1 Me yibi buch ni diyen nag Omer, me lung Omer ni ke yinʼ luwan. Me diyen Omer nag Jared; me diyen Jared ni pagael nge ppin.

2 Ma Jared e togopluw ngakʼ e chitamangin, me chuw nge yibi paer nga lan fare binaw nu Heth. Me yibi buch ni baen nag boʼor e gidiiʼ, ni bachan nifngin e thin rokʼ, nge yaeni madaʼ ko ngiyalʼ ni ke mʼing u lukungun oren e gidiiʼ ko fare lung ni ke yog ngakʼ.

3 Ma napʼan ni yog ngakʼ barbaʼ fare lung me ʼog nag e mael ngakʼ e chitamangin, me koel e chitamangin nge fek ni kalbus, me guy rogon nge pigpig ni kalbus;

4 Ere chiney, lan gubin e pi rran ni gagyeg Omer ko lung, e baley riy ko pi rran rokʼ e immoy u kalbus. Me yibi buch ni diyen nag bogi pagael nge ppin, nu fithikʼraed e bay i Esrom nge Coriantumr riy;

5 Mar damomuw gaed nib gel ni bachan e pi ngongol rokʼ Jared ni walagraed, ni arame ra sunmiyed ba ulung i salthaw nga ranoed nag e mael ngakʼ Jared. Me yibi buch ni ranoed nag e mael ngakʼ nib nepʼ.

6 Me yibi buch u napʼan ni kar liiʼed fare ulung i salthaw rokʼ Jared ngar mʼaed ma ranoed ni nga kur liiʼed; me wenig ngoraed ni nga dabra liiʼed ngemʼ, ma ra piiʼ fare gilʼelung ngakʼ e chitamangin. Ere yibi buch ni arame ra paged nge paer nib fos.

7 Ere chiney e Jared e ri kirbaenʼ ni bachan e ke mul paʼ ko fare gilʼelung, ya ke yunʼuy laniyaenʼ nga dakean fare lung nge pi falfalaenʼ nu fayleng.

8 Chiney e bay beeʼ nib rugod ni fak Jared ni rib salap, ni guy gelingin e kirbaen rokʼ e chitamangin, me lemnag ni nge tanmeg rogon ni ngan sulweg fare gilʼelung ngakʼ e chitamangin.

9 Chiney e fare rugod ni fak Jared e rib pidorang. Ere yibi buch ni non ngakʼ e chitamangin, me gaʼar ngakʼ: Mangfan ni kari kirbaenʼ e chitamag? Dawori biʼeg fare chep ni fek e pi chitamangdaed ngar thʼaebed farengi day ni toʼaer nga barbaʼ? Musap, gathi bay riy ba chep ni morngaʼagen e piʼin kakrom, nu dakean e pi tanam roraed nib miith e rafeked riy e pi gilʼelung nge pi falfalaenʼ?

10 Ere chiney, e nge, malʼog e chitamag nge yaen ngakʼ Akish, ni fare pagael ni fak Kimnor; ya musap, gag e gub pidorang, ma nggu churuʼ u pʼoewchen, me digow nigeg, ma arame ra athpeg ni nge leʼengiyeg; ere faʼanra athapeg ni ngam piiʼeg ngakʼ nge leʼengiyeg, ma arame ngam gaʼar ngakʼ: Gura piiʼ ngom ni faʼan gara fek iyib ngog loelugen e chitamag, ni fare pilung.

11 Ma chiney e Omer e ba tafafil rokʼ Akish; ere, napʼan ni malʼog Jared nge yaen ngakʼ Akish nge yib, me churuʼ fare rugod ni fak Jared u pʼoewchen ni arame ri digow nag, me athapeg ni nge leʼengiy. Me yibi buch ni gaʼar ngakʼ Jared: Mpiiʼ fakam ngog nggu leʼengiy.

12 Ere gaʼar Jared ngakʼ: Gura piiʼ ngom, ni faʼan gara fek iyib ngog loelugen e chitamag, ni pilung.

13 Me yibi buch ni Akish e kunuy nga lan e naʼun rokʼ Jared gubin e gidiiʼ rokʼ, me gaʼar ngoraed: Gimed ra michmich ngog ni gimed ra yulʼyulʼ ngog ko renʼen ni gubaʼadag ni ngam rinʼed?

14 Me yibi buch ni yaed gubin nra michmich gaed ngakʼ, u dakean Got nu tharmiy, ngo dakean e tharmiy, ngo dakean e fayleng, ngo dakean loelugraed, ni enra rinʼ ni thil ko nʼen nibe athapeg Akish e ra mul loelugen; ma enra dag banʼen ni ke yoeg Akish ngoraed, e ku ireram e chaʼ ni yira fek e pogofan rokʼ.

15 Me yibi buch ni aray rogon ni mʼagaenʼraed ko tin ni ke yoeg Akish. Ere Akish e weliy ngoraed e pi michmich ni weliy e piʼin kakrom ni ur gayed ni nge gel lungraed, niʼir e ke af iyib nga butʼ ni boed ni yib rokʼ Kain, niʼir e thang e fan aram ko sommʼon.

