1 Ere chiney e gag, Moroni, e gu ʼulʼul ngay i piiʼ fare chep ku Jared nge fare moʼon ni walagen.

2 Ya yibi buch u tomuren ni fare Somoel e ke falʼeg rogon fapi malang ni fek fare moʼon ni walagen Jared iyaen nga bugul e burey, fare moʼon ni walagen Jared e sul nga butʼ ko fare burey, me yaeni tay fapi malang nga langgin fapi mʼuw ni kan falʼeg, ni taʼareb nga baley ngo baley; ere musap gaed, me mat raʼen u langgin fapi mʼuw.

3 Ere aray rogon ni fare Somoel e mateg raʼen fapi malang u fithikʼ e lumor, ni nge piiʼ e tamilang ngakʼ fapi pumoʼon, nge ppin, nge bitir, ni nge siy ra thʼaebed farengi day nib gaaʼ u fithikʼ e lumor.

4 Me yibi buch u napʼan nra kunkunuyed gubin mite ggan, ni nge siy ra mʼaed u maday, nge gane gamanman roraed, nge garbaw, nge re miti gamanman ara chachngeg ni ngar feked nge un ngoraed—me yibi buch u napʼan ni kar muguʼuliyed gubin e pinnʼey ma ranoed nga langgin fapi barkow ara mʼuw roraed, mar milekag gaed u maday, ni kar paged yaed nga lani paʼ Somoel ni Got roraed.

5 Me yibi buch ni fare Somoel ni Got e yibi thow nag bangi nifeng nib gel u dakean e day, nib sor iyaen ko fare nam nni michmicheg; ere aray rogon ni yinʼraed e nʼew u maday u paʼ e nifeng.

6 Me yibi buch nib yoʼor yay ni tharey raed e day, ni bachan e pi nʼew ni gagangʼ nibe pil nga dakeanraed, nge yokoʼ ni almarin nibe sum ko nifeng ni gel.

7 Me yibi buch u napʼan ni yaedra ligil nga ʼaer ma dar yib e day ngoraed ni ngar lumoch gaed ngay, ya mʼuw roraed e rib macheʼcheʼ ni boed fini pachingʼ barbaʼ i plate, ma kub macheʼcheʼ ni boed fare arke ku Noah; ere napʼan ni ke ʼing raed e day mar yoer gaed ngakʼ Somoel, me sulwegraed bayay nga dakean e day ngalang.

8 Me yibi buch ni de tal e nifeng ko thow iyaen ko farengi binaw nni michmicheg u napʼan ni yaed bay u maday; ere aray rogon nra maenʼ gaed u paʼ e nifeng.

9 Ere ra oged e soerokʼ ngakʼ Somoel; arragon, fare moʼon ni walagen Jared e oge soerokʼ ngakʼ Somoel, me oge magaer nge soerokʼ ngakʼ Somoel ni poloʼ e rran; ma napʼan ni nepʼ, ma dar talgaed i oge soerokʼ ngakʼ Somoel.

10 Ere aray rogon nra maenʼ gaed iyaen; ma dariy ba kan u maday ni rayog ni nge bilig e mʼuw roraed, mus ko ray ma dabiyog ni nge bilig raed; ma gubin e ngiyalʼ ma bay e magael roraed, ni demutrug ko yaed bay u dakean e day u lang ara fithikʼ e day.

11 Ere aray rogon nra maenʼ gaed iyaen, ni dalip miriʼay nge aningeg iragag nge aningeg e rran u maday.

12 Mar madab gaed nga dappʼelʼay ko fare binaw nni michmicheg. Ma napʼan nra tayed ayraed nga dakean dappʼelʼay ko fare binaw nni michmicheg mar siroʼ gaed nga dakean e buutʼ, mar sobutʼ niged yaed u mit Somoel, me mapʼ luʼraed ko falfalaenʼ u pʼoewchen Somoel ni bachan e pi murnguy rokʼ ngoraed nib sumunguy.

