1 Ināianei ahau, a Moronai, e paku tuhituhi i ētahi mea e rite ana ki tāku e pai ai; ā, kei te tuhituhi atu nei au ki ōku tuākana, ki ngā Rāmana; ā, e hiahia ana ahau kia mōhio ai rātou kua pahemo atu ngā tau neke atu i te whā rau e rua ngahuru mai i te tohu i homai nei mō te haerenga mai a te Karaiti.

2 Ā, ka hīritia ake e ahau ēnei tuhituhinga, whai muri iho i taku kōrerotanga atu i ētahi kupu ruarua i runga i te kupu whakahau ki a koutou.

3 Nana, kei te hiahia au kia akiaki i a koutou ina pānuitia ēnei mea e koutou, mehemea he whai mātauranga i roto i te Atua kia pānuitia ēnei mea, kia maumahara koutou ki te nui o tō te Ariki aroha ki ngā tamariki a te tangata, mai i te hanganga anō o Arama tae noa iho ki te wā e whiwhi ai koutou i ēnei mea, me te whakaaroarohia i roto i ō koutou ngākau.

4 Ā, ina whiwhi koutou i ēnei mea, ka akiaki au i a koutou kia uia e koutou te Atua, te Matua Ora Tonu, i runga i te ingoa o te Karaiti, mehemea e tika ana rānei ēnei mea; ā, ki te inoi ake i runga i te ngākau pono, i runga i te hiahia pono, e whakapono ana i te Karaiti, ka whakakitea atu e ia te tika o tēnei mea ki a koutou, i runga i te mana o te Wairua Tapu.

5 Ā, mā te mana o te Wairua Tapu e mōhio ai koutou ki te pono o ngā mea katoa.

6 Ā, ko ngā mea katoa e pai ana, he tika, ā, he pono; nā reira, kāore tētahi mea pai e whakakore atu i te Karaiti, engari ka whāki atu ko ia anō tērā.

7 Ā, mā te mana o te Wairua Tapu koutou e mōhio ai ko ia anō tērā; nā reira e akiaki ana ahau i a koutou kia kaua koutou e whakakore atu i te mana o te Atua; nā te mea e mahi ana ia i runga i te mana, e rite ana ki te whakapono o ngā tamariki a te tangata, e rite ana i nāianei, āpōpō, ā, āke tonu atu.

8 Hei āpiti anō, kei te akiaki au i a koutou, e aku teina, kia kaua koutou e whakakore atu i ngā takoha a te Atua, nā te mea he maha anō ērā; ā, e ahu mai ana ērā i taua Atua anō. Ā, he maha ngā huarahi e whakahaerehia atu ai ērā takoha; engari ko taua Atua anō e mahi ana i roto i te katoa; ā, kua hoatu ērā i runga i ngā whakakitenga o te Wairua o te Atua ki te tangata, hei oranga mō rātou.

9 Nana rā, kua hoatu te Wairua o te Atua ki tētahi, kia whakaako ia i te kupu whai mātauranga;

10 Ā, ki tētahi atu, kia whakaako ia i te kupu o te mātauranga i runga i taua Wairua anō;

11 Ā, ki tētahi atu, te whakapono tino nui rawa atu; ā, ki tētahi atu, ngā takoha whakaora i runga i taua Wairua anō;

12 Hei āpiti anō, ki tētahi atu, kia taea e ia te mahi merekara nunui;

13 Hei āpiti anō, ki tētahi atu, kia taea e ia te poropiti e pā ana ki ngā mea katoa;

14 Hei āpiti anō, ki tētahi atu, te kitenga i ngā anahera me ngā wairua e minita mai ana;

15 Hei āpiti anō, ki tētahi atu, ngā arero katoa;

16 Hei āpiti anō, ki tētahi atu, te whakamāoritanga i ngā reo me ngā reo kē atu.

17 Ā, e ahu mai ana ēnei takoha katoa i runga i te Wairua o te Karaiti; e puta mai ana ērā mea ki ngā tāngata katoa, e rite ana ki tāna i pai ai.

18 Ā, e akiaki ana au i a koutou, e aku teina aroha, kia mahara tonu koutou e ahu mai ana ngā takoha katoa i te Karaiti.

19 Ā, e hiahia ana au kia akiaki i a koutou, e aku teina aroha, kia mahara koutou he rite ia inānahi, ināianei, ā, āke tonu atu, ā, ko ēnei takoha katoa kua kōrerotia ake nei, koia he mea wairua, e kore rawa e whakamutua atu, i ngā wā katoa e tū ana te ao, e rite ana anake ki te whakaponokore o ngā tamariki a te tangata.

20 Nā reira, me ai he whakapono; ā, mehemea me ai he whakapono me ai anō hoki he tūmanako; ā, mehemea me ai he tūmanako me ai anō hoki he aroha noa.

