1 Ket ita napasamak iti maikapat a pulo ket tallo a tawen ti panagturay dagiti ukom, awan ti panagsususik kadagiti tattao ni Nephi malaksid iti sumagmamano a babassit a panagpannakkel nga adda iti simbaan, a nangpataud iti sumagmamano a babassit a panagsisiasi kadagiti tattao, a nasolbar iti nagpatinggaan ti maikapt a pulo ket tallo a tawen.

2 Ket awan ti panagsususik kadagiti tattao iti maikapat a pulo ket uppat a tawen; awan met ti adu a panagsususik iti maikapat a pulo ket lima a tawen.

3 Ket napasamak iti maikapat a pulo ket innem, wen, adu unay ti panagsususik ken adu ti panagsiasi; a nagbanag iti kasta unay ti kaadu dagiti pimmanaw iti daga ti Zarahemla, ket napanda iti daga nga agpaamianan tapno tawidenda ti daga.

4 Ket nagdaliasatda iti kasta unay ti kaadayo a distansia, agingga a nakadanonda kadagiti dadakkel a danum ken adu a karayan.

5 Wen, ket nagwarasda kadagiti amin a paset ti daga, iti aniaman kadagiti paset a saan a napagbalin a langalang ken awanan iti troso, gapu kadagiti adu nga agnanaed a nangtawid idi iti daga.

6 Ket ita awan ti paset ti daga a nalangalang, malaksid laeng ti maipapan iti troso; ngem gapu iti kinadakkel ti panakadadael dagiti tattao a nagnanaed idi naawagan daytoy a langalang.

7 Ket gapu ta bassit laeng ti troso iti rabaw ti daga, nupay kasta nagbalin dagiti tattao a napan sadiay nga eksperto unay iti panagtrabaho iti semento; ngarud nangpatakderda kadagiti balay a semento, a nagnaedanda.

8 Ket napasamak nga immadu ken nagwarasda, ket napanda manipud iti daga nga agpaabagatan agingga iti daga nga agpaamianan, ket iti kasta nangrugida a nagwaras iti intero a rabaw ti daga, manipud iti abagatan a baybay agingga iti amianan a baybay, manipud iti laud a baybay agingga iti daya a baybay.

9 Ket nagnaed dagiti tattao nga adda iti daga nga agpaamianan kadagiti tolda, ken kadagiti balay a semento, ket impalubosda nga agtubo ti aniaman a kayo iti rabaw ti daga tapno dumakkelda, tapno nga iti umiso a tiempo maaddaanda kadagiti troso tapno mangbangon kadagiti balayda, wen, kadagiti siudadda, ken kadagiti temploda, ken kadagiti sinagogada, ken kadagiti santuarioda, ken amin a kita dagiti pasdekda.

10 Ket napasamak a gapu ta kasta unay ti kinakirang dagiti troso iti daga nga agpaamianan, agpayso nga adu ti impatulodda babaen iti barko.

11 Ket iti kasta nangipaayda kadagiti kasapulan a pamay-an dagiti tattao tapno makapatakder kadagiti adu a siudad iti daga nga agpaamianan, agpadpada babaen iti kayo ken semento.

12 Ket napasamak nga adu kadagiti tattao ni Ammon, a Lamanita babaen ti pannakayanakda, ti agpayso nga immay met ditoy a daga.

13 Ket ita adu ti naisurat kadagiti kasuratan maipapan kadagiti ar-aramid daytoy a tattao, babaen ti adu kadagitoy a tattao, a detalyado ken nagadu unay, maipapan kadakuada.

14 Ngem kitaen, apagkasangagasut a paset dagiti ar-aramid dagitoy a tattao, wen, ti salaysay dagiti Lamanita ken dagiti Nephita, ken dagiti gubatda, ken panagsususikda, ken panagsiasida, ken ti panangasabada, ken dagiti padtoda, ken ti panagpatulodda babaen iti barko ken ti panagbangonda kadagiti barko, ken ti panagpatakderda kadagiti templo, ken kadagiti sinagoga ken kadagiti santuarioda, ken kadagiti kinalintegda, ken kadagiti kinadakesda, ken kadagiti pammapatayda, ken kadagiti panagtakawda, ken kadagiti panagsamsamda, ken iti amin a kita ti kinarimon ken kinabalangkantis, ket saan a malaon iti daytoy nga aramid.

15 Ngem kitaen, adu dagiti libro ken adu a kasuratan ti tunggal kita, ket naisurat dagiti Nephitas kadagiti kasuratan.

16 Ket naited dagitoy manipud iti maysa a henerasion agingga iti sabali babaen dagiti Nephita, uray agingga a natnagda iti panaglabsing ket napapatay, nasamsam, ken naanup, ken napapanawda, ken napapatay, ken naiwarasda iti rabaw ti daga, ken naitipon kadagiti Lamanita agingga a saanda naawagan a Nephita, agbalinda a dakes, ken naatap, ken narungsot, wen, agingga nga agbalinda a Lamanita.

17 Ket ita agsubliak manen iti salaysayko; ngarud, napasamak ti imbagak kalpasan ti kaadda dagiti nakaro a panagsususik, ken riribuk, ken gubgubat, ken panagsisiasi, kadagiti tattao ni Nephi.

18 Naggibus ti maikapat a pulo ket innem a tawen a panagturay dagiti ukom;

19 Ket napasamak nga adda pay laeng dakkel a panagsususik iti daga, wen, uray pay iti maikapat a pulo ket pito a tawen, ken kasta met iti maikapat a pulo ket walo a tawen.

