1 Me yibi buch ni Orihah e gagyeg nag e pufthin nib matʼaw u dakean farengi nam u gubin e pi rran rokʼ, ni pi rran rokʼ e rib yoʼor.

2 Me diyen nag e pagael nge ppin; arragon, i diyen nag guyey nge taʼareb, ni riliwʼ nge dalip riy e bogi pagael.

3 Me yibi buch ni ki diyen ni Kib ni ke pilibthir. Me yibi buch ni Kib e paer nggilʼ ko lung; me diyen Kib ni Corihor.

4 Ma napʼan ni Corihor e ke gaman guyey nge lʼagruw e duw yangren me togopluw ngakʼ e chitamangin, me chuw nge yaeni paer nga lan fare binaw nu Nehor; me diyen nag e pagael nge ppin, mar manged bogi pagael ni pichoʼay nge ppin ni pidorang; ere Corihor e miliy nga orel e gidiiʼ nib yoʼor ngar uned ngakʼ.

5 Ma napʼan ni ke kunuy nga taʼabang ba ulung i salthaw me yib ko fare binaw nu Moron ni gin be paer fare pilung riy, nge koel ni nge fek ni kalbus, niʼir e yibi taw ngay ko fare bugithin ni yoeg fare moʼon ni walagen Jared ni yira fekraed riy ni kalbus.

6 Chiney e fare binaw nu Moron niʼir e be paer fare pilung riy, e ba chugur ko farengi binaw ni Kanpag fithingan ni tunguy fapi Nephites.

7 Me yibi buch ni Kib e paer nib kalbus, nge gidiiʼ rokʼ u tanpaʼ Corihor ni fare pagael ni fak, nge yaeni madaʼ ko ngiyalʼ ni kari pilibthir; machane Kib e ki diyen nag Shule ni ke pilibthir, u napʼan nib kalbus.

8 Me yibi buch ni Shule e ri damomuw ngakʼ walagen; ere Shule e mang beeʼ nib madangdang, me mang beeʼ nib moʼon nib yargael, ma ku beeʼ ni kub tamilngaenʼ i matʼaweg banʼen.

9 Ere, me yib nga bangi falang ni Efraim, me raanraen nag e wasey ko rengi falang nem, me falʼeg e sayden ko wasey nge fanay e piʼin ni ke miliyraed kar uned ngakʼ; ma tomuren ni ke tay e sayden nga paʼraed me sul ko fare binaw nu Nehor, me og nag e mael ngakʼ walagen ni Corihor, ni aram rogon ni fek fare gilʼelung me sulweg ngakʼ e chitamangin ni Kib.

10 Ere chiney e bachan e nʼen ni ke rinʼ Shule, me piiʼ e chitamangin ngakʼ fare gilʼelung; ere me tabab ko lung u gilʼ e chitamangin.

11 Me yibi buch ni gagyeg nag e pufthin nib matʼaw; me garareg gilʼilungun u dakean gaʼangin yang fare nam, ya fapi gidiiʼ e kar riyoʼor gaed.

12 Me yibi buch ni Shule e ki diyen nag boʼor e pagael nge ppin.

13 Ere Corihor e kalngaenʼ ko pi ngongol ni kireb ni ke rinʼ; ere Shule e piiʼ ngakʼ ni nge gel lungun u lan gilʼilungun.

14 Me yibi buch ni Corihor e diyen nag boʼor e pagael nge ppin. Ma fithikʼ e pi pagael ni fak Corihor e bay bagyaed riy ni fithingan e Noah.

15 Me yibi buch ni Noah e togopluw ngakʼ Shule, ni fare pilung, nge ku aram rogon ngakʼ e chitamangin ni Corihor, me miliy nga orel i Cohor nib pagael ni walagen, nge ku aram rogon ngakʼ gubin e pi pagael ni walagen nge ku boech e gidiiʼ nib yoʼor.

16 Me ognag e mael ngakʼ Shule, ni fare pilung, ni aram rogon ni rafeked farengi binaw ni taferaed ko sommʼon; me mang pilung ko ginem e binaw.

17 Me yibi buch niki yibnag bayay e mael ngakʼ Shule, ni fare pilung; me koel Shule, ni fare pilung, nge fek ni kalbus iyaen nga lan yu Moron.

18 Me yibi buch ni arame ke chugur ni nge liiʼ ngemʼ, me nepʼ riy me nʼaeg fapi pagael ni fak Shule lingraed iyib nga naʼun rokʼ Noah ngar liiʼed ngemʼ, mar tʼaered e mab ko kalbus nga butʼ ngar feked e chitamangraed nga wean, mar tayed ko chiyaʼ u gilʼilungun.

19 Ere, fare pagael ni fak Noah e ire yinʼ luwan nge toey e lung rokʼ; machane dakiyog ni nge gel lungraed ngakʼ Shule ni fare pilung, ma fapi gidiiʼ e rapired nga tan e lung rokʼ Shule ni fare pilung mar monʼog gaed mar yoʼor gaed.

20 Ere fare nam e kiiʼ u butʼ; nge paer ni ke lʼagruw e lung, gilʼilungun Shule, nge gilʼilungun Cohor, ni fare pagael ni fak Noah.

21 Ere Cohor, ni fare pagael ni fak Noah, e guy rogon e gidiiʼ rokʼ ni ngar baed nag e mael ngakʼ Shule, ni ire gel Shule riy ngoraed me liiʼ Cohor nge yimʼ.

22 Ma chiney e Cohor e bay ba pagael ni fak ni fithingan e Nimrod; ere Nimrod e piiʼ fare lung rokʼ Cohor ngakʼ Shule, me mʼagaenʼ Shule ngakʼ; ere Shule e piiʼ matʼawon nib gaaʼ, me gagyeg u lan e gilʼilungun Shule ni rogon ni baʼadag.

23 Ma ku arragon u napʼan e lung rokʼ Shule me yib e profet nga fithikʼ fapi gidiiʼ, ni ke lʼoegraed Somoel, ni yaed be prophesy nag ni pi ngongol ni kireb nge pi liyoer rokʼ fapi gidiiʼ ko liyos e be yib nag e riyaʼ nga dakean fare nam, ni yira liiʼraed ni faʼanra dabra kalgaed ngaenʼraed.

24 Me yibi buch ni fapi gidiiʼ e ra togopluw gaed ngakʼ fapi profet, mar muning gaed ngoraed. Me yibi buch ni fare pilung ni Shule e gagyeg nag e pufthin nib togopluw ngakʼ gubin e piʼin ni kar togopluw gaed ngakʼ fapi profet.

25 Ere gagyeg nag ba motochiyel u gaʼangin yang fare nam, niʼir e piiʼ gelingin fapi profet ni nga ranoed ko yungin ni yaed baʼadag; ere dakean e biney me yog ni ngan fek fapi gidiiʼ iyaen ko kalngaenʼ.

26 Ere bachan e kalngaenʼ fapi gidiiʼ ko pi denen roraed nge pi mongongol liyos roraed me tay raed Somoel ni dar mʼaed, mar tabab gaed ko monʼog bayay u dakean fare nam. Me yibi buch ni Shule e diyen nag bogi pagael nge ppin ni ke pilibthir.

27 Ma arame dakiyib e mael u lan e pi rran rokʼ Shule; me yib ngaenʼ fapinʼen nib felʼ ni rinʼ Somoel ni fan ngakʼ e pi chitamangin ni baʼaram ni fekraed iyib ngar thʼaebed farengi day nib toʼaer ngar baed ko farengi nam nni michmicheg; ere gagyeg nag e puf-oloboch nib matʼaw u lan gubin e pi rran rokʼ.