1. I na, e aku au taeake, kare ainei kotou i akamaara i te tatau i te tuatua a te peroveta ra ko Zenosa, i tana i tuatua atu ki te ngutuare o Iseraela, i te na ko anga e;

2. Ka akarongo mai ana kotou, e te ngutuare o Iseraela e, ka akarongo mai i taku tuatua, koia oki, te peroveta a te Atu.

3. I na oki, te na ko maira te Atu, E akaaite au ia koe, e te ngutuare o Iseraela, ki tetai orive meitaki ra ta tetai tangata i tanu e kenu i roto i tona ra kainga vine; tupu akera te reira, pakari atura, e akamata iora i te pe.

4. Aere atura te atu o te kainga vine, akara atura aia ki tana ra orive, e kua akamata ïa i te pe; kua tuatua akera aia, ka pakoti aere au, e ka kenu e ka akono i te reira, peneiake ka tupu mai te au atava ou, kia kore ïa e mate.

5. Kua pakoti akera aia i te au atava kikino o te reira, kenu iora e akono oki i te reira, mei tei tau i tana tuatua.

6. E ope akera te au ra e manganui, kua tupu maira te au atava ou; ina ra, kua vaitata te au atava mamaata i te mate.

7. Akara akera te atu o te kainga vine i te reira, e kua tuatua aia ki tona tavini e; te tangi nei au no te kino o teianei pu rakau; e tenana, ka aere koe e rave mai i te au atava o tetai orive ngangaere, e apai mai i te reira kiaku nei, e ka pakoti taua i taua au atava mamaata ra tei vaitata i te mate, e e titiri atu i te reira ki roto i te ai kia pou.

8. E i na, te na ko maria te atu o te kainga vine, e apai ke aere au i teianei au atava ou e manganui, e e tanu aere au i te reira i te au ngai taku e inangaro; e me mate ua atu te aka o teianei pu rakau ka tika iaku, uaka akono ra au i te ua nona naku uaorai; e no reira e rave eii au i teia au atava ou, ka pau ei au i te reira ki te ngai taku e inangaro.

9. Ka rave koe i te au atava o te orive ngangaere ra, e pau i te reira ki te ngai no reira mai taua au atava tikai ra, e teia taku i pakoti ra, e titiri atu au i te reira ki roto i te ai kia pou, kia kore te reira e takako i toku kainga vine.

10. E kua akono te tavini o te atu o te kainga vine ra i te tuatua a te atu o te kainga vine, e kua pau maira aia i te au atava o te orive ngangaere ra.

11. E kua akaue te atu o te kainga vine kia kenuia, e kia pakotiia te au atava kino o te reira, e kia akonoia te reira pu rakau i te na ko anga ki tona tavini e, te tangi nei oki au i te mate o teia pu rakau, no reira, i peraʼi au, peneiake ko te akaora au i te au aka nona kia kore te reira e mate, kia ora ra te reira noku.

12. E tenana, e aere atu koe, e tiaki i te pu rakau, e e akono i te reira mei tei tau i taku nei tuatua.

13. E tanu rai au i teia i te pae i raro roa o toku kainga vine, i te ngai taku e inangaro, kare oki aau tuatua i te reira; e te pera nei au kia ora te au atava tikai o taua pu rakau noku; e kia akaputu oki au i te ua nona no tetai tuatau naku uaorai; te tangi nei au i te kino o teianei pu rakau, e i tona ua katoa.

14. E kua aere atura te atu o te kainga vine, e kua uuna aere aia i te au atava tikai o te orive mua ra i te au ngai i raro roa i te kainga vine ra, tetai atava ki tetai ngai e tetai atava ki tetai ngai, mei tei tau i tona manako e tona inangaro.

15. E roa akera, kua tuatua atura te atu o te kainga vine ki tona ra tavini, e aere taua ki raro ki te kainga vine, e angaanga taua i roto i te kainga vine ra.

16. E aere atura te atu o te kainga vine e tona ra tavini katoa, ki raro ki te kainga vine kia angaanga. E kua tuatua maira te tavini ki tona pu, i na, ka akara mai ana, e akara ki te pu rakau.

