1Ma haaku tama fakahele na e, kua liu au tohi atu ki a koe ke iloa e mutolu, kua moui agaia au; kua tohi atu au falu a mena fakamomoko.

2Kitia la ne felatauaki au mo e mamahi mo e tau Lamana mo e nakai kautu a mautolu. Ne veli ai a Akenitasi pihia foki mo Lulama, mo Emelona ha ko e pelu, hanai ti kua mamate ai e tokologa he ha mautolu a tau uho tagata.

3Ti ko e magaaho nai, kitia la ma haaku tama, kua matakutaku au neke fakaotioti he tau Lamana e tau tagata nai; ha ko e ha lautolu a nakai fakatokihala, ti kua fakatumau e mahani fakaohooho a Satani ke feitaaki ai a lautolu e taha ke he taha.

4Kitia la kua fakatumau ai haaku a gahua mo lautolu; ko e magaaho ka vagahau fakalahi atu e au e tau kupu he Atua ki a lautolu, kua vivivivi mo e ita mai a lautolu ki a au; ka nakai fakamakamaka atu au kua fakamaō ha lautolu a tau loto; ko e mena ia kua matakutaku au kua fakaoti e gahuahuaaga he Agaaga Tapu mo lautolu.

5Ha kua mua ue atu e ita ha lautolu, mo e kitia ai e au kua nakai matakutaku a lautolu ke he mate; ti kua galo foki ha lautolu a fakaalofa taha ke he taha; kua fia inu a lautolu ke he toto mo e taui atu ke he kelea ke he tau magaaho oti.

6Ko e magaaho nai ma haaku tama fakahele na e, kia toka ai ha lautolu a tau mahani uka, kia gahua ni a taua fakamalolo, ha ko e mena ka fakaoti e gahua ha taua, to hohoko ai a taua ke he fakahalaaga; ha kua ha ha ia taua e gahua ke taute he mouiaga nai, kia mahala ai e fi he tau mena tututonu oti kana, mo e fakaokioki ai ha taua a tau agaaga ke he kautu he Atua.

7Ko e magaaho nai to tohi e au falu a mena ke he tau matematekelea he tau tagata nai. Kua lata ia mo e tau mena ne iloa e au mai ia Amoroni, kitia la, kua tokologa lahi e tau pagota he tau Lamana ne moua mai e lautolu he kolo i Selisa; ti ha ha i ai e tau taane, tau fifine mo e tau fanau.

8Ti ko e tau taane, mo e tau mamatua taane he tau fifine ia, mo e tau fanau ia, kua kelipopo e lautolu; ti ne fagai e lautolu e tau fifine aki e tau kakano he tau taane ha lautolu, mo e tau fanau aki e tau kakano he tau mamatua taane ha lautolu, mo e tote lahi foki e vai inu ne foaki ki a lautolu.

9Ti nakai toka ia he mena kelea lahi nai ne eke ai he tau Lamana, kua mai nai ia he tau mena kelea he tau tagata ha tautolu i Molianatumu. Kitia la ko e tokologa he tau fanau fifine he tau Lamana kua uta fakapagota ai e lautolu; mo e uta kehe e lautolu e mena mahuiga mo e uho he tau mena oti, ko e mahani mea mo e mahani mitaki mai he tau tamaafine ia.

10Ka mole atu he taute e lautolu e mena nai, ne kelipopo ai e lautolu a lautolu ke he puhala kua mua ue atu he kelea, kua fakakikiveka ai e tau tino ha lautolu a to hoko ke he mate; ka mole ia, ti gau hē ai e tau kakano ha lautolu, tuga ne tau manu favale, ha ko e mao he tau loto ha lautolu, kua taute ai e lautolu ko e fakamailoga ia he toa.

11Oi ma haaku tama fakahele na e, maeke fefē e tau tagata pehe nai, kua nakai ha ha i ai ha maama —

12(Ti ko e gahoa ni e tau tau kua mole atu, ko lautolu he magaaho ia, ko e tau tagata maama mo e mitaki).

13Oi ma haaku tama na e, maeke fefē he tau tagata pehe nai, kua fiafia lahi ke he tau mena kua mua he kelea —

14Maeke fefē ia tautolu ke manatu, to fakauka he Atua haana a lima he fakafiliaga ki a tautolu?

