1 Ere chiney e gag, Moroni, e kug yoloey e pi thin ni kan chiyliy ngog, u rogon ni gumnang; ma kug gog ngomed e pinʼen ni kug chaʼariy; ere dab maroed ngay ni ngam piliyeged e thin riy; ya rib mathngeluwol ni ngam rinʼed, ma kemus ni rayog ko ngiyalʼ inʼen ni ke gonopiy Got.

2 Ere musap gaed, rayog ni ngan piiʼ matʼawmed ni ngam daged fapi yungi plate ngakʼ e piʼin ra piiʼ e ayuw ko re muruwel ney;

3 Ma ngakʼ dalip niiʼ e bay ni dag ngoraed u dakean gelingin Got; ere rib dugil ni yaedra nang ni pinnʼey e rib riyulʼ.

4 Ma lʼugun dalip niiʼ ni mich riy e yira yarmiy e pinnʼey riy; ma mich rokʼ dalip niiʼ, nge re muruwel ney, niʼir e yira dag gelingin Got riy nge ku aram rogon ko thin rokʼ, niʼir e pinʼen ni fachaʼ ni Chitamangiy, nge fare Fak, nge fare Kan ni Thothup e yaed be micheg babyoren—ma gubin e pinnʼey e ra paer ni ba mich nib togopluw ko fayleng ko bin tomur e rran.

5 Ma faʼan yaedra kalngaenʼ marbaed ngakʼ e en Chitamangiy u fithingan Yesus, ma yaedra thap nga lan gilʼilungun Got.

6 Ere chiney, muguyed ko bay matʼawog ko pinnʼey, fa dariy; ya gimed ranang ni bay matʼawog u napʼan ni gimed ra guyeg, ma gaed sakʼiy u pʼoewchen Got ko bin tomur e rran. Amen.