1 Buka mine, Moroni, sengiyawucedzela umbhalo wababe, Mormoni. Buka, nginetintfo letimbalwa nje lengitawutibhala, lengiyaletwe ngato ngubabe.

2 Manje kwenteka kutsi emvakwemphi lenkhulu naleyesabekako lebeyiseKhumora, buka, lawo maNefi bekabalekele eveni lelingaseningizimu atingelwa ngemaLamani, ate onkhe abulawa.

3 Futsi nababe ngalokunjalo wabulawa ngiwo, sengisele ngedvwa kute ngibhale indzaba ledzabukisako yekubhujiswa kwebantfu bakitsi. Kodvwa buka, abasekho, futsi ngiyawufeza umyaleto wababe. Noma batawungibulala nami angati.

4 Ngako-ke ngitawubhala ngiphindze ngiyifihle lemibhalo ngaphansi kwemhlaba; futsi noma ngabe ngiya kuphi akunandzaba.

5 Buka, ngubabe lowente lombhalo, uyibhalile nenhloso yawo. Buka, bengiyawuyibhala nami kube benginendzawo kulabongcwengcwe, kodvwa ngite; nensimbi ngite, ngoba ngingedvwa. Babe ubulewe emphini, kanye nabo bonkhe bemndeni wami, ngite nebangani angati nekutsi ngitawuyakuphi; angati nekutsi iNkhosi itawungivumela ngihlale sikhatsi lesingakanani.

6 Buka, iminyaka lengemakhulu lamane seyendlulile kusukela ekufikeni kweNkhosi neMsindzisi wetfu.

7 Buka, emaLamani abatingele bantfu bami, emaNefi, lidolobha ngelidolobha nendzawo ngendzawo, bate baphela nya; futsi kube kukhulu kubhujiswa kwabo; yebo, kukhulu kuphindze kuyamangalisa kubhujiswa kwebantfu bami emaNefi.

8 Buka, sandla seNkhosi lesikwentile loku. Buka ngetulu kwaloko, nemaLamani asemphini lomunye nalomunye; futsi live lonkhe ligcwele kubulalana lokuchubekako kanye nekucitseka kwengati; kute losatiko siphetfo salemphi.

9 Manje, buka, angisasho lutfo mayelana nabo, ngoba kute namunye ngaphandle kwemaLamani kanye neletigebengu labasekhona eveni.

10 Futsi kute namunye lomatiko Nkulunkulu weliciniso ngaphandle kwebafundzi baJesu, labo labasala eveni bate bubi bebantfu baba bukhulu kakhulu kangangoba iNkhosi ayitange isabavumela kutsi bahlale nebantfu; futsi noma basekhona kulelive kute umuntfu lowatiko.

11 Kodvwa buka, mine kanye nababe sibabonile, futsi basisebentele.

12 Futsi loyo lotfola lombhalo, aphindze angawusoli ngenca yemaphutsa lakuwo, nguye loyawukwati ngetimo letinkhulu kunaleti. Buka, nginguMoroni; futsi kube bekungenteka, bengiyawunembulela tonkhe letintfo.

13 Buka, sengenta siphetfo senkhulumo mayelana nalabantfu. Ngiyindvodzana yaMormon, futsi babe bekawentalelwane yaNefi.

14 Futsi nginguye loyo lowafihla lombhalo eNkhosini; bongcwengcwe bawo abakabaluleki, ngenca yemyaleto weNkhosi. Ngoba ngempela yatsi kute namunye loyawubatfola kute atfole inzuzo; kodvwa lombhalo lokubo uligugu lelikhulu; futsi loyo loyawuwuveta, iNkhosi itawumbusisa.

15 Ngoba kute namunye longaba nemandla ekuwuveta ngaphandle kwekutsi awanikwe nguNkulunkulu; ngoba Nkulunkulu ufuna kutsi kwentiwe ngeliso lelitinikele lekuletsa ludvumo lwakhe, noma ngeliso lelitinikele kute kuzuze bantfu basendvulo kanye nalabo bantfu besivumelwano seNkhosi labahlakatwa kudzala.

