1. E teianei, te tuatua nei au no runga i te bapetizoanga. I na, kua bapetizoia te au ereta, te au taunga e te au puapii, kare ra ratou e bapetizoia, mari ra, kia rave ratou i te angaanga tei tau i te reira.

2. Kare rava tetai i arikiia no te bapetizo, mari ra, ko tei aere mai ma te ngakau akaaka e te vaerua meitaki, kia kite te akonoanga e, kua tataraara i ta ratou au ara.

3. E kare katoa e tangata e arikiia no te bapetizo, mari ra, kia rave aia i te ingoa o te Mesia ki runga iaia, ma te akakoro e ka akono aia iaia e tae ua atu ki te openga.

4. E kia oti ratou i te arikiia na roto i te bapetizoanga, e kia raveia e i tamaia, e te mana o te Vaerua Tapu, ei reira ratou e tatauiaʼi ki rotopu i te au tangata o te akonoanga a te Mesia e kua tataia to ratou ingoa kia maaraaraia e kia utuutuia, e te au tuatua meitaki a te Atua, kia noo ki te ngai tika e kia tiaki marie na roto i te pure, i te irinaki ua anga ki te meitaki o te Mesia, koia te tumu e te akaotianga o to ratou akarongo.

5. Kua uipa putuputu te akonoanga no te pure e te akakoreanga kai, e kia tuatua ratou uaorai no te meitaki o to ratou uaorai au vaerua.

6. E kua uipa putuputu katoa ratou no te rave anga i te varaoa e te wina, ei akamaaraanga i te Atu ia Iesu.

7. E kua matakite tikai ratou i te akapapu anga e, auraka rava e tarevake i rotopu ia ratou, e ko tei kitea e kua rave ara aia, ka raveia mai e toru kite o te akonoanga ei akaapa ia ratou ki mua i te au ereta, e me kore ratou e tataraara, e kare oki e aaki i te tika, ka tipuia to ratou ingoa ki vao, e kare ratou e tatau akaouia ki rotopu i te au tangata o te Mesia.

8. Kareka ra, me tataraara ratou, ma te tauta e kia akakoreia te reira, ma te inangaro tika, ka akakoreia ta ratou au ara.

9. Na te akonoanga e akaaere i ta ratou au uipaanga, mei tei tau i ta te Vaerua, e ma te mana o te Vaerua Tapu, e na te mana o te Vaerua Tapu e arataki ia ratou kia ako, kia akamaroiroi, kia pure, kia pati, kia imene oki, e kua akaperaia oki ïa.