1Ko au nai ko Moronai kua tohia ai e au falu a kupu he haaku a matua taane ko Moromona, ne vagahau ai e ia ke he tau tagata he haana tau fakaakoaga ki a lautolu ke he tau sunako ne talaga e lautolu ke lata mo e tau tapuakiaga.

2Ko e magaaho nai, ko au ko Moromona, kua vagahau au ki a mutolu ma haaku tau matakinaga fakahelehele; ko e fakaalofa he Atua ko e Matua, mo e ha tautolu a Iki ko Iesu Keriso, mo e haana a finagalo tapu, ha ko e haana fakaalofa kua kotofa e ia au, kua ataina ai au ke vagahau atu ki a mutolu he magaaho nai.

3Ko e mena ia, to vagahau atu au ki a mutolu ha ha he lotu, ko e tau tutaki totonu a Keriso, mo e kua ha ha i ai e amaamanakiaga kua lahi ke maeke ai ke fakalataha atu ke okioki ai ke he Iki, ke he magaaho nai, a to okioki fakalataha ai mo ia ke he lagi.

4Ko e magaaho nai ma haaku tau matakinaga, kua fakafili ai e au e tau mena nai ha mutolu, ha ko e ha mutolu a mahani totonu ke he tau fanau he tau tagata.

5Ha kua manatu e au e kupu he Atua ne pehe mai, ha ko e ha lautolu a tau gahua to iloa ai e mutolu a lautolu; ha ko e mena kaeke ke mitaki e tau gahua ha lautolu kua mitaki foki a lautolu.

6Kitia la ne pehe mai e Atua ko e tagata kelea nakai maeke ia ia ke taute e mena kua mitaki; kaeke ke foaki e ia e taha mena fakaalofa, po ke liogi ke he Aua, to nakai taute e ia mo e loto fakamooli to nakai moua ai e ia ha taui.

7Kitia la kua nakai totou ia ki a ia ko e tututonu.

8Kitia la kaeke ko e tagata kelea ne foaki e mena fakaalofa kua taute e ia mo e lamakai ke he loto. Ko e mena ia kua totou ai ki a ia ke tuga ni kua toka ni ia ia haana a fakalofa. Ko e mena ia kua totou kelea a ia ki mua he Atua.

9Ti pihia foki ia kua totou kelea ai ke he tagata, kaeke ke liogi a ia mo e nakai fakamakamaka ke he loto; hanai to nakai fai taui ki a ia ha kua nakai talia he Atua e tau mena pihia.

10Ko e mena ia ko e tagata kelea nakai maeke ia ia ke taute e mena kua mitaki; po ke maeke ia ia ke foaki e mena fakaalofa kua mitaki.

11Kitia la ko e vaipuna kona kua nakai maeke ke moua mai ai e vai magalo, pihia foki mo e vaipuna magalo kua nakai maeke ke moua mai ai e vai kona; ko e mena ia, ko e tagata ne fekafekau ke he tiapolo nakai maeke ke muitua ki a Keriso; ti kaeke ke muitua a ia ki a Keriso kua nakai maeke a ia ke eke mo fekafekau he tiapolo.

12Ko e mena ia, ko e tau mena oti kua mitaki mai he Atua ia; ko e tau mena kua kelea mai ia he tiapolo ia; ha ko e tiapolo ko e fi a ia ke he Atua, kua tau atu a ia ki a ia ke he tau magaaho oti, mo e uiina mo e fakaohooho a ia ke he hala, mo e fakatumau ai ke taute e tau mena kua kelea.

13Ka e kitia la, ko e tau mena mai he Atua kua uiina mo e fakaohooho ai ke fakatumau ke he tau mena mitaki, ko e mena ia, ko e tau mena oti kua uiina mo e fakaohooho ai ke taute e mitaki, mo e fakaalofa ke he Atua mo e fekafekau ki a ia, kua mai he Atua a ia.

14Ko e mena ia, ki a mataala ma haaku tau matakainaga fakahelehele, ki a aua neke fakafili e mutolu e tau mena kua kelea ko e tau mena mai he Atua ia, po ke tau mena kua mitaki mai he Atua ko e tau mena mai he tiapolo ia.

