1 Ere chiney e gag, Moroni, e arame nggu muʼ nag e chep rog ni morngaʼagen fare mogothgoth nra aw ko fapi gidiiʼ ni yaed faram e kug yoloey morngaʼagraed.

2 Ya musap gaed, kar feked yathin gubin e thin rokʼ Ether; ya rriyulʼ ni ke yoeg ngoraed morngaʼagen gubin banʼen, aram ko sommʼon ni sum e gidiiʼ; nge tomuren ni chuw e raen u dakean e re nam ney me yaeni aw ni bangi nam ni kan melʼeg u fithikʼ gubin e pi nam, ni ba nam ni kan melʼeg ni fan ngakʼ Somoel; ere fare Somoel e baʼadag ni nge gubin e gidiiʼ nibe paer u dakean ma thingar ra pigpig gaed ngakʼ;

3 Ma ireram e gin gilʼ fare Jerusalem ni Beʼech, nra yib nga butʼ u tharmiy, nge ireram gilʼ fare galasia nib thothup rokʼ Somoel.

4 Musap gaed, Ether e guy e pi rran rokʼ Kristus, me weliy morngaʼagen ba Jerusalem ni Beʼech u dakean e re nam ney.

5 Ma ki weliy morngaʼagen fapi gidiiʼ ku Israel, nge fare Jerusalem niʼir e ra yib Lehi riy—u tomuren ni kan gatheay ma bay ni toey bayay, nib binaw nib thothup ni fan ngakʼ Somoel; ere, dabiyog ni nge mang ba Jerusalem ni Beʼech ya ki immoy u bingyalʼ i nʼen ni kakrom; machane bay kun toey bayay, nge mang bbinaw nib thothup rokʼ Somoel; ma thingar ni toey ni fan ngakʼ e pi gidiiʼ ku Israel—

6 Ere ba Jerusalem ni Beʼech e thingar ni toey nga dakean e re nam ney, ni fan ngakʼ e tin ni ke magaey u pifak Yosef, ya pinnʼey e ke yib e pow riy.

7 Ya boed rogon Yosef ni fek e chitamangin iyaen nga lan fare nam nu Egypt, me yimʼ u roem; ere, aram rogon ni fare Somoel e fek e tin ni ke magaey u pifak Yosef nga wuruʼ fare binaw nu Jerusalem, ni nge yog ni wurengaenʼ ngakʼ pifak Yosef ni nge siy ra mʼaed, ni woed ni wurengaenʼ ngakʼ fachaʼ ni chitamangin Yosef ni de yimʼ.

8 Ere, tin ni ke magaey u pifak Yosef e bay ni yung raed nga dakean e re nam ney; ma nge paer ni bangi nam ni ngar pired riy; ma bay ra sunmiyed bbinaw nib thothup ni fan ngakʼ Somoel, ni boed fare Jerusalem ni kakrom; ma dabki minaenʼraed, nge yaeni madaʼ ko tomur, u napʼan ni ke yimʼe fayleng.

9 Ma arame bay yib rebo tharmiy nib beʼech nge rebo fayleng nib beʼech; mar boedew e gal ni kakrom machane tin kakrom e kemʼay, ma gubin banʼen ma kan beʼech nag.

10 Ma arame bay yib fabin nib Beʼech e Jerusalem; ma rib felʼ waʼathan e piʼin ni bay rapired riy, ya yaed e piʼin ni mad roraed e ke wechwech u dakean rachaʼen fare Saaf; ma yaed e piʼin ni kan thiʼeg raed nga fithikʼ e tin ni ke magaey u pifak Yosef, ni yaed e piʼin ni gidiiʼen fapi gidiiʼ ku Israel.

11 Ma arame ku bay yib fare Jerusalem ni kakrom; nge pi gidiiʼ riy, e rib felʼ waʼathraed, ya kan lukuy raed nga rachaʼen fare Saaf; ma yaed e piʼin nni garareg raed ngan kunuy nga taʼabang u lan fare aningeg i rabaʼ e fayleng, ngu lan e pi nam u leluʼoch, ma yaed e piʼin nibe fek e tawaʼath ni yib ko fare mʼag ni tay Got ngakʼ e pi chitamangraed, i Abraham.

12 Ma napʼan ni bay yib e pinnʼey, me buch fare chep nib thothup ni gaʼar, bay e piʼin nib mʼon, ni yaedra tomur; ma bay e piʼin nib tomur, ni bay ra mʼonaed.

13 Ma arame guwaen ni nggu yoloey boech, machane ba mathngeluwol ni nggu rinʼ; ya rib felʼ mab poloʼ falʼngin e pi prophecy rokʼ Ether; machane dar liyoer gaed ngakʼ, ere ra yinʼed nga wuruʼ e binaw; me yaeni miith nga thilin bangi war ni rran, me nepʼ me yaen nga wean nge yaliy e pinʼen ni nge buch ko fapi gidiiʼ.

14 Ma napʼan nibe paer u thilin bangi war me falʼeg e tin kubay ko re chep ney, nibe guy e gafgow nibe aw nga dakean fapi gidiiʼ, nib nepʼ.

