1. Te episetole a toku Metua a Momoni, tei tataia mai kiaku kia Moronai i muri ake i toku kapikiangaia ki te angaanga orometua. E teia tana i tata mai kiaku, i te na ko anga mai e,

2. E taku tamaiti akaperepere e Moronai, e rekareka anga maata toku ia koe, no tei aroa te Atu ko Iesu Mesia ia koe, e kua iki ia koe ei rave i tana angaanga, e tana angaanga tapu.

3. E manakonakoanga rai toku ia koe i roto i toku pure anga atu ki te Atua te Metua na roto i te ingoa o tana tamaiti tapu ko Iesu, kia akono aia, na roto i tona meitaki maata e tona aroa ua, kia akono oki aia ia koe kia tāpū marie koe i te akarongo i tona ingoa e tae ua atu ki te openga.

4. E teianei e taku tamaiti, ka tuatua au kia koe i te au mea e taitaia ravaʼi au, e tumatetenga tikai au no te tauetonoanga i rotopu ia kotou.

5. Me e tuatua tika tei akakiteia mai kiaku, kua tupu te tauetonoanga i rotopu ia kotou no runga i te bapetizo anga o ta kotou au tamariki mearikiriki.

6. No reira e taku tamaiti, te anoano nei au, kia tauta marie ua koe, e kia akakoreia atu teia tarevake maata mei rotopu ia kotou, ko te tumu oki teia i tata atu ei au i teia episetole.

7. I muri ua ake i toku kiteanga i teia au mea tei tupu kia kotou kua pati atura au ki te Atua, no runga i teia mea. Kua tae maira te tuatua a te Atua kiaku, na roto i te mana o te Vaerua Tapu, i te na ko anga mai e,

8. Ka akarongo mai ana i te reo o te Mesia, toou akaora, toou Atu, e toou Atua, i na, kare au i aere mai ki to te ao nei e apii i te aronga tuatua tika kia tataraara, no te aronga ara ra, kare oki te taote e no te tangata ora, no tei makiia ra, no reira, te ora ua ra te tamariki rikiriki, kare oki ratou i rave ara ana, no reira, kua rave keia te taumaa o Adamu mei runga ia ratou, na roto iaku, no reira kare atura e mana ki runga ia ratou, e te ture oki o te peritome, kua oti ke ana te reira iaku nei.

9. Ko te tu teia i ta Vaerua Tapu akakiteanga mai kiaku i te tuatua a te Atua, no reira, e taku tamaiti akaperepere e, kua kite oki au e, ko ta kotou bapetizo anga i te tamariki mearikiriki, e angaanga viivii ïa i mua i te Atua.

10. I na, te tuatua atu nei au kia koe, ko taau teia e apii atu kia ratou, te tataraara, te bapetizoanga no te aronga tei tau no te rave ara, ae, e apii i te au metua kia tataraara e kia bapetizoia, e kia taakaaka ia ratou, mei ta ratou au tamariki rai, e ka ora katoa ia ratou, ma ta ratou au tamariki katoa.

11. E kare oki te tataraara me kore ra, te bapetizo e inangaroia no ta ratou tamariki mearikiriki. I na, ko te bapetizoanga no te tataraara ïa, no te akatupu anga i te akaueanga no te mataraanga o te au ara.

12. Ina ra, te ora ua ra te tamariki i te Mesia ra, mei te akatumuangaia mai o te ao nei, naringa kare, kua riro i reira te Atua ei Atua pae tai ua, e e Atua akatuke, e te akono i te tu o te tangata, eaa te maata o te au tamariki rikiriki tei mate, e kare i bapetizoia?

13. No reira, naringa e kare e ora te tamariki tei kore i bapetizoia, kua aere takere ana ratou kia ade openga kore.

14. I na, te tuatua atu nei au kia koe, ko tei manako e kia bapetizoia te tamariki varevare, tei roto aia i te vaarua kavangu o te kino, e te tapeka o te ara, kare oki ona akarongo, kare e manakonakoanga, kare e aroa, no reira, ka tipu keia aia i tona manako, e kua uriia aia ki raro ia ade.

