1 E taku tama aroha, kei te tuhituhi atu anō au ki a koe kia mōhio ai koe kei te ora tonu ahau; engari ka tuhi atu au i ngā mea e tino pōuri ana.

2 Nana rā, kua whawhai atu au i tētahi whawhai nui ki ngā Rāmana, nā konā tē toa ai mātou; ā, kua hinga a Araheanatu i te hoari, me Rurama anō hoki rāua ko Emerono; āe rā, kua ngaro atu ō mātou tāne tino pai tokomaha.

3 Ināianei ā nana, e taku tama, e wehi ana au kei whakangaro ngā Rāmana i tēnei iwi; nā te mea kāore rātou e rīpenetā ana, ā, e whakaohooho tonu ana a Hātana i a rātou kia riri tētahi ki tētahi.

4 Nana, e hono tonu ana taku mahi ki a rātou; ā, ina kōrero koi atu au ki a rātou i te kupu a te Atua ka tūoioi rātou, ā, ka riri ki ahau; ā, ina kāore au e kōrero koi atu ka whakapakeke rātou i ō rātou ngākau ki tēnā; nā reira, e wehi ana au kua mutu pea tā te Wairua o te Ariki tohe ki a rātou.

5 He nui hoki tō rātou riri, nā, ko te āhua nei kāore ō rātou wehi ki te mate; ā, kua ngaro atu tō rātou aroha, tētahi ki tētahi; ā, e hono tonu ana tō rātou mateinu ki te toto me te ngaki mate.

6 Ināianei ā, e taku tama aroha, ahakoa tō rātou whakapakeketanga, tukua tāua kia ū ki te mahi; nā te mea mēnā ka mutu tā tāua mahi, ka heke iho tāua ki raro iho i taua whakahēnga; nā te mea he mahi tā tāua i a tāua e noho ana i roto i tēnei tapenakara uku, kia wikitōria tāua i runga i te hoariri o te tika katoa, ā, kia okioki ō tāua wairua i te kīngitanga o te Atua.

7 Ināianei ā, ka paku tuhituhi atu nei au e pā ana ki ngā whakamamaetanga o tēnei iwi. Nā te mea e rite ana ki te mātauranga i whiwhi nei au i a Amorono, nana, he tokomaha ngā mauhere ā ngā Rāmana, i mau ai i a rātou i te pourewa o Heritaha; ā, he tāne i reira, he wahine me ngā tamariki.

8 Ā, kua whakamatea ngā hoatāne me ngā matua o aua wahine me aua tamariki; ā, ka whāngaia ngā wāhine ki te kikokiko o ō rātou hoatāne, ngā tamariki anō ki te kikokiko o ō rātou matua; ā, kāore he wai, atu i te mea iti, e hoatu ai e rātou ki a rātou.

9 Hei aha koa tēnei mōrikarika nui o ngā Rāmana, kāore i kō atu i tō te iwi o Moriatuma. Nana rā, kua mauhere atu rātou i ngā tamāhine tokomaha a ngā Rāmana; ā, whai muri iho i tā rātou murunga i tērā mea e tino utu nui ana i a rātou, e whai tikanga nui ake i ngā mea katoa, koia ko te tapu o te tīnana me te puhi o te wahine—

10 Ā, whai muri iho i tā rātou meatanga i tēnei mea, ka kōhuru rātou i a rātou i runga i te āhuatanga tino nanakia, e whakamamae ana i ō rātou tīnana kia mate rawa; ā, whai muri iho i tā rātou meatanga i tēnei, ka kainga e rātou ō rātou kikokiko kia rite ki te kararehe mohoao, he mea nā te whakapakeketanga o ō rātou ngākau; ā, ka mahia tēnei e rātou kia riro ai tētahi tohu toa.

11 E taku tama aroha, me pēhea tētahi iwi pēnei, kāore nei ō rātou tikanga—

12 (Ā, kua pahemo atu ngā tau ruarua noa iho, ā, he iwi whai tikanga rātou, ā, he iwi āhuareka rātou)

13 Engari, E taku tama, me pēhea tētahi iwi pēnei, e āhuareka ana i runga i te mōrikarika nui—

14 Me pēhea e taea ai e tāua te whakaaro ka pupuri atu te Atua i tōna ringa i runga i te whakawā i a tātou?

15 Nana, e tangi ana tōku ngākau: Auē te mate mō tēnei iwi. Puta mai i runga i te whakawā, E te Atua, hunaia ō rātou hara, ō rātou whakarihariha, me ō rātou mōrikarika i mua i tōku kanohi!

