1 Ere chiney e gag, Moroni, e nggu ʼulʼul ko chep rog. Ere, musap gaed, yibi buch ni bachan fapi ulung nib miith rokʼ Akish nge pi tafgear rokʼ, ma arame ra koeled fare gilʼelung ku Omer.

2 Machane, fare Somoel e wurengaenʼ ngakʼ Omer, nge pi pagael ni fak nge pi ppin ni fak ni dar gayed rogon ni ngar gatheayed.

3 Ere fare Somoel e kuruf e thin ku Omer u malikʼaey ni nge chuw u lan fare binaw; ere Omer e chuw u lan fare binaw niʼir nge tabinaew rokʼ, mar milekag gaed nib yoʼor e rran, marbaed nga ranoed u charen farengi falang nu Shim, marbaed nga bangi banʼen nliiʼ fapi Nephites riy, mar sor gaed u roem nga lan e ngek, marbaed nga bangi banʼen ni kanoeg ni Ablom, u charen e dappʼelʼay, me nʼuf e tent rokʼ u roem, nge fapi pagael nge ppin ni fak, nge gubin chon e tabinaew rokʼ, ma kemus ni yigoʼ Jared nge tabinaew rokʼ e dar uned.

4 Me yibi buch ni Jared e ni gapgep nag nge mang pilung ko fapi gidiiʼ, u paʼ e piʼin kireb; me piiʼ ngakʼ Akish beeʼ nib ppin ni fak nge leʼengiy.

5 Me yibi buch ni Akish e gay rogon ni nge fek e pogofan rokʼ e chitamangin ni wechmaʼ rokʼ; me yoeg ngakʼ fa piʼin ni kar michmich gaed u dakean fare mʼag ni tay pi kakrom, mar feked loelugen e chitamangin ni wechmaʼ, u napʼan ni be paer ko gilʼelung rokʼ, ni ke pag e gidiiʼ rokʼ ngar baed ko gin bay riy.

6 Ya kari garar e re ulung ney nib kireb mab miith ni ke yung e kireb nga lan gumʼirchaʼen gubin fapi gidiiʼ; ere Jared e ni thang e fan rokʼ u napan ni bay ko lung rokʼ, me yinʼ Akish luwan.

7 Me yibi buch ni Akish e tabab ko awaenʼ ngakʼ ba pagael ni fak, ere yinʼ nga kalbus, ma yungiyalʼ e piiʼ buchʼuw e ggan ngakʼ ma yungiyalʼ e ri ddariy nge madaʼ ko ngiyalʼ ni ke yimʼ.

8 Ere chiney e walagen faʼanem ni ke yimʼ, (ni Nimrah fithingan) e ri damomuw ngakʼ e chitamangin ni bachan e nʼen ni ke rinʼ e chitamangin ngakʼ faʼen walagen.

9 Me yibi buch ni Nimrah e kunuy nga taʼabang boechi ulung i gidiiʼ, mar miil gaed nga wuruʼ fare binaw, marbaed ra pired ngakʼ Omer.

10 Me yibi buch ni Akish e ki diyen ni boech e pagael, maki mʼagaenʼ fapi gidiiʼ ngoraed, ni yug aram rogon ni kar michmich gaed ngakʼ ni ngar rinʼed gubin mite ngongol ni kireb ni boed rogon ni baʼadag.

11 Chiney e fapi gidiiʼ ku Akish e yaed baʼadag ni nge felʼ rograed, ni boed Akish ni athapeg ni nge gel lungun; ere, fapi pagael ni fak Akish e ra piiʼed e salpiy ngoraed, niʼir e ra miliyed riy nga orel e tin yoʼor ko fapi gidiiʼ ngar uned ngoraed.

12 Ma arame tabab ba mael u thilin fapi pagael ni fak Akish nge Akish, ni paer ni bukun e duw nʼumngin i napʼan, arragon, ni ri chugur ni nge yimʼ gubin fapi gidiiʼ ko fare lung, arragon, ni gubin, ma kemus ni guyey e gidiiʼ ni magaey, ni yaed e piʼin nra miil gaed ngar uned ko tabinaew rokʼ Omer.

13 Ere, Omer, e ni sulweg bayay ko farengi nam ni tafen.

14 Me yibi buch ni Omer e ke pilibthir iyaen; machane, napʼan ni ke pilibthir me diyen ni Emer; me gapgep nag Emer ni nge mang pilung ni nge yinʼ luwan ko lung.

15 Ma tomuren ni ke gapgep nag Emer ni nge mang pilung me guy e gapas u lan fare nam u lan lʼagruw e duw, ma arame yimʼ, ma bukun e rran ni guy nib sug ko kirbaenʼ. Me yibi buch ni Emer e yinʼ luwan ko lung, me yaen u woʼen e chitamangin.

16 Ere fare Somoel e tabab bayay ni nge chuweg e buch waʼath ko fare nam, ma fare tabinaew ku Emer e ri monʼog u tane lung ku Emer; ma lan nelʼ iragag nge lʼagruw e duw ma kar gel gaed, ni arame kar falaʼab gaed—

17 Ma bay gubin mite waʼamngin roraed, nge awoch, nge mad, nge gol, nge silber, nge tin thʼabi felʼ banʼen;

18 Nge gubin mite cattle, nge oxen, nge garbaw, nge saaf, nge babiy, nge kaming, nge gubin mite gamanman nib tʼuf ni ggan ko gidiiʼ.

19 Ma kubay e os, nge donkey, ma bay e elefent, nge curelom nge cumom; ni gubin mab gaʼfan ngakʼ e gidiiʼ, ma rib gaaʼ ni elefent nge curelom nge cumom.

