1 Me yibi buch u napʼan ni fos e madʼad u doew Coriantumr, me yib ngaenʼ fapi thin ni yoeg Ether ngakʼ.

2 Me guy ni ke chugur lʼagruw e million e gidiiʼ rokʼ ni kar mʼaed ko sayden, me tabab e kirbaenʼ nga lan gumʼirchaʼen; arragon, ke gaman lʼagruw e million e pumoʼon ni madangdang ni kan liiʼraed, nge ku aram rogon ngakʼ e pi leʼengraed nge bitir roraed.

3 Me tabab ko kalngaenʼ ko pi kireb ni ke rinʼ; me yib ngaenʼ fapi thin ni ke weliy gubin fapi profet, me guy ni ke muguʼul e pi thin nem nge yibi madaʼ ko ngiyalʼ nem, ni gubin nge madaʼ ko tin achig; ere ri kirbaen ni polo me siyeg ni ngan falʼeg laniyaenʼ.

4 Me yibi buch ni yoloey bangi babyor nge yaen ngakʼ Shiz, ni be athapeg ni nga dabki liiʼ fapi gidiiʼ, ma ra pag fare gilʼelung ni fan ko yafos rokʼ fapi gidiiʼ.

5 Me yibi buch u napʼan ni ke thap farengi babyor rokʼ ngakʼ Shiz me yoloey bang nge yaen ngakʼ Coriantumr, ni faʼanra pag ir nge liiʼ ko sayden rokʼ, ma ra pag fapi gidiiʼ ni dabki liiʼraed.

6 Me yibi buch ni fapi gidiiʼ e dar kalgaed ngaenʼraed ko denen roraed; ere fapi gidiiʼ rokʼ Coriantumr e ra damomuw gaed ngakʼ fapi gidiiʼ rokʼ Shiz; ma fapi gidiiʼ rokʼ Shiz e ra damomuw gaed ngakʼ fapi gidiiʼ rokʼ Coriantumr; ere, fapi gidiiʼ rokʼ Shiz e ra og niged e mael ngakʼ fapi gidiiʼ rokʼ Coriantumr.

7 Ere napʼan ni guy Coriantumr ni arame ke yaen ni nge aw nga butʼ bayay me miil rokʼ fapi gidiiʼ ku Shiz.

8 Me yibi buch ni yibi taw nga yungi raen nu Ripliancum, ni fan e, bagaʼ ara bafelʼ ko gabin; ere, napʼan ni rabaed ko yungi raen ney mar nʼufed e pi tent roraed; ma ku aram rogon ngakʼ Shiz ni nʼuf e pi tent rokʼ u charen e yungi raen nem; ma aram me yaeni rebo rran riy marbaed ni mael nga taʼabang.

9 Me yibi buch nra mael gaed nib ubchiyaʼ, ma kun madʼad ngakʼ Coriantumr bayay, me aw nga butʼ ko rachaʼ ni ke yaen nib yoʼor u doew.

10 Me yibi buch ni fapi salthaw rokʼ Coriantumr e ra piiʼed fapi salthaw rokʼ Shiz ni arame ra gel gaed ngoraed, mar tulufed raed; mar miil gaed nga lan e yimuch, mar nʼufed e pi tent roraed u bangi banʼen ni kanoeg ni Ogath.

11 Me yibi buch ni fapi salthaw rokʼ Coriantumr e ra nʼufed e pi tent roraed u charen bangi falang ni Ramah fithingan; ni ku ireram farengi falang niʼir e mithaeg Mormon ni Chitamag fapi chep nib thothup riy ngakʼ Somoel.

12 Me yibi buch ni ra kunuyed nga taʼabang gubin fapi gidiiʼ u dakean gaʼangin yang fare nam, ni dawor ra mʼaed, ma kemus ni yigoʼ Ether e de ʼun.

13 Me yibi buch ni Ether e guy gubin e pinʼen nibe rinʼ fapi gidiiʼ; me guy ni pi gidiiʼ nib mʼagaenʼ ngakʼ Coriantumr e ra mukun gaed nga taʼabang ko fapi salthaw rokʼ Coriantumr; ma pi gidiiʼ nib mʼagaenʼraed ngakʼ Shiz e ra mukun gaed nga taʼabang ko fapi salthaw rokʼ Shiz.

14 Ere, yow lʼagruw ni ra kunuyew nga taʼabang e gidiiʼ u lan aningeg e duw, ni gomanga yog nra fekew gubin e piʼin ni bay u dakean fare nam, ni nge yog e gelingin ngorow ni rogon nra yog ngorow.

15 Me yibi buch u napʼan ni yaed gubin ni kar mukun gaed nga taʼabang, ni gubin e gidiiʼ nra beeʼ make mang ko re rabaʼ i salthaw ni baʼadag, nge pi leʼengraed roraed nge bitir roraed—ni gubin ni pumoʼon, nge ppin, nge bitir min tay talin e mael nga paʼaraed, ma baʼ fen e pul talin e mael roraed, nge mad ni ma upnguy ngorngorey, nge urwaech ni ma upnguy loelugey ko mael, ere kar chuw gaed nga madan e mael—mar baed iyib ra poethoeth gaed nga taʼabang; mar mael gaed ko re rran nem ni poloʼ, ma dariy barbaʼ ni gel.

