Sehluko 6
EmaNefi abutsana eveni laseKhumora kute acedzele timphi tekugcina—Mormon uyayifihla imibhalo lengcwele egcumeni iKhumora—EmaLamani ayancoba, futsi sive semaNefi siyabhujiswa—Emakhulu etinkhulungwane abulawa ngenkemba. Cishe ngemnyaka weNkhosi wa 385.
1 Manje sengiyawucedzela umbhalo wami lomayelana nekubhujiswa kwebantfu bami, emaNefi. Futsi kwenteka kutsi sahamba saya phambi kwemaLamani.
2 Futsi mine, Mormon, ngabhalela inkhosi yemaLamani incwadzi, nginesifiso sekutsi isivumele kutsi sibutsele ndzawonye bantfu betfu eveni laseKhumora, ngasegcumeni lebelibitwa ngekutsi yiKhumora, lapho besitawukulwa nawo.
3 Futsi kwenteka kutsi inkhosi yemaLamani yanginika lentfo lebengiyifisa.
4 Futsi kwenteka kutsi sahamba saya eveni laseKhumora, samisa emathende etfu atungeleta ligcuma iKhumora; bekunguseveni lemanti lamaningi, imifula, kanye nemitfombo; futsi lapha besinelitsemba lekutsi besitowehlula emaLamani.
5 Ngesikhatsi sekwendlule iminyaka lengemakhulu lamatsatfu nemashumi lasiphohlongo nakune, bese sibabutsele bonkhe bantfu betfu labesebasele eveni laseKhumora.
6 Futsi kwenteka kutsi ngesikhatsi sesibabutsele ndzawonye bonkhe bantfu baba sicuku sinye eveni laseKhumora, buka mine, Mormon, besengisebudzaleni; ngati kutsi bese kutoba ngumzabalazo wekugcina webantfu bakitsi, ngiyaletwe yiNkhosi kutsi ngingavumeli imibhalo lebeyindluliselwe bobabe betfu, lebeyingcwele, kutsi iwele etandleni temaLamani, (ngoba emaLamani bekatawuyishabalalisa) ngako-ke ngenta lombhalo ngiwususela kubongcwengcwe baNefi, ngawufihla egcumeni iKhumora yonkhe lemibhalo lebenginiketwe yona ngekwetsenjwa sandla seNkhosi, ngaphandle kwalaba bongcwengcwe labambalwa lengabaniketa indvodzana yami Moroni.
7 Futsi kwenteka kutsi bantfu bami, kanye nebafati nebantfwana babo, babese bayawabona emabutfo emaLamani ahamba eta ngakubo; bawalindza ngaloko kwesaba lokukhulu kwekufa lokugcwalisa tifuba tabo bonkhe lababi, kute balwe nawo.
8 Futsi kwenteka kutsi eta atawukulwa natsi, wonkhe umuntfu bekagcwele kwesaba ngenca yebukhulu besibalo sawo.
9 Futsi kwenteka kutsi abahlasela bantfu bami ngenkemba, nangebutjoki, nangemicibisholo, nangembazo, kanye nangato tonkhe tinhlobo tetikhali temphi.
10 Futsi kwenteka kutsi bantfu bami babulawa, yebo, netinkhulungwane letilishumi tami lebetinami, nami ngawela emkhatsini wato ngilimele; futsi endlula ngakimi kangangekutsi akatange angibulale.
11 Futsi ngesikhatsi sekendlulile abulele bonkhe bantfu ngaphandle kwalabangemashumi lamabili nakune betfu, (emkhatsini wabo bekukhona nendvodzana yami Moroni) sesisindzile ekubulaweni kwebantfu betfu, sabona ngakusasa, ngesikhatsi emaLamani sekabuyele etinkanjini tawo, sisetulu egcumeni iKhumora, bantfu bami labatinkhulungawane letilishumi labebabulewe, labebaholwa ngimi phambili.
12 Saphindze sabona tinkhulungwane letilishumi tebantfu bami labebaholwa yindvondzana yami Moroni.
13 Buka, tinkhulungwane letilishumi taGidigidona betifile, naye ngalokunjalo asekhatsi.
14 Futsi Lama bekafile netinkhulungwane takhe letilishumi; naGilgali bekafile netinkhulungwane takhe letilishumi; Limha bekafile netinkhulungwane takhe letilishumi; kanjalo naJenewumi bekafile netinkhulungwane takhe letilishumi; kanye naKhumeniha, naMoroniha, na-Anthiyonumu, naShibilomu, naShemi, naJoshi, bebafile netinkhulungwane tabo letilishumi umuntfu amunye.
15 Futsi kwenteka kutsi bekukhona labanye labalishumi labafa ngenkemba, kanye netinkhulungwane tabo letilishumi umuntfu amunye; yebo, ngisho nabo bonkhe bantfu bami, ngaphandle kwalabo labangemashumi lamabili nakune labebanami, kanjalo nalabebambalwa labebabalekele emaveni laseningizimu, nalabo labambalwa labebaphambukele kumaLamani, bebafile; tidvumbu tabo; nematsambo; kanye nengati bekulele phansi emhlabatsini, kushiywe tandla talabo labababulala kute kubole eveni, nekutsi kubhidlike kuphindze kubuyele kunina wako emhlabeni.
16 Futsi umphefumulo wami wadzabuka ngebuhlungu, ngenca yekubulawa kwebantfu bami, ngakhala ngatsi:
17 Awu nine labahle, ingabe niphambuke kanjani etindleleni teNkhosi! Awu nine labahle, ingabe nimlahle kanjani loyo Jesu, lobekeme netandla letivulekile kute anemukele!
18 Bukani, kube anikwentanga loku, beningeke nife. Kodvwa bukani, senifile, futsi sengikhalela kulahleka kwenu.
19 Awu nine madvodzana kanye nemadvodzakati lamahle, nine bobabe kanye nabomake, nine madvodza kanye nebafati, nine labahle, nife kanjani!
20 Kodvwa bukani, senihambile, futsi tinsizi tami ngeke tisanibuyisa.
21 Futsi lusuku luyeta masinyane lapho umtimba wenu lobhubhako kufanele wembatse kungabhubhi, lemitimba manje lebolako kufanele ibe yimitimba lengenakubola; ngaleso sikhatsi kufanele nime phambi kwesihlalo sekwehlulela saKhristu, kute nehlulelwe ngekwemisebenti yenu; nangabe nilungile, ngaleso sikhatsi niyawubusiswa naboyihlo lesebahamba phambi kwenu.
22 Awu kube beniphendvukile ngaphambi kwekutsi lokubhubha lokukhulu kute etikwenu. Kodvwa bukani, senihambile, naBabe, yebo, Babe loPhakadze wasezulwini, uyasati simo senu; futsi utawuniphatsa njengekwekulunga kanye nangekwemusa wakhe.