1 He pukapuka nā tōku matua a Moromona, kua tuhia ki ahau, a Moronai; ā, i tuhia ki ahau i muri tata i taku karangatanga ki te minitatanga. Ā, i tuhia e ia ki ahau i runga i tēnei āhuatanga, e mea ana:

2 E taku tama aroha, a Moronai, e tino hari ana ahau mō tōu Ariki a Ihu Karaiti i mahara mai ki a koe, ā, kua karangatia koe ki tana minitatanga, ā, ki tana mahi tapu.

3 E aro ana aku inoi ki a koe i ngā wā katoa, e inoi tonu ana ki te Atua te Matua i runga i te ingoa o tana Tamaiti Tapu, a Ihu, māna koe, he mea nā tōna pai mutunga kore me tōna aroha mutunga kore, e pupuri i runga i te pūmautanga o te whakapono ki tōna ingoa tae noa atu ki te mutunga.

4 Ināianei ā, e taku tama, ka kōrero atu au ki a koe e pā ana ki tētahi mea e tino whakapōuri nei i ahau; nā te mea e pōuri ana ahau i te aranga ake o ngā tautohetohenga i waenganui i a koutou.

5 Nā te mea, mehemea kua akona au ki te pono, kei roto i a koutou ngā tautohetohenga e pā ana ki te rumakitanga o ā koutou tamariki nohinohi.

6 Ināianei ā, e taku tama, e hiahia ana ahau kia kaha ū koe ki te mahi, kia murua atu tēnei hē nui i roto i a koutou; ina hoki, nā konei i tuhituhi ai ahau i tēnei pukapuka.

7 Nā te mea whai muri tata iho i taku rongonga i ēnei mea i a koe ka uiui atu au ki te Ariki e pā ana ki te take. Ā, ka tau mai te kupu a te Ariki i runga i te kaha o te Wairua Tapu, e mea ana:

8 Whakarongo ki ngā kupu a te Karaiti, tōu Kaihoko, tōu Ariki me tō koutou Atua. Nana, kīhai au i haere mai ki te ao ki te karanga atu ki te hunga tika engari ki te karanga atu ki te hunga hara kia rīpenetā; kāore he take kia whai rata ai te hunga whaiora, engari ko te hunga e māuiui ana; nā reira, he whaiora ngā tamariki nohinohi, nā te mea kāore e āhei ana i a rātou te hara; nā reira ka whakamutua atu te kanga a Arama i roto i ahau, nā, kāore ōna kaha ki runga i a rātou; ā, kua whakamutua atu te ture o te kotinga i roto nei i ahau.

9 Ā, i whakakite atu te Wairua Tapu i te kupu a te Atua ki ahau i runga i tēnei āhuatanga; nā reira, e taku tama aroha, e mōhio ana au he karakia tāwai i te aroaro o te Atua, kia rumaki koutou i ngā tamariki nohinohi.

10 Nana ko taku kupu tēnei ki a koe, nā, māu tēnei mea e whakaako—ko te rīpenetātanga me te rumakanga ki te hunga e mōhio ana, e taea ana ki te mahi kino; āe rā, whakaakona ngā mātua, nā, me rīpenetā rātou, ā, me rumaki rātou, ā, me whakaiti rātou i a rātou anō kia rite ki ā rātou tamariki nohinohi, ā, kia whakaorangia ai rātou me ā rātou tamariki nohinohi.

11 Ā, kāore he take kia rīpenetā ngā tamariki nohinohi, kāore rānei he take kia rumakina. Nana, he meatanga te rumakitanga ki te rīpenetātanga ki te whakatutukitanga i ngā whakahaunga hei murunga hara.

12 Engari e ora ana ngā tamariki i roto i te Karaiti, mai i te tūāpapa rā anō o te ao; ki te kore, he Atua hauwhā te Atua, ā, he Atua panoni anō hoki, ā, he Atua whakapai kanohi; nā te mea tokohia ngā tamariki kua matemate nei, ā, kīhai i rumakina!

13 Nā reira, mehemea kāore i taea te whakaora ngā tamariki nohinohi motu kē atu i te rumaki, e tika ana kia haere atu ēnei ki tētahi ao rēwera mutunga kore.

14 Nana ko taku kupu tēnei ki a koe, kei te au o te kawa, ā, kei te herenga o te hara te tangata e whakaaro ana me rumaki ngā tamariki; nā te mea kāore ōna whakapono, ōna tūmanako, kāore rānei ōna aroha noa; nā reira, me hātepe atu ia i a ia e whakaaro ana, me haere iho ia ki te ao rēwera.

15 Nā te mea he whakawehi te kino nei kia whakaaro ake ka whakaora te Atua i tētahi tamaiti nā te rumakanga, ā, kia ngaro atu tērā atu nā te mea kīhai ia i rumakina.

16 Auē te mate mō rātou te hunga e whakapeau i ngā huarahi a te Ariki i runga i tēnei ritenga, nā te mea ka ngaro rātou ki te kore rātou e rīpenetā. Nana, kei te kōrero au i runga i te māia, kua whakamanaia au e te Atua; ā, kāore au e wehi ana ki tā te tangata e taea ai te mahi; nā te mea ka makaia atu te wehi katoa e te aroha tino pono.

17 Ā, kua kī au i te aroha noa, koia ko te aroha mutunga kore; nā reira, he rite ngā tamariki katoa ki ahau; nā reira, e aroha ana au ki ngā tamariki i runga i te aroha tino pono; ā, he rite katoa rātou, ā, ka whiwhi rātou i te whakaoranga.

18 Nā te mea kei te mōhio au ehara te Atua i te Atua hauwhā, ehara rānei i te Atua panoni; engari tūturu tonu ia nō mua iho, ā, āke, ake, ake.

19 Kāore e taea ana e ngā tamariki nohinohi te rīpenetā; nā reira, he whakarihariha kino te whakakore atu i te aroha tūturu o te Atua ki a rātou, nā te mea e ora katoa ana rātou i roto i a ia nā tōna aroha.

20 Ā, e whakakore ana te tangata e mea ana me rumaki ngā tamariki nohinohi i te aroha o te Karaiti me te whakatau he mea kore te whakamārietanga o te mea me te mana o tana hokonga.

21 Auē te mate mō te hunga pērā, nā te mea e tata mai ana te mate ki a rātou, te ao rēwera, me tētahi whakamamaetanga mutunga kore. Kei te kōrerohia e au i runga i te māia; Kua whakahau te Atua ki ahau. Whakarongo ki a rātou, ā, kia aro atu, ka tū atu rānei rātou ki a koe hei te nohoanga-whakawā o te Karaiti.

22 Nā te mea tirohia ngā tamariki nohinohi katoa e ora ana i te Karaiti, me te hunga katoa anō hoki kāore i a rātou te ture. Nā te mea ka tau te mana o te hokonga ki runga i te hunga katoa kāore ō rātou ture; nā reira, kāore e taea ana e te tangata kāore i whakahēngia, kāore rānei i raro iho i tētahi whakahēnga te rīpenetā; ā, kāore hoki he painga ō te rumakanga ki ngā mea pērā—-

23 Engari he tāwai tēnā i te aroaro o te Atua, e whakakāhore ana i te whakaaroha o te Karaiti, me te kaha o tana Wairua Tapu, me te whakawhirinaki ki runga i ngā mahi mate.

24 Nana, e taku tama, e tika ana kia kore tēnei mea; nā te mea mā te hunga kei raro iho i te whakahēnga, ā, i raro iho i te kanga o tētahi ture whati te rīpenetātanga.

25 Ā, ko te hua mātāmua o te rīpenetātanga, arā, ko te rumaki; ā, e ahu mai ana te rumaki i te whakapono tae atu ki te whakatutukiranga o ngā whakahaunga; ā, ka puta ake te murunga hara i te whakatutukiranga i ngā whakahaunga;

26 Ā, ka puta ake te māhaki, te ngākau pāpaku i te murunga hara; ā, nā te māhaki me te ngākau pāpaku puta ake ai te toronga iho o te Wairua Tapu, koia te Kaiwhakaāio e whakakī nei ki te tūmanako me te tino aroha, ko taua aroha he mea mau tonu i runga i te tākare tonu ki te inoi, tae atu ki te putanga mai o te mutunga, ina nohotahi te hunga tapu katoa ki te Atua.

27 Nana, e taku tama, ka tuhituhi atu anō au ki a koe ki te kore au e haere ākuanei atu ki ngā Rāmana. Nana, ko te whakapehapeha o tēnei iwi, o te iwi rānei o ngā Nīwhai, i tūturu ai tō rātou whakangaromanga ki te kore rātou e rīpenetā.

28 Me inoi mō rātou, e taku tama, kia puta ai te rīpenetātanga ki a rātou. Engari nana, e wehi ana au kei mutu tā te Wairua tohe ki a rātou; ā, kei tēnei wāhi o te whenua e whai ana anō hoki rātou ki te turaki iho te kaha me te mana katoa e ahu mai ana i te Atua; ā, kei te whakakāhore rātou i te Wairua Tapu.

29 Ā, hei muri iho i te whakaparahako i tētahi mātauranga nui rawa, e taku tama, meake rātou ngaro ai, kia tutuki ai ngā poropititanga i kōrerohia ake nei e ngā poropiti, me ngā kupu anō hoki a tō tātou Kaiwhakaora ake anō.

30 Hei konā rā, e taku tama, kia tuhituhi atu anō au ki a koe, kia tūtaki anō rānei ki a koe. Āmine.