Sehluko 9
Moroni uncusa labo labangakholwa kuKhristu kutsi baphendvuke—Watisa ngaNkulunkulu wetimangaliso, lonika tembulo nalotfululela tipho netibonakaliso kulabetsembekile—Timangaliso tiyaphela ngenca yekungakholwa—Tibonakaliso tilandzela labo labakholwako—Bantfu bayancuswa kutsi bahlakaniphe baphindze bagcine imiyaleto. Cishe ngemnyaka weNkhosi wa 401 kuya kuwa 421.
1 Manje sengiphindze ngikhuluma mayelana nalabo labangakholwa kuKhristu.
2 Bukani, niyawukholwa yini elangeni lekuhanjelwa kwenu—bukani, ngesikhatsi iNkhosi ita, yebo, ngisho nangalolo suku lolukhulu lapho umhlaba uyawugocotwa ndzawonye njengelicansi, futsi konkhe kuyawuncibilikiswa kushisa lokukhulu, yebo, ngalolo suku lolukhulu lapho niyawuletfwa kutsi nitawuma phambi kweMvana yaNkulunkulu—ngaleso sikhatsi niyawusho yini kutsi kute Nkulunkulu?
3 Ngaleso sikhatsi niyawuchubeka yini nekumphika Khristu, noma niyawuyibona yini iMvana yaNkulunkulu na? Ngabe nicabanga kutsi ningahlala yini naye nati ngelicala lenu na? Nicabanga kutsi ningajabula yini kuhlala naloyo Muntfu longcwele, ibe imiphefumulo yenu ihlushwa kwati ngelicala lekutsi seloku niyayiphula imitsetfo yakhe?
4 Bukani, ngitsi kini niyawuba nelusizi kakhulu kuhlala naNkulunkulu longcwele nalolungile, nati ngekungcola kwenu phambi kwakhe, kunekutsi nihlale nalabajezisiwe esihogweni.
5 Ngoba bukani, ngesikhatsi niyawuletfwa kute nibone bungcunu benu phambi kwaNkulunkulu, kanjalo nenkhatimulo yaNkulunkulu, kanye nebungcwele baJesu Khristu, kuyawukokheleka lilangabi lemlilo longacisheki kini.
6 Awu uma kunjalo nine leningakholwa, phendvukelani eNkhosini; khalani kakhulu kuBabe egameni laJesu, kute mhlawumbe nitfolakale ningenasici, nimsulwa, nibahle, futsi nimhlophe, nihlantwe yingati yeMvana, ngalolo suku lolukhulu nelwekugcina.
7 Ngiphindze ngikhuluma kini nine leniphika tembulo taNkulunkulu, lenitsi setaphela, sekute tembulo, tiphrofetho, tipho, kuphiliswa noma kukhuluma ngetilimi kanye nekuhunyushwa kwetilimi.
8 Bukani, ngitsi kini, loyo lotiphikako letintfo akalati livangeli laKhristu; yebo, akayifundzi imibhalo lengcwele; uma ayifundzile, akayicondzi.
9 Ngoba asifundzi yini kutsi Nkulunkulu uyafana itolo, namuhla, naphakadze, futsi kuye kute kugucugucuka noma lokuncane nje kushintja?
10 Manje, uma niticabangele nkulunkulu logucukako, futsi kuye lokukhona lokuncane nje kushintja, uma kunjalo niticabangele nkulunkulu longasuye Nkulunkulu wetimangaliso
11 Kodvwa bukani, ngitawunikhombisa Nkulunkulu wetimangaliso, ngisho Nkulunkulu wa-Abrahama, naNkulunkulu wa-Isaka kanye naNkulunkulu waJakobe; futsi kusenguye loyo Nkulunkulu lowadala emazulu nemhlaba, kanye nato tonkhe tintfo letikuwo.
12 Bukani, wadala Adamu, nga-Adamu kweta kuwa kwemuntfu. Ngenca yekuwa kwemuntfu kweta Jesu Khristu, ngisho Babe kanye neNdvodzana; futsi ngenca yaJesu Khristu kweta kuhlengwa kwemuntfu.