15He kitia la ma haaku tau matakainaga, kua foaki atu ai ki a mutolu ke fifili ki ai, ki a iloa ai e mutolu e mitaki mai he kelea; ti ko e puhala ke fakafili ai, kua maama mitaki, kia iloa maaliali mitaki e mutolu ke tuga e maama he aho mai he pouli he po.

16He kitia la ko e Agaaga ha Keriso, kua foaki ai ke he tau tagata oti ke maeke ai ia ia ke iloa e mitaki mai he kelea, ko e mena ia kua fakakite atu ai e au e puhala ke fifili ai; ha ko e tau mena oti kua uiina ai ke taute e mitaki mo e fakaohooho ai ke tua ki a Keriso, ne kua fakafano mai ai he malolo mo e fakaalofa a Keriso; ko e mena ia, kia iloa ai e mutolu mo e katoatoa ai e lotomatala ko e mai ia he Atua.

17Ka ko e ha mena ne kua fakaohooho ai e tau tagata ke taute e tau mena kelea, mo e nakai tua ki a Keriso mo e fakatikai a ia, mo e nakai fekafekau ke he Atua, ti iloa ai e mutolu mo e lotomatala katoatoa, ko e mai ia he tiapolo; kua pihia e puhala he tiapolo, ha ko e mena nakai fakaohooho e ia ha tagata taha ke taute e tau gahua mitaki, nakai fai taha; po ke haana a tau agelu foki; po ke lautolu foki kua eke mo haana tau tagata.

18Ti ko e magaaho nai ma haaku tau matakainaga, kua kitia ai kua iloa e mutolu e maama ke maeke ai ia mutolu ke fakafili, ko e ha e fe e maama ko e maama a Keriso, kia kitia kua nakai fakafili hepe a mutolu; ha ko e fakafiliaga ia ne fakafili ai e mutolu to fakafili ai a mutolu.

19Ko e mena ia, kua ole fakamakamaka atu au ki a mutolu ma tau matakainaga, kua lata ia mutolu ke kumikumi fakamakutu ke he maama a Keriso ke maeke ai ia mutolu ke iloa e mitaki mai he kelea; kaeke ke tapiki mau a mutolu ke he tau mena mitaki oti mo e nakai tiaki to eke a koe mo tama ha Keriso.

20Ti ko e magaaho nai ma haaku tau matakainaga, kua maeke fefe ke tapiki mau a mutolu ke he tau mena mitaki oti?

21Ko e magaaho nai ke he tua, tuga ia ne pehe au to vagahau au hagaao ke he tua, mo e to tala atu e au e puhala ke maeke ai ia mutolu ke taofi mau ke he tau mena mitaki oti.

22Ite kitia la, kua iloa he Atua e tau mena oti kana, mai he taha fakaotiaga ke hoko atu ke he taha fakaotiaga, kitia la ne fakafano mai e ia e tau agelu ke gahua ai ke he au fanau he tau tagata, ke fakakite ai e talahauaga hagaao ke he haele mai a Keriso; mai ia Keriso foki to ha ha i ai e tau mena mitaki oti.

23Ne talahau ai foki he Atua ke he tau perofeta, mai he haana a gutu, to haele mai a Keriso.

24Kitia la ne ha ha i ai loga e tau puhala ne fakamaama e ia ke he fanau he tau tagata, kua mitaki; ti ko e tau mena oti kua mitaki mai ia ia Keriso; ka nakai pihia kua kau mahala e tau tagata, to nakai fai mena mitaki ka moua ai e lautolu.

25Ko e mena ia, ha ko e tau gahua he tau agelu mo e tau kupu oti kua vagahau mai he gutu he Atua, kua kamata ai e tau tagata ke fakagahuahua e tua ha ia Keriso; ti ha ko e tua, ne taofi mau ai a lautolu ke he tau mena mitaki oti, ti pihia a to haele mai a Keriso.

