1 Futsi kwenteka kutsi ngawo lowo mnyaka kwacala kwaphindze kwaba khona imphi emkhatsini wemaNefi kanye nemaLamani. Nanoma ngangimncane, bengimkhulu ngemtimba; ngako-ke bantfu baNefi bangibeka kutsi ngibe ngumholi wabo, noma umholi wemabutfo abo.

2 Ngako-ke kwenteka kutsi ngemnyaka wami welishumi nesitfupha ngalwa nemaLamani, ngihola emaNefi; ngako-ke iminyaka lengemakhulu lamatsatfu nemashumi lamabili nesitfupha beseyendlulile.

3 Futsi kwenteka kutsi ngemnyaka wemakhulu lamatsatfu nemashumi lamabili nesikhombisa emaLamani eta kitsi ngemandla lamakhulu kakhulu, kangangekutsi awesabisa emabutfo ami; ngako-ke akatange alwe, acala abalekela ngasemaveni labekangasenyakatfo.

4 Futsi kwenteka kutsi sate sefika edolobheni lase-Angola, salitsatsa lelodolobha laba ngeletfu, senta emalungiselelo ekutsi sitivikele kumaLamani. Futsi kwenteka kutsi salicinisa lelo dolobha ngemandla etfu onkhe; kodvwa nanoma sasilicinisile ngako konkhe emaLamani atselekela etikwetfu aphindze asiphocelela kutsi sibaleke siphumele ngaphandle kwalelo dolobha.

5 Futsi baphindze basikhipha naseveni laDavide.

6 Sahamba sate sefika eveni laJoshuwa, lebelisemnceleni enshonalanga ngaselugwini lwelwandle.

7 Futsi kwenteka kutsi sabagcogca bantfu betfu ngekushesha lokukhulu, kute sibagcogcele ndzawonye babe licembu linye.

8 Kodvwa buka, lelive beligcwele tigebengu kanye nemaLamani; nanoma kubhujiswa lokukhulu bekulengela bantfu bami, abatange baphendvuke ekwenteni kwabo bubi; ngako-ke kwaba khona ingati nekubulawa kwebantfu labaningi kulo lonkhe live, etinhlangotsini totimbili kumaNefi kanjalo nakumaLamani; futsi kwaba khona kuvukelana lokukhulu kulo lonkhe live.

9 Manje, emaLamani bekanenkhosi, libito layo kungu-Aroni; weta watokulwa natsi nelibutfo lelitinkhulungwane letingemashumi lamane nakune. Buka, ngamelana naye ngalabatinkhulungwane letingemashumi lamane nakubili. Futsi kwenteka kutsi ngamehlula nelibutfo lami kangangekutsi wangibalekela. Buka, konkhe loku kwenteka, bese kwendlule iminyaka lengemakhulu lamatsatfu nemashumi lamatsatfu.

10 Futsi kwenteka kutsi emaNefi acala aphendvuka ebubini bawo, aphindze acala kukhala njengoba bekuphrofethe Samuweli umphrofethi; ngoba buka bekute namunye umuntfu lobekakwati kugcina loko lobekukwakhe, ngenca yemasela, netigebengu, nebabulali, nebuciko bemilingo, kanye nebutsakatsi lobebukhona eveni.

11 Ngako-ke kwacala kutsi kube khona kukhala kanye nekulila kulo lonkhe live ngenca yaletintfo, ikakhulukati emkhatsini webantfu baNefi.

12 Futsi kwenteka kutsi ngesikhatsi mine, Mormon, ngibona kulila nekukhala kwabo kanye nelusizi lwabo phambi kweNkhosi, inhlitiyo yami yacala kutfokota ngekhatsi kimi, ngekwati sihawu kanye nekumela bulukhuni kweNkhosi, ngako-ke nginekucabanga kutsi yayitawuba nesihawu kubo kute baphindze babe bantfu labalungile.

13 Kodvwa buka kutfokota kwami bekulite, ngoba kudzabuka kwabo bekungasiko kwekuphendvuka, ngenca yebuhle baNkulunkulu; kodvwa esikhundleni saloko bekukudzabuka kwekulahlwa, ngenca yekutsi iNkhosi beyingeke ivume njalo kutsi bajabule basesonweni.

14 Abatange bete kuJesu ngetinhlitiyo letidzabukile nangemoya lodzabukile, kodvwa bamcalekisa Nkulunkulu, baphindze bafisa kufa. Noko bebalwa ngenkemba kute basindzise timphilo tabo.