13 Ngenca yekuhlengwa kwemuntfu, lokweta ngaJesu Khristu, babuyiselwa ebukhoneni beNkhosi; yebo, kungalendlela lapho bonkhe bantfu bayahlengwa, ngoba kufa kwaKhristu kufeza kuvuka kulabafile, lokufeza kuhlengwa ekulaleni lokungapheli, lapho bonkhe bantfu bayawuvuswa kuloko kulala ngemandla aNkulunkulu ngesikhatsi kukhala licilongo, futsi bayawuvuka, labancane nalabakhulu, bonkhe bayawukuma phambi kwesihlalo sakhe, sebahlengiwe baphindze bakhululwa kulesibopho sekufa saphakadze, lokukufa kwenyama.
14 Futsi emvakwaloko kuyawube sekuta kwehlulela kwaloNgcwele kubo; emvakwaloko kuta sikhatsi lapho loyo longcolile uyawuhlala angcolile, naloyo lolungile ahlale alungile; kutsi loyo lojabulile ahlale ajabulile; kutsi loyo longakajabuli ahlale angakajabuli.
15 Manje, Awu nine nonkhe leniticabangela nkulunkulu longeke ente timangaliso, ngifuna kunibuta kutsi, ngabe tonkhe letintfo setendlulile, leto lengikhulume ngato na? Ngabe siphetfo sesifikile na? Bukani ngitsi kini, Cha; futsi Nkulunkulu akayekeli kutsi abe nguNkulunkulu wetimangaliso.
16 Bukani, ngabe tintfo Nkulunkulu latentile atimangalisi yini emehlweni etfu na? Yebo, ngabe ngubani longacondza imisebenti lemangalisako yaNkulunkulu na?
17 Ngubani longatsi bekungasiso simangaliso kutsi ngelivi lakhe lizulu kanye nemhlaba kwabakhona; nangemandla elivi lakhe umuntfu wadalwa ngelutfuli lwemhlaba; futsi ngemandla elivi lakhe timangaliso tenteka na?
18 Ngubani longatsi Jesu Khristu akatange ente timangaliso letinkhulu letiningi na? Futsi kwabakhona timangaliso letinkhulu letiningi letentiwa ngetandla tebaphostoli.
19 Futsi uma ngabe kwaba khona timangaliso ngaleso sikhatsi, pho kungani Nkulunkulu asayekele kuba nguNkulunkulu wetimangaliso kodvwa abe anguMuntfu longagucuki? Bukani, ngitsi kini, akagucuki; uma agucuka angayekela kuba nguNkulunkulu; kodvwa akayekeli kuba nguNkulunkulu, futsi usenguye Nkulunkulu wetimangaliso.
20 Sizatfu sekutsi ayekele kwenta timangaliso emkhatsini webantfwana bebantfu kungoba bancishelwe lukholo, baphambukile endleleni lenguyonayona, futsi abamati Nkulunkulu lekufanele bametsembe.
21 Bukani, ngitsi kini loyo lokholwa kuKhristu, angangabati lutfo, noma ngabe yini layawuyicela kuBabe egameni laKhristu uyawuniketwa yona; futsi lesi setsembiso sawonkhewonkhe, kute kufike nasemikhawulweni yemhlaba.
22 Ngoba bukani, naku lokushiwo nguJesu Khristu, iNdvodzana yaNkulunkulu, kubafundzi bakhe labatawusala, yebo, kanjalo nakubo bonkhe bafundzi bakhe, nesicuku siva: Hambani niye emhlabeni wonkhe, nishumayele livangeli kubo bonkhe bantfu;
23 Futsi loyo lokholwako abhajatiswe uyawusindziswa, kodvwa loyo longakholwa uyawulahlwa;
24 Leti tibonakaliso tiyawubalandzela labo labakholwako—ngelibito lami bayawukhipha bodeveli; bayawukhuluma ngetilimi letinsha; bayawubamba tinyoka; futsi noma banatsa noma ngayini lebulalanako angeke behlelwe lutfo; bayawubeka tandla kulabagulako futsi baphile;
25 Futsi noma ngubani lokholwa egameni lami, angangabati lutfo, kuye ngitawuwacinisa onkhe emavi ami, kute kufike nasemikhawulweni yemhlaba.
