy e yaʼel ko gidiiʼ, niʼir e ratay raed ni yaed bagael ma yaed ba miyuluy, ni gubin e ngiyalʼ ma yaed be rinʼ e tin nib felʼ e muruwel, me wawliyraed ngar liyoer gaed ngakʼ Got.

5 Me yibi buch ni Ether e prophesy nag bogi banʼen nib felʼ mab poloʼ falʼngin ngakʼ fapi gidiiʼ, niʼir e de michaenʼraed ngay, ni bachan e dar guyed.

6 Ere chiney, e gag, Moroni, e nggu weliy boech banʼen ni morngaʼagen e pinnʼey; bay gudag ko fayleng ni mich e bogi banʼen ni yibe athapeg ma danur guy; ere, dabi yoʼor lungmed ni bachan e damur guyed, ya dabi yib e mich riy ngomed nge yaeni madaʼ nga tomuren ni kan sikeng nag e mich romed.

7 Ya dakean e mich e mʼug Kristus riy ngakʼ e pi chitamangdaed, u tomuren ni ke fos ko yamʼ; ma de mʼug ngoraed nge yaeni madaʼ nga tomuren ni ke michaenʼraed ngakʼ; ere, dabisiy ni boech e gidiiʼ e bay e mich roraed ngakʼ, ya de mʼug ko fayleng.

8 Machane bachan e mich ko gidiiʼ me mʼug ko fayleng, me taʼfan fithingan e en Chitamangiy, me falʼeg rogon woʼen ngakʼ e gidiiʼ ni ngar manged boech e pi tafek tawaʼath nu tharmiy, ni gomanga yog ni ngar athapeged e pinʼen ni dawor ruguyed.

9 Ere, gimed e kurayog ni nge yog ni mu athap gaed, magmed mang tafek tawaʼath nu tharmiy, ni kemus ni faʼanra bay e mich romed.

10 Musap gaed, u dakean e mich e ni pining fa piʼin kakrom riy u rogon fare yaram nib thothup rokʼ Got.

11 Ere, dakean e mich e ni piiʼ fare motochiyel rokʼ Moses riy. Machane dakean fare tawaʼath ni aram Fak e ke falʼeg Got rebo kanawoʼ riy nib felʼ; ma dakean e mich e kan muguʼuliy riy.

12 Ya faʼanra dariy e mich u fithikʼ e gidiiʼ ma Got e dabiyog ni nge rinʼ e maʼangʼang u fithikʼraed; ere, dabi mʼug ngoraed nge madaʼ nga tomuren ni ke yog e mich ngoraed.

13 Musap gaed, u dakean e mich rokʼ Alma nge Amulek me puth fare kalbus riy nga butʼ.

14 Musap gaed, fare mich rokʼ Nephi nge Lehi e gagyeg nag fare thil ni tay fapi Lamanites, Min tawfe nagraed ko nifiy nge fare Kan ni Thothup.

15 Musap gaed, fare mich rokʼ Ammon nge pi walagen e gagyeg nag ba maʼangʼang nib gaaʼ nga fithikʼ fapi Lamanites.

16 Arragon, ni mus ngakʼ gubin e piʼin ni gagyeg nag e maʼangʼang e ra gagyeg niged u dakean e mich, ni boed e piʼin ni ur moyed nga mʼon ku Kristus nge piʼin ni rabaed nga tomuren.

17 Ma dakean e mich e fare dalip i gachalpen e yog riy ngoraed ba michmich ni dabra thamiyed e yamʼ; ma de yog ngoraed e re michmich nem nge madaʼ nga tomuren ni ke yog e mich ngoraed.

18 Ma dariy bingyalʼ ni ke gagyeg nag e gidiiʼ e maʼangʼang nge madaʼ nga tomuren ni ke yog e mich ngoraed; ere sommʼon e nge michaenʼraed ngakʼ fachaʼ ni Fak Got.

19 Ma bay boech e gidiiʼ ni rib gel e mich roraed, u mʼon ni nge yib Kristus, ni arame dakiyog i tel raed u barbaʼ farengi lumor nibe inge lem, ya rriyulʼ nra guyed nga oewchraed e pinʼen ni kar guyed ko changar u dakean e mich, mar falfalaenʼ gaed.