17. Kua akara atura te atu o te kainga vine, kite atura i taua pu rakau i pauia mai ki te au atava o te orive ngangaere ki runga ra; e kua tupu akera te reira, e kua ua maira i te ua. Akara akera aia i te reira e e mea meitaki; e te ua nona, mei te ua tikai ïa.

18. E kua tuatua atura aia ki te tavini, i na, kua rauka i te au atava o te rakau ngangaere i te mou i te aka ra, e kua tupu taua aka ra ki te ririnui maata; e no te ririnui maata o te aka i ua mai ei te orive ngangaere i te ua tikai ra; e teianei, naringa kare taua i pau i teianei au atava, kua mate teia pu rakau. E teianei, i na, e akaputu au i te ua ta te pu rakau i ua maira; e e akaputu au i te ua nona no tetai tuatau ra naku uaorai.

19. E kua tuatua atura te atu o te kainga vine ki te tavini, e aere mai, ka aere taua ki te pae ki raro roa o te kainga vine nei, e akara me kua ua katoa mai te au atava tikai o te rakau i te ua maata, kia akaputu au i te ua naku uaorai no tetai tuatau.

20. Aere atura raua ki te ngai ta te atu i uuna i te au atava tikai o te rakau ra, e kua tuatua atura aia ki te tavini, ka akara mai ana ki teia, kite akera aia i te pu rakau mua ra, e kua ua maira i te ua maata; e kite akera aia e, e mea meitaki ïa. E kua tuatua atura aia ki te tavini, ka rave i te ua o te reira, e akaputu i te reira no te tuatau ra, kia vai rai te reira naku uaorai; i na oki, te na ko atura aia, kua roa toku akono anga i te reira, e kua ua meitaki maira i te ua maata.

21. E kua tuatua maira te tavini ki tona ra atu e, Eaa koe i aere mai ei ki konei e tanu i teianei rakau koia oki teia atava o te rakau ra? I na oki, ko te ngai kino rava teia i te kainga vine katoa.

22. E kua tuatua atura te atu o te kainga vine kiaia, Eiaa koe e tuatua mai kiaku nei, i kite ana oki au e, e kino rava teia one i konei, no reira i tuatuaʼi au kia koe e, kua roa toku akono anga i te reira, e kua kite oki koe e, kua ua maira te reira i te ua maata.

23. E kua tuatua atura te atu o te kainga vine ra ki tona tavini, Ka akara ki ko; i na, kua tanu katoa rai au i tetai atava no tona tumu; e kua kite oki koe e, kua kino rava teia ngai i to te ngai mua ra. Ka akara ra ki te pu rakau ra, kua roa toku akono anga i te reira, e kua ua mai i te ua maata; e tenana, e aaki mai, e akaputu no te tuatau ra, kia vai rai te reira naku uaorai.

24. E kua tuatua akaou atura te atu o te kainga vine ki tona tavini, Ka akara mai ana, ki tetai atava ke taku i tanu ra; i na, kua akono oki au i te reira, e kua ua mai i te ua.

25. E kua tuatua atura aia ki te tavini, ka akara mai ana, e kia kite i te rakau openga; i na, kua tanu au i teia ki roto i te ngai meitaki, e kua akono au i te reira e roa, e kua ua mai tetai pae i te ua meitaki ra; e kua ua mai tetai pae i te ua kino ra; e i na, okotai rai tu toku akono anga i teianei rakau e tera au rakau katoa ra.

26. E kua tuatua atura te atu o te kainga vine ki te tavini, ka pakoti i te au atava i kore i ua mai i te ua meitaki, e titiri ki roto i te ai.

27. Ina ra, kua tuatua maira te tavini kiaia, kia pakoti taua i te au atava kino o te reira, e kia kenu oki e kia akono i te reira tetai manga tuatau poto, e peneiake ka ua mai i te ua meitaki naau, kia akaputu mai koe no te tuatau ra.

