1Ko e magaaho nai kua tala atu au ki a mutolu hagaao ke he papatisoaga. Kitia la kua papatiso e tau patu, tau ekepoa, mo e tau faiaoga; ka ne nakai papatiso ai a to ta mai ai e lautolu e tau fua ke kitia ai kua lata ke taute ai pihia.

2Ne nakai talia falu ia lautolu ke he papatisoaga, a to fakatokihala e tau loto, mo e tau agaaga fakatokolalo mo e fakamooli ke he lotu kua tokihala mooli a lautolu mai he ha lautolu a tau hala.

3Ne nakai fai ia lautolu kua talia ke he papatisoaga, a to uta ai e lautolu e higoa a Keriso mo e amanakiaga malolo ke fekafekau ki a ia a to hoko ke he fakaotiaga.

4Ka mole atu ai ha lautolu a talia ke he papatisoaga, kua moua e fakameaaga ha ko e malolo he Agaaga Tapu, kua totou ai a lautolu ko e tau tagata he lotu a Keriso; kua uta foki ha lautolu a tau higoa ke manatu mo e fagai ai ke he kupu he Atua, ke leveki a lautolu he puhala tonu, ke fakatumau e mahani liogi, mo e falanaki atu ke he tau monuina a Keriso ko ia ne tohia mo e fakaotiaga he ha lautolu a tua.

5Ti ne fakapotopoto fakalataha, tumau e lotu ke fakakanopogi mo e liogi mo e fetutalaaki taha ke he taha ma e mafola he tau momoui he tau agaaga ha lautolu.

6Ne fakapotopoto fakalataha tumau foki a lautolu ke kai ai e aleto mo e uaina ke he fakamanatuaga he Iki ko Iesu.

7Ne kitekite fakalahi atu a lautolu, kua nakai lata ke ha ha ia lautolu ha mena kelea, ko lautolu kua moua kua taute e tau mena kelea mo e fakamooli ai he toko-tolu e tutaki he lotu ki mua he tau patu, kaeke ke nakai tokihala po ke talahau ai, ko e ha lautolu a tau higoa kua uta kehe ai, mo e nakai totou ai a lautolu fakalataha mo e tau tagata a Keriso.

8Kaeke ke tokihala a lautolu mo e ole ke he fakamagaloaga mo e fakamakamaka to fakamagalo atu ai ki a lautolu.