1 Riqui ñuca, Moroni, tucuchini ñuca taita Mormónpaj quilcashcata. Riqui, ñuca huaquin cuzascunata quilcanata charini, cuzascuna imami ñuca taita mandahuarca.

2 Cunan yalishca jipa chai jatun, manllanayai Cumorahpi macanajui jipa, riqui, Nefitacuna maijan pacajushca rirca urai llactaman Lamanitacunahuan huañuchi tucushca carca, paicuna tucuilla tucuringacaman.

3 Ñuca taitapash huañuchi tucushca carca, ñucalla causani quilcangapa llaquilla villaita ñuca llactapuracunapaj tucuchimanda. Ashtahuangari riqui, paicuna rishca, ñuca pactachini ñuca taitapaj rurachunbacha saquishcata. Ñucata huañuchina na huañuchinata, na yachanichu.

4 Chaimanda ñuca quilcasha, pacashapash quilcashcacunata alpapi; maiman ñuca rini na importanllu.

5 Riqui, ñuca taita cai quilcashcata rurarca, pai quilcashca munashcata. Riqui, ñuca quilcaiman cai jirru fangacunapi chusha tiajpica, ashtahuangari na tian; mineraltapash na charini, imashpa ñucalla cani. Ñuca taita huañushca macanajuipi, tucui ñuca aillupash, na ali rijsicunata maiman rinatapash na charini; Apunchij imauracaman saquinga ñuca causachun na yachani.

6 Riqui, chuscu patsaj huatacuna yalishca ñucanchi Apunchij, Jatun Quishpichij shamushcamanda.

7 Riqui, Lamanitacuna ñuca llactapura Nefitacunata huañuchishca, urai llactan llactan, pushtun pushtun, pipash na tiangacaman; jatun cashca paicunapaj urmai; ari, jatun manllanayai ñuca llactapura Nefitacunapaj tucuchi can.

8 Riqui Apunchijpaj maqui can caita rurashca. Riqui, Lamanitacuna macanajuipi can caishuhuan chaishuhuan; tucui cai alpa jahualla shuj catilla muyundi huañuchi, yahuar jichai can; pipash na yachan macanajui tucurinata.

9 Cunan, riqui, ñuca na ashtahuan nini paicunamanda, pipash na tian ashtahuangari Lamanitacunalla shuhuacunapash picuna causan alpa jahuapi.

10 Pipash na yachan ciertopacha Diosta ashtahuangari Jesúspaj discípulocunalla, picuna causarca alpapi imaura llactapuracunapaj na ali ruraicuna shina jatun cangacaman, Apunchij paicunata na saquirca llactapuracunahuan causachun; paicuna alpa jahuapi caj na caj maijan runapash na yachan.

11 Ashtahuangari riqui, ñuca taita, ñucapash paicunata ricurcanchi, paicuna ñucanchita achil yachachircapash.

12 Maijan cai quilcashcata chasquin, na alicachijpipash caipi na alicaicunata tarimanda, pai yachanga jatun cuzascunamanda. Riqui, ñuca cani Moroni; ushashpallaca, tucui cuzascunata cangunaman yachaj chayachiman.

13 Riqui, ñuca tucuchini cai llactapuracunamanda parlaita. Ñuca cani Mormónpaj churi, ñuca taita carca Nefipaj cati aillu.

14 Ñuca cani pimi pacan cai quilcashcata Apunchijman; jirru fangacunaca nimapash na valij can, Apunchijpaj rurachunbacha saquishcamanda. Pai ciertopacha nin pipash na caicunata chasquinga charijyangapa; ashtahuangari tandachishpa quilcashcata jatun valishca can; maijan caita michaman apamunga, paita Apunchij achilyachinga.

15 Pipash na ushaita chari ushanga caita michaman apamungapa imashpapash Dios paiman cushpalla; Dios munan cai rurashca cachun shujlla ricuihuan paipa punchapamba cachunlla, nacashpa alicachun punda caru caiman chaiman chajchui tucushca Apunchijpaj convenio llactapuracunapajman.