15 Me yibi buch ni ku lan e re duw nem nni chuweg u fithikʼ fapi gidiiʼ me yibi tabab ba mael nib gaaʼ nga fithikʼ fapi gidiiʼ, ya rib yoʼor e piʼin ni rabaed, ni bogi gidiiʼ nib yargael, marbaed ragayed rogon ni ngar liiʼed Coriantumr u dakean e pi makath ni kireb roraed mab miith, niʼir e kug weliy morngaʼagen.

16 Ere chiney e Coriantumr, e ke fil gubin e pi salap ko mael nge gubin e pi sasaliyeb nu fayleng, ere og nag e mael ngakʼ e piʼin ni yaed be gey rogon ni ngar liiʼed.

17 Machane de kalngaenʼ, ma ku aram rogon ngakʼ e pi pagael ni pichoʼay ni fak nge pi ppin ni pidorang ni fak; ma ku aram rogon ngakʼ e pi pagael ni pichoʼay nge ppin ni fak Cohor; ma ku aram rogon ngakʼ fapi pagael ni pichoʼay nge ppin ni fak Corihor; ma ra ngan ngochngocheg i yoeg, ma dariy rebo pagael ni pichoʼay nge ppin ni pidorang u dakean gaʼangin yang e fayleng ni kalngaenʼ ko pi denen rok.

18 Ere, yibi buch nu lan e bin mʼon e duw ni paer Ether riy u thilin fare ngi war, ma arame boʼor e gidiiʼ ni kan liiʼraed ko sayden rokʼ fapi ulung nib miith, ni yaed be cham ngakʼ Coriantumr ni gomanga yog nra feked fare gilʼelung.

19 Me yibi buch ni fapi pagael ni fak Coriantumr e ra cham gaed nib gel me mapʼ rachaʼraed nib yoʼor.

20 Ma lan e bin lʼagruw e duw me yib e thin rokʼ Somoel ngakʼ Ether, ni nge yaen nge prophesy ngakʼ Coriantumr ni, faʼanra kalngaenʼ, nge gubin chon e tabinaew rokʼ, ma fare Somoel e ra piiʼ ngakʼ gilʼilungun me tay e gidiiʼ rokʼ ni dabra mʼaed—

21 Ara dangay ma yaedra yimʼ, nge gubin chon e tabinaew rokʼ ma kemus ni yigoʼ ir e ra magaey. Ma kemus ni nge paer nib fos ni nge guy nibe muguʼul fapi prophecy niʼir faram e kan weliy ni morngaʼagen boech e gidiiʼ ni bay rabaed ngar pired ko fare nam; mar feked Coriantumr ngar kʼeyaged; ma gubin e gidiiʼ ma yira liiʼ ngemʼ, ma kemus ni yigoʼ Coriantumr e ra magey.

22 Me yibi buch ni Coriantumr e de kalngaenʼ, ma aram rogon nge chon e tabinaew rokʼ, nge fapi gidiiʼ; ma de tal fare mael; mar gayed rogon ni ngar liiʼed Ether, machane miil roraed nge yaeni miith bayay nga thilin farengi war.

23 Me yibi buch ni yibi puw Shared ngalang, me og nag e mael ngakʼ Coriantumr; me gel ngakʼ, ni arame bin dalip e duw ngay me fek ni kalbus.

24 Ma fapi pagael ni fak Coriantumr, e lan e bin aningeg e duw, mar gel gaed ngakʼ Shared, mar sulweged bayay fare gilʼelung ngakʼ e chitamangraed.

25 Ere arame tabab ba mael u dakean gaʼangin yang fare nam, gubin e gidiiʼ nge ulung rokʼ e yaed be cham ni fan ko pinʼen ni yaed baʼadag.

26 Me basug e moroʼroʼ, ma ra ngan ngochngoch nag iyoeg, ma gubin mite kireb ma bay u dakean gaʼangin yang fare nam.

27 Me yibi buch ni Coriantumr e ri damomuw nib gel ngakʼ Shared, me yaen nge pi salthaw rokʼ ngakʼ ni mael; marbaed ra gak gaed u fithikʼ e damomuw, ni rabaed ra gak gaed nga lan fare loway nu Gilgal; ma mael nra tayed e rib ubchiyaʼ.

28 Me yibi buch ni Shared e cham ngakʼ u lan dalip e rran. Me yibi buch ni Coriantumr e gel ngakʼ, me tuluf iyaen nge madaʼ ko ngiyalʼ ni ke yib i taw nga yungi raed nu Heshlon.

29 Me yibi buch ni Shared e ki og nag e mael ngakʼ bayay u dakean e pi yungi raed nem; ere musap gaed, me gel ngakʼ Coriantumr, me tuluf nge sul bayay ko fare loway nu Gilgal.

30 Ere Coriantumr e og nag e mael bayay ngakʼ Shared u lan fare loway nu Gilgal, me gel ngakʼ Shared me madʼad ngakʼ ngemʼ.

31 Ere Shared e madʼad nga ay Coriantumr, ni arame dakiyaen ko mael bayay u lan lʼagruw e duw, ni aram napʼan gubin e gidiiʼ u dakean fare nam ma yaed be puʼoeg e rachaʼ, ma dariy beeʼ ni nge tileg raed.