28. Kua akono iora te atu o te kainga vine, e tona tavini katoa ra i te au pu rakau katoatoa o te kainga vine.

29. E roa akera, kua tuatua atura te atu o te kainga vine ki tona ra tavini, ka aere mai ana, ka aere taua ki raro i te kainga vine, e angaanga akaou i roto i te kainga vine ra. I na oki, te vaitata nei te openga; no reira kia akaputu au i te ua naku uaorai no te tuatau ra e tikai.

30. Aere atura te atu o te kainga vine e te tavini katoa ki raro i te kainga vine, tae atura raua ki taua pu rakau i pakotiia tona au atava tikai, e i pauia mai oki te au atava ngangaere; e i na, tei runga i taua pu rakau ra te au tu ua katoa ra.

31. E kua kai iora te atu o te kainga vine i te au ua, e ope rava ake te au tu katoa ra. Kua tuatua atura te atu o te kainga vine, i na, kua roa to taua akono anga i teia pu rakau nei, e kua akaputu au i te ua maata naku uaorai no tetai tuatau ra.

32. Ina ra, kua ua mai i te ua maata i teianei, kare rava okotai mea meitaki. E i na, tei runga i te pu rakau te au tu ua kino katoatoa ra; kua maata ua atu rai ta taua angaanga, kare rava aku puapinga i te reira; e teianei, te tangi nei au no te kino o teia pu rakau nei.

33. E kua tuatua atura te atu o te kainga vine ki te tavini ra, Eaa ta taua ka rave ki teianei pu rakau kia rauka akaou iaku te ua naku uaorai?

34. E kua tuatua atura te tavini ki te pu, i na, no te mea i pau mai koe i te au atava ngangaere ra, kua akameitaki ïa i te au aka e i oraʼi te reira, kare ïa i mate; te kite nei koe i reira, te meitaki ua nei rai te au aka.

35. E kua tuatua atura te atu o te kainga vine ki tona ra tavini, kare rava aku puapinga i taua au aka, me ka ua mai te reira i te ua kino.

36. Kua kite ra au e, e mea meitaki rai te au aka, e no toku uaorai akakoroanga i akono ei au i te reira; e no te ririnui maata o te au aka, i ua mai ei te ua meitaki i runga i te atava ngangaere ra.

37. Ina ra oki, kua tupu mai te au atava ngangaere ra, e kua maata atu to ratou ririnui i to te au aka ra, e no te mea, kua ririnui ake te au atava i to te aka ra, kua ua mai te reira i te ua kino e maata, e no te mea kua ua mai te reira i te ua kino e maata, i na, kua akamata ïa i te mate, e e kino vave oki te reira e e titiriia ki roto i te ai, me kore taua e kimi i tetai ravenga nona e oraʼi.

38. E kua tuatua atura te atu o te kainga vine ki tona tavini, E aere taua ki raro i te pae i raro roa o te kainga vine kia kite e, me kua ua katoa mai i te au atava tikai i te ua kino.

39. Aere atura raua ki raro i te pae i raro roa ra o te kainga vine. E kite akera raua e, kua kino katoa te ua o te au atava tikai ra, koia oki, te rakau mua, e te rua, e te openga oki; e kua kino ratou katoatoa.

40. E te ua kino o te pu rakau openga ra, kua akakino te reira i te pae o te pu rakau i ua mai ana i te ua meitaki e mae atura te atava e kua mate.

41. E kua aue iora te atu o te kainga vine, e kua tuatua atura ki tona tavini, Eaa atu tei rauka iaku i te rave i toku nei kainga vine.

42. I na, i kite ana au e, kua kino te ua katoatoa o toku kainga vine, mari ra, ko teia. E teianei, ko teia tei ua ana i te ua meitaki, kua kino katoa ïa; kare atu rai e puapinga to te au pu rakau i toku kainga vine, mari ra kia tipupuia e kia titiriia ki roto i te ai.

43. E akara mai ki teia pu rakau openga nei, nona te atava i mate ra, kua tanu au i te reira ki te one meitaki, koia oki te ngai meitaki rava atu i te au ngai katoatoa i toku nei kainga vine.