16 Achilyachishca can maijan caita michaman llujchin; imashpa cai yanamanda michaman llujchishca canga, Diospaj shimimanda; ari, cai alpamanda llujshimunga, punchallayachingapash yanallapi, llactapuracunapaj yachaiman shamunga; cai rurashcapash canga Diospaj ushaihuan.

17 Pandaicuna tiashpaca runapaj pandaicuna canga. Ashtahuangari riqui, ñucanchi na yachanchi pandaicunata; shina cashpapash Dios yachan tucui cuzascunata; chaimanda, maijan na alicachin, cuidari imashpapash peligropi canman ucu pachapaj ninapi.

18 Pimi nin: Ricuchihuai, nacashpa chugrishca cangui—pai cuidado cachun mandashcaman Apunchij na saquishcata.

19 Riqui, maijan ñapash ricushpa chasquichin ñapash randi chasquichishca canga; paipaj ruraicunamanda randi carashca canga; chaimanda, pi chugrichin Apunchijmanda randi chugrichishca canga.

20 Riqui imata achil quilcashca nin—runa na chugrichinga, pai na ricushpa chasquichinpash; imashpa ricushpa chasquichina ñucapaj can, Apunchij nin, venganzapash ñucapaj can, ñuca pagasha.

21 Pi fiñaita, macanajuipash huairata aisan Apunchijpaj rurana contra, Apunchijpaj covenio llactapurapapash pimi Israelpaj huasi cajpaj contra, nijpipash: Ñucanchi Apunchijpaj ruraita tucuchishun, Apunchij na yaringachu paipaj convenio imata pai rurashca Israelpaj huasiman—paipash peligropi can cuchushpa, shitai tucuna ninaman;

22 Mana tucurina Apunchijpaj munaicuna catinga, imaura tucui paipaj nishcapachacuna pactashca cangacaman.

23 Mascaichi Isaíaspaj achil villachiscacunata. Riqui, ñuca caicunata na quilcai ushani. Ari, riqui ñuca cangunaman nini, chai santocuna picuna rishca ñucata ñaupashpa, picunami cai alpata chasquishca carca, mañanga, ari, alpamanda Apunchijta mañanga; imashna Apunchij causan pai yaringa conveniota imata paicunahuan rurashca carca.

24 Pai yachan paicunapaj achil mañaicunata, paicunapaj huauquicunamanda rurashcata. Pai yachan paicunapaj feta, imashpa paipaj shutipi urcucunata shujman cuyuchi usharca; paipaj shutipi alpata chujchuchirca; paipaj shimi ushaimanda cárcelcunata urmachirca alpaman; ari, rupajuj jornopash na chugrichi usharca, sacha animalcunapash, veneno junda culebracunapash na usharca, paipaj shimi ushaimanda.

25 Riqui, paicunapaj achil mañaicuna carca paimanda Apunchij saquichun cai cuzascunata llujchichun.

26 Pipash na minishtin nina caicuna na llujshimunga, ciertopacha llujshimunga, imashpa Apunchij parlashca caita; imashpa alpamanda llujshimunga, Apunchijpaj maquihuan, pipash na caita jarcanga; cai llujshimunga shuj punllapi imaura cai nishca cajpi juyailla ruraita ricuchicunata ñana tianllu; cai llujshimunga imashna shuj huañushcamanda parlajuj laya.

27 Cai llujshimunga shuj punllapi imaura santocunapaj yahuar Apunchijman mañanga, pacalla tandanajunacunamanda, yanallapaj ruranacunamanda.

28 Ari, cai llujshimunga shuj punllapi imaura Diospaj ushaita na nishca cajpi, iglesiacuna huagliman tigrajpi, jariyashpa alsarijpi paicunapaj shungucunapi; ari, shuj punllapi imaura iglesiacunapaj pushajcuna, yachachijcuna jatarijpi paicunapaj shungucunapi jariyaipi, paicunapaj iglesiacunata catijcunapata ñucapaj cashcanman yangacaman.

29 Ari, cai shamunga shuj punllapi imaura ninacuna uyarijpi, ninan huairacuna, cushni llujshijun samai caru llactacunapi.

