1Ko e tohi he haaku a matua taane ko Moromona, ne tohi mai ki a au, ko Moronai, ne tohia mai ai ki a au he mole fakatote e haaku a ui ke he gahua. Ti ko e pehe nai e tau mena ne tohi mai e ia ki a au:

2Ma haaku tama fakahelehele na e ko Moronai, kua mua ue atu haaku a fiafia, ko e haau a Iki ko Keriso, kua leveki e ia a koe, mo e kua ui e ia a koe ke he haana a gahua mo e haana a gahua tapu.

3Kua manatu tumau e au a koe he haaku a tau liogi, kua fakatumau ai haaku a tau liogi ke he Atua ko e Matua, ke he higoa he haana a Tama Tapu ko Iesu, ke maeke ai ia ia ha ko e haana mafola mo e fakaalofa tukulagi, kua nakai fai fakaotiaga, ke leveki e ia a koe ke fakatumau ke he tua ke he haana higoa ke he fakaotiaga.

4Ko e magaaho nai ma haaku tama, kua tala atu nai e au ki a koe e mena kua mua ue atu haaku a momoko ki ai; kua momoko au kua ha ha i ai e taufetoko ia mutolu.

5Ha kua iloa e au kua ha ha ki a mutolu e taufetoko hagaao ke he papatisoaga he tau fanau ikiiki ha mutolu.

6Ko e magaaho nai ma haaku tama, kua manako au ke gahua fakamalolo a mutolu, ke maeke ai e hepe lahi nai ke uta kehe mai ia mutolu; ko e mena ia ne tohi ai e au e tohi nai.

7Ko e magaaho ne iloa ai e au e tau mena nai ki a mutolu, ne ole au ke he Iki hagaao ke he mena ia. Ti ko e kupu he Iki ne hoko mai ki a au ke he malolo he Agaaga Tapu, ne pehe mai:

8Fanogonogo mai ke he tau kupu a Keriso, ko e ha mutolu a Lukutoto, ko e ha mutolu a Iki mo e ha mutolu a Atua. Kitia la ne hau au ke he lalolagi nakai ke ui ke he tututonu, ka e ki a lautolu ne agahala ke tokihala; ko lautolu ne katoatoa nakai lata ke fai ekekafo, ka ko lautolu ni kua gagao; ko e mena ia, kua katoatoa e tau fanau ikiiki, ha kua nakai maeke ia lautolu ke hala; ko e mena ia ko e holifono a Atamu kua uta kehe mai ia lautolu ha ko au, mo e nakai fai malolo ia ki a lautolu; mo e fakatufono foki he peritome kua uta kehe ai ha ko au.

9Kua pihia e puhala ne fakailoa mai ai he Agaaga Tapu e kupu he Atua ki a au; ko e mena ia ma haaku tama fakahele, kua iloa e au ko e mena kua kelea lahi ki mua he Atua ke papatiso e mutolu e tau fanau ikiiki.

10Kitia la kua tala atu nai au ki a mutolu, to fakaako e mutolu e mena nai ko e tokihala mo e papatisoaga ki a lautolu kua lauia mo e maeke ke hala; hanai, kia fakaako e tau mamatua, kua lata ia lautolu ke tokihala mo e papatiso, mo e fakatokolalo a lautolu ke tuga e tau fanau ha lautolu, to hao foki a lautolu fakalataha mo e tau fanau ha lautolu.

11Ko e tau fanau ikiiki ha lautolu kua nakai lata ke tokihala, po ke papatiso. Kitia la ko e papatisoaga, kua mai ia he fakatokihalaaga ke fakamooli e fakatufono ke lata mo e fakamagaloaga he tau hala.

12Kua momoui e tau fanau ikiiki ki a Keriso, pihia tali mai he fakaveaga he lalolagi; kaeke ke nakai pihia, ko e Atua nakai katoatoa a ia, ti ko e Atua mahani fiofio, mo e fakalilifu ke he tau tagata, ha ko e mena nai, kua tokofiha e tau tama ikiiki kua mamate ka e nakai papatiso!

13Ko e mena ia kaeke ke nakai hao e tau fanau ikiiki ha kua nakai papatiso, liga kua hoko tuai a lautolu ke he mate nakai fai fakaotiaga.

14Kitia la kua tala atu nai au ki a mutolu, ko lautolu ne manatu kua lata e tau fanau ikiiki ke papatiso ko lautolu ia ha ha he matematekelea mo e lilī ai ke he kelea, ha kua nakai ha ha ia ia e tua po ke amaamanaki po ke fakaalofa; ko e mena ia, kua lata kia ke uta ke he mai a ia, mo e hifo a ia ki teoli.

15Kua mua ue atu e kelea, ke manatu kua fakahao he Atua taha e tama tote ha ko e papatisoaga ka e mate e taha ha kua nakai papatiso.

