1 Me yibi buch ni fare moʼon ni walagen Jared (chiney e oren fapi mʼuw ni kan falʼeg e meruk) e yaen nga dakean e burey, ni yaed be yoeg fithingan ni fare burey ni Shelem, ni bachan fini tolang, me ranraen nag bangi war nge fek ragag nge nelʼ i malang nib achichig riy; mab wechwech nib tamilang raʼen, ni boed fini tamilang raʼen e maloer; me fek nga lani paʼ iyaen nga pʼebugul fare burey, me non ngakʼ Somoel bayay ni gaʼar:

2 O Somoel, gur e kamoeg ni dabisiy ni ra ingmaed e day. Chiney e musap, O Somoel, ma dab mu puwaenʼ ngakʼ e tapigpig rom ni bachan e moʼowaer rokʼ u pʼoewchem; ya gamaed manang ni gur e gab thothup ma gamapaer u tharmiy, ma gamaed e dabibung rogmaed u pʼoewchem; ya bachan fare mul romaed, ma ke kireb nag rarogmaed ni gubin e ngiyalʼ; machane, O Somoel, gur e kam piiʼ ngomaed ba motochiyel ni thingar gu meybil gaed ngom, ni gomanga yog ni ngam piiʼ ngomaed ni boed ni gamaed be athapeg.

3 Musap, O Somoel, gur e kam gechig nagmaed ni bachan e denen romaed, ma kam gagyeg nag ni nggu chuw gaed nggu milekag gaed iyaen, ma ke aray urngin e duw ni kug pired u lan wuruʼ e binaw; machane, gur e ke wureng anʼum ngomaed. O Somoel, musap ngog u fithikʼ e murnguy, mag chefeg e damomuw rom nga orel ko pi gidiiʼ rom ney, ma dab mu pag ni ngar thʼaebed e giday ney nib toʼaer u fithikʼ e lumor; ya musap baʼaray bogi banʼen ni kug ranraen nag ko war.

4 Ma gumnang, O Somoel, ni gur e gubin e gelingin ma bay rom, ma rayog ni ngam rinʼ banʼen ni demutrug rogon ni gabaʼadag ni fan ko gidiiʼ; ere mmath ko pi malang ney, nga buguli paʼam, O Somoel, mag falʼeg rogon ni gomanga mat raʼen u fithikʼ e lumor; me galʼ maed u lan fapi mʼuw ni kug falʼeged, ni nge yog e magael ngomaed u napʼan ni gamaed be thʼaeb e day nga barbaʼ.

5 Musap, O Somoel, gur e rayog ni ngam rinʼ e biney. Gamaed manang ni gur e rayog rom ni ngam dag gelingim ni maʼangʼang, niʼir e ba achichig fan u waenʼ e gidiiʼ.

6 Me yibi buch u napʼan ni yoeg fare moʼon ni walagen Jared e pi thin ney, musap gaed, me kʼiyeg fare Somoel paʼ nge math ko fapi malang ni tataʼareb nga bugulipaʼ. Ma farengi lumor nib ing laninʼuy e nni chuweg u oewchen fare moʼon ni walagen Jared, me guy bugulipaʼ fare Somoel; ni boed bugulipaʼ beeʼ, ni bay doewngin ni ufin nge rachaʼ; ere fare moʼon ni walagen Jared e thig nga butʼ u pʼoewchen Somoel, ya ke liiʼ e murus.

7 Me guy Somoel ni fare moʼon ni walagen Jared ni ke thig nga butʼ; me gaʼar Somoel ngakʼ: Mu suwon ngalang, mangfan ni kam thig nga butʼ?

8 Me gaʼar ngakʼ Somoel: Kug guy bugulipaʼ Somoel, mug rus nra liiʼeg; ya dagnang ni fare Somoel e bay doewngin ni ufin nge rachaʼ.

9 Me gaʼar Somoel ngakʼ: Bachan e mich rom ma ke yog ni ngam guy nra yog ni nge yib doewag ni ufin nge rachaʼ; ma dariy beeʼ ni ke yib nga pʼoewcheg nib gel e mich rokʼ ni boed ni bay rom; ya faʼan manga dangay me gur e dabiyog ni ngam guy bugulipaʼag. Fa kam guy nib ʼang ko biney?

10 Me fulweg ni gaʼar: Dangay; Somoel, mmʼug ngog.

11 Me gaʼar fare Somoel ngakʼ: Ra mich u wunʼum e pi thin ni gura yoeg?

12 Me fulweg ni gaʼar: Arragon, Somoel, gumnang ni gur e gamayoeg e tin riyulʼ, ya gur e Got ko riyulʼ, ma dabiyog ni ngam baen.

13 Ma napʼan ni yoeg e pi thin ney, musap gaed, fare Somoel e mʼug ngakʼ, me gaʼar: Bachan e gur e kam nang e pinnʼey, ere kan bayul nigem ko fare mul; kan sulwegem ko gin ni gubay riy; ere kug mʼug ngom.