20 Ere aray rogon ni puʼoeg Somoel e tawaʼath rokʼ nga dakean e re nam ney, niʼir e kan melʼeg u fithikʼ gubin yang e nam; me chiyliy ni enra paer ko re nam nem e nge paer riy ni fan ngakʼ Somoel, ara yira gatheayraed u napʼan ni kar loel gaed ko kireb; ya ireram e piʼin, ni yoeg Somoel ni gaʼar: Gura puʼoeg e damomuw rog ni poloʼ nga dakeanraed.

21 Ere Emer e gagyeg nag e pufthin nib matʼaw u gubin e pi rran rokʼ, me diyen nib yoʼor ni pagael nge ppin; me yibi diyen ni Coriantum, me gapgep nag Coriantum ni nge yinʼ luwan ko lung.

22 Ere tomuren ni ke gapgep nag Coriantum ni nge yinʼ luwan ko lung me paer u lan aningeg e duw, me guy e gapas u lan farengi nam; arragon, ma kiguy fachaʼ ni Fak e tin nib Matʼaw, me falfalaenʼ me rir u lan e pi rran rokʼ; me yimʼ u fithikʼ e gapas.

23 Me yibi buch ni Coriantum e yaen u woʼen e chitamangin, me toey bukun e binaw ni gagangʼ, me piiʼ e tin nib mangil ngakʼ e pi gidiiʼ rokʼ u lan e pi rran rokʼ. Me yibi buch ni de fakay e bitir nge yaeni madaʼ ko ngiyalʼ ni kari pilibthir.

24 Me yibi buch ni yibi yimʼ leʼengin, ni ke gaman raʼay nge lʼagruw e duw yangren. Me yibi buch ni Coriantum e fek beeʼ nib ppin nge leʼengiy, ko ngiyalʼ nem ni ke pilibthir, ni beeʼ ni kub rugod, mar diyen gow ni pagael nge ppin; ere paer nge yaeni gaman raʼay nge aningeg iragag nge lʼagruw e duw yangren.

25 Me yibi buch ni diyen nni Com, ere Com e yinʼ luwan ko lung; me paer ko lung u lan aningeg iragag nge mereb e duw, me diyen ni Heth; ma ki diyen ni boech e pagael nge ppin.

26 Ere fapi gidi e kur garar gaed bayay u dakean gaʼangin yang fare nam, ma arame tabab bayay e kireb ni ke ni almarin u dakean gaʼangin yang fare nam, ma arame mʼagaenʼ Heth ko fapi makath nib miith bayay rokʼ e pi kakrom, ni ngan liiʼ e chitamangin.

27 Me yibi buch ni chuweg e chitamangin u gilʼilungun, ya liiʼ ngemʼ ko sayden rokʼ; me yinʼ luwan ko lung.

28 Ma aram me yib e profet nga lan fare nam bayay, ni yaed be yoeg ngoraed ni ngar kalgaed ngaenʼraed—ni thingar ra falʼeg rogon woʼen fare Somoel ara bay yib ba gechig nga dakean fare nam; arragon, ni boed ni bay yib ba uyngol, niʼir e yaedra yimʼ riy ni faʼanra dabra kalgaed ngaenʼraed.

29 Machane fapi gidiiʼ e de michaenʼraed ko thin rokʼ fapi profet, ere ra chuweged raed u lan binaw; ma boechi yaed e ninʼ nga lan e loew min pagraed ni ngar mʼaed. Me yibi buch ni rrinʼed gubin e pinnʼey ni boed nibe motochiyel nag fare pilung, i Heth.

30 Me yibi buch ni arame tabab e lldoew ni almarin u dakean fare nam, ere gidiiʼ riy e tabab ko yamʼ nib papay ni bachan e fare uyngol, ya dar awe nʼuw u dakean e fayleng.

31 Ma arame ki yib e porchoyog ni yub nga dakean fare nam, mar kʼaeded e gidiiʼ nib yoʼor. Me yibi buch ni pi gamanman roraed e ra tabab gaed ko miil rokʼ fapi porchoyog ni yub, iyaen ko fare binaw ni bay ko yimuch, ni ke tunguy fapi Nephites fithingan ni Zarahemla.

32 Me yibi buch ni boʼor iyaed e yimʼ u kanawoʼ; machane, bay boech iyaed ni miil nga lan fare binaw ko yimuch.

33 Me yibi buch ni fare Somoel e tileg fapi porchoyog ni nga dab kur lʼoelʼoeged raed, machane ngar ninged e woʼ ni nga dab kiyog ni nge yaen beeʼ, ni enra nomeg ni nge yaen u roem e ra kʼaed e porchoyog ni yub.

34 Me yibi buch ni fapi gidiiʼ e ra leaked aban e gamanman, mar longuyed e tin ni ke yimʼ u kanawoʼ, nge madaʼ ko ngiyalʼ ni kar longuyed raed ni gubin. Ere chiney e napʼan ni guy fapi gidiiʼ ni arame thingar ra mʼaed mar tabab gaed ko kalngaenʼ ko pi denen roraed mar meybil gaed ngakʼ Somoel.

35 Me yibi buch u napʼan ni kar sobutʼ niged yaed u mit Somoel me piiʼ e nʼuw nge aw nga dakean e fayleng; ma aram me tabab i sul gelingin fapi gidiiʼ bayay, ma aram me tabab e galwog nga lan e pi nam ko leluʼoch, nge gubin e pi nam iyaen. Ere fare Somoel e dag gelingin ngoraed ni ke ayuwegraed ni nge siy ra mʼaed ko uyngol.