1. Te au tuatua ta Iakoba ra, ta te teina o Niphai, i tuatua atu ki te iti tangata o Niphai i muri ake i te mateanga o Niphai.

2. E teianei, e aku au taeake akaperepere, ko au nei ko Iakoba, kia akono ki te taoonga tei tukuia mai kiaku nei, e kia maroiroi au i te rave anga i te angaanga o toku nei taoonga ma te tau tikai, kia ma toku kakau i ta kotou au ara, no reira i aere mai ei au ki roto i te iero i teia rā nei, kia akakite atu kia kotou i te tuatua a te Atua.

3. Kua kite kotou e, kua akono au i toku taoonga ma te maroiroi. I teianei rai rā, kua teimaa rava au i te taitaia e te inangaro i te meitaki no to kotou au vaerua.

4. I na oki, kua akono kotou i te au tuatua a te Atu, taku i tuku atu kia kotou na, e tae rava mai ki teianei rā.

5. Ina ra, e akarongo mai ana kotou kiaku nei, e kia kite oki kotou e, na roto i te tauturu a te Mana Katoatoa tei anga i te rangi e te enua nei, e raukaʼi iaku kia akakite atu kia kotou i to kotou au manako, i na, te akamata ua ra kotou i te rave i te ara, e ara viivii rava ïa iaku, e e ara viivii katoa ïa i te Atua ra.

6. I na, kua otooto toku ngakau i te reira, e kua ruketekete oki au, ma te akama i mua i te aroaro o Tei Anga mai iaku kia akakite atu au kia kotou i te kino tei roto i to kotou ngakau.

7. Kua otooto katoa au i te mea e, kare e ravenga mari ra, kia tuatua pu ua atu au kia kotou na i mua i ta kotou au vaine e ta kotou au tamariki oki, kua maru rava oki to ratou ngakau, e te tiama, e te tiratiratu oki ki mua i te Atua, e kua mataora oki te Atua i te reira.

8. E te manako nei au e, i aere mai ratou ki runga i ko nei kia akarongo i te tuatua mataora a te Atua, koia oki te tuatua te ka akaora i te ngakau puta ra.

9. E teianei, kua teimaa toku vaerua i te mea e, kua tae mai tetai akaueanga pakari no ko mai i te Atua kia ako atura au kia kotou i ta kotou au ara, e kia akamaata i te mamae i te aronga i putaia ra, eiaa ra e akapumaana e e akaora atu ia ratou i te mamae, e te aronga i kore i putaia ra, kia kore ratou e noo ma te rekareka i te akarongo anga i te tuatua a te Atua, kia tukuia ra te matipi ki to ratou ngakau kia mamae oki to ratou vaerua ra.

10. E no atu e maata ua rai te reira angaanga, ka akono rai au i te akaueanga pakari a te Atua, i te akakite anga atu kia kotou i ta kotou au ara e to kotou tu viivii, i mua oki i te aroaro o tei mā te ngakau, e tei puta te ngakau, e ki raro ake oki i te akaara matariki anga o te Atua Mana Katoatoa ra.

11. E teianei, e akakite atu au i te tuatua mou kia kotou na, mei tei tau i te tuatua papu a te Atua ra. I na oki, te pure ua ra au ki te Atu, kua tae maira te tuatua kiaku, na ko maira, E Iakoba, apopo koe e aere atu ei ki roto i te iero ra, ka akakite atu ei i te tuatua taku ka tuku atu kia koe ra ki teianei iti tangata.

12. E i na, e taku au taeake, teia ïa te tuatua taku e akakite atu kia kotou na, kua akamata tetai pae o kotou kia kimi i te auro e te ario, e te au tu apinga oko maata o te enua ra, kua ki oki teianei enua tei taputouia no kotou e no ta kotou uanga i te reira au tu apinga ra.

13. E kua akameitaki mai te rima o te Atua ia kotou ki te au mea meitaki maata rava, i raukaʼi ia kotou te au apinga oko maata; e no te mea kua maata atu ta kotou i ta to kotou au taeake ra, kua teitei kotou i te nengonengo o to kotou ngakau, e no te oko maata o to kotou kakau, kua marokiakia to kotou kaki e kua teitei oki to kotou upoko, e kua takinga kino kotou i to kotou au taeake, no te mea, kua manako kotou, e maata atu to kotou meitaki i to ratou.

14. E teianei, e aku au taeake, kua manako kotou e, e mea tika te reira i te Atua ra? I na, e tuatua atu au kia kotou, Kare. E akaapa ra aia ia kotou, e mei te mea ka rave ua atu rai kotou i taua au mea ra, ka tae vave mai tana utunga ki runga ia kotou na.

15. Naringa oki aia e akakite mai kia kotou e, ka rauka iaia te patia ia kotou, e ka rauka oki iaia te papa mai ia katou ki raro ki te one pueu, i te akara anga okotai o tona ra mata!

16. Naringa oki aia e akakore i te ara e te viivii i rotopu ia kotou na. Naringa oki kotou e akarongo ki te tuatua a tana au akaueanga, kia kore e mate to kotou vaerua i te akaparau o to kotou ngakau.

17. E akamaara atu i to kotou au taeake mei ia kotou i akamaara atu ia kotou uaroai, e e aroa atu i te au tangata katoatoa, e e oronga ua atu i ta kotou apinga, kia riro katoa ratou ei aronga apinga mei ia kotou te tu.

