1 Ket napasamak a timmaud ti panagsisina kadagiti tattao, iti kasta nagsisinada ket nagturongda iti nadumaduma a lugar, a pinanawan ni Nephi nga agmaymaysaa, bayat a sitatakder iti nagtengngaanda.

2 Ket napasamak a napan ni Nephi iti bukodna a balay, a pampanunotenna dagiti bambanag nga impakita ti Apo kenkuana.

3 Ket napasamak bayat ti panagpampanunotna iti kastoy—maleddaangan isuna gapu iti kinadakes ti tatttao dagiti Nephita, dagiti nalimed nga aramidda iti kinadakes, ken dagiti panangpapatayda, ken panagsamsamda, ken amin a kita ti kinadangkes—ket napasamak a bayat iti nauneg a panagpampanunotna a marikna ti pusona, kitaen, adda nangngegna a timek a kunana:

4 Nabendisionanka, Nephi, gapu kadagidiay bambanag nga inaramidmo; ta nakitak no kasano iti saan a pannakabannogmo a naipakaammo a nalawag ti balikas, nga intedko kenka, para kadagitoy a tattao. Ket saanka a nagbuteng kadakuada, ken saanmo nga inkagumaan ti bukodmo a biag, no di ket inkagumaam ti pagayatak, ken iti panangtungpal dagiti bilinko.

5 Ket ita, gapu ta inaramidmo daytoy nga awan iti pannakabannog, kitaen, bendisionanka iti agnanayon; ket pagbalinenkanto a mannakabalin iti sao ken aramid, iti pammati ken dagiti aramid; wen, agingga a maaramidto kenka ti amin a bambanag mayannurot iti balikasmo, gapu ta saan a panagkiddawmo ti maikanniwas iti pagayatak.

6 Kitaen, sika ni Nephi, ket siak ti Dios. Kitaen, ipakaammok a nalawag kenka iti sanguanan dagiti anghelko, a maaddaanka iti bileg para kadagitoy a tattao, ket saplitakto ti daga iti panagbisin, ken iti angol, ken pannakadadael, a mayannurot iti kinadakes dagitoy a tattao.

7 Kitaen, itedko kenka ti bileg, a ti aniaman nga ilantipmo ditoy daga ket mailantipto iti langit; ket ania man a waswasem ditoy daga mawaswasto iti langit; ket iti kasta maaddaankanto iti bileg kadagitoy a tattao.

8 Ket iti kasta, no ibagam iti daytoy a templo a maburak nga aggudua, maaramidto.

9 Ket no ibagam iti daytoy a bantay, Maitapuakka ket agbalinka a nalannas, maaramidto.

10 Ket kitaen, no ibagam a sapliten ti Dios dagitoy a tattao, mapasamakto.

11 Ket ita kitaen, ibilinko kenka, a mapanka ​​ket ipakaammom a nalawag kadagitoy a tattao, a kastoy ti kuna ti Apo a Dios, a Mannakabalin-amin: Malaksid no agbabawikayo masaplitkayonto, uray agingga iti pannakadadael.

12 Ket kitaen, ita napasamak nga idi insao ti Apo dagitoy a balikas ken ni Nephi, nagsardeng ket saan a napan iti bukodna a balay, ngem nagsubli kadagiti ummong ti tattao a naiwaras iti rabaw ti daga, ket nangrugi nga impaammo a nalawag kadakuada ti balikas ti Apo a naisao kenkuana, maipanggep iti pannakadadaelda no saanda nga agbabawi.

13 Ita kitaen, iti laksid dayta naindaklan a milagro nga inaramid ni Nephi iti panangibagana kadakuada maipanggep iti ipapatay ti kangatuan nga ukom, pinatangkenda ti puspusoda ken saanda a dimngeg kadagiti balikas ti Apo.

14 Ngarud inwaragawag ni Nephi kadakuada ti balikas ti Apo, a kunana: Malaksid no agbabawikayo, kastoy ti kuna ti Apo, masaplitkayto uray agingga iti pannakadadael.

15 Ket napasamak nga idi impakaammo a nalawag ni Nephi kadakuada ti balikas, kitaen, pinatangkenda latta ti puspusoda ket saanda a dumngeg kadagiti balikasna; ngarud linaisda isuna, ket inkagumaanda a tiliwen tapno maibaludda isuna.

16 Ngem kitaen, adda kenkuana ti bileg ti Dios, ket saanda a matiliw tapno maibaludda, gapu ta isu ket innala ti Espiritu ken naipanaw iti nagtengngaanda.

17 Ket napasamak a napan isuna babaen iti Espiritu, kadagiti nadumaduma nga ummong ti tattao, a nangipakaammo a nalawag ti balikas ti Dios, uray agingga a naipakaammona a nalawag daytoy kadakuada amin, wenno impatulod daytoy kadagiti amin a tattao.

18 Ket napasamak a saanda a dumngeg kadagiti balikasna; ket nangrugi nga adda dagiti panagsususik, uray agingga a nagsisinada kontra iti bagbagida ket nangrugida a nagpipinnatay babaen ti espada.

19 Ket iti kasta a nagpatingga ti maikapitopulo ket maysa a tawen ti panagturay dagiti ukom kadagiti tattao ni Nephi.