20 Nupay kasta nagserbi ni Helaman ti tugaw‑pagukoman nga addaan iti hustisia ken kinapatas; wen, inkagumaanna a mangtungpal kadagiti alagaden, ken dagiti panangukom, ken dagiti bilin ti Dios; ket talaga nga agtultuloy nga inaramidna ti nalinteg iti imatang ti Dios; ket nagbiag a simmursurot kadagiti wagas ti amana, isu a rimmang-ay isuna iti daga.

21 Ket napasamak nga addaan isuna iti dua a lallaki nga annak. Innaganna ti immuna iti Nephi, ken iti inaudi, ti nagan a Lehi. Ket nangrugida a dimmakkel para iti Apo.

22 Ket napasamak a nangrugi a nagsardeng dagiti gubat ken panagsususik, iti sangkabassit, kadagiti tattao dagiti Nephita, panggibus a paset ti maikapat a pulo ket walo a tawen ti panagturay dagiti ukom kadagiti tattao ni Nephi.

23 Ket napasamak iti maikapat a pulo ket siam a tawen ti panagturay dagiti ukom, adda agtultuloy a kappia a naipasdek iti daga, iti amin malaksid kadagiti nalimed a kombinasion a naipasdek ni Gadianton a mannanakaw kadagiti nataltalged a paset ti daga, nga iti dayta a panawen saan nga ammo kadagidiay dadaulo ti gobierno; ngarud saanda a nadadael manipud iti daga.

24 Ket napasamak nga iti daytoy met laeng a tawen addaan ti kasta unay a kinarang-ay iti simbaan, isu nga adda rinibu a nakikadua iti simbaan ken nabuniagan gapu iti panagbabawi.

25 Ket kasta unay ti kinarang-ay ti simbaan, ken adu unay dagiti bendision a naibukbok kadagiti tattao, nga uray dagiti nangato a saserdote ken dagiti mannursuro ket nasdaawda a mismo iti saan a marukod.

26 Ket napasamak a rimmang-ay ti aramid ti Apo babaen iti panangbuniag ken panangkaykaysa ti adu a tattao iti simbaan ti Dios, wen, uray pinullo a ribu.

27 Isu a makitatayo a manangngaasi ti Apo kadagiti amin nga agkiddaw, iti kinapasnek ti puspusoda, babaen iti nasantoan a naganna.

28 Wen, isu a makitatayo a silulukat ti ruangan ti langit kadagiti amin, uray pay kadagidiay mamati iti nagan ni Jesucristo, nga Anak ti Dios.

29 Wen, makitatayo a ti siasinoman a mayat nga umawat ti balikas ti Dios, a napardas ken nabileg, a mangsina kadagiti amin a panangallilaw ken dagiti silo ken nasikap a plano ti sairo, ken mangiturong iti tao ni Cristo iti nailet ken akikid a dalan nga agturong iti dayta agnanayon a gulpo ti ladingit a naisagana a manglapunos kadagiti dakes—

30 Ket madanon dagiti kararuada, wen, dagiti saan a matay a kararuada, ti makannawan nga ima ti Dios iti pagarian ti langit, tapno maawat a kudua da Abraham, ken Isaac, ken ni Jacob, ken kadua dagiti amin a nasantoan nga ammatayo, tapno saanen a pulos a rummuar.

31 Ket iti daytoy a tawen adda ti agtultuloy a panagragsak iti daga ti Zarahemla, ken kadagiti amin a rehion iti aglawlaw, uray pay iti amin a daga a tinagikua dagiti Nephita.

32 Ket napasamak nga adda kappia ken kasta unay a naindaklan a panagragsak iti nabati iti maikapat a pulo ket siam a tawen; wen, ken kasta met nga adda ti agtultuloy a kappia ken naindaklan a panagragsak iti maikalimapulo a tawen ti panagturay dagiti ukom.

33 Ket iti maikalimapulo ket maysa a tawen ti panagturay dagiti ukom adda met kappia, malaksid iti panagpannakkel a nangrugi a simrek iti simbaan—saan nga iti simbaan ti Dios, no di ket kadagiti puso dagiti tattao nga agkunkuna a kamengda ti iglesia ti Dios—

34 Ket nagbalinda a napangato iti panagpannakkel, uray pay iti pannangidadanes ti adu kadagiti kakabsatda. Ita maysa a nakaro a kinadakes daytoy, a nakaigapuan ti panagsagaba dagiti ad-adda a napakumbaba a paset dagiti tattao iti nakaro a pannakaidadanes, ken tapno aglasat iti adu a rigat.

35 Nupay kasta nagayunoda ken nagkararagda a masansan, ket talaga nga ad-adda a pimmigpigsa iti kinapakumbabada, ken ad-adda a timmibtibker ti pammatida ken ni Cristo, iti pannakapunno dagiti kararuada iti ragsak ken liwliwa, wen, agingga iti pannakapatarnaw ken iti pannakapaisanto dagiti pusoda, umay daytoy pannakapaisanto gapu iti panangiyawatda kadagiti pusoda iti Dios.

36 Ket napasamak a nakappia met a nagpatingga ti maikalimapulo ket dua a tawen, malaksid iti kasta unay ti nakaro a panagpannakkel a simrek kadagiti puso dagiti tattao; ket gapu daytoy iti kasta unay a kinadakkel ti kinabaknangda ken ti kinarang-ayda iti daga; ket talaga nga inaldaw a dimmakkel kadakuada.

37 Ket napasamak a natay ni Helaman iti maikalimapulo ket tallo a tawen ti panagturay dagiti ukom, ket nangrugi nga agturay ti inauna a lalaki nga anakna a ni Nephi a kas kasukatna. Ket napasamak a nagtugaw iti pangukoman nga addaan iti hustisia ken kinapatas; wen, tinungpalna dagiti bilin ti Dios, ken nagbiag iti wagas ti amana.