16 Ma ni chaʼariy u gelingin fare moʼoniyanʼ ni ngan weliy e pi michmich ney ngakʼ e pi gidiiʼ, ni ngan tay raed u fithikʼ e lumor, ni ngan ayuweg e piʼin ni be gay e gelingin ni nge yog ni gel lungraed, ma ngar thanged e pogofan, ma ngar moroʼroʼ gaed, ma ngar baen gaed, ma ngar rinʼed gubin mite ngongol ni kireb nge galong.

17 Ere fare rugod ni fak Jared ire tay nga lan gumʼirchaʼen ni nge gay e pinnʼey ni morngaʼagen e kakrom; ere Jared e tay nga lan gumʼirchaʼen Akish; ere, Akish e weliy ngakʼ e gidiiʼ rokʼ nge pi tafafil rokʼ, nibe miliyraed nga orel u dakean e pi michmich nib mʼagaenʼraed ngay ni ngar rinʼed e tin baʼadag.

18 Me yibi buch nra sunmiyed ba ulung nib miith, ni boed e piʼin kakrom; nib ulung ni thʼabi fananikan nge thʼabi kireb u fithikʼ e gabin, u mit Got;

19 Ya fare Somoel e dar ma muruwel u fithikʼ e pi ulung nib miith, ara ma chiyliy ni gidiiʼ e ngar puʼoeged e rachaʼ, ya rib mathngeluwol u fithikʼ urngin banʼen, ni aram ko sommʼon ni sum e gidiiʼ.

20 Ere chiney e gag, Moroni, e dab gu yoloey morngaʼagen e pi michmich nge pi lung roraed, ya gumnang ni kar garar gaed u fithikʼ gubin e gidiiʼ, ma ku yaed bay u fithikʼ fapi Lamanites.

21 Ma kar bucheged e gafgow ngakʼ e pi gidiiʼ ney ni yaed e gube weliy morngaʼag raed e chiney, nge ku arragon ko fare gafgow rokʼ fapi gidiiʼ ku Nephi.

22 Ere re nam nra piiʼ e ayuw ko tiney e ulung nib miith, ni nge gel lungun me felʼ rogon, nge madaʼ ko ngiyalʼ ni kar garar gaed u dakean e nam, musap gaed, e yira gathaeyraed; ya fare Somoel e dabi pag rachaʼen e gidiiʼ rokʼ, ni bay ra puʼoeged, ni nge gubin e ngiyalʼ me yoer ngakʼ u fithikʼ e butʼ ni fan ko gechig roraed me pag ni dabi gechig nagraed.

23 Ere, O gimed e pi Gentiles, rib gonop rokʼ Got ni ngan dag e pinnʼey ngomed, ni nge yog riy ni ngam kalgaed ngaenʼmed ko pi denen romed, ma nge siy mu paged e pi ulung ney nib ta mathang pogofan ngar gagyeg niged gimed, ni kan sunmiy ni nge gel lungun me felʼ rogon—nge muruwel riy, arragon, ni boed e muruwel ni gimed ra gafgow riy ni ngam paged nge yib nga dakeanmed, arragon, ni boed farengi sayden ko gechig rokʼ fare Got ni Manechubog e ra mul nga dakeanmed, ni nge gafgow me gatheaymed ni faʼan gimed ra pag e pinnʼey nge buch.

24 Ere, fare Somoel e ke chiyliy ngomed, u napʼan ni gimed ra guy e pinnʼey ni kar baed nga fithikʼmed ma ngam odgaed nge tamilang laniyaenʼmed ko rengi dodow ni kireb ni gimed bay riy, ni bachan e re ulung ney nib miith ni bayi paer u fithikʼmed, ara gafgow ko re ulung ney, ni bachan rachaʼen e piʼin ni kan liiʼraed; ya yaed be yoer u fithikʼ e fiyath ni falbiy ngoraed, nge piʼin ni kar sunmiyed.

25 Ya bay yibi buch ni enra ʼun i sunmiy e be gay rogon ni nge thangmit fare paer nib puf-rogon ko gubin e binaw, nge pi nam, nge pi nug; ma be yib ni nge gatheay gubin e gidiiʼ, ya fare moʼoniyanʼ e ire sunmiy, niʼir e chitamangin gubin mit e baen; ma ku ir fare tabaen, ni baen nag fagal nib mʼon e labthir rodaed, arragon, niʼir fare tabaen ni gagyeg nag e gidiiʼ ni nge thang e pogofan aram ko sommʼon; niʼir e ʼelʼel nag gumʼirchaʼen e gidiiʼ ni nge yog ni ngar thanged e fan ko pi profet, mar malang niged raed, mar chuweged raed aram ko sommʼon.

26 Ere, gag, Moroni, e kan chiyliy ngog ni nggu yoloey e pinnʼey ni gomanga yog ni chuw e kireb, ma nge yog ni yib fare ngiyalʼ innʼem ni Moʼoniyanʼ e dakuriy gelingin ni nge gagyeg nag gumʼirchaʼen e gidiiʼ, ma nge yog nni pingegaenʼraed ngar ululiyed i rinʼed e tin nib felʼ, ni gomanga yog ni ngar baed ko fare alublub ko gubin e tin nib matʼaw mar thap gaed.