26Ka mole e haele mai haana ko e tau tagata foki kua fakahao ha ko e tua ke he haana a higoa. Ko e tua foki kua eke ai a lautolu mo fanau he Atua. Ti tuga ni kua moui a Keriso, ne vagahau e ia e tau kupu nai ke he ha lautolu a tau matua, kua pehe age: Ko e tau mena oti ka ole e mutolu ke he Matua ha ko e haaku a higoa, ko e mena mitaki, mo e tua to moua ai e mutolu, kitia la to taute ai ki a mutolu.

27Ko e mena ia ma haaku tau matakinaga fakahelehele, kua fakaoti kia e tau mana ha kua haele atu a Keriso ke he lagi, mo e nofo ai ke he faahi matau he Atua, ke moua ai haana tonuhia ha ko e haana fakaalofa noa ke he fanau he tau tagata?

28Ha kua tali e ia e tau fakaotiaga he fakatufono, mo e kua moua e ia a lautolu ne tua ki a ia; ti ko lautolu ne tua ki a ia to tapiki mau a lautolu ke he tau mena mitaki oti; ko e mena ia ne lagomatai a ia ke he puhala he fanau he tau tagata; ti nofo tukulagi ai ni a ia ke he lagi.

29Ha kua eke e ia e mena nai, ma haaku tau matakinaga fakahelehele, kua fakaoti kia e tau mana? Kitia la kua tala atu nai au ki a mutolu, nakai; nakai la fakaoti foki e tau gahua he tau agelu ke he tau tagata.

30He kitia la kua eke a lautolu maana, ke gahua ai ke lata mo e haana poakiaga, mo e fakakite atu a lautolu ki a lautolu, kua malolo e tua mo e malolo e tau manamanatuaga ke he tau vahega mena oti faka-atua.

31Ko e faahi gahua ne gahua ki ai a lautolu ke ui atu ke he tau tagata ke tokihala mo e fakakatoatoa ai mo e taute e tau gahua he maveheaga he Matua, ne taute e ia ke he tau fanau he tau tagata, ke tauteute e puhala ha ha he tau tagata, ke fakakite e kupu a Keriso ke he tau tagata fifili he Iki ke maeke ia lautolu ke talahau atu e tau fakamooliaga ki a ia.

32Kua taute ai pihia, ko e Iki ko e Atua kua tauteute e puhala ke maeke he tau toe tagata ke ha ha i ai e tua ki a Keriso, ke maeke ai he Agaaga Tapu ke ha ha i ai ke he tau loto ha lautolu, ke lata foki mo e malolo ha ha i ai; ti taute pihia ke hoko ai e maveheaga ne taute he Matua ke he tau fanau he tau tagata.

33Ne pehe mai a Keriso: Kaeke ke tua mai a mutolu ki a au, to ha ha ki a mutolu e malolo ke taute ha mena kua lata, ha ko au.

34Ti ne pehe foki a ia: Kia tokihala a mutolu oti ha ha he lalolagi mo e o mai ki a au, mo e papatiso ke he haaku a higoa, mo e tua mai ki a au, ke maeke ai ia mutolu ke hao ai.

35Ti ko e magaaho nai ma haaku tau matakainaga fakahelehele, kaeke ko e tau mena ne tala atu e au ki a mutolu kua mooli to fakakite atu foki he Atua, fakalataha mo e malolo mo e lilifu kua mua ue atu he aho fakahiku, kua mooli, ti, kaeke kua mooli, kua fakaoti kia e aho he tau mana?

36Po, kua fakaoti kia e ahiahi mai he tau agelu ke he fanau he tau tagata? Po kua taofi kia e ia e malolo he Agaaga Tapu mai ia lautolu? Po ke uta ni ke he magaaho, po ke tuaga he lalolagi? Po ke to ha ha i ai tokotaha ni e tagata ki luga he kelekele ke moui ai?

37Kitia la, kua tala atu au ki a mutolu nakai; ha ko e mai he tua ne kua maeke ai e tau mana; ti ko e tua foki ne maeke ai e agelu ke gahua ai ke he fanau he tau tagata; ko e mena ia kaeke kua fakaoti e tau mena nai, oi te ke he tau fanau he tau tagata, ha ko e ha lautolu a nakai tua fakamooli kua eke mo mena noa ai e tau mena oti.