30 Uyaringapash macanajuicunamanda, ninan macanajuicuna shamugrin ninajujta, alpa mama chujchuicunapash tauca pushtucunapi.

31 Ari, yalinga shuj punllapi imaura jatun mapacuna tiajpi alpa jahuallapi; tianga huañuchicuna, shuhuaicuna, llullaicuna, umachicuna, fornicacióncuna, tucui laya millanayaicuna; imaura taucacuna tiajpi picuna ninga: Caita rurai, chaita rurai, imapash na canllu, imashpa Apunchij shinllichinga shina chai tucuri punllapi. Ashtahuangari ay shinacuna, imashpa paicuna can llaquipaj jayapi, na ali ruraicunapaj huatanacunapi.

32 Ari, yalinga chai shuj punllapi imaura iglesiacuna shayarishca canga, caicuna ninga: Shamuichi, cangunapaj culquihuan perdonashca canga cangunapaj juchacunamanda.

33 Oh na alita rurajcuna, huagli, na cazuj llactapuracuna, imashpata iglesiacunata shayachinguichi cangunapa culquita charingapa? Imashpata shujman tigrachinguichi achil Diospaj shimita, cangunapaj almacunaman condenaciónda apamui ushangapa? Riqui, ali ricuichi Diospaj achil ricuchinacunata; riqui, punlla shamun imaura tucui cai cuzascuna cangunapaman shamunga.

34 Riqui, Apunchij ricuchihuarca jatun juyailla cuzascunamanda imacuna ñalla shamunga, chai punlla cai cuzascuna cangunapaman ricurimunga.

35 Riqui, ñuca cangunaman parlani caipi cajpishna, ashtahuangari na caipi canguichi. Ashtahuangari riqui, Jesucristo ñucaman ricuchihuashca, ñuca yachani cangunapaj ruraicunata.

36 Ñuca yachani canguna purinajujta jariyaipi cangunapaj shungucunapi; na tianllu ashtahuangari huaquinlla picuna na alsarijcuna jariyaipi paicunapaj shungucunapi, ninan fino churajushcacunaman, envidia, fiñanajuicunamanbash, na alicunata rurachinapash, napacha ricunayachishpa catirianacuna, tucui laya na alita ruraicuna; cangunapaj iglesiacunapash, ari, tucuilla, mapayashcaman tigrashca cangunapaj shungucunapaj jariyaimanda.

37 Riqui, canguna culquita juyanguichi, cangunapaj minishtirishcapachata, cangunapaj fino churajunacuna, cangunapaj iglesiacunapaj juyaillayachinacunata, ashtahuan juyana randi huajchata, minishtijta, ungushcata, llaquillatapash.

38 Oh mapacuna, hipócritacuna, yachachijcuna, picuna jaturinguichi ima huaglichinaman, imashpata canguna mapayachinguichi Diospaj achil iglesiata? Imashpata pingaitucunguichi Cristopaj shutita apangapa? Imashpata na yuyanguichi chai jatun valij can mana tucurita chari cushijui, llaquita yali ima nimaura na tucurin—cai pachapaj jariyaimanda?

39 Imashpata juyaillayachinguichi imata na causaita charijta, ashtahuangari saquichiguichi yarjachishca, minishtishca, churajuna illa, ungushca, llaquihuan cangunapata yalichun, nachu ricurianguichi?

40 Ari, imashpata shayachinguichi cangunapaj pacalla millanayaicunata charijyangapa, shinanguichipash cusa illa huarmicuna huacachun Apunchijpaj ñaupapi, taita mama illacunapash huacachun Apunchijpaj ñaupapi, paicunapa taitacunapaj yahuarpash cusacunapapash Apunchijta mañan alpamanda venganzata cangunapaj umacunapi?

41 Riqui, venganzapaj espada cangunapaj jahuapi huarcushca; punlla ña shamun pai randipash ruranga santocunapaj yahuarta cangunapaj jahuapi, imashpa pai ashtahuan na saquinga paicunapaj huacaicunata.