1 Ināianei ahau, a Moronai, e tuhituhi nei i ngā kupu ruarua a tōku matua a Moromona, i kōrero ai ia e pā ana ki te whakapono, te tūmanako me te aroha noa; nā te mea i runga i tēnei ritenga i kōrero ai ia ki te iwi, e pērā ana i tāna i whakaako ai i a rātou i roto i te whare karakia i hangaia ai e rātou hei wāhi koropiko.

2 Ināianei ahau, a Moromona e kōrero atu nei ki a koutou, e aku teina aroha; ā, he mea nā te aroha o te Atua te Matua, me tō tātou Ariki a Ihu Karaiti, me tōna hiahia tapu, nā tōna takohatanga o tana karangatanga ki ahau, nā, i tukua ai ahau ki te kōrero atu ki a koutou i tēnei wā.

3 Nā reira, e hiahia ana ahau ki te kōrero atu ki a koutou ngā mea o te hāhi, ko koutou nei ngā kaiaruaru a te Karaiti, ā, kua whiwhi i tētahi tūmanako nui e taea ai e koutou te tomo atu ki roto i te okiokinga o te Ariki, mai i tēnei wā tae noa atu ki te wā e whiwhi koutou i te okiokinga ki a ia i te rangi.

4 Ināianei ā e aku teina, kei te whakawā au i ēnei mea mō koutou he mea nā tā koutou hīkoi rangimārie me ngā tamariki a te tangata.

5 Nā te mea e mahara ana au ki te kupu a te Atua e mea ana mā ā rātou mahinga e mōhio ai koutou ki a rātou; nā te mea mehemea he pai ā rātou mahinga, nā, he pai anō hoki rātou.

6 Nana rā, kua kī mai te Atua kāore e taea ana e te tangata e kino ana ki te mahi pai; nā te mea mēnā ka tuku atu i tētahi taonga, ka inoi rānei ki te Atua, ki te kore e meatia e ia i runga i te tino hiahia kāore he painga mōna.

7 Nana rā, kāore e tatauria atu ki a ia hei tika.

8 Nana rā, mehemea ka hoatu tētahi taonga e tētahi tangata e kino ana, ka meatia e ia i runga i te manawapā; nā reira ka tatauria atu ki a ia me te mea nei kua kaiponuhia e ia te taonga; nā reira ka tatauria ia hei mea kino i te aroaro o te Atua.

9 Waihoki ka tatauria ki te tangata hei mea kino, ki te inoi ia i runga i te tino hiahia kore o te ngākau; āe rā, kāore he painga mōna, nā te mea kāore te Atua e whakawhiwhi i ngā mea pērā.

10 Nā reira, kāore e taea ana e te tangata e kino ana te mahi i te pai; kāore rānei ia e hoatu i tētahi taonga pai.

11 Nana rā, e kore te puna kawa e āhei te whakaputa mai i te wai pai; e kore rānei te puna pai e āhei te whakaputa i te wai kawa; nā reira, e kore te tangata e mahi pononga ki te rēwera e āhei te whai i te Karaiti; ā, ki te whai atu ia i te Karaiti e kore ia e āhei te mahi pononga atu ki te rēwera.

12 Nā reira, e ahu mai ana ngā mea pai katoa i te Atua; ā, e ahu mai ana ngā mea kino katoa i te rēwera; nā te mea he hoariri te rēwera ki te Atua, ā, e whawhai tonu ana ki a ia, ā, e pōhiri ana, e whakawai ana kia hara, me te mahi tonu i ērā mea e kino ana.

13 Engari nana, ko tā te Atua e pōhiri nei, e whakawai nei kia mahi tonu i te pai; nā reira, ko ngā mea katoa e pōhiri ana, ā, e whakawai ana kia mahi pai, kia aroha ki te Atua, kia mahi ki a ia he mea nā te hā o te Atua.

14 Nā reira, kia tūpato, e aku teina aroha, kei whakawā koutou i ērā mea e kino ana hei mea nā te Atua, ngā mea e pai ana nā te Atua rānei hei mea nā te rēwera.