44. E kua kite oki koe e, i tipupu ana au i te teita ngangaere i kako i teia ngai, kia tanu au i teia pu rakau i teia ngai nei.

45. E kua kite oki koe e, kua ua mai tetai pae i te ua meitaki, e kua ua mai oki tetai pae i te ua kino; e no tei kore au i pakoti ana i te au atava kino e titiri atu ki roto i te ai, kua mate te au atava i na, kua peke te meitaki ki te atava ngangaere e mae ua atu te atava meitaki.

46. E teianei, i na, i akono ua rai taua i toku kainga vine, kua kino te reira au pu rakau e kare oki e ua mai i te ua meitaki; e i inangaro ana au kia ora te reira, kia akaputu au i te ua naku uaorai no te tuatau ra. Ina ra, kua riro ratou mei te orive ngangaere rai te tu, e kare o ratou puapinga, mari ra, kia tipu keia ki raro e titiriia atu ki roto i te ai; e te tangi nei au no te kino o te reira.

47. Kareka, ra eaa ua atu taku ravenga i toku kainga vine? Kua akaea ainei toku rima i kore ei au e akono i te reira? Kare. Kua akono au i te reira, kua kenu au, e kua pakoti aere au i te au atava kino o te reira, e kua maniua au i te kainga, e kua akatika ua au i toku rima i te ra katoa nei, e te vaitata nei te openga. Te tangi nei au kia tipu ke atu au i te au pu rakau katoatoa o toku kainga vine e kia titiri atu i te reira ki roto i te ai kia pou. Koai oki tei akakino i toku kainga vine?

48. E kua tuatua maira te tavini ki tona pu, kare ainei no te teitei roa o toou kainga vine? Kare ainei i ririnui ake te au atava i te au aka? E no te mea kua ririnui ake to te au atava ra i to te reira au aka ra, i na, kua viviki te au atava i te tupu ma te ririnui o te au aka, i maataʼi to ratou uaorai ririnui. I na, e tuatua atu au, kare ainei tera te tumu i kino ei te au pu rakau o toou ra kainga vine?

49. E kua tuatua atura te atu o te kainga vine ki te tavini, ka aere taua ka tipu ke atu i te au pu rakau o te kainga vine nei, e titiri atu ki roto i te ai, kia kore e kako toku kainga vine i te teita, kua pou oki te ravenga. Eaa ua atu taku ka rave i toku taku ka rave i toku kainga vine?

50. E kua tuatua atura te tavini ki te atu o te kainga vine ra, E akakoromaki ua atu i te reira no tetai manga tuatau poto ua.

51. E kua tuatua atura te atu, ka akakoromaki ua atu i te reira e manga tuatau poto ua, kua tangi oki au no te kino o te au pu rakau i toku kainga vine ra.

52. E tenana, kia rave taua i te au atava o teia, taku i tanu i te pae i raro roa i toku kainga vine, e kia pau atu taua i te reira ki roto i te tumu tikai no reira mai teia atava; e kia pakoti atu taua i taua au atava ra tei ua mai i te ua kavakava ra, o taua pu rakau ra, e kia pau atu i te au atava tikai no taua pu rakau ra ki te ngai o ratou ra.

53. E pera oki au kia kore te pu rakau e mate, peneiake ko te akaora au i tona au aka noku uaorai no toku uaorai akakoroanga.

54. E i na, te ora nei rai te au aka o te au atava tikai taku i tanu aere i te ngai taku i inangaro ra; e no reira kia akaora katoa au i te reira no toku uaorai akakoroanga, e rave ei au i te au atava o teianei pu rakau, ka pau atu ei au i te reira ki roto i taua au aka ra; i na, ka pau au i te au atava o te tumu tikai ra ki roto ia ratou, kia akaora katoa au i te au aka noku uaorai; e kia rava to ratou ririnui peneiake ka ua mai ïa i te ua meitaki noku, e kia rauka te kaka iaku no te ua o toku kainga vine.