16Oi te ki a lautolu kua fakahehē pehe nai e tau puhala he Iki, ha ko e mena to fakaotioti ai a lautolu, a to tokihala. Kitia la kua vagahau atu au ki a mutolu mo e loto malolo ha ko e pule mai he Atua; kua nakai matakutaku au ke he ha mena ka taute he taha tagata; ha ko e fakaalofa kua katoatoa kua uta kehe ai e matakutaku.

17Kua puke foki au ke he fakaalofa, ko e fakaalofa tukulagi; ko e mena ia, kua tatai oti e tau fanau ikiiki ki a au, ko e mena ia kua fakaalofa au ke he tau fanau ikiiki mo e fakaalofa katoatoa; ti kua tatai oti a lautolu, ti kua moua e lautolu e fakamouiaga.

18Ha kua iloa e au ko e Atua, ko e Atua nakai fakafili kau, ke hikihiki, ka ko ia to nakai kehe a to hoko ke he tukulagi mo e tukulagi.

19Nakai maeke he tau fanau ikiiki ke fakatokihala, ko e mena ia kua mua ue atu e kelea ke fakatikai e fakaalofa noa he Atua ki a lautolu, ha ko e mena kua momoui oti a lautolu ki a ia ha ko e haana fakaalofa noa.

20Ti ko ia ke pehe kua lata e tau fanau ikiiki ke papatiso, kua fakatikai e ia e fakaalofa a Keriso mo e kua eke mo mena noa e fakamafolaaga haana mo e malolo foki he haana lukutotoaga.

21Oi te ki a lautolu kua matematekelea a lautolu ke he mate, teoli, mo e mamahi nakai fai fakaotiaga. Kua vagahau au mo e loto malolo; kua poaki mai he Atua ki a au. Fakanogonogo ki a lautolu mo e omaoma, neke tutu atu a lautolu ki a mutolu ke he nofoa he fakafiliaga a Keriso.

22He kitia la, ko e tau fanau ikiiki oti kua momoui ki a Keriso, pihia mo lautolu oti kua nakai lauia he fakatufono. Ha ko e malolo he lukutotoaga kua hoko mai ki a lautolu oti kua nakai lauia ke he fakatufono; ko e mena ia, ko ia kua nakai fakahala po ke nakai lago ai e fakahalaaga, kua nakai maeke ke tokihala ti nakai aoga foki e papatisoaga ki a lautolu.

23Ko e mena kelea ki mua he Atua ke fakatikai e fakaalofa noa a Keriso, mo e malolo he haana a Agaaga Tapu, mo e tuku e tau falanakiaga ke he tau gahua popo.

24Kitia la ma haaku tama na e, kua nakai lata ke pihia e mena ia; ha ko e tokihala kua lata mo lautolu kua ha ha i ai e fakahalaaga mo e malaia he holifono e fakatufono.

25Ko e tau fua uluaki he tokihala ko e papatisoaga; ko e papatisoaga kua moua ai e fakamagaloaga he tau hala.

26Ko e fakamagaloaga he tau hala ke moua ai e totonu mo e loto fakatokolalo; ha ko e totonu mo e loto fakatokolalo ke moua ai e Agaaga Tapu, ko e lagomatai kua puke ke he amaamanaki, mo e fakaalofa katoatoa, ko e fakaalofa ke tumau ka fakamakamaka ke liogi, a to hoko mai e fakaotiaga, ko e magaaho ia to nonofo oti ai e tau tagata tapu mo e Atua.

27Kitia la ma haaku tama na e, to tohi atu foki au ki a koe kaeke ke nakai la hoko atu au ke felakutaki mo e tau Lamana. Kitia la ko e loto fakatokoluga he kautu nai, po ke tau tagata Nifai, kua fakamooli ai ha lautolu a fakaotiaga, a to fakatokihala a lautolu.

28Kia liogi ma lautolu ma haaku tama, ke maeke ke moua e lautolu e tokihala. Ka e kitia la kua matakutaku au he neke hola kehe e gahuahuaaga he Agaaga Tapu mo lautolu; ti ko e faahi nai foki he motu, kua kumikumi ai a lautolu ke tuku hifo e malolo mo e pule mai he Atua; ti kua fakatikai foki e lautolu e Agaaga Tapu.

29Ka mole atu ai e tiaki he lotomatala nai ma haaku tama na e, kua tata mai e fakaotiaga ki a lautolu, ke fakamooli e tau perofetaaga ne talahau ai he tau perofeta fakalataha mo e tau kupu he ha tautolu a Fakamoui.

30Kia mavehe a ma haaku tama na e, a to liu au ke tohi atu, po ke liu ke feleveia ai mo koe. Amene.