13 Me yibi buch ni ranoed iyaen u dakean e nam, mar tabab gaed ko wuldug u butʼ.

14 Ma Jared e bay aningeg i pagael ni fak; ni fithingraed e Jacom, nge Gilgah, nge Mahah, nge Orihah.

15 Ma fare moʼon ni walagen Jared e ki diyen nag e pagael nge ppin.

16 Ma fapi tafager rokʼ Jared nge fare moʼon ni walagen e urngiraed u gubin e gonpon ba riliwʼ nge lʼagruw e gidiiʼ; ma kur diyen niged e pagael nge ppin u mʼon ni ngar baed ko fare nam nni michmicheg; me ere mar tabab gaed ko yoʼor iyaen.

17 Ere ni fil ngoraed ni ngar sobutʼ niged yaed u pʼoewchen Somoel; ma kun llowaenʼ nagraed u lang.

18 Me yibi buch nra tabab gaed ko garar u dakean e nam, mar yoʼor gaed mar wuldug gaed u butʼ; mar manged gidiiʼ ni madangdang u lan fare nam.

19 Ma fare moʼon ni walagen Jared e ke pilibthir iyaen, me guy ni ke chugur i yaen nga malow; ere gaʼar ngakʼ Jared: Ngad kunuyew nga taʼabang e pi gidiiʼ rodow ni nge yog ni ngad theʼegew raed, ni nge yog ni ngad nangew roraed ko mang e yaed baʼadag ni ngad rinʼew u mʼon ni nga darow nga malow.

20 Ere aram rogon ni mukun fapi gidiiʼ nga taʼabang. Chiney e oren e pagael nge ppin ni fak fare moʼon ni walagen Jared e yaed riliwʼ nge lʼagruw; ma oren e pagael nge ppin ni fak Jared e ragag nge lʼagruw, ni aningeg e pagael ni fak.

21 Me yibi buch ni ra theʼegew e gidiiʼ rorow; ma tomuren ni kar theʼegew urngiraed, ma roegew ngoraed ni nga roeged ko mang e yaed baʼadag ni ngar rinʼew ni fan ngoraed u mʼon ni ngar mʼow.

22 Me yibi buch ni fapi gidiiʼ e yaed baʼadag ni ngar gapgep nigew rebo pagael ni fakrow ni nge mang pilung roraed.

23 Ere chiney musap gaed, biney e ri kirbaenʼrow ngay. Me gaʼar fare moʼon ni walagen Jared ngoraed: Rriyulʼ ni biney e ra fekey iyaen nga kalbus.

24 Machane me gaʼar Jared ngakʼ fare moʼon ni walagen: Mpagraed ngar gayed beeʼ ni nge mang pilung roraed. Me gaʼar ngoraed: Mu melʼeged u fithikʼmed rebo pagael ni fakmow ni nge mang pilung, ni chaʼ ni gimed baʼadag.

25 Me yibi buch ni ra melʼeged e bin ba ilal i fak fare moʼon ni walagen Jared; ni fithingan e Pagag. Me yibi buch ni siyeg ir riy ni dabi mang pilung roraed. Ere fapi gidiiʼ e ra adaged ni chitamangin e ire nge tawasar ngakʼ, machane chitamangin e dabun ni nge rinʼ; me chiyliy ngoraed ni nge dabra tawasariyed beeʼ ni nge mang pilung roraed.

26 Me yibi buch ni ra melʼeged gubin fapi pagael ni walagen Pagag, ma dubraed.

27 Me yibi buch ni ku aram rogon ni dariy reb fapi pagael ni fak Jared ni baʼadag ni nge mang pilung, ma kemus ni taʼab gayaed; ere Orihah e ni gapgep nag ni nge mang pilung ko fapi gidiiʼ.

28 Ere tabab ko lung, nge fapi gidiiʼ e tabab ko monʼog; mar falaʼab gaed.

29 Me yibi buch ni arame yimʼ Jared, nge fare moʼon ni walagen.

30 Me yibi buch ni Orihah e paer nib sobutʼaenʼ u mit Somoel, me tay u waenʼ rogon fini felʼ e pinʼen ni rinʼ Somoel ngakʼ e chitamangin, maki fil ngakʼ e gidiiʼ rokʼ rogon fini felʼ e pinʼen ni rinʼ Somoel ngakʼ e pi chitamangraed.