1. E teianei, i na, e aku au taeake, kua tuatua akenei au kia kotou e, ka totou au, e i na, teia taku tuatua totou. Te au mea i tuatuaia e taua peroveta nei ko Zenosa ki te ngutuare o Iseraela, i te akatauanga ia ratou ki te pu orive ra, ka tupu tikai ïa.

2. Ei te rā e akatika akaou ei aia i tona rima kia akaora i tona ra iti tangata, ko te rua oki o tona akatikaanga i tona rima, ko te aere anga openga ïa o te au tavini o te Atu ra ma te mana, e akono e e pakoti aere i tona kainga vine; ko te openga iora i reira.

3. E teianei, e ao to ratou tei maroiroi i te angaanga i tona ra kainga vine; e akaapaanga maata ra to te tangata e titiriia aia ki vao i to ratou uaorai ngai! E ka kā oki te ao nei i te ai.

4. E te aroa maata o to tatou Atua ia tatou nei, e kua akamaara oki aia i te ngutuare o Iseraela nei; te au aka, e te atava katoa; e te akatika ua nei rai aia i tona rima kia ratou e opu ua atu te ra; e iti tangata marokiakia e te patoitoi ratou, kareka, ko te kore e akaketaketa i to ratou ngakau e akaoraia ïa i roto i te basileia o te Atua ra.

5. E teianei, e aku au taeake akaperepere, te pati atu nei au kia kotou ma te tuatua maru kia tataraara kotou, e kia aere mai ma te akakoroanga tika o te ngakau, e e piri ua atu rai koe ki te Atua mei iaia i piri mai kia kotou na. E kia akatika ua aia i tona rima aroa ia kotou i te marama o te ao, eiaa kotou e akaketaketa i to kotou ngakau.

6. I na, mei te mea e akarongo ana kotou i tona reo i teianei rā, e me kare katoa e akaketaketa i to kotou ngakau; eaa kotou e mate ei?

7. I na oki, kia angaiia kotou ki te tuatua meitaki a te Atua e opu ua atu te rā, e ua mai ainei kotou i te ua kino, kia tipu keia e kia titiriia kotou ki roto i te ai ra?

8. I na, e patoi ainei kotou i teianei au tuatua? E akaruke ainei kotou i te au tuatua a te au peroveta ra? E ka akaruke ainei oki kotou i te au tuatua katoatoa i tuatuaia i te Mesia ra, no atu e maata ua atu rai te au tangata i tuatua iaia ra? E ka uuna ainei i te tuatua meitaki a te Mesia ra, e te mana o te Atua, e te orongaanga o te Vaerua Tapu, e e arai i te Vaerua Tapu, e e taitoito ainei oki i te ravenga maata no te akaoraanga i akonoia no kotou?

9. Kare ainei kotou i kite e, mei te mea e rave rai kotou i te reira au mea, na te mana o te akaoraanga e te tuakaouanga i roto i te Mesia ra e arataki ia kotou ki mua i te akavaanga a te Atua ma te akama e te mataku?

10. E mei tei tau i te tuatua tika ra, kare oki e tika kia akakore i te tuatua tika, e tukuia atu kotou ki roto i taua roto ai e te teio ra, kare tona mura e mate, e e kake ua atu rai tona auai e tuatau ua atu; ko taua roto ai e te teio ra, ko te mamae mutu kore ïa.

11. E tenana, e aku au taeake akaperepere, e tataraara kotou, e tomo na roto i te ngutupa tika ra, e aere ua atu na te mataara kokota ra, e tae ua atu ki te tuatau e raukaʼi ia kotou te ora mutu kore ra.

12. Kia pakari kotou, eaa atu taku ka tuatua atu?

13. E teianei, kia orana kotou e tae ua atu ki te tuatau e aravei akaou ei au ia kotou ki mua i te akavaanga tika a te Atua ra, na tana akavaanga rai e papa i te aronga tuatua tika kore e te mataku rikarika ra. Amene.