1 At ngeni magsalita ku tungkul keng binyag. Lawan, ding makatua, sacerdote, at talaturu mebiniag la; at ela mabinyag nung ela migdalang bungang karapatdapat para mabinyag.

2 Ni eda pepabureng ninumang tau mabinyag ya nune pepakit da a maki malungkut lang pusu at sisising espiritu; at patunayan da king pisamban ing tutu lang sinisi kareng anggang kasalanan da.

3 At alang metanggap king binyag maliban mu nung tanggapan de ing lagiu nang Cristo, at mika kapagnasan a suyuan de anggang kapupusan ning karelang bie.

4 At kaibat dang metanggap king binyag, at metanggap la at melinis king upaya na ning Espiritu Santo, mibilang la karing tau na ning pisamban nang Cristo; at ding karelang lagiu misulat la, bang maganaka la at masese king mayap a amanu ning Dios, para manatili la king ustung dalan, bang manatili lang mimingat king panalangin, mamasa mu king kayablasan nang Cristo, ing asaan da king karelang kasalpantayanan manibat king mumuna angga king kapupusan.

5 At ding miembru ning pisamban medalas lang mipulungpulung, para magayunu at manalangin, at makipagsalita king balang metung tungkul king kapakanan ning kaladua.

6 At medalas lang mitipuntipun a abe-abe para mangan king tinape at alak, para king pamagganaka king Guinung Jesus.

7 At meging maingat la king pamaglawe a alang dapat mikasala karela; at ninumang meyakit gawang kasalanan, at atlung saksi na ning pisamban perusan dala arapan da ring makatua, at nung ela sinisi, at ela migtapat, ding karelang lagiu milako la, at ela mibilang karing tau nang Cristo.

8 Dapot kasing dalas ning karelang pamanisi at pamaniawad patawad, maki tune kapagnasan, mipatawaran la.

9 At ding karelang pulung penibalan nala ning pisamban agpang karing gawa na ning Espiritu, at king upaya na ning Espiritu Santo; uling anti ing upaya na ning Espiritu Santo tinaid nala nung manaral la, o manamuyut o manalangin, o maniawad maki kapagkumbaban, o magkanta, anya pin iti milyari.