18. I mua ake ka kimi atu ei kotou i te apinga nui e kimi i te basileia a te Atua ra.

19. E kia rauka ia kotou te tatari i te Mesia, ka rauka ia kotou te apinga nui, me inangaro kotou i te reira; e ka kimi ua atu rai kotou i te reira kia takinga meitaki atu, kia akakakau i tei ngere ra, e kia angai i tei pongi ra, e kia akaora i te tuikaa ra, e e matuapuru atu i tei rokoia i te maki e te tumatetenga ra.

20. E teianei, e aku au taeake, kua tuatua akenei au kia kotou i te ngakau parau, e ko kotou oki tei takinga kino atu i to kotou tangata tupu ra, e tei akakino oki iaia no te akaparau o to kotou ngakau; tena ta te Atua i oronga mai kia kotou, e eaa ta kotou ka tuatua mai i te reira?

21. Kare ainei kotou e manako e, e mea viivii taua au mea ra i mua iaia i tei anga i te tangata nei? E aiteite te au tangata katoatoa i tona ra akaara anga. No te one mai oki te au tangata katoatoa nei; e okotai ua ona tumu i angaʼi aia ia ratou, kia akono oki ratou i tana au akaueanga e kia akakaka iaia e tuatau ua atu.

22. E teianei, e akaoti au i te tuatua kia kotou i te ngakau parau. E naringa kare au i akaueia kia tuatua atu kia kotou i tetai ara maata rava atu, i na, e rekareka maata toku ngakau ia kotou i reira.

23. No ta kotou ara kino rava atu, i riro ei te tuatua a te Atua ei mea teimaa rava iaku nei. I na oki, te na ko maira te Atu, kua akamata teianei iti tangata i te rave i te ara, kare oki ratou i marama i te tuatua tapu i tataia ra; e no te au mea oki i tataia no Davida e tana tamaiti ko Solomona, i kimi ei ratou kia akatika i ta ratou uaorai akaturi ra.

24. I na, e maata te vaine a Davida e Solomona, e te au vaine akaturi oki, e e mea viivii oki te reira i mua iaku ra, te na ko maira te Atu.

25. No reira, te na ko maira te Atu, i arataki mai ei au i teianei iti tangata mei te enua maira mei Ierusalema, na roto i te mana o toku nei rima, kia rauka iaku te akatupu i tetai atava tuatua tika no te uanga a te kopu o Iosepha ra.

26. E teianei, kare au, ko te Atu ra te Atua, e akatika kia rave teianei iti tangata i taua au mea ra mei tei raveia i te tuatau taito ra.

27. E tenana, e akarongo mai iaku, e e akono oki i te tuatua a te Atu ra; Auraka rava tetai tangata i rotopu ia kotou, mari ra, okotai vaine, auraka rava oki e vaine akaturi.

28. Kua mataora oki au, ko te Atu te Atua, i te vaine tiama ra. E mea viivii rava te akaturi i mua iaku nei, te na ko maira te Atu Sabaota.

29. Kia kore teianei iti tangata e akono i taku au akaueanga, ka taumaaia te enua no ratou, te na ko maira te Atu Sabaota.

30. E kia inangaro au i te akatupu i te uanga noku ra, ka akaue atu au i toku ra iti tangata; kia kore ra au e akapera, ka akono ratou i teia au mea nei e tikai, te na ko maira te Atu Sabaota ra.

31. I na oki, kua kite akenei au i te mii e kua akarongo akenei oki au i te aue o te au tamaine o toku iti tangata i te enua ra i Ierusalema, koia ïa, i te au enua katoatoa o toku ra iti tangata, no te tuatua tika kore e te au angaanga viivii ra a ta ratou au tane.

32. E te na ko maira te Atu Sabaota, kare au e akatika kia tae ua mairai te aue o te au tamaine manea o teianei aronga, kiaku taku i arataki mai mei te enua maira mei Ierusalema ra, no te au tane o toku nei iti tangata, te na ko maira te Atu Sabaota.

33. Kare oki ratou e arataki ke atu i te au tamaine a toku nei iti tangata ki te kino, no to ratou ngakau maru; e akautunga atu ra au ia ratou ki tetai utunga maata, e tae ua atu ki to ratou matenga tikai, kare oki au e akatika kia akaturi ratou mei ta te aronga taito ra, te na ko maira te Atu Sabaota.

34. E teianei, i na, e aku au taeake, kua kite kotou e, kua orongaia mai teia au akaueanga ki to tatou ra metua kia Lihai, i kite ana kotou i te reira, e e akaapaanga maata oki to kotou, kua rave katoa kotou i te au mea kare oki e tika kia raveia.

35. I na, kua maata atu ta kotou au ara i rave i ta to kotou au taeake, te ngati Lamana. Kua akamamae kotou i te ngakau o ta kotou au vaine maru, e no ta kotou angaanga kino i mua i ta kotou au tamariki kare ratou e irinaki ia kotou, kua tae rava atu te tangi o to ratou ngakau ki runga ki te Atua ia kotou. E no te tika o te tuatua a te Atua tei tae mai ki raro nei kia kotou, e maata tei mate, kua puta oki i te puta oonu ra.