38Ha ko e mena to nakai maeke ke fakamoui ha tagata, ke tuga e tau kupu a Keriso, ka ko lautolu kua tua ke he haana higoa; ko e mena ia, kaeke kua fakaoti e tau mena nai, ti kua fakaoti foki kia e tua; ti hagahagakelea ai e tuaga he tagata ke tuga mo e mena kua nakai fai fakamouiaga ne taute ai.

39Ka e kitia la ma haaku tau matakainaga fakahelehele, kua fakafili e au e tau mena kua mitaki ha mutolu, kua fakafili e au kua ha ha i ai e tua ha mutolu ki a Keriso, ha ko e ha mutolu a fakatokolalo; he kaeke kua nakai tua a mutolu ki a ia, kua nakai lata a mutolu ke totou fakalataha mo e tau tagata he haana a lotu.

40Ti pehe foki ma haaku tau fakahelehele, to vagahau atu au ki a mutolu hagaao ia ke he amaamanakiaga.

41Ko e heigoa kia ke amaamanaki a mutolu ki ai? Kitia la kua tala atu nai au ki a mutolu: To moua e mutolu e amaamanakiaga ha ko e fakamafolaaga a Keriso mo e malolo he liu tu mai, ke moua e moui tukulagi, ti pihia ha ko e ha mutolu a tua ki a ia ke tuga mo e maveheaga.

42Ko e mena ia, kaeke ke ha ha he tagata e tua, kua lata he ha ha ia ia e amaamanakiaga; ha ko e mena ka nakai fai tua; kua nakai fai amaamanakiaga foki.

43Ti pehe, kitia la, kua tala atu au nakai maeke ha tagata ke ha ha ia ia e tua mo e amaamanakiaga, a to mahani molū mo e fakatokolalo haana loto.

44Kaeke ke pihia ko e haana a tua mo e amaamanakiaga kua nakai aoga, to nakai talia ki mua he Atua kaeke ke nakai mahani molū mo e fakatokolalo e loto; kaeke ke mahani molū mo e fakatokolalo e loto he tagata, mo e talahau haana a tau hala, ha ko e malolo he Agaaga Tapu, ko Iesu ko e Keriso, kua lata ia ia ke ha ha i ai e fakaalofa, kaeke ke nakai ha ha i ai e fakaalofa, kua nakai aoga e tagata ia, ko e mena ia kua lata ke ha ha ia ia e fakaalofa.

45Kua fakauka e fakaalofa, to totonu, nakai mahekeheke e fakaalofa, nakai hula e fakaalofa, ti nakai fakatokoluga, nakai manatu ki a ia ni, nakai mukamuka ke hogohogomanava, nakai manatu kelea, nakai fiafia ke he tau mena kua kelea, ka e fiafia ke he mena mooli, talia e tau mena oti, tua ke he tau mena oti, amaamanaki ke he tau mena oti, mo e fakatumau ke he tau mena oti.

46Ko e mena ia ma haaku tau matakainaga fakahelehele, kaeke ke nakai ha ha i ai e fakaalofa ia mutolu kua teao a mutolu, ha ko e mena nakai kaumahala e fakaalofa. Ko e mena ia, kia tapiki mau ke he fakaalofa; ko e mena kua mua ue atu ha ko e mena mahala e tau mena oti —

47Ka ko e fakaalofa, ko e fakaalofa mooli a Keriso, mo e tumau ai tukulagi ti kaeke kua ha ha i ai a ia kua moua e fakalofa he aho fakamuiaki to mafola a ia.

48Ko e mena ia ma haaku tau fakahelehele, liogi ke he Matua mo e malolo katoa he tau loto, ke maeke ia mutolu ke puke ke he fakaalofa, ne foaki age e ia ki a lautolu koe tau tutaki mooli he haana Tama, ko Iesu Keriso; ke maeke ia mutolu ke eke mo fanau he Atua; Kaeke ke tu mai a ia to tuga a ia a tautolu, ha ko e mena to kitia e tautolu a ia kua tumau ni, kia maeke ia tautolu ke moua e amaamanakiaga nai; Ke maeke ia tautolu ke mea ke tuga a ia ne mea. Amene.