1Ko au nai, ko Moronai, kua tohi falu a mena ne manatu au kua mitaki; ti kua tohia e au ke he haaku a tau matakainaga, ko e tau Lamana; kua manako au ke iloa e lautolu kua molea e fa e teau mo e uafulu e tau tau tali mai he fakakite mai e fakamailoga ke he haele mai a Keriso.

2Ti kua fakamau e au e tau tohi nai, he mole atu he vagahau e au falu a kupu fakamafana ki a mutolu.

3Kitia la kua fakamafana atu au kaeke ke totou e mutolu e tau mena nai, kaeke ko e iloilo mai he Atua kua lata ke totou e mutolu, kia maantu e mutolu e fakaalofa noa he Iki ke he tau tagata kamata mai he tufugatiaaga a Atamu ke hoko ke he magaaho ke moua ai e mutolu e tau mena nai, mo e kia manamanatu ha mutolu a tau loto ki ai.

4Ti ko e magaaho ka moua ai e mutolu e tau mena nai, kua fakamafana atu au ki a mutolu kia ole atu ke he Atua, ko e Matua Tukulagi, ke he higoa a Keriso ko e mooli nakai e tau mena nai; ti kaeke ke ole mo e loto fakamooli mo e manatu katoa, mo e tua ki a Keriso to fakakite atu e ia e mena mooli ki a koe ke he malolo he Agaaga Tapu.

5Ti ko e malolo he Agaaga Tapu ke iloa ai e mutolu e mooli he tau mena oti kana.

6Ko e ha mena kua mitaki, kua tonu mo e mooli: Ko e mena ia, kua nakai fai mena mitaki kua fakatikai e Keriso, ka kua fakakite kua ha ha i ai a Keriso.

7Ti maeke ke iloa e mutolu kua ha ha i ai a ia ke he malolo he Agaaga Tapu; ko e mena ia, kua fakamafana atu au kia aua neke fakatikai e mutolu e malolo he Atua; ha ko e gahua a ia ke he malolo ke tuga mo e tua he tau fanau he tau tagata, kua tatai he aho nai, a pogipogi, mo e tukulagi.

8Kua liu foki fakamafana atu au ma haaku tau matakainaga, kia aua neke fakatikai e mutolu e tau fakaalofa he Atua ha kua loga lahi; ti mai he Atua taha ni. Ti kua loga lahi e tau puhala kua moua ai e tau fakaalofa nai; ka ko e Atua taha ni ne gahua ke he tau mena oti ia, ti kua foaki mai ai ke he tau fakakiteaga he Agaaga he Atua ke he tau tagata, ke monuina ai a lautolu.

9Kitia la, ke he taha, kua foaki he Agaaga he Atua ke maeke ai ia ia ke fakaako e kupu he pulotu;

10Ke he taha foki ke maeke ia ia ke fakaako e lotomatala ha ko e Agaaga ia foki;

11Ke he taha foki, ko e tua kua mua ue atu; ke he taha ko e fakaalofa ke fakamlolo e tau gagao mai he Agaaga taha ia;

12Ti foaki foki ke he taha, ke maeke ai ke taute e tau mana lalahi;

13Ti foaki foki ke he taha, ke maeke ke taute e tau perofetaaga ke he tau mena oti;

14ti foaki foki ke he taha, ke kitia e tau agelu mo e falu a Agaaga kua gahua ai;

15Ti foaki foki ke he taha, ke maeke ke iloa e tau vagahau kehekehe;

16Ti foaki foki ke he taha, ke maeke ke fakaliliu e tau vagahau kehekehe mo e tau leo kehekehe;

17Ti ko e tau fakaalofa oti nai, kua mai ia he Agaaga a Keriso; kua hoko mai ai ke he tau tagata taki-taha ke tuga kua finagalo a ia ki ai.

18Kua fakamafana atu au ki a mutolu, ma haaku tau matakainaga fakahelehele na e, kia manatu e mutolu ko e tau fakaalofa oti kua mitaki kua mai ia, ia Keriso.

19Ti kua fakamafana atu foki au ma haaku tau matakainaga fakahelehele na e, ko e mena tatai ni a ia i ne afi, aho nai, mo e tukulagi, ti ko e tau fakaalofa oti nai ne vagahau atu e au, ko e tau mena fakaagaaga, to nakai uta kehe ai, to ha ha i ai ke he lalolagi, to fakalata foki ke he nakai tua he tau fanau he tau tagata.

20Ko e mena ia, kua lata ke ha ha i ai e tua; kaeke ke ha ha i ai e tua, kua ha ha i ai foki e amaamanaki; kaeke foki ke ha ha i ai e amaamanaki kua lata ke ha ha i ai foki e fakaalofa.