14 Musap, I gag faʼanem nni falʼeg rogog u tabolngin e fayleng ni nggu bayuliy e gidiiʼ rog. Musap, I gag Yesus Kristus. I gag fare Chitamangiy nge fare Fak. Gag rog e rayog e yafos riy ngakʼ gubin e gidiiʼ, ni arame yafos ni manechubog, ni boed e piʼin nra michaenʼraed nga fithingag; ma bay ra manged e pagael ni fakag nge ppin ni fakag.

15 Ma dariy bingyalʼ ni kug mʼug ngakʼ e gidiiʼ ni yaed e gu sunmiy raed, ya dariy bingyalʼ ni ke michaenʼ e gidiiʼ ngog ni boed ni kam rinʼ. Ere kam guy nni sunmiyem ni boed yaʼag? Arragon, gubin e gidiiʼ min sunmiy aram ko sommʼon ni boed yaʼag.

16 Musap, re dowef ney, niʼir e gabe guy e chiney, e doewngin e yaʼel rog; ma gidiiʼ e gusunmiy ni boed yaʼan doewngin e yaʼel rog; ere boed ni kug mʼug ngom ni gub yaʼel, e aram rogon ni gura mʼug ko gidiiʼ rog ni bay doewngig.

17 Ere chiney, e bachan e gag, Moroni, e kugog ni dabiyog ni nggu falʼeg ba chep ni poloʼ ni morngaʼagen e pinnʼey ni kan yoloey, ere rib gaman u wunʼug ni kemus ni nggog ni Yesus e ke mʼug ko re moʼon ney nib yaʼel, ni boed rogon nge yaʼan fare dowef ni faʼani mʼug ngakʼ fapi Nephites.

18 Me machib ngakʼ ni boed ni machib ngakʼ fapi Nephites; ma gubin e pinnʼey ni rinʼ, ni nge yog ni nang e re moʼon ney niʼir Got, ni bachan e pi muruwel ni maʼangʼang nib yoʼor ni ke dag Somoel ngakʼ.

19 Ere bachan e llowaenʼ ko re moʼon ney ma arame dakiyog ni ngan tel ni nge dabiguy langgin farengi lumor nibe ʼing e lem; ere guy bugulipaʼ Yesus, niʼir e napʼan ni guy, me thig nga butʼ ni ke liiʼ e murus; ya ke nang ni ireray bugulipaʼ Somoel; ma daki tʼuf ni nge mich u waenʼ, ya kari nang, ni dar maerwaer u waenʼ.

20 Ere, bachan e bay rokʼ e re llowaenʼ ney ni morngaʼagen Got, ere dabkiyog ni ngan tel u barbaʼ farengi lumor nibe inge lem; ere guy Yesus; me machib ngakʼ.

21 Me yibi buch ni fare Somoel e gaʼar ngakʼ fare moʼon ni walagen Jared: Musap, gur e dab mu pag e pinnʼey ni kam guy ma kam rungʼag nge thap ko gidiiʼ, nge yaeni madaʼ ko re ngiyalʼ inʼen ni nggu rir nag fithingag u lan e dowef; ere, ngam chaʼariy e pinʼen ni kam guy ma kam rungʼag, ma dab mu dag ngakʼ beeʼ.

22 Ere musap, napʼan ni nga mub ngog, ma ngam yoloey e pinnʼey mag chaʼariy, ni nga dabiyog ni nge piliyeg beeʼ e thin riy; ya ngam yoloey u rebo yalen e thin ni dabiyog ni ngar biʼeged.

23 Ere musap, galney e malang e nggu piiʼ ngom, ni ngam chaʼariy nge fapinʼen ni ngam yoloey.

24 Ya musap, fare thin ni bay mu yoloey e kug athkuy; ere bay gguy rogon ko ngiyalʼ nib mʼag anʼug ngay, ni nge gaaʼ nag e gal malang ney e tamilang u waenʼ e gidiiʼ ko pinnʼey ni ngam yoloey.

25 Ere napʼan ni yoeg fare Somoel e pi thin ney, me dag ngakʼ fare moʼon ni walagen Jared gubin e gidiiʼ u fayleng niki immoy, nge ku gubin e piʼin ni bay yib; ma deteleg riy ni nge dabki guy raed, nge ku aram rogon ngakʼ e piʼin bay ko tin tomur e rran u fayleng.

26 Ye yoeg ngakʼ aram ko sommʼon, ni faʼanra mich u waenʼ ni raedag ngakʼ gubin banʼen—ma yira dag ngakʼ, ere fare Somoel e dakiyog ni nge mithaeg banʼen rokʼ, ya manang ni fare Somoel e rayog ni nge dag gubin banʼen ngakʼ.

27 Ere fare Somoel e gaʼar ngakʼ: Mu yoloey e pinnʼey mag chaʼariy; ma bay gudag ngakʼ e gidiiʼ ko re ngiyalʼ e nʼen nib mʼag anʼug ngay.

28 Me yibi buch ni fare Somoel e chiyliy ngakʼ ni nge chaʼariy fagal malang ni ke piiʼ ngakʼ, ma dabi dag, nge madaʼ ko ngiyalʼ ni fare Somoel e ire nge dag ko gidiiʼ.