1. Ina ra, kua inangaro au, ko Iakoba, i te tuatua atu kia kotou i tei ma te ngakau. E irinaki kotou ki te Atua ma te ngakau ngaueue kore, e e pure atu kiaia ma te akarongo maata, e nana e akapumaana mai ia kotou i to kotou au tumatetenga, nana oki e tauturu mai ia kotou, e e akautunga mai ia ratou tei kimi i to kotou mate.

2. E kotou katoatoa tei ma te ngakau, ka akateitei i to kotou upoko ki runga kia rauka te tuatua mataora a te Atua ra, kia akakiia i tona aroa; ka rauka ïa ia kotou, me tinamou to kotou ngakau, e tuatau ua atu.

3. Aue, aue oki kotou tei kore i ma te ngakau, ko tei viivii i teia ra nei i mua i te aroaro o te Atua ra; Kia kore kotou e tataraara, e taumaaia te enua nei ia kotou, e na te ngati Lamana ko tei kore i viivii mei ia kotou rai, e taumaa maata oki to ratou, na ratou e pāpā ia kotou e pou rava.

4. E tae vave mai te tuatau, kia kore kotou e tataraara, e riro atu to kotou enua ipukarea kia ratou; e e arataki atu te Atu ra ko te Atua i te aronga tuatua tika mei roto atu ia kotou na.

5. I na, ko te ngati Lamana, to kotou au taeake, ta kotou i makitakita no to ratou tu viivii e no te taumaa i tae mai ki runga i to ratou pakiri; kua maata atu ta ratou tuatua tika i to kotou; kare oki ratou i akangaropoina i te akaueanga a te Atua ra, tei tukuia mai ki to tatou au metua, i te na ko anga mai e, okotai vaine ta kotou e rave, e auraka e vaine akaturi, auraka oki kotou e akaturi.

6. E teianei, te akono nei rai ratou i taua akaueanga nei; e no te akarongo e te akono meitaki i teia akaueanga nei, e kore ei te Atu ra ko te Atua, e akapou takiri ia ratou, ka aroa ra aia ia ratou, e te vai atura te tuatau e riro ei ratou ei iti tangata akameitakiia ra.

7. I na, kua aroa te au tane i ta ratou au vaine, e kua aroa te au vaine i ta ratou au tane, e kua aroa katoa ta ratou au tane e ta ratou au vaine i ta ratou au tamariki; e no te tuatua tika kore oki a to ratou ra ai metua, i riro ei ratou i te akarongo kore e te makitakita oki ia kotou; e tenana, eaa atu to kotou meitaki i to ratou i mua i te aroaro o Tei Anga ia kotou?

8. E aku au taeake e, kua mataku au e, kia kore kotou e tataraara i ta kotou au ara, e teatea ake to ratou pakiri i to kotou kia tu kotou e ratou katoa i mua i te terono o te Atua ra.

9. E no reira, i tuku atu ei au i tetai akaueanga kia kotou na, ko te tuatua oki ïa a te Atua ra, kia kore kotou e taitoito akaou ia ratou no te tu kerekere o to ratou pakiri; kia kore katoa kotou e taitoito akaou ia ratou no to ratou tu viivii; kia akamaara ra kotou i ta kotou uaorai au angaanga viivii, e kia akamaara oki e, no to ratou au metua i tae mai ei to ratou tu viivii.

10. E tenana, kia akamaara kotou i ta kotou au tamariki e to ratou ngakau i mamae i te akara anga i ta kotou akono kore i mua ia ratou; e kia akamaara katoa kotou e, no ta kotou angaanga viivii, penei ake, e aratakiiaʼi ta kotou au tamariki ki te mate, e e iri mai ta ratou au ara ki rungao i to kotou upoko kia tae mai te rā openga ra.

11. E aku au taeake e, e akarongo mai ana ki taku nei tuatua, e akaaraara i te manako o to kotou na ngakau; e ruru ia kotou uaorai, kia ara mai kotou i te moe o te mate ra; e tatara ia kotou uaorai i te mamae o ade ra, kia kore kotou e riro ei au angela na te tiaporo ra, e uriiaʼi ki roto i taua roto ai ra e te teio, koia oki te rua o te mate ra.

12. Maata atu te au mea taku, ta Iakoba, i tuatua atu ki te iti tangata o Niphai, i te akoanga atu kia ratou i te akaturi e te moeana, e te au anoano kikino, i akakite atu oki au kia ratou i te utunga rikarika no te reira.

13. Kare e rauka kia tataia ki runga i teianei au papa te anere anga o te au mea i raveia e teianei iti tangata, kua maata oki ratou i teianei; ki runga ra i te au papa mamaata i tataiaʼi te au mea e manganui i raveia e ratou ra, ta ratou au tamaki anga, e ta ratou taumaro anga, e te au o to ratou ui ariki ra.

14. Kua tuatuaia teianei au papa i te au papa a Iakoba, e kua maaniia e te rima o Niphai ra. Te akaoti nei au i teianei au tuatua.