21Ka nakai ha ha i ai e fakaalofa ia mutolu, to nakai fakahao ai a mutolu ke he kautu he Atua; ti nakai fakahao foki a mutolu ke he kautu he Atua ka nakai ha ha ia mutolu e tua, ti nakai fakahao foki kaeke ke nakai ha ha i ai e amaamanaki.

22Ti kaeke ke nakai ha ha i ai e amaamanaki ia mutolu to fakaatukehe ai; ko e fakaatukehe nai mai he ha mutolu a tau mahani kelea.

23Ti ne talahau fakamooli mai a Keriso ke he ha tautolu a tau mamatua: Kaeke ke tua a mutolu to maeke ia mutolu ke taute e tau mena oti kua tonu ia ki a au.

24Ti ko e magaaho nai kua vagahau atu au ke he tau matapotu oti he lalolagi — kaeke ke hoko mai e aho, ke uta kehe e malolo mo e tau fakaalofa he Atua mai ia mutolu, kua eke ai pihia ha ko e nakai tua.

25Kaeke ke pihia e mena ia, oi fakaalofa te ke he tau fanau he tau tagata; to nakai ha ha i ai taha ke taute ha mena mitaki ia mutolu; nakai, ai taha. Ti kaeke ke ha ha i ai taha ke taute e mena kua mitaki to gahua a ia ha ko e malolo mo e tau fakaalofa he Atua.

26Ti oi te ki a lautolu ka uta ke he ai e tau mena nai ti mamate, ha kua mamate a lautolu mo e tau hala, nakai maeke ke fakahao a lautolu ke he kautu he Atua; kua vagahau atu nai e au ke tuga mo e tau kupu a Keriso; ti nakai fakavai foki au.

27Kua fakamafana atu au ki a mutolu ke manatu e tau mena nai; kua hoko mai tuai e magaaho ke iloa e mutolu kua nakai fakavai au, ha ko e mena to kitia e mutolu au he laulau he Atua; mo e to pehe atu e Iki ko e Atua ki a mutolu: Nakai kia fakakite atu e au e haaku a tau kupu ki a mutolu ne tohia ai he tagata nai, tuga e taha tagata ne tagi mai he mate, hanai, ke tuga foki taha kua vagahau mai he efuefu?

28Kua fakailoa e au e tau kupu nai ke fakamooli aki e tau perofetaaga. Ti kitia la to vagahau mai he gutu he Atua tukulagi, ti ko e haana tau kupu to logona ki ai mai he taha atuhau ke he taha atuhau.

29To fakakite atu he Atua ki a mutolu ko e tau mena ne tohia atu e au ki a mutolu ko e tau mena mooli.

30Kua liu fakamafana atu au ki a mutolu ke o mai ki a Keriso, mo e taofi mau ke he tau fakaalofa mitaki, mo e aua neke aamo atu ke he fakaalofa kelea po ke tau mena kua nakai mēa.

31Ti aala mai mo e mamatike mai he efuefu, ma Ierusalema na e; hanai ti tui haau a tau tapulu fulufuluola, ma tamaafine a Siona; ti fakamalolo haau a tau pou mo e fakalaulahi atu e tau tuuta tukulagi, ke aua neke fakagogoa a mutolu, ko e tau maveheaga he Matua Tukulagi ne taute e ia ki a mutolu, ma Isaraela na e, to maeke ke fakamooli ai.

32Hanai, o mai ki a Keriso mo e tututonu ai ki a ia, mo e fakatikai a tautolu ke he tau mena oti kua nakai faka-atua ia; ti kaeke ke fakatikai a tautolu ke he tau mena ia, ka e fakaalofa ke he Atua mo e malolo katoa mo e manatu katoa, to lahi haana fakaalofa ke maeke ai ia mutolu ke katoatoa ai ki a Keriso; ti kaeke foki ke he fakaalofa noa he Atua kua tututonu a mutolu ki a Keriso, ti nakai maeke ai ia mutolu ke fakatikai e malolo he Atua.

33Ti kaeke foki ke katoatoa a mutolu ki a Keriso ha koe fakaalofa he Atua mo e nakai fakatikai haana a malolo, kua tapu ai a mutolu ia Keriso ha ko e fakaalofa he Atua, ha ko e maligiaga he toto a Keriso, ko e maveheaga ia he Atua ke fakamagalo aki ha mutolu a tau hala, ke maeke ai ia mutolu ke tapu ai mo e nakai fai mena ke ila ai.

34Ti ko e magaaho nai, kua mavehe atu a ki a mutolu oti. To fano vave au, ke okioki ai he parataiso he Atua, a to hoko ke liu fakalataha ai haaku a tino mo e agaaga, a to ta mai au mo e kautu ai ki luga he pulagi, ke feleveia mo mutolu ki mua he laulau fulufuluola a Iehova mua ue atu. Ko e Iki Fakafili Tukulagi he moui mo e mate. Amene.