55. E kua rave iora raua i te atava orive tikai tei riro ei orive kino ra, e kua pau raua i te reira ki roto i te au pu orive tikai ra tei riro katoa ei au orive kino.

56. E kua rave iora oki raua i te au atava o te au orive tikai ra tei riro ei orive kino ra, e kua pau rava i te reira ki roto i te tumu rakau tikai ra.

57. E kua tuatua atura te atu o te kainga vine ki te tavini, Eiaa e pakoti i te au atava ngangaere o te au pu rakau ra, mari ra, ko te mea kavakino, e ko te reira, ka pau ei koe mei taku i tuatua ra.

58. E e akono akaou taua i te au pu rakau o te kainga vine, e e pakoti aere taua i te au atava marō ra e e tipu keia atu i te au atava kino, e kua pe oki, e titiri i te reira ki roto i te ai.

59. E ka pera au, peneiake ko te tupu to te au aka ririnui no to ratou uaorai meitaki; e no te pau aere anga i te au atava, kia mate te kino i te meitaki.

60. E no te mea, kua akaora au i te au atava tikai ra, e te au aka katoa oki, e kua pau akaou au i te au atava tikai ki roto i to ratou tumu rakau tikai ra, e kua akaora oki i te au aka o to ratou tumu rakau tikai ra, peneiake ka ua akaou mai te au rakau o toku kainga vine i te ua meitaki; e kia mataora akaou au i te ua a toku kainga vine, e peneiake ko te mataora rava au, i te mea, i akaoraʼi au i te aka e te au atava katoa o te ua mua ra.

61. E tenana, e aere, e kapiki atu i te au tavini, kia angaanga pakari tatou ma to tatou ririnui, i roto i te kainga vine nei, kia teateamamao taua i te ravenga e rauka akaou ei iaku i te ua tikai ra, e meitaki rava oki ïa, e e puapinga maata atu ïa i to te au ua katoa ra.

62. E tenana, E aere taua e angaanga ma to taua ririnui i teianei tuatau openga; i na, te vaitata mai nei oki te openga, e ko teia rai taku pakoti anga openga i toku ra kainga vine.

63. E pau ana i te au atava, ka akamata i to te openga ra kia riro te reira to mua, e kia riro oki to mua ei akaopenga, e kenu aere i te au pu rakau, te mea pakari ra e te tupu ou katoa oki; te mea mua ra e te mea openga, te mea openga e te mea mua katoa oki, kia akono akaouia ratou katoatoa, e ko te akono anga openga oki te reira.

64. E tenana, kia okotai ua ake toou kenu akaou anga, e te pakoti akaou anga i te atava kino ra e te maniua i te kainga no te mea te vaitata mai nei te openga. E mei te mea e tupu mai teia au atava i pauia mai nei, e e ua mai oki i te ua tikai ra, e akateateamamao koe i reira i te ngai no ratou kia tupu.

65. E kia tupu te reira, e pakoti ke koe i te au atava e ua mai i te ua kavakava, mei tei tau i te ririnui e te maata oki o te atava meitaki ra; eiaa kia okotai anake oou pakoti ke anga i te au atava kino ra, ko te maata atu aea te ririnui o te au aka i to te au atava tei pauia maira, e e mate ei tei pauia maira, e e mate rava te au pu rakau o toku nei kainga vine.

66. E ka tangi au, mei te mea e mate te au pu rakau o toku nei kainga vine; e tenana, e pakoti ke atu koe i te au atava kino mei tei tau i te tupuanga o te au atava meitaki kia aiteite to te aka ririnui e to te au atava katoa oki, e kia mate te kino i te meitaki, e kia tipu keia atu te kino e kia titiriia ïa ki roto i te ai, kia kore te reira e takako i toku nei kainga vine; e pera oki au i te akaatea anga atu i te kino ki vao i toku kainga vine.