16 Me yibi buch u napʼan ni ke nepʼ ma kar magaf gaed, mar suloed ko pi tamagif roraed; ma tomuren ni kar suloed ko pi tamagif roraed mar sap gaed ngalang ngar yoer niged e kirbaenʼ ko yamʼ ni ke tay e gidiiʼ roraed; ere rib almarin e mayoer nra tayed, ma gelʼgelʼ roraed ko kirbaenʼ, e suguy fithikʼ e nifeng.

17 Me yibi buch ni rebo rran riy ma ranoed bayay ko mael, ere rib noemow mab gel e gafgow ko binem e rran; machane, dariy barbaʼ ni gel, ma napʼan ni nepʼ bayay mar suguyed fithikʼ e nifeng nga lamraed ko yoer, nge gelʼgelʼ roraed, nge daloloeyʼ roraed, ko pi gidiiʼ roraed ni kar mʼaed.

18 Me yibi buch ni Coriantumr e yoloey bangi babyor bayay ngakʼ Shiz, nibe athapeg ni nga dab kiyib bayay ni mael, ma nge fek fare gilʼelung, me pag fapi gidiiʼ ni dabra mʼaed.

19 Machane musap gaed, fare Kan ni Thothup rokʼ Somoel e ke chuw roraed, ere Moʼoniyanʼ e ke poloʼ gelingin nga dakean gumʼirchaʼen fapi gidiiʼ, ya kar paged yaed ke ʼelʼel gumʼirchaʼraed, nge maʼew ko tafnaey roraed ni nge gatheayraed; ere ranoed bayay ko mael.

20 Me yibi buch ni ra mael gaed ko re rran nem ni poloʼ, ma napʼan ni nepʼ mar moloed nga dakean e pi sayden roraed.

21 Me yaeni rebo rran riy mar cham gaed nge nepʼ.

22 Ma napʼan ni nepʼ ma kar ching gaed ko damomuw, ni boed beeʼ ni ke ching ko waeyin; mar moloed bayay nga dakean e pi sayden roraed.

23 Me rebo rran riy mar cham gaed bayay; ma napʼan ni nepʼ ma yaed gubin ni kar mʼaed ko sayden ma kemus ni wugem nge lʼagruw ko gidiiʼ rokʼ Coriantumr nge nelʼ iragag nge mereb ko gidiiʼ rokʼ Shiz e magaey.

24 Me yibi buch ni ra moloed nga dakean e pi sayden roraed e re nepʼ nem, me rebo rran riy mar cham gaed bayay, mar cham gaed u poloʼ i gelingraed ko sayden roraed nge fan e pul talin e mael roraed, ni poloʼ e re rran nem.

25 Ma napʼan ni nepʼ ma kemus ni guyey nge lʼagruw ko gidiiʼ rokʼ Shiz, nge riliwʼ nge medilip ko gidiiʼ rokʼ Coriantumr e ke magaey.

26 Me yibi buch ni ra abich gaed mar moloed, mar falʼeged rograed ko yamʼ ko bin migid e rran. Ma yaed bogi pumoʼon nib gagangʼ mab yargael ni faʼanra nga noeg gelingin e gidiiʼ.

27 Me yibi buch ni ra cham gaed u lan dalip e awa, mar aw gaed nga butʼ ni bachan e rachaʼ ni ke mapʼ u doewraed.

28 Me yibi buch u napʼan ni fapi gidiiʼ rokʼ Coriantumr e ke sul gelingraed ni rayog ni nga ranoed, ma ranoed ni ngar miil gaed ni fan ko yafos roraed; machane musap gaed, Shiz nge gidiiʼ rokʼ e ra puw gaed ngalang, me michmicheg u fithikʼ e damomuw rokʼ ni ra liiʼ Coriantumr ara ire nge yimʼ ko sayden.

29 Ere, lʼoelʼoegraed, me yaeni rebo rran riy ma ke koelraed; mar cham gaed bayay ko sayden. Me yibi buch u napʼan ni yaed gubin ni kar mʼaed ko sayden, ma kemus ni yigoʼ Coriantumr nge Shiz e kar magaey gow, musap gaed Shiz e aw nga butʼ ni bachan e rachaʼ u doew ni ke yaen.

30 Me yibi buch u napʼan ni Coriantumr e ke pag ir nga dakean e sayden rokʼ, ni be toffan buchʼuw, me thaeb loelugen Shiz nge mul.

31 Me yibi buch u tomuren ni ke thʼaeb loelugen Shiz nge mul, me bigbigiy Shiz ir ngalang nga paʼ me sul nge aw nga butʼ; ma tomuren ni ke guruboch nag marchaʼalen, me awe fan rokʼ.

32 Me yibi buch ni Coriantumr e thig nge aw nga butʼ, me paer ni gowa dakuriy e pogofan rokʼ.

33 Me non fare Somoel ngakʼ Ether, ni gaʼar ngakʼ: Mman iyaen. Me yaen iyaen, me guy ni fapi thin rokʼ Somoel e gubin make muguʼul; me museg e chep rokʼ; (ma raʼay guruy riy e dawor gu yoloey) me fek nge mithaeg nrogon ni yog riy me pirʼeg fapi gidiiʼ rokʼ Limhi.

34 Chiney e pi thin nib tomur ni yoloey Ether e baʼaray: Demutrug ko nge fekeg fare Somoel ngalang, ara nggu paer nggu ayliy e tin baʼadag Somoel u lan e dowef, e demutrug rogon, ni faʼanra kug thap nga lan gilʼilungun Got. Amen.