20 Ere musap gaed, kad guyed u lan e re chep ney ni bagyaed e pichaʼaney e fare moʼon ni walagen Jared; ya rib gel e mich rokʼ ngakʼ Got, ni arame napʼan ni kʼiyeg Got bugulipaʼ ma dakiyog ni nge mithaeg ko changar rokʼ fare moʼon ni walagen Jared, ni bachan e thin rokʼ ni yoeg ngakʼ, ni ireram fare thin ni yog ngakʼ u dakean e mich.

21 Ma tomuren ni ke guy fare moʼon ni walagen Jared bugulipaʼ Somoel, ni bachan fare michmich ni ke yog ngakʼ fare moʼon ni walagen Jared u dakean e mich, ere fare Somoel e dakiyog ni nge mithaeg banʼen ko changar rokʼ; ere me dag gubin banʼen ngakʼ, ya dabkiyog i tel u barbaʼ farengi lumor nibe inge lem.

22 Ma dakean e mich me yog riy ngakʼ e pi chitamag fare michmich ni pinnʼey e ra yib ngakʼ pi walagraed u dakean fapi Gentiles; ere Somoel e ke chiyliy ngog, arragon, ni Yesus Kristus.

23 Ere gguʼar ngakʼ: Somoel, fapi Gentiles e yaedra muning nag e pinnʼey, ni bachan e dag salap gaed ko yol; ya gur Somoel e kam salap nagmaed ko thin u dakean e mich, machane dawor mu salap nagmaed ko yol; ya gur e kam sunmiy gubin e pi gidiiʼ ney ni rayog ni ngar weliyed boʼor banʼen, ni bachan fare Kan ni Thothup ni kam piiʼ ngoraed;

24 Ma gur e kam sunmiy maed ni buchʼuw e tin rayog ni nggu yoloeyed, ni bachan e sagilaeyʼ u paʼmaed. Musap, gur e dam sunmiy maed ni gamaed ba salap ko yol ni boed fare moʼon ni walagen Jared, ya gur e mu sunmiy ni pinʼen ni yoloey e rib mangingʼ ni woed gur, nibe miliyaenʼ e gidiiʼ ni ngar biʼeged.

25 Gur e kum falʼeg e thin romaed nib mangingʼ mab felʼ, nge taw nga bang ni dab kiyog ni nggu yoloeyed; ere, napʼan ni gamaed ra yol ma gamaed be guy fanmaed kirkireb ko yol, nge oloboch riy ni bachan rogon ni gamaed be yarmiy e pi yu bugithin romaed; ere gube rus nag ni richey me muning nag fapi Gentiles e thin romaed.

26 Ere napʼan ni gog e rennʼey, me non Somoel ngog, ni gaʼar: Pi meechiyang e ma muning, machane yaedra kirbaenʼ; ma murnguy rog e ba gaman ko piʼin nib muding, ni yaedra fek oewchraed ko pi moʼowaer romed;

27 Ma faʼanra yib e gidiiʼ ngog ma gura dag ngoraed e moʼowaer roraed. Guma piiʼ e moʼowaer ko gidiiʼ ni nge yog ni nge sobutʼaenʼ raed; ma murnguy rog e ba gaman ko gubin e gidiiʼ ni yaed be sobutʼ niged laniyaenʼraed u pʼoewcheg; ya faʼan yaedra sobutʼ niged laniyaenʼraed u pʼoewcheg, me michaenʼraed ngog, ma arame gura guy rogon ni pinʼen ni moʼowaer roraed e ra mang gelingraed.

28 Musap gaed, gura dag ngakʼ fapi Gentiles e pi moʼowaer roraed, ma gura dag ngoraed ni mich, nge athap, nge tʼufeg e ra fekraed iyib ngog—ni fare alublub ko gubin mit e felʼ.