15 Futsi kwenteka kutsi kudzabuka kwami kwabuyela kimi, ngaphindze ngabona kutsi lusuku lwemusa bese lwendlulile kubo, ngekwasemhlabeni kanye nangekwakamoya; ngoba ngatibona tinkhulungwane tabo tijutjelwa phansi ngekuhlamuka Nkulunkulu wabo ngalokusobala, baphindze bacwabelana ndzawonye njengebulongo eveni. Futsi waphela ngaleyondlela-ke umnyaka wemakhulu lamatsatfu nemashumi lamane nakune.

16 Futsi kwenteka kutsi ngemnyaka wemakhulu lamatsatfu nemashumi lamane nesihlanu emaNefi acala kubalekela emaLamani; alandzelwa ate efika eveni laseJashoni, ngaphambi kwekutsi avinjwe ekuhociseni kwabo.

17 Manje, lelidolobha laseJashoni belisedvute nelive lapho Amaroni bekabeke khona imibhalo yeNkhosi, kute ingashabalaliswa. Buka besengihambe ngekwelivi la-Amaroni, futsi ngabatsatsa laboNgcwengcwe baNefi, ngenta umbhalo njengekwemavi a-Amaroni.

18 Futsi kubo labongcwengcwe baNefi ngilandzise ngalokugcwele ngabo bonkhe bubi kanye netinengiso; kodvwa kulaba bongcwengcwe ngikugwemile kutsi ngilandzise ngalokugcwele ngebubi kanye nangetinengiso tabo, ngoba buka, tigameko letiningi letichubekako tebubi kanye netinengiso betisolo tingaphambi kwemehlo ami solo ngaba mdzala ngalokwenele kutsi ngicondze tindlela temuntfu.

19 Maye kimi ngenca yebubi babo; ngoba inhlitiyo yami igcwele lusizi ngenca yebubi babo, tinsuku tonkhe tami; noko, ngiyati kutsi ngiyawuphakanyiswa ngelusuku lwekugcina.

20 Futsi kwenteka kutsi ngalomnyaka bantfu baNefi baphindze batingelwa bacoshwa kutsi babaleke. Futsi kwenteka kutsi sacoshwa sabaleka sate sefika ngasenyakatfo eveni lelalibitwa ngekutsi yiShemi.

21 Futsi kwenteka kutsi salicinisa lelidolobha laseShemi, sabagcogca bantfu betfu kangangoba besingakhona, kute mhlawumbe sibasindzise ekufeni.

22 Futsi kwenteka ngemnyaka wemakhulu lamatsatfu nemashumi lamane nesitfupha acala aphindze atseleka etikwetfu.

23 Futsi kwenteka kutsi ngakhuluma kubantfu bami, ngabancusa ngemandla lamakhulu, kutsi beme ngesibindzi ngaphambi kwemaLamani balwele bafati babo, nabantfwababo, nemiti yabo, kanye nemakhaya abo.

24 Futsi emavi ami abavusetela ngandlela tsite kutsi bacine, kangangekutsi abatange basawabalekela emaLamani, kodvwa bema ngesibindzi ngalokumelene nawo.

25 Futsi kwenteka kutsi salwa silibutfo lelitinkhulungwane letingemashumi lamatsatfu sibukene nelibutfo lelitinkhulungwane letingemashumi lasihlanu. Futsi kwenteka kutsi sema ngaphambi kwawo ngekucina lokukhulu kangangekutsi asibalekela.

26 Futsi kwenteka kutsi ngesikhatsi sekabalekile sawalandzela ngemabutfo etfu, saphindze sahlangabetana nawo, sawashaya; noko emandla eNkhosi aketanga kitsi; yebo, bese sishiyiwe kutsi sitilwele ngekwetfu, kangangekutsi Moya weNkhosi awutange uhlale kitsi; ngako-ke bese sibutsakatsaka njengabomnaketfu.

27 Futsi inhlitiyo yami yaba nelusizi ngenca yalesi sehlakalo lesikhulu sekukhatsateka kwebantfu bakitsi, ngenca yebubi kanye netinengiso tabo. Kodvwa buka, salwa nemaLamani kanye netigebengu taGadiyanthoni, sate saphindze sawatsatsa emave langemafa etfu.

28 Futsi umnyaka wemakhulu lamatsatfu nemashumi lamane nemfica besewendlulile. Ngemnyaka wemakhulu lamatsatfu nemashumi lasihlanu senta sivumelwano nemaLamani kanye netigebengu taGadiyanthoni, ngaso sehlukaniselana emave langemafa etfu.

29 Futsi emaLamani asinika live lelingasenyakatfo, yebo, kute kufike indleleni lencane lebeyiholela eveni lelingaseningizimu. Tsine saniketa emaLamani lonkhe lelive lelingaseningizimu.