26 Manje bukani, ngubani longamelana nemisebenti yeNkhosi? Ngubani longakuphika leyikushito? Ngubani longaphikisana nemandla lamakhulu eNkhosi? Ngubani longadzelela imisebenti yeNkhosi? Ngubani longadzelela bantfwana baKhristu? Bukani, nonkhe nine lenidzelela imisebenti yeNkhosi, niyawumangala futsi nibhubhe.
27 Awu ngako-ke ningadzeleli, futsi ningamangali, kodvwa vanini emavi eNkhosi, nicele kuBabe egameni laJesu noma yini leniyidzingako. Ningangabati, kodvwa kholwani, nicale njengasetikhatsini takadzeni, nite eNkhosini ngenhlitiyo yenu yonkhe, fezani kusindziswa kwenu ngekwesaba nangekutfutfumela phambi kwayo.
28 Hlakaniphani etinsukwini tekuvivinywa kwenu; tihlubuleni kuko konkhe kungahlanteki; ningaceli, kute nenelise tinkhanuko tenu, kodvwa celani ngekucina lokunganyakatiswa, kutsi ningakuvumeli kulingwa, kodvwa kutsi nisebentele Nkulunkulu weliciniso nalophilako.
29 Bonani kutsi anibhajatiswa ngalokungakafaneli; bonani kutsi anidli sidlo saKhristu ngalokungakafaneli; kodvwa bonani kutsi nenta tonkhe tintfo ngalokufanele, nikwente egameni laJesu Khristu, iNdvodzana yaNkulunkulu lophilako, uma nikwenta loku, nibeketele kute kube sekugcineni, ngeke nilahlwe ngaphandle.
30 Bukani, ngikhuluma nani shengatsi ngikhuluma ngikulabafile; ngoba ngiyati kutsi niyawuwatfola emavi ami.
31 Ningangisoli ngenca yeliphutsa lami, nababe kanjalo, ngenca yeliphutsa lakhe, noma labo lababhala ngaphambi kwakhe; kodvwa esikhundleni saloko mbongeni Nkulunkulu kutsi uwavetile emaphutsa etfu kini, kute nifundze kuhlakanipha kakhulu kunatsi.
32 Manje, bukani, siwubhale lombhalo ngekwelwati lwetfu, ngetinhlavu temagama letibitwa ngekutsi siGibhithe lesiguculiwe, letendluliswa futsi taguculwa ngitsi, ngendlela yekukhuluma kwetfu
33 Futsi kube bongcwengcwe betfu bebabakhulu ngalokwanele besiyawubhala ngesiHebheru; kodvwa siHebheru siguculwe ngitsi naso, kube besingabhala ngesiHebheru, bukani, beningeke nibe nemaphutsa embhalweni wetfu.
34 Kodvwa iNkhosi iyatati tintfo lesitibhalile, nekutsi kute namunye umuntfu lowati lulwimi lwetfu; futsi ngenca yekutsi kute labanye bantfu labati lulwimi lwetfu, ngako-ke ilungise tindlela tekuhunyushwa kwawo.
35 Futsi letintfo tibhalwe ngenhloso yekutsi tisuse ingati yabomnaketfu etingutjeni tetfu, lasebancishelwe lukholo.
36 Bukani, letintfo lebesitifisa mayelana nabomnaketfu, yebo, kubuyiselwa kwabo ekumatini Khristu, tingekwemithandazo yabo bonkhe labangcwele labahlala kulelive.
37 Futsi shengatsi iNkhosi Jesu Khristu ingavuma kutsi imithandazo yabo iphendvulwe ngekwelukholo; shengatsi Nkulunkulu Babe angasikhumbula sivumelwano lasenta nendlu yaka-Israyeli; futsi shengatsi angababusisa ingunaphakadze, ngekukholwa egameni laJesu Khristu. Amen.