15 Nana rā, e aku teina, kua tukuna atu ki a koutou kia whakawākia, kia mōhio ai koutou te pai i te kino; ā, he mārama te huarahi hei whakawā, e mōhio ai koutou i runga i tētahi mātauranga tino tika, e pērā ana me te awatea i te pō.

16 Nana rā, kua hoatu te Wairua o te Karaiti ki ngā tāngata katoa, kia mōhio ai ia ki te pai i te kino; nā reira, kei te whakakite atu au ki a koutou te āhua e whakawā ai koutou; nā te mea kua tonoa iho ngā mea katoa e pōhiri ana ki te mahi pai, me te whakapakepake kia whakapono ai i te Karaiti kua tonoa e te mana me te takoha o te Karaiti; nā reira mōhio ai koutou i runga i te mātauranga tino tika he mea nā te Atua.

17 Engari, ko ngā mea katoa e whakapakepake ana i te tangata ki te mahi kino, ā, kia kaua e whakapono i te Karaiti, me te whakakāhore i a ia, ā, kia kaua e mahi ki te Atua, kātahi ka mōhio koutou i runga i tētahi mātauranga tino tika nō te rēwera tērā; nā te mea ka mahi te rēwera i runga i tēnei āhua, nā te mea kāore ia e whakapakepake i te tangata kotahi ki te mahi pai, kāo; kāore e pēnā anō āna anahera; kāore rānei ngā mea e tuohu iho ana ki a ia.

18 Ināianei ā, e aku teina, e kitea ana kei te mōhio koutou ki te māramatanga e whakawā ai koutou, ko taua māramatanga ko te māramatanga o te Karaiti, tirohia kei whakawā hē koutou; nā te mea ka whakawākia koutou i runga i te āhua i whakawākia ai e koutou anō hoki.

19 Nā reira, e tohe ana ahau ki a koutou, e ngā teina, kia āta rapu mārire koutou i runga i te māramatanga o te Karaiti kia mātau ai koutou ki te pai i te kino; ā, ki te mau koutou ki ngā mea katoa e pai ana, ā, ki te kore e whakahēngia, ka tino meinga koutou hei tamariki nā te Karaiti.

20 Ināianei ā, e aku teina, mā te aha e āhei ai i a koutou te mau ki ngā mea pai katoa?

21 Ināianei ā ka aro atu au ki taua whakapono, i kī ai ahau māku e korero atu nei; ā, māku e kōrero te huarahi ki a koutou e āhei ai i a koutou te mau ki ngā mea pai katoa.

22 Nana rā, e mōhio ana te Atua ki ngā mea katoa, he mea nō te mau tonu ki te mau tonu, nana, nāna ngā anahera i tono ki te minita ki ngā tamariki a te tangata, kia whakakitea atu e pā ana ki te haerenga mai a te Karaiti; ā, ka puta mai i te Karaiti ngā mea pai katoa.

23 Ā, i whakapuaki atu anō te Atua ki ngā poropiti, e tōna ake māngai, e haere mai ai te Karaiti.

24 Ā nana, he maha ngā huarahi i whakakitea atu ai e ia ngā mea ki ngā tamariki a te tangata, koia he mea pai; ā, e puta mai ana ngā mea pai katoa i te Karaiti; me i kore kua taka te tangata, ā, kāore tētahi mea pai e puta ake ki a rātou.

25 Nā reira, mā te minitatanga a ngā anahera, ā, mā ngā kupu katoa e puta ake ana i te māngai o te Atua, i tīmata ai tā te tangata whakapakari i roto i te whakapono o te Karaiti; ā, pēnei nā te whakapono, i mau ai rātou ki ngā mea pai katoa; ā, i pēneitia tae atu ki te haerenga mai a te Karaiti.

