1. E i na, kua ako atu au, ko Iokaba, ko toku ra iti tangata i te au tuatua e maata (kare e rauka iaku te tata i taku au tuatua, mari ra, e manga tuatua iti ua, no te mea, e rave ngatā te kotikoti anga i ta matou au tuatua ki rungao i te au papa) e kua kite matou e, ka vai ua rai te au mea ta matou e tata nei.

2. Ko te au mea ra ta matou e tata ki runga i tetai atu mea, mari ra, ki runga i te au papa ra, ka pou ïa e ka ngaro ke atu; kua rauka ra ia matou te tata i tetai manga tuatua meangiti ki runga i te au papa, kia akakite ki ta matou au tamariki e to matou au taeake akaperepere i tetai tuatua meangiti i to matou tu, te tu oki o to ratou ra ui tupuna.

3. Te mataora nei matou i te reira, e te angaanga nei oki matou ma te maroiroi kia kotikoti i teianei manga tuatua ki runga i te au papa, ma te manakonako anga e, e arikiia te reira e to matou au taeake akaperepere e ta matou au tamariki ma te ngakau mataora, e kia kimi oki i te reira, kia apii ratou no runga i to ratou nga metua i muatangana, ma te mataora eiaa ma te otooto, eiaa oki ma te akavaavaa.

4. Kua tataia teianei au mea e matou kia kite ratou e, i kite ana matou i te tuatua o te Mesia, e tei ia matou oki te manakonako i tona ra kaka i nga anere anga o te mataiti i mua ake tona ra tae anga mai; kare tei ia matou anake te manakonakoanga i tona ra kaka, tei te au peroveta tapu katoa ra oki i mua ake ia matou nei.

5. I na, i irinaki ana ratou i te Mesia ra, e i akamori ana oki ratou i te Metua i tona ra ingoa; e te akamori katoa nei rai matou i te Metua i tona ra ingoa. No reira te akono nei rai matou i te ture a Mose, tei arataki atu i to matou nei ngakau kiaia ra, e no reira i akatapuiaʼi te reira ei tuatua tika ia matou, mei ia Aberahama katoa i roto i te metepara, ka akono ei aia i te au akaueanga a te Atua ra i te tuku anga atu i tana tamaiti ia Isaaka, ko te akatauanga ïa o te Atua ra e tana ra Tamaiti anau tai.

6. E no reira i kimi ei matou i ta te au peroveta ra, e tei ia matou te au eeuanga e manganui, e te vaerua o te totou; e i teia au kite nei, e raukaʼi ia matou te manakonako, e te akarongo ngaueue kore kia rauka ia matou i te akaue atu i te ingoa o Iesu ra, e e akarongo ei te au pu rakau ia matou, e te au maunga, e te ngaru o te tai ra.

7. Ina ra, na te Atu ra ko te Atua i akakite mai kia matou i to matou tu paruparu, kia kite matou e, na roto i tona ra aroa e tona ra takinga meitaki maata ki te tamariki a te tangata nei, e raukaʼi ia matou te mana kia rave i taua au mea ra.

8. I na, e au angaanga maata e te umere ta te Atu ra. E kimi ngata i te oonuanga o te tuatua ngaro nana ra, kare oki e rauka i te tangata te kite i te au ravenga katoatoa nana ra. Kare oki te tangata e kite i tana au aerenga mari ra, kia eeuia mai ïa kiaia ra; e tenana, e aku au taeake, eiaa kotou e akavaavaa i te au eeuanga a te Atua ra.

9. E i na oki, na roto i te mana o tana ra tuatua i tae mai ei te tangata ki runga i te enua nei tei angaia oki e te mana o tana ra tuatua. E mei te mea ra e, kua tuatua te Atua, e kua angaia iora teianei ao, kua tuatua oki, e kua angaia te tangata nei, i na, eaa ka kore e raukaʼi iaia kia akaue atu i te enua, e i te au mea i angaia e tona ra rima ki runga i te enua nei, mei tei tau i tona ra manako e tona ra inangaro oki?

10. E tenana, e aku au taeake, eiaa kotou e kimi kia ako atu ki te Atu, kia ariki mai ra i tana i tuatua mai. I na oki, te kite nei kotou uaorai e, e ako maira aia ma te pakari, e ma te tuatua tika, e ma te aroa maata ki runga i tana ra au angaanga katoatoa.

11. E teianei, e te au taeake akaperepere, kia tau kotou iaia, na roto i te etarangaara a te Mesia, tana ra Tamaiti anau tai, kia rauka ia kotou te tuakaouanga, mei tei tau i te mana o te tuakaouanga tei roto i te Mesia ra, e kia tukuia oki kotou ei momua o te Mesia ki te Atua, ma te akarongo, e ma te rauka anga i te manakonako i te kaka nona, i mua ake aia ka akakite mai ei iaia uaorai i te kopapa nei.

12. E teianei, eiaa kotou e umere i te mea, kua akakite atu au i teianei au mea; eaa oki i kore ei i tuatuaia te tarangaara a te Mesia, kia rauka te kite tika nona ra, e te kite i te tuakaouanga, e i te ao a muri atu?

13. E i na, e aku au taeake, ko tei totou ra, kia totou aia i tei tau i te kite a te tangata nei; no te mea te tuatua maira te Vaerua Tapu i te tuatua mou, ma te pikikaa kore. E no reira, i tuatuaʼi aia i te tu tikai o te au mea e vai nei, e te tu tikai oki o te au mea ka vai a muri atu, e no te ora o to kotou vaerua i akakite papuia mai ei i teianei au mea kia tatou nei. Ina ra, kare tatou anake tei kite i teianei au mea, i tuatua katoa ana oki te Atua i te reira ki te au peroveta taito ra.

14. Ina ra, e iti tangata ngakau marokiakia oki te ngati Iuda, kua akavaavaa ratou i te au tuatua tika, kua ta oki ratou i te au peroveta e kua kimi atura i te au mea kare e rauka ia ratou kia marama. E teianei, no to ratou tu matapo, tei tae ki runga ia ratou no te kimianga i te au mea tika kore ia ratou kia rave ra, ka inga ratou e tikai. Kua rave keia oki e te Atua tona au mea marama pu, e kua orongaia mai kia ratou te au mea i kare e rauka kia marama, ko ratou oki tei inangaro i te reira. E no to ratou inangaro i te reira i peraʼi te Atua, kia turorirori ratou.

15. E teianei, te arataki uaia nei au, ko Iakoba, e te Vaerua kia totou; te kite oki nei au na roto i te angaanga a te Vaerua Tapu i roto iaku nei, e no te turori anga o te ngati Iuda i akaruke ei ratou i te toka tei tau kia tukuia e ratou ki raro i te patu ei turanga ngaueue kore ra.

16. Ina ra, mei tei tau i te au tuatua tapu ra, ka riro te reira toka ei tumu maata, e te tumu openga, e te ngaueue kore, te toka okotai oki ïa e tika i te ngati Iuda kia patu ki runga.

17. E teianei, e aku au akaperepere, akapeea e raukaʼi ia ratou, tei akaruke i te tumu mou ra, kia patu ki rungao i te reira ka riro ïa ei toka tiava no ratou?

18. E aku au taeake akaperepere, mei te mea kare au e ngaueue i toku turanga i te Vaerua, e e turori oki no toku taitaia anga ia kotou, ka akataka marie au teianei tuatua ngaro kia kotou.