16 Hei āpiti anō, e taku tama, he tokomaha ngā pouaru me ā rātou tamāhine e noho tonu ana i Heritaha; me ērā atu wāhanga ō kīhai i kawea atu e ngā Rāmana, nana, kua kawea atu e te tauā a Tenepehi, ā, kua mahue rātou kia ātiutiu haere ki ngā wāhi e taea ai hei rapu kai; ā, he tokomaha ngā kuia e hemo ana i te huarahi, ā mate noa atu.

17 Ā, he ngoikore te tauā i tōku taha; ā, kei waenganui ngā tauā o ngā Rāmana i a Heritaha me au; ā, ko ngā tāngata katoa kua tahuti atu ki te tauā a Arona, nā, kua hinga hei pārurenga ki ō rātou tikanga mohoao weriweri.

18 Auē te kino nui o tōku iwi! Kāore ō rātou tikanga whakahaere me ō rātou aroha. Nana, he tangata noa iho ahau, ā, e rite tōku kaha ki tō te tangata kotahi, ā, kāore e taea tonutia ana e ahau te whakahau kaha i a rātou.

19 Ā, kua kaha haere rātou i runga i tō rātou whakapeautanga; ā, e rite ana tō rātou horetītī, kāore e tohua ana tētahi, pakeke mai, tamariki mai; ā, e āhuareka ana rātou ki ngā mea katoa atu i ngā mea e pai ana; ā, kei kō atu te whakamamaetanga o ā tātou wahine me ā tātou tamariki i ngā mea katoa; āe rā, tē taea e te arero te whāki, tē taea rānei te tuhi.

20 Ināianei ā, e taku tama, e kore au e whakaroa atu i runga i tēnei āhuatanga weriweri. Nana, e mōhio ana koe ki te whakarihariha o tēnei iwi; e mōhio ana koe kāore ō rātou tikanga, kua kore hoki ō rātou kare ā-roto; ā, kua nui kē ake tō rātou whakarihariha i tō ngā Rāmana.

21 Nana, e taku tama, kāore e taea e au te whakamōhio i a rātou ki te Atua kei patua au e ia.

22 Engari nana, e taku tama, e whakamōhio ana ahau i a koe ki te Atua, ā, e whakawhirinaki ana au i te Karaiti, nā, ka whakaorangia koe; ā, e inoi ake ana au ki te Atua kia tohungia koe, kia kite i te whakahokinga o tana iwi ki a ia, ki tō rātou whakangaromanga katoatanga rānei; nā te mea e mōhio ana ahau ki te kore rātou e rīpenetā me te tahuri atu ki a ia e tika ana kia mate rātou.

23 Ā, ki te mate rātou ka rite tō rātou meatanga ki tō ngā Iarere, he mea nā te whakakeke o ō rātou ngākau, e whai ana i te toto me te ngaki mate.

24 Ā, mehemea e tika ana kia mate rātou, e mōhio ana tāua he tokomaha o ā tāua teina kua tītore atu ki ngā Rāmana, ā, he tokomaha anō ngā mea e tītore atu ana ki a rātou; nā reira, tuhia ētahi mea ruarua, mehemea ka tohua koe, ā, mehemea ka mate au tē kite hoki i a koe; engari e tūmanako ana au kia kite wawe au i a koe; nā te mea kei ahau ngā tuhinga tapu e hiahia ana au kia tukuna atu ki a koe.

25 E taku tama, kia ū koe i roto i te Karaiti; ā, kaua e pōuri tō ngākau i ngā mea kua tuhia atu nei e au ki a koe, me te whakataumaha iho i a koe kia mate; engari mā te Karaiti koe e hāpai ake, mā ōna whakamamaetanga me tōna matenga, me te whakakitenga atu i tōna tīnana ki ō tāua tūpuna, me tōna aroha me tōna whakamanawanui, me te tūmanako o tōna korōria me tōna oranga tonutanga, kia okioki ai i roto i tō hinengaro mō āke tonu atu.

26 Ā, mā te aroha o te Atua te Matua, ko tōna torona he tiketike ake i roto i ngā rangi, me tō tāua Ariki a Ihu Karaiti, e noho nei i te ringa matau o tōna mana, tae noa ki te wā e tuohu iho ngā mea katoa ki a ia, e waiho, e piri tonu ai ki a koe mō āke tonu atu. Āmine.