15. E kino rikarika tikai kia manako e, ka akaora te Atua i tetai tamaiti no tei bapetizoia aia, e ko tetai, ka mate aia, no te mea, kare aia i bapetizoia.

16. Ka mate oki ratou tei akatarevake i te arataa o te Atu, mei teia te tu, e mate tikai ratou me kore ratou e tataraara. I na, te tuatua nei au ma te mataku kore no te mana i orongaia mai kiaku e te Atua, kare oki au e mataku i ta te tangata ka rave, ko te aroa mou, nana e akakore i te mataku.

17. Kua ki oki au i te aroa ua, koia te aroa mutu kore, no reira, kua aiteite pouroa te tamariki kiaku nei, no reira, te aroa nei au i te au tamariki ma te aroa mou tikai, e okotai rai o ratou tu, e ka rauka oki te ora.

18. Kua kite oki au e, kare te Atua i te Atua pae tai, kare oki te Atua e tuke, e tuke kore ra tona tu, mei muatangana e mutu kore ua atu.

19. Kare e rauka i te tamariki varevare kia tataraara, no reira, e mea rikarika rava kia patoiia te aroa maata o te Atua ia ratou, te ora ua ra oki ratou iaia no tona ra aroa ua.

20. E ko tei karanga e, e tau te bapetizoanga no te tamariki varevare kua patoi aia i te aroa ua o te Mesia, e kua akakore oki i te tarangaara e te mana o te akaoraanga.

21. Aue oki ratou, tei te mate ua ratou, i ade, e te mamae openga kore. Te tuatua nei au ma te maroiroi maata, na te Atua oki i akaue mai iaku. Ka akarongo mai ana, e e akono oki, me kore ra, ka akaapaia kotou kia tae ki te ra akavaanga a te Mesia.

22. E i na, te ora ua ra te tamariki varevare i te Mesia ra, e te aronga katoa tei kore i kite i te ture ra, kua tae mai oki te mana o te tarangaara ki runga ia ratou tei kore a ratou ara, no reira, ko tei kore i akaapaia, kare e tau ia ratou te tataraara, e kare oki e puapinga te bapetizoanga no ratou.

23. Ina ra, e mea viivii te reira i mua i te aroaro o te Atua, i te akakoreanga i te aroa ua o te Mesia, e te mana o tona ra Vaerua Tapu i te irinaki anga ki te au mea mate ra.

24. I na, e taku tamaiti, auraka teia au mea nei, kia tataraara ra te aronga tei akaapaia ratou, e tei taumaaia ki te ture kare i akonoia ra.

25. Ko te ua mua a te tataraara, ko te bapetizo ïa, e te bapetizoanga ra, no te akarongo ïa, i te akono i te au akaueanga, e no te akono anga i te au akaueanga, e akakoreiaʼi te au ara.

26. E na te akakoreanga o te ara i apai mai i te tu maru, e te akaaka o te ngakau, e no te tu maru e te ngakau akaaka i tae mai ei te Vaerua Tapu, ei akapumaana mai i te aronga e manakonakoanga to ratou, e te aroa mou, te aroa te ka vai maroiroi na roto i te pure, e tae ua atu ki te openga ka noo ei te aronga tapu ki te Atua.

27. I na, e taku tamaiti, ka tata akaou atu kia koe, me kore au e aere atu ki te tamaki i te ngati Lamana. I na, ko te parau o teia basileia, me kore ra, te au tangata ngati Niphai, kua riro ïa ei akakore ia ratou, me kore ratou e tataraara.

28. E pure no ratou e taku tamaiti, kia tae mai te tataraara kia ratou, ina ra, te mataku nei au ko tei akamutu aea te vaerua i te noo kia ratou, e i roto i teia tuanga o te enua, te kimi nei ratou kia takore te au tikaanga e te mana tei tae mai mei te Atua mai, e te patoi nei ratou i te Vaerua Tapu.

29. E no to ratou akarukeanga i teia kite maata e taku tamaiti, ka mate tikai ratou kare e roa atu ana, ei akatupu i te au totou tei tuatuaia e te au peroveta, e ta to ratou Akaora oki.

30. Kia orana koe e taku tamaiti e tae ua atu ki te