67. E e pau akaou au i te au atava o te pu rakau meitaki ki roto i te tumu rakau tikai ra.

68. E e pau au i te au atava o te tumu rakau tikai ra ki roto i te au atava tikai ra o te pu rakau ra; e pera oki au i te kapiti akaou anga ia ratou, kia ua mai ratou i te ua tikai ra, e kia riro ratou ei okotai.

69. E, e titirii te kino ki vao rava i te enua katoatoa o toku kainga vine; i na oki, te akono anga openga teia i toku nei kainga vine.

70. E kua tono atura te atu o te kainga vine i tona tavini, aere atura te tavini, rave iora mei ta te atu i akaue kiaia, e kua arataki maira oki aia i tetai au tavini, e toko iti ua ake ratou.

71. E kua tuatua atura te atu o te kainga vine kia ratou, E aere kotou, e angaanga ki roto i te kainga vine ma to kotou ririnui katoa. I na oki, ko toku akono anga openga teia i toku kainga vine ra; e te vaitata nei oki te openga e e tae vave mai te tuatau ra; e me angaanga kotou ma to kotou ririnui katoatoa i te pae iaku, ka rauka te mataora ia kotou i te ua taku e akaputu naku uaorai no te tuatau e vaitata mai nei.

72. Kua aere iora te au tavini e angaanga iora ma to ratou ririnui katoa; e kua angaanga iora oki te atu o te kainga vine e ratou katoa; e kua akono ratou i te au akaueanga a te atu o te kainga vine i te au mea katoatoa.

73. E tupu akaou maira te ua tikai ra i roto i te kainga vine; e tupu akera te au atava mua ra kia ruperupe rava oki; e kua akamata iora i te pakoti ke atu i te au atava kino ra e titiri atu ki vao; e kua aite iora te ririnui o te au atava ra ki to te au aka oki.

74. E kua pera ratou i te angaanga ma te maroiroi, mei tei tau i te au akaueanga a te atu o te kainga vine ra, e tae ua atu ki te titiri anga atu i te ua kino ki vao i te kainga vine ra; e i akakoromaki oki te atu i te au pu rakau ra, e kua ua akaou mai i te ua tikai ra; e kua riro te reira mei te kopapa okotai, e e okotai rai tu to te au ua katoatoa; e kua akaputu oki te atu o te kainga vine nana uaorai i te ua tikai ra ko tei meitaki rava atu iaia, mei mua mairai.

75. E kite akera te atu o te kainga vine e, e mea meitaki tona ua, e kare i kino akaou tona kainga vine, kua kapiki atura aia ki tona au tavini, e kua tuatua atura kia ratou, i na, ko te taime openga teia ta tatou ka kenu i te kainga vine; e kua kite oki kotou e; i rave ana au mei tei tau i toku inangaro; e kua akaputu au i te ua tikai, e e mea meitaki oki te reira, mei tei muatangana ra oki. E e ao oki to kotou. No te mea kua maroiroi kotou i te tuaturu mai iaku i roto i toku kainga vine, e kua akono mai kotou i taku au akaueanga, e kua apai akaou mai kotou i te ua meitaki kiaku, e kare oki e kino akaou toku kainga vine, e i titiriia te kino ki vao ra, i na, e raukaʼi te mataora ia kotou i konei iaku, no te ua o toku kainga vine ra.

76. I na oki, e roa te tuatau e akaputuputu ei au i te ua o toku kainga vine naku uaorai, no te tuatau i vaitata roa mai; e ko te taime openga teia taku i akono i toku nei kainga vine, e i pakoti au i te au atava kino e i kenu, e kua maniua au i te reira; no reira e akaputuputu ei au i te ua naku uaorai, e roa te tuatau, mei tei tau i taku tuatua ra.

77. E kia tae mai te tuatau e tupu akaou mai ei te ua kino i roto i toku kainga vine, ei reira au e akaue atu ei kia akaputuputuia mai te meitaki e te kino katoa; e e rave mai ei au i te meitaki naku uaorai, e e titiri atu ei au i te kino ki vao i tona ra ngai. Ei reira e tae mai ei te tuatau e te openga; e e akaue atu ei au kia tutungiia toku kainga vine ki te ai.