29 Ere gag, Moroni, e tomuren ni kug rungʼag e pi thin ney, me gapas laninʼug, mug gaʼar: O Somoel, tirom nib matʼaw e yira rinʼ, ya gumnang ni gur e gama gagyeg nag e gidiiʼ u rogon e mich roraed;

30 Ya fare moʼon ni walagen Jared e gaʼar ko fare burey ni Zerin, Muchuw riy—me chuw. Ma faʼan manga dariy e mich rokʼ ma dabi mithmith; ere gur e gama gagyeg u tomuren ni ke yog e mich ko gidiiʼ.

31 Ya gur e mmʼug ngakʼ pi gachalpem; u tomuren ni ke yog e mich ngoraed, mar non naed u fithingam, gur e kam mʼug ngoraed u fithikʼ ba gelingin nib gaaʼ.

32 Ma ku gumnang ni gur e kamoeg faram ni gur e kam falʼeg ba naʼun ni fan ko gidiiʼ, arragon, u fithikʼ e pi naʼun rokʼ e Chitamam, niʼir e rayog riy ngakʼ e gidiiʼ e athap nib felʼ; ere gidiiʼ e thingari athap, ara dangay ma dabiyog ni nge yog bang e tagilʼ ngakʼ ko rengi nʼen ni kam falʼeg rogon.

33 Ma bayay, ku gumnang ni gur e kamoeg ni kam tʼufeg e fayleng, nge yaeni madaʼ ko ngiyalʼ ni kam tay e yafos rom nga butʼ ni fan ko fayleng, ni nge yog ni ngam fek bayay ya ngam falʼeg bangi tagilʼ ni fan ko gidiiʼ.

34 Ere chiney e gumnang nre adag rom ney ko gidiiʼ e tʼufeg; ere, faʼanra dariy e tʼufeg ko gidiiʼ ma dabiyog ngoraed e rangi tagilʼ ni baʼaram ni kam falʼeg u lan e pi naʼun rokʼ e Chitamam.

35 Ere, gumnang ni bachan e rennʼey ni kamoeg, ni faʼanra dariy e tʼufeg ko fapi Gentiles, ni bachan e moʼowaer romaed, ma gur e gara sikeng nagraed, mag chuweg roraed e pinʼen ni yaed ba salap riy, arragon, ni woed e pinʼen ni ke yog ngoraed, mag piiʼ ngakʼ e piʼin nib yoʼor boech e tin ra yog ngoraed.

36 Me yibi buch ni arame gu meybil ngakʼ Somoel ni nge piiʼ e murnguy ngakʼ fapi Gentiles, ni nge yog ngoraed e tʼufeg.

37 Me yibi buch ni arame gaʼar fare Somoel ngog: Faʼanra dariy e tʼufeg roraed ma dariy rogon ngom, ya gur e kuʼum yulʼyulʼ; ere, mad rom e bay ni beʼech nag. Ma bachan e gur e kam guy e moʼowaer rom ere gur e bay ni gel nigem, ni arame bay mu paer nga butʼ ko farengi tagilʼ ni kug falʼeg u lan e pi naʼun rokʼ e Chitamag.

38 Ere chiney e gag, Moroni, gube fingichiy e pi Gentiles, arragon, nge ku aram rogon ngakʼ e pi walageg nib tʼuf rog, nge yaeni madaʼ ko ngiyalʼ ni kug madaʼ gaed nggilʼ e pufthin rokʼ Kristus, ni ireram e gin nra nang e gidiiʼ riy ni mad rog e dariy rachaʼmed riy.

39 Ma aram magmed nang ni kug guy Yesus, ma kenon ngog ni gamow ba sabol, ma ke yoeg ngog u fithikʼ e tamilang ni sobutʼaenʼ, ni boed ni ma non beeʼ ngakʼ beeʼ ko birog e thin, ni be weliy morngaʼagen e pinnʼey;

40 Ma kemus ni buchʼuw riy e kug yoloey, ni bachan e dag salap ko yol.

41 Ere chiney, e nggu chiyliy ngomed ni ngam gayed e chaʼaney i Yesus niʼir e ke yoloey fapi profet nge apostle morngaʼagen, ni nge yog ngomed fare murnguy rokʼ Got ni Chitamangiy, nge fare Somoel i Yesus Kristus, nge fare Kan ni Thothup, niʼir e be micheg row, ngomed me paer romed ni gubinfen. Amen.