1 Ne mpindiewu ndi ngakula bitangila ditambula. Monayi, bakulu, bakuidi, ne balongeshi bavua batambula; ne kabavua batambula to amu pa kumbusha bobu bakuama bimuma bivua biakanyina ne bavua bakumbanyina kutambula.

2 Anyi kabakanyisha bua kutambuisha muntu nansha umua to amu pa kumbusha bobu balua ne mutshima mutshibuluka ne nyuma munyingalala, ne baleja kudi ekelezia ne bulelela bavua bakudimuna mutshima ku mibi yabu yonsu.

3 Ne kabakanyisha bua kutambuisha muntu to amu pa kumbusha biangatabu dîna dia Kilisto, bikala ne dipangadika dia kumusadila tô ne ku ndekelu.

4 Ne kunyima kua banyishibua bua ditambula, ne benzejibua ne balengejibua kudi bukola bua Nyuma wa Tshijila, bakabadibua munkatshi mua bantu ba mu ekelezia wa Kilisto; ne mêna abu akangatshibua, bua kubavulukabu ne kubadishabu ne dîyi dimpa dia Nzambi, bua kubalama mu njila muakana, bua kubalama batungunuka kudimuka mu disambila, beyemena amu ku midimu miakana ya Kilisto, uvua muikala mubangi ne mushikiji wa ditabuija diabu.

5 Ne ekelezia uvua usangila pamua misangu mivula, bua kujila ne bua kusambila, ne bua kuambilangana bitangila diakalengela dia anyima yabu.

6 Ne bavua badisangisha pamua misangu mivula bua kuangata diampa ne mvinyo, bua kuvuluka Mukalenga Yezu.

7 Ne bavua batangila ne bushuwa menamena bua ne kakuikadi malu mabi munkatshi muabu to; ne ewu yonsu uvuabu basangana wenza malu mabi, ne bajadiki basatu ba mu ekelezia bavua bamupîsha kumpala kua bakulu, ne pavuabu kabayi bakudimuna mutshima to, ne kabayi batonda to, mêna abu akakupudibua, ne kabavua babadibua munkatshi mua bantu ba Kilisto to.

8 Kadi misangu yonsu pavuabu bakudimuna mutshima ne bakeba dibuikidila, ne dijinga dilelela, bavua babuikidibua.

9 Ne masangisha abu avua alombodibua kudi ekelezia ku mushindu wa midimu ya Nyuma, ne ku bukola bua Nyuma wa Tshijila; bualu bukola bua Nyuma wa Tshijila buvua babalombola ne bua kuyisha, anyi bua kukankamija, anyi bua kusambila, anyi bua kutendekena, anyi bua kuimba, bavua benza mena nanku.