Sehluko 3
Mormon ushumayela kuphendvuka kumaNefi—Atfola kuncoba lokukhulu futsi ayatikhukhumeta ngenca yemandla awo—Mormon uyala kuwahola, nemithandazo yakhe ngabo ite lukholo—INcwadzi yaMormon imema tivana letilishumi nakubili taka-Israyeli kutsi tikholwe livangeli. Cishe ngemnyaka weNkhosi wa 360 kuya kuwa 362.
1 Futsi kwenteka kutsi emaLamani awatange ete kutawukulwa kwate kwendlula iminyaka lelishumi. Buka, ngangisebentise bantfu bami, emaNefi, ekulungiseleleni emave awo kanye netikhali tawo kubhekana nesikhatsi semphi.
2 Futsi kwenteka kutsi iNkhosi yatsi kimi: Memetela kulabantfu utsi—Phendvukani, nite kimi, nibhajatiswe, niphindze nakhe libandla lami, niyawusindziswa.
3 Ngamemetela kulabantfu, kodvwa kwaba lite; futsi abatange babone kutsi bekuyiNkhosi leyayibasindzisile, yabanika litfuba lekuphendvuka. Buka batenta lukhuni tinhlitiyo tabo ngekumelana neNkhosi Nkulunkulu wabo.
4 Futsi kwenteka kutsi emvakwekwendlula kwemnyaka welishumi, lebekwenta, sekuhlangene konkhe, iminyaka lengemakhulu lamatsatfu nemashumi lasitfupha kusukela ekuteni kwaKhristu, inkhosi yemaLamani yatfumela incwadzi kimi, leyayingatisa kutsi bebalungiselela kuta kutawukulwa natsi.
5 Futsi kwenteka kutsi ngenta bantfu bami kutsi babutsane ndzawonye eveni iNcitsakalo, edolobheni lelaliseminceleni, ngasendleleli lencane lebeyiholela eveni lelingaseningizimu.
6 Kulapho lasawabeka khona emabutfo etfu, kute sivimbe emabutfo emaLamani, kute angatfoli nanoma nguliphi lemave etfu; ngako-ke saticinisa ngekumelana nawo ngemandla etfu onkhe.
7 Futsi kwenteka kutsi ngemnyaka wemakhulu lamatsatfu nemashumi lasitfupha nakunye emaLamani eta ehlela edolobheni iNcitsakalo kute atawukulwa natsi; futsi kwenteka kutsi ngalowo mnyaka sawehlula, kangangekutsi aphindze abuyela emaveni awo.
8 Ngemnyaka wemakhulu lamatsatfu nemashumi lasitfupha nakubili aphindze ehla kutawukulwa natsi. Saphindze sawehlula, sabulala sibalo lesikhulu sawo, kwatsi labafile bawo baphonswa elwandle
9 Manje, ngenca yalentfo lenkhulu bantfu bami, emaNefi, lebebayentile, bacala kutikhukhumeta ngenca yemandla abo, bacala kufunga phambi kwemazulu kutsi bebatawutiphindzisela ngengati yabomnakabo lebebabulewe titsa tabo
10 Bafunga ngemazulu, kanjalo nangesihlalo sebukhosi saNkulunkulu, kutsi bebatawukuya kuyawukulwa netitsa tabo, nekutsi bebayawutisusa tiphele nya eveni.
11 Futsi kwenteka kutsi mine, Mormon, ngala ngaphetsa kusukela ngaleso sikhatsi kuya phambili kutsi ngibe ngumekhuti kanye nemholi walabantfu, ngenca yebubi kanye netinengiso tabo.
12 Buka, ngangibaholile, nanoma kungenca yebubi babo ngangibaholile tikhatsi letiningi kute bayawukulwa, futsi ngangibatsandza, ngekwelutsandvo lwaNkulunkulu lolwalukimi, ngenhlitiyo yami yonkhe, futsi umphefumulo wami ubathandazela ngenshisekelo lenkhulu kuNkulunkulu wami lusuku lonkhe; noko, wawute lukholo, ngenca yebulukhuni betinhlitiyo tabo.
13 Futsi kukatsatfu ngibakhulula etandleni tetitsa tabo, kodvwa abatange baphendvuke etonweni tabo.
14 Ngesikhatsi sebafunge ngako konkhe loko lebebalelwe kona yiNkhosi kanye neMsindzisi wetfu Jesu Khristu, kutsi bebatawuhamba bayawukulwa netitsa tabo, batiphindzisele ngengati yabomnakabo, buka livi leNkhosi lefika kimi, latsi:
15 Kuphindzisela ngekwami, futsi mine ngiyawubuyisela; ngenca yekutsi labantfu abatange baphendvuke emvakwekutsi sengibakhululile, buka, bayawususwa baphele nya emhlabeni.
16 Futsi kwenteka kutsi ngala ngaphetsa kuhamba ngiyawukulwa netitsa tami; ngenta njengoba iNkhosi yayingiyaletile; ngema njengafakazi losibukeli kute ngivetele umhlaba tintfo lengatibona ngaphindze ngativa, njengoba tatibonakalisiwe ngaMoya lowawufakaze ngetintfo letatitawukwenteka.
17 Ngako-ke ngiyanibhalela nine, beTive, kanjalo, nine bendlu yaka-Israyeli, ngesikhatsi umsebenti sewucala, kuyawufanela kutsi nitilungiselele kubuyela eveni lelilifa lenu.
18 Yebo, bukani, ngibhalela yonkhe imikhawulo yemhlaba; yebo, kini, tivana letilishumi nakubili taka-Israyeli, leniyawukwehlulelwa ngekwemisebenti yenu ngulabo labalishumi nakubili Jesu labakhetsa kutsi babe bafundzi bakhe eveni laseJerusalema.
19 Ngetulu kwaloko, ngibhalela nensali yalabantfu, nabo labayawukwehlulelwa ngulabalishumi nakubili Jesu labakhetsa kulelive; bona bayawukwehlulelwa ngulabanye labalishumi nakubili Jesu labakhetsa eveni laseJerusalema.
20 Letintfo Moya uyativeta kimi; ngako-ke nginibhalela nonkhe. Futsi ngalesi sizatfu ngiyanibhalela, kute nati kutsi kumele nonkhe nime phambi kwesihlalo sekwehlulela saKhristu, yebo, wonkhe muntfu longewemndeni wonkhe wa-Adamu, futsi kumele nime kute nehlulelwe ngemisebenti yenu, noma ngabe mihle noma ngabe mibi.
21 Ngetulu kwaloko kute nikholwe livangeli laJesu Khristu, leniyawuba nalo emkhatsini wenu; futsi ngetulu kwaloko kute emaJuda, bantfu besivumelwano beNkhosi, babe nalomunye fakazi ngaphandle kwaloyo labambona baphindze bamuva; kutsi Jesu, loyo labambulala, bekanguye kanye Khristu kanye naNkulunkulu lucobo.
22 Futsi ngifisa kunenta nikholwe nonkhe nine mikhawulo yemhlaba kutsi niphendvuke niphindze nitilungiselele kutsi nime phambi kwesihlalo sekwehlulela saKhristu.