21 Ā, ki te kore ō koutou aroha noa, e kore rawa koutou e whakaorangia i roto i te kīngitanga o te Atua; e kore rawa rānei koutou e taea te whakaora i roto i te kīngitanga o te Atua mehemea kāore ō koutou whakapono; e kore rawa koutou e taea ki te kore ō koutou tūmanako.

22 Ā, ki te kore ō koutou tūmanako, he tika kei te ngākau kore koutou; ā, ka puta te ngākau kore nā te kino.

23 Ā, i pono tā te Karaiti kōrero atu ki ō tātou tūpuna: Mehemea he whakapono tōu ka taea e koutou ngā mea katoa e tika ana ki ahau.

24 Ināianei ā, e kōrero ana au ki a koutou e ngā tōpito katoa o te ao—nā, ki te haere mai te rā e whakamutua atu te mana me ngā takoha a te Atua i waenganui i a koutou, ka meatia nā te whakaponokore.

25 Ā, auē te mate mō ngā tamariki a te tangata mehemea koinei te āhua; nā te mea kāore i reira tētahi e mahi pai ai i waenganui i a koutou, kāore kau te mea kotahi. Nā te mea mehemea i reira tētahi i waenganui i a koutou e mahi pai ana, ka mahi ia i runga i te mana me ngā takoha a te Atua.

26 Ā, auē te mate mō te hunga e whakamutua atu ana ēnei mea, ā, ka mate, nā te mea ka mate rātou i roto i ō rātou hara, ā, tē taea rātou te whakaora i roto i te kīngitanga o te Atua; ā, kei te kōrerotia tērā e au e rite ana ki ngā kupu a te Karaiti;

27 Ā, e akiaki ana au i a koutou kia mahara ki ēnei mea; nā te mea e wawe mai ana te wā e mōhio ai koutou kāore au i te rūkahu, nā te mea ka kite koutou i ahau i te pae o te Atua; ā, ka kī atu te Ariki te Atua ki a koutou: Kāore au i whakapuaki atu i aku kupu ki a koutou, kua tuhia nei e tēnei tangata, e rite ana ki tētahi e karanga ake ana i te mate, āe rā, e rite ana ki tētahi e kōrero ake ana i te puehu?

28 Kei te whakapuaki atu au i ēnei mea ki a koutou hei whakatutukiranga i ngā poropititanga. Ā nana, ka puta atu ēnei mea i te māngai o te Atua Ora Tonu; ā, ka whakahī atu tana kupu i tēnei whakatipuranga ki tētahi atu whakatipuranga.

29 Ā, ka whakakite atu te Atua ki a koutou, he pono tāku i tuhituhi ai.

30 Hei āpiti anō ka akiaki au i a koutou kia haere mai ki te Karaiti, kia mau ki ngā takoha pai katoa, kia kaua e pā atu ki te takoha kino, ki te mea poke rānei.

31 Ā, e oho, whakatika ake i te puehu, E Hiruharama; āe rā, whakamaua ō koutou kākahu ātaahua, E te tamāhine a Hīona; ā, whakakahangia āu takiwā, ā, whakanuia ō koutou rohe mō āke tonu atu, kia kore tonu koutou e whakapōauautia tonutia, kia tutuki ai ngā kawenata a te Matua Ora Tonu i kawenata ai ia ki a koe, E te whare o Iharaira.

32 Āe rā, haere mai ki te Karaiti, kia whakatikaina ake i roto i a ia, ā, whakakorengia atu e koutou te hē katoa i a koutou; ā, ki te whakakorengia atu ngā hē katoa i a koutou anō, kia aroha koutou ki te Atua i runga i tō koutou ngoi katoa, hinengaro katoa me tō koutou kaha, kātahi ka ranea tōna aroha ki a koutou, nā, mā tōna aroha koutou e whakatikaina ake nei i roto i te Karaiti; ā, mehemea ka tino tika rawa atu koutou i roto i te Karaiti i runga i te aroha o te Atua, kāore e taea ana e koutou te whakakāhore nei i te mana o te Atua.

33 Hei āpiti anō, mehemea ka tino tika rawa atu koutou i roto i te Karaiti i runga i te aroha o te Atua, e kore rānei e whakakāhore i tōna mana, kātahi koutou ka whakatapua i roto i te Karaiti i runga i te aroha o te Atua, mā roto i te whakahekenga o te toto o te Karaiti, kei roto nei i te kawenata a te Matua ki te murunga i ō koutou hara, kia meinga tapu koutou, kia kohakore ai.

34 Ināianei ā, ko taku poroporoaki tēnei ki a koutou katoa. Meake ka haere au kia okioki i te pararaiha o te Atua, kia whakakotahi mai anō tōku wairua me tōku tīnana, ā, ka kawea ahau i runga i te hau, kia tūtaki atu ki a koe i mua i te pae āhuareka o Ihowa nui, te Kaiwhakawā Ora Tonu me te hunga ora me te hunga mate. Āmine.