15Kitia la kua tagi haaku loto: Oi te! ke he tau tagata nai. Kia hoko mai haau a fakafiliaga ma Atua n,a e, kia fufū ha lalu a tau hala, mo e tau mahani kelea mai i mua he haau a fofoga!

16Ti pehe foki ma haaku tama na e, kua tokologa ai e tau takape mo e tau fanau fifine ha lautolu ne ha ha i ai agaia i Selisa; ti ko e falu a koloa ne nakai uta he tau Lamana ne uta ai he kautau a Senifi, mo e toka ai a lautolu i ai ke o fano ai mo e kumi e lautolu ha lalu tau mena ke kai; ti tokologa he tau fuakau fifine ne mamatefua he hala mo e mamate ai.

17Ko e kautau foki ne fakalataha mo au kua lolelole; ti ko e tau kautau he tau Lamana ha ha he vahaloto a Selisa mo au; mo e tokologa kua fehola ai ke he kautau a Arona — Kua mahala mo e veveli ai ke he tau aga vale kua mua he kelea ha lautolu.

18Oi ko e tau matematekelea he haaku a tau tagata! Kua nakai fai takitakiaga mo e nakai fai fakaalofa. Kitia la, ko au ni ko e tagata, ha ha foki ia au e malolo he tagata, ti kua nakai tuai maeke ia au ke fai peehiaga ke he haaku a tau poakiaga.

19Kua malolo lahi ha lautolu a tau manatu hepehepe; kua lahi ha lautolu a tau aga vale, nakai fakahao taha, e fuakau po ke fuata; kua fiafia ke he tau mena oti, kua nakai mitaki; ko e matematekelea foki he tau fifine mo e tau fanau oti kua ha ha he motu nai, kua mua atu e kelea ke he tau mena kelea oti; hanai nakai maeke he alelo ke talahau, nakai maeke foki ke tohia ai.

20Ko e magaaho nai ma haaku tama na e, nakai fakaloaloa atu au ke he mena matakutakuina nai, kitia la kua iloa e koe e tau mahani kelea he tau tagata nai; iloa foki e koe, nakai fai fakaakoaga po ke ha manatu atu ki tua ia lautolu; kua mua atu ni e mahani kelea ha lautolu ke he tau Lamana.

21Kitia la ma haaku tama na e, nakai maeke ia au ke ole ke he Atua ma lautolu he matakutaku neke kelipopo e ia au.

22Ka e kitia la ma haaku tama kua ole atu au ke he Atua maau, ti kua tua au ki a Keriso kia moui ai a koe; kua liogi au ke he Atua ke fakahao ai haau a moui, ke fakamooli e liliumaiaga he haana tau tagata ki a ia, po ke ha lautolu a kelipopoaga ha kua iloa e au kua lata ke fakaotioti a lautolu kaeke ke nakai tokihala mo e liliu atu ki a ia.

23Ti kaeke ke mamate a lautolu to tuga e tau Iareto ha ko e uka he tau loto ha lautolu, kua kumi au ke he toto mo e tauiaga ke he kelea.

24Ti kaeke ni ke mamate ai a lautolu, kua iloa e taua ko e tokologa he tau matakainaga ha taua kua kau fakalataha mo e tau Lamana, mo e to tokologa foki, ka fehola ki ai; ko e mena ia kua tohia falu a mena kaeke ke moui a koe mo e mate au ka e nakai kitia e au a koe; ka e kua tua au to kitia e au a koe he tau magaaho ku i mua ha kua ha ha ki a au e tau fakamauaga tapu ke foaki atu ki a koe.

25Ma haaku tama, kia fakamooli ki a Keriso; ti aua ia neke momoko ha koe tau mena ne tohi ai e au, ke toho hifo ai a koe ke he mate, ka e kia maeke ia Keriso ke lagaaki hake a koe ki luga, mo e ha ko e haana matematekelea, mo e mate, mo e ha ko e fakakiteaga he haana a tino ke he ha tautolu a tau matua mo e haana fakaalofa mo e fakauka, mo e haana a amaamanakiaga lilifu mo e moui tukulagi kia manatu tukulagi e koe.

26Ti kia ha ha he fakaalofa noa he Atua ko e Matua, ko e haana a nofoaiki kua tokoluga ke he lagi, mo e ha tautolu a Iki ko Iesu Keriso, kua nofo ai ke he faahi matau he haana a malolo a to hoko ke liu fakalataha ki a ia e tau mena oti, kia fakalataha ai mo koe tukulagi. Amene.