16 Ubusisiwe loyo loyawuveta lentfo; ngoba iyawukhishwa ebumnyameni iletfwe ekukhanyeni, ngekwelivi laNkulunkulu; yebo, iyawukhishwa ngaphansi kwemhlaba, iyawukhatimula iphume ebumnyameni, yatiwe nabantfu; futsi loku kuyawukwentiwa ngemandla aNkulunkulu.

17 Uma ngabe kunemaphutsa kuyawuba maphutsa emuntfu. Kodvwa buka, tsine asalati liphutsa; noko Nkulunkulu wati tonkhe tintfo; ngako-ke, loyo losolako, akacaphele hleze abe sengotini yemlilo wesihogo.

18 Naloyo lotsi; Ngitjengise, noma kungenjalo uyawushaywa—akacaphele hleze ayalete ngaloko lokungavunyelwa yiNkhosi.

19 Ngoba buka, loyo lowehlulela ngekushesha naye uyawukwehlulelwa ngekushesha; ngoba inkhokhelo yakhe iyawuba njengekwemisebenti yakhe; ngako-ke, loyo loshayako naye uyawushaywa futsi, yiNkhosi.

20 Buka kutsi umbhalo longcwele utsini—umuntfu akangashayi, noma ehlulele; ngoba kwehlulela kwami, kusho iNkhosi, nekuphindzisela kwami, futsi ngimi lengiyawubuyisela.

21 Futsi loyo loyawukhuluma ngelulaka kanye nangekulwa ngalokumelene nemsebenti weNkhosi, nangalokumelene nebantfu besivumelwano beNkhosi lababendlu yaka-Israyeli, naloyawutsi: sitawubhubhisa umsebenti weNkhosi, iNkhosi ngeke isikhumbule sivumelwano sayo leyasenta kuyo indlu yaka-Israyeli—nguye loyo losengotini yekujutjwa aphonswe emlilweni.

22 Ngoba tinjongo taphakadze teNkhosi tiyawuchubeka njalo, tite tigcwaliseke tonkhe tetsembiso tayo.

23 Ticwaningeni tiphrofetho taka-Israyeli. Bukani ngeke ngikwati kutibhala. Yebo, bukani ngitsi kini, labo labangcwele labahambe phambi kwami, labebabanikati balelive, bayawukhala, yebo, ngisho baselutfulini bayawukhala eNkhosini; njengoba iNkhosi iphila iyawusikhumbula sivumelwano leyasenta nabo.

24 Iyayati imithandazo yabo, kutsi beyentelwe bomnakabo. Iyalwati lukholo lwabo, ngoba ngeligama layo bebangesusa tintsaba; futsi ngeligama layo bebangenta umhlaba utamatame; nangemandla elivi layo benta emajele kutsi adzilike phansi; yebo, abalimalanga ngisho nasesitsandvweni semlilo lesesabekako, ngisho nasetilwaneni tasendle nasetinyokeni letinebutsi, ngenca yemandla elivi lakhe.

25 Bukani, imithandazo yabo futsi beyentelwe loyo iNkhosi leyiyawumvumela kutsi avete letintfo.

26 Kute namunye lekufanele atsi angeke kwenteke, ngempela kuyawukwenteka, ngoba iNkhosi ikukhulumile loku; ngoba tiyawuvela ngaphansi kwemhlaba, ngesandla seNkhosi, kute namunye loyawukuvimba; kuyawukwenteka ngelusuku lapho kuyawutsiwa timangaliso atisenteki; futsi kuyawukwenteka kube shengatsi kukhona lokhuluma kulabafile.

27 Kuyawukwenteka ngelusuku lapho ingati yalabangcwele iyawukhala eNkhosini, ngenca yemacembu layimfihlo kanye nemisebenti yebumnyama.

28 Yebo, kuyawukwenteka ngelusuku lapho emandla aNkulunkulu sekaphikwa, futsi nemabandla sekanenkhohlakalo nekutichenya etinhlitiyweni tawo; yebo, ngisho nangelusuku lapho baholi bemabandla kanye bafundzisi bayawuphakama ngenca yekutichenya lokusetinhlitiyweni tabo, babe nemona ngisho nemalunga emabandla abo.

29 Yebo, kuyawukwenteka ngelusuku lapho bantfu bayawuva ngemililo, nangetiphepho, kanye nangetinkhungu tentfutfu emaveni angaphandle.

30 Ngetulu kwaloko bantfu bayawuva ngetimphi, emahemuhemu etimphi, kanye nangekutamatama kwemhlaba tindzawo ngetindzawo.

31 Yebo, kuyawukwenteka ngelusuku lapho kuyawube kukhona kungcola lokukhulu emhlabeni; kuyawuba khona kubulalana, nebugebengu, nekucamba emanga, nenkhohliso, nebugwadla, kanye nato tonkhe tinhlobo tetinengiso; lapho bayawuba baningi labayawutsi, yenta loku, noma yenta lokwa, futsi akusho lutfo, ngoba iNkhosi iyawubasekela labanjalo ngelusuku lwekugcina. Kodvwa maye kulabo, ngoba basenyongweni lebabako nasetibopheni tebubi.

32 Yebo, kuyawukwenteka ngelusuku lapho kuyawuba khona emabandla lakhiwe layawutsi: Wota kimi, futsi ngemali yakho uyawutsetselelwa tono takho.

33 Awu nine bantfu lababi nalabaphambene futsi lenibonhlokolukhuni, kuya ngani nitakhele emabandla kute nitfole inzuzo na? Kuya ngani nigucule livi lelingcwele laNkulunkulu, kute niletse lusizi emiphefumulweni yenu na? Bukani, tsembelani etembulweni taNkulunkulu; ngoba bukani, sikhatsi siyeta ngalolo suku lapho tonkhe letintfo kuyawufanela tigcwaliseke.

34 Bukani, iNkhosi ingikhombisile tintfo letinkhulu naletimangalisako mayelana naloko lokufanele kwenteke masinyane, ngalolo suku lapho letintfo tiyawuvela emkhatsini wenu.

35 Bukani, ngikhuluma kini shengatsi benikhona, kantsi anikho. Kodvwa bukani, Jesu Khristu ungikhombisile nine, futsi ngiyatati netento tenu.

36 Ngiyati kutsi nihamba ngekutichenya lokusetinhlitiyweni tenu; kute namunye ngaphandle nje kwalabambalwa kuphela labangatiphakamisi ngekutichenya lokusetinhlitiyweni tabo, lokubangela kutsi bagcoke tingubo letinhle kakhulu, lokubangela umona, nencabano, nenzondo, nekuhluphana, kanye nayo yonkhe inhlobo yebubi; nemabandla enu, yebo, ngisho onkhe, angcolile ngenca yekutichenya kwetinhlitiyo tenu.

37 Ngoba bukani, nitsandza imali, kanye netintfo tenu, kanye netingubo tenu letinhle kakhulu, kanye nekuhlotjiswa kwemabandla enu, ngetulu kwekutsi nitsandze labamphofu, kanye nalabeswele, labagulako kanye nalabahluphekile.

38 Awu nine leningcolile, nine batentisi, nine bafundzisi, lenitiyekelela kuloko lokutawukonakala, nilingcoliseleni libandla lelingcwele laNkulunkulu na? Kuya ngani nibe nemahloni ekutsi nibitwe ngelibito laKhristu na? Kuya ngani ningacabangi kutsi yinkhulu leyo ntfokoto lengapheli kunelusizi lolungasoze luphele—ngenca yeludvumo lwelive na?

39 Kuya ngani nitihlobise ngaloko lokute imphilo, kodvwa nibe nivumela labalambile, nalabeswele, nalabangcunu, nalabagulako kanye nalabahluphekako kutsi bendlule kini, futsi ningabanaki na?

40 Yebo, kungani nakha tinengiso tenu tangasese kute nitfole inzuzo, nente kutsi bafelokati balile phambi kweNkhosi, ngalokunjalo netintsandzane kutsi tilile ngaphambi kweNkhosi, futsi ngalokunjalo nengati yaboyise kanye nebayeni babo kutsi ikhale eNkhosini isuka phansi, kute kube khona kuphindzisela etikwetinhloko tenu na?

41 Bukani, inkemba yekuphindzisela ilengela ngetulu kwenu; futsi sikhatsi siyeta masinyane lapho ayawuyiphindziselela ingati yalabangcwele kini, ngoba ngeke isakuvumela kukhala kwabo nanini.