26 Ā, i muri iho i tana haerenga mai ka whakaorangia te tangata i runga i te whakapono ki tōna ingoa; ā, nā te whakapono, ka meinga rātou hei tama nā te Atua. Ā, he pono e ora ana te Atua i kōrero ia i ēnei kupu ki ō tātou tūpuna, e mea ana: Ko ngā mea katoa e inoi ai koutou ki te Matua, mēnā e pai ana, i runga i te whakapono ka riro i a koutou, nana, ka meatia ki a koutou.

27 Nā reira, e aku teina aroha, kua mutu ngā merekara nā te kakenga ake o te Karaiti ki roto i te rangi, ā, kua noho iho i te ringa matau o te Atua, kia riro mai i te Matua ana tikanga aroha kua meatia e ia ki runga i ngā tamariki a te tangata?

28 Nā te mea kua whakautua e ia ngā tōpito katoa o te ture, ā, māna katoa te hunga e whakapono ana ki a ia; ā, ka piri te hunga whakapono ki ngā mea pai katoa; nā reira ka wawao ia mō ngā tamariki a te tangata; ā, ka noho tonu atu ia i ngā rangi.

29 Ā, mōna i pēnei ai, e aku teina aroha, kua mutu ngā merekara? Nana ko taku kupu tēnei ki a koutou, Kāo; kāore anō rānei kia mutu i ngā anahera te minita ki ngā tamariki a te tangata.

30 Nana rā, kei raro rātou i tōna mana, hei minita kia rite ki tana whakahau, e whakakite atu ana rātou i a rātou anō ki te hunga whakapono kaha, ā, ki te hunga hinengaro ū i roto i ngā āhuatanga katoa o te atuatanga.

31 Ā, ko te tikanga o tā rātou minitatanga, koia hei karanga atu i ngā tangata ki te rīpenetātanga, me te whakaea me te mahi i ngā mahi kawenata a te Matua, kua kawenatatia e ia ki ngā tamariki a te tangata, ki te whakarite i te huarahi ki waenganui i ngā tamariki a te tangata, mā te whakapuaki atu i te kupu a te Karaiti ki ngā oko kōwhiria a te Ariki, kia whakaatu atu rātou i a ia.

32 Ā, mā te pēneitanga, ka whakarite te Ariki te Atua i te huarahi kia whai whakapono te toenga atu o ngā tāngata i te Karaiti, kia whai wāhi atu te Wairua Tapu i roto i ō rātou ngākau, e rite ana ki tō reira mana; ā, nō tēnei āhuatanga pahawa ake ai te Matua, ngā kawenata i kawenata ai ia ki ngā tamariki a te tangata.

33 Ā, i kī te Karaiti: Mehemea ka whakapono mai koutou i ahau ka whai mana koutou ki te mahi i ngā mea katoa e tika ana i roto i ahau.

34 Ā, kua kī ia: E rīpenetā e ngā tōpito katoa o te ao, ā, haere mai ki ahau, kia rūmakina i runga i tōku ingoa, me te whakapono ki a au, kia whakaorangia ai koutou.

35 Ināianei ā, e aku teina aroha, mehemea koinei te āhuatanga, nā, e pono ana ēnei mea kua kōrero atu nei au ki a koutou, ā, ka whakakite atu te Atua ki a koutou, i runga i te mana me te korōria nui hei te rā whakamutunga, nā, he pono ērā mea, ā, mehemea he pono aua mea kua mutu te rā o ngā merekara?

36 Kua mutu rānei i ngā anahera te puta mai ki ngā tamariki a te tangata? Kua kaiponu rānei ia i te mana o te Wairua Tapu i a rātou? Ka pērātia rānei e ia, i ngā wā katoa e mau ai te taima, e tū ana rānei te whenua, e waiho ai rānei tētahi tangata i runga i tō reira mata kia whakaorangia ai?

37 Nana ko taku kupu tēnei ki a koutou, Kāo; nā te mea mā te whakapono e mea ai ngā merekara; ā, mā te whakapono e puta mai ai ngā anahera ki te minita ki ngā tamariki a te tangata; nā reira, mehemea kua oti ēnei mea auē te mate mō ngā tamariki a te tangata, ina hoki nā te whakaponokore i pērā ai, ā, he horihori te katoa.

38 Nā te mea kāore e taea ana te whakaoranga i te tangata, e rite ana ki ngā kupu a te Karaiti, ki te kore e whai whakapono rātou ki runga i tōna ingoa; nā reira, mehemea kua mutu ēnei mea, nā, kua mutu anō hoki te whakapono; ā, he weriweri te āhuatanga o te tangata, nā te mea he rite rātou me te mea nei kīhai i meatia tētahi hokonga.

39 Engari nana, e aku teina aroha, he pai kē ake aku mea e whakawā ai i a koutou, nā te mea e whakawā ana ahau kei a koutou te whakapono ki te Karaiti he mea nā tō koutou māhaki; nā te mea ki te kore ō koutou whakapono ki a ia, nā, kāore koutou e tika ana kia tatauria i waenganui i te iwi o tana hāhi.

40 Hei āpiti anō, e aku teina aroha, kei te hiahia au ki te kōrero atu ki a koutou e pā ana ki te tūmanako. Me pēhea e taea ai e koutou te whakapono, ki te kore ō koutou tūmanako?

41 Ā, me tūmanako koutou ki te aha? Nana ko taku kupu tēnei ki a koutou, nā, ka whai tūmanako koutou i runga i te whakamārietanga a te Karaiti me te kaha o tana aranga, kia whakaarahia ake ki te oranga tonutanga, ā, ka pēnei nā tō koutou whakapono ki a ia e rite ana ki te whakaari.

42 Nā reira, mehemea he whakapono tō tētahi tangata me whai tūmanako ia; nā te mea ki te kore he whakapono kāore e taea he tūmanako.

43 Hei āpiti anō, nana ko taku kupu tēnei ki a koutou, nā, kāore e āhei ana i a ia te whai whakapono me te tūmanako, ki te kore ia e māhaki, ā, e ngākau pāpaku.

44 Me i pērā, kua moumou tōna tūmanako, nā te mea kāore e tika ana ētahi i te aroaro o te Atua atu i te hunga māhaki me te hunga ngākau pāpaku; ā, ki te māhaki, ā, ki te ngākau pāpaku tētahi tangata, me te whāki atu i runga i te mana o te Wairua Tapu, nā, ko Ihu te Karaiti, e tika ana kia whai aroha noa ia; nā te mea ki te kore ōna aroha noa kua kore ia; nā reira e tika ana kia whai aroha noa ia.

45 Ā, e manawanui ana te aroha noa, e atawhai ana, e kore hoki e pūhaehae, e kore hoki e whakapehapeha, e kore hoki e whai ki āna ake, e kore e riri wawe, e kore e whakaaro kino, ā, e kore e hari i runga i te kino engari ka hari i runga i te pono, e whakamanawanui ana ki ngā mea katoa, e whakapono ana ki ngā mea katoa, e tūmanako ana ki ngā mea katoa, e whakaririka ana ki ngā mea katoa.

46 Nā reira, e aku teina aroha, ki te kore ō koutou aroha noa, kua kore koutou, nā te mea e kore rawa te aroha noa e taka. Nā reira, me piri ki te aroha noa, koia te mea nui ake i te katoa, nā te mea me taka ngā mea katoa—

47 Engari ko te aroha noa te aroha tūturu o te Karaiti, ā, ka mau tonu mō āke tonu atu; ā, ko te tangata e kitea ana kei a ia tēnei hei te rā whakamutunga, nā, ko te pai mōna.

48 Nā reira, e aku teina aroha, me inoi ake ki te Matua i runga i te kaha katoa o te ngākau, kia whakakīngia ai koutou ki tōna aroha, kua tukua iho nei ki ngā kaiaru pono katoa a tana Tama, a Ihu Karaiti; kia meinga ai koutou hei tama nā te Atua; nā, kia rite tātou ki a ia ina puta mai ia, nā te mea ka kite tātou i tōna āhua tūturu; kia riro i a tātou tēnei tūmanako; kia whakamākia tātou kia rite ki tōna mā. Āmine.