1 Me yibi buch ni Jared nge walagen, nge chon e tabinaew rorow nge pi tafagear rokʼ Jared nge walagen nge pi chon e tabinaew roraed, e ranoed nga lan fare loway ni bay nga leluʼoch, (ma fithingan fare loway e Nimrod, nni tunguy u fithingan beeʼ nib cheag ko makoel gamanman) nge pi gamanman roraed ni kar kunuyed nga taʼabang, ni pumoʼon nge ppin, ni gubin mit.

2 Ma kur tayed e wup ngar koeled e archeʼ; ma kur falʼeged ba mʼuw, niʼir e rafeked e nig nu maraen riy nge un ngoraed.

3 Ma kur feked e ngul nge un ngoraed, ni kanoeg, ni ngul ko athibthib; ere aray rogon nra feked nge un ngoraed ba ulung i ngul, nge gubin mit banʼen ni bay u dakean e nam, nib un e awoch ni gubin mit ngay.

4 Me yibi buch u napʼan ni karbaed nga lan fare loway u Nimrod me yib Somoel nga butʼ nge non ngakʼ fare moʼon ni walagen Jared; ni bay u fithikʼ bangi manileng, ere fare moʼon ni walagen Jared e de guy.

5 Me yibi buch ni fare Somoel e chiyliy ngoraed ni nga ranoed iyaen nga lan wuruʼ e binaw, arragon, ngar sor gaed ko gin baʼaram ni dariy beeʼ ni ke yib riy. Me yibi buch ni ranoed ni fare Somoel e bay nga mʼon roraed, ma be non ngoraed nib sakʼiy u fithikʼ bangi manileng, ma be piiʼ ngoraed e kanawoʼ ko gin ni ngar milekag gaed iyaen ngay.

6 Me yibi buch ni arame ra milekag gaed iyaen u lan wuruʼ e binaw, mar toeyed e mʼuw, niʼir e ngar thʼaebed e day riy nga barbaʼ, ni kube powiʼiyraed fare Somoel.

7 Ma fare Somoel e dabi pagraed ngar talgaed u lan wuruʼ e binaw u barbaʼ e day, ya baʼadag ni ngar baed iyib ngar madaʼ gaed ko fare nam nni michmicheg, niʼir e kan melʼeg u fithikʼ gubin e pi nam, ni fare Somoel ni Got e tay ni fan ngakʼ ba ulung i gidiiʼ nib matʼaw.

8 Ma ke micheg ngakʼ fare moʼon ni walagen Jared u fithikʼ e damomuw rokʼ, ni piʼin ra paer ko re nam ney niʼir e nni michmicheg, ko re ngiyalʼ innʼem iyaen nga mʼon nge gubinfen, e thingar rapigpig gaed ngakʼ, niʼir e karimus e bin riyulʼ e Got ni bay, ara dangay ma yira chuwegraed u napʼan ni ke yib e damomuw rokʼ ni poloʼ nga dakeanraed.

9 Ere chiney, e rayog ni ngad guyed e morngaʼag rokʼ Got ni morngaʼagen e re nam ney, ni banam nni michmicheg; ni demutrug ko mang ulung e ra paer riy ma nge pigpig ngakʼ Got, ara yira chuwegraed u napʼan nra yib e damomuw rokʼ ni poloʼ nga dakeanraed. Ma damomuw rokʼ ni poloʼ e ra yib nga dakeanraed u napʼan ni kar loel gaed nga fithikʼ e kireb.

10 Ya musap gaed, ireray ba nam ni kan melʼeg u fithikʼ gubin e pi nam; ere enra paer riy e nge pigpig ngakʼ Got ara yira chuweg riy; ya ir fare morngaʼag rokʼ Got ni dabimus biʼid. Ma dab ni chuwegraed nge madaʼ ko ngiyalʼ, ni ke sug e denen u fithikʼ e gidiiʼ ko fare nam.

11 Ma re chep ney e ra yib ngomed, O gimed e pi Gentiles, ni nge yog ni ngam nanged fare morngaʼag rokʼ Got—ni nge yog ni ngam kalgaed ngaenʼmed, ma dab kum ʼulʼul gaed i rinʼ e kireb nge madaʼ ko ngiyalʼ ni ke ubchiyaʼ, ni nge siy mu miliyed fare damomuw rokʼ Got ni poloʼ nga dakeanmed ni boed ni ke rinʼ fa piʼin ni ur pired ko re nam ney.

12 Musap gaed, ireray banam ni kan melʼeg, ma demutrug e re ulung nra paer riy ma ra chuw u paʼ e sib, nge kalbus, nge gubin e pi nam u tane tharmiy, ni faʼan yaedra pigpig ngakʼ fare Got ko fare nam, niʼir Yesus Kristus, ni ke yibi mʼug u dakean e pinʼen ni kug yoloeyed.

13 Ere chiney e nggu ʼulʼul ko chep rog; ya musap gaed, yibi buch ni fare Somoel e fek Jared nge pi walagen iyib ko farengi day nib gaaʼ niʼir e be kiiʼeg e pi nam. Ma napʼan ni rabaed ko day mar nʼufed e pi tent roraed; mar tunguyed fithingan e re ginnʼem ni Moriancumer; mar pired u lan e tent, ni yaed be paer u lan e tent u dappʼelʼay u lan aningeg e duw.

14 Me yibi buch ni ke mʼay aningeg e duw me yib bayay fare Somoel ngakʼ fare moʼon ni walagen Jared, me sakʼiy u fithikʼ bangi manileng me non ngakʼ. Ma lan dalip e awa ni non Somoel riy ngakʼ fare moʼon ni walagen Jared, me fonow nag ni bachan e daki yib ngaenʼ ni nge meybil ngakʼ Somoel.

15 Ere fare moʼon ni walagen Jared e kalngaenʼ ko kireb ni ke rinʼ, me meybil ngakʼ Somoel ni fan ngakʼ pi walagen ni yaed bay rokʼ. Me gaʼar Somoel ngakʼ: Gura nʼaegfan rom nge denen rokʼ pi walagem; machane dab kum denen gaed bayay, ya ngam tayed u wunʼmed ni fare Kan ni Thothup rog e dabiyog ni nge gubin e ngiyalʼ ni nga i miliy e gidiiʼ; ere, faʼan gimed ra denen nge madaʼ ko ngiyalʼ ni kam loel gaed ni poloʼ nga fithikʼ ma yira palog nagmed rokʼ Somoel. Ere ireray e tafnaey rog u morngaʼagen fare nam ni gura piiʼ ngomed ni ngam pired riy; ya ba nam niʼir e kan melʼeg u fithikʼ gubin e pi nam.

16 Ere fare Somoel e gaʼar: Mman ko muruwel ngam dumow mʼuw, ni boed rogon e mʼuw ni kam toey. Me yibi buch ni fare moʼon ni walagen Jared e yaen nge muruwel, nge ku aram rogon ngakʼ pi walagen, mar toeyed e mʼuw ni boed rogon ni kuʼur toeyed, ni boed rogon ni midil nag Somoel. Ma bogi mʼuw nib achichig, mab bbaʼud u dakean e day, ni boed fini baʼud ba archeʼ u dakean e day.

17 Ma rin toey e pi mʼuw nem nib macheʼcheʼ ni dabi lulʼ e day u thilin, ma boed rogon barbaʼ i pilet nra mite raen riy; ma tʼay e pi mʼuw nem e rib macheʼcheʼ ni boed rogon fini pachingʼ barbaʼ i pilet; ma barbaʼ nge barbaʼ e rib macheʼcheʼ ni boed rogon fini pachingʼ barbaʼ i pilet; ma peʼebukʼ e ba simʼuthmʼuth; ma baʼani dakean e rib macheʼcheʼ ni boed rogon fini pachingʼ barbaʼ i pilet; ma nʼumngin e boed nʼumngin bake gakʼiy; ma mab riy, e napʼan nra maen, mab macheʼche ni boed rogon fini pachingʼ barbaʼ i pilet.

18 Me yibi buch ni fare moʼon ni walagen Jared e non ngakʼ Somoel, nibe gaʼar: O Somoel, kug rinʼ fare muruwel ni kam chiyliy ngog, ma kug toey fapi mʼuw ni boed ni kamoeg rogon ngog.

19 Ma musap, O Somoel, ma dariy e magael u langgin; ngu uw e nggu yapʼ gaed iyaen ngay? Ma ka gamaed rayimʼ, ya dabiyog ni nggu pogofan gaed u langgin, ya kemus ni chuʼuw i nifeng ni bay riy e ra mʼay, ere gamaed ra yimʼ.

20 Me gaʼar Somoel ngakʼ fare moʼon ni walagen Jared: Musap, ngam tay bang nib kur u baʼan dakean, ma ku aram rogon nga baʼan tanggin; ma napʼan ni bayi mʼay e nifeng romed magmed bing e gin nib kur riy nge yib e nifeng ngomed. Ma faʼanra bay yib e day ngomed nga langgin, musap gaed, mu ninged, ni nge siy mu lumoch gaed.

21 Me yibi buch ni fare moʼon ni walagen Jared e rinʼ, ni boed rogon ni ke chiyliy Somoel.

22 Me non bayay ngakʼ Somoel nibe gaʼar: O Somoel, musap kug rinʼ ni boed rogon ni kam chiyliy ngog; ma kug falʼeg rogon fapi mʼuw ni fan ngakʼ e gidiiʼ rog, ma musap dariy e magael u langgin. Musap, O Somoel, ngam pagmaed nggu thʼaebed e giday ney nib gaaʼ nga barbaʼ u fithikʼ e lumor?

23 Me gaʼar fare Somoel ngakʼ fare moʼon ni walagen Jared: Mang e gabaʼadag ni nggu rinʼ ni nge yog ni tamilang lan e mʼuw romed? Ya musap, dabiyog ni ngam tay e winda riy, ya raputh nge nochiyang; ara mu feked e nifiy nge un ngomed, ya dab mmaroed u raʼen e nifiy.

24 Ya musap, gimed ra boed ba ray u lulukungun e day; Ya pi nʼew ni gagangʼ e bayi pil nga dakeanmed. Machane, gura sulwegmed ngalang bayay u fithikʼ e day; ya nifeng e be yib u lʼugnaeg, ma ku aram rogon ko nʼuw nge yuluʼ, gag e gube piiʼ nge yib.

25 Ere musap, kug falfalʼeg rogom ni fan ko pinnʼey; ya dabiyog ni ngam thʼaeb e giday ney nib toʼaer ma kemus ni faʼan gura falfalʼeg rogom ni fan ko pi nʼew u maday, nge nifeng nibe thow iyaen, nge yuluʼ ni bay yib. Ere mang e gabaʼadag ni nggu falʼeg rogon ni fan ngomed ni nge yog e magael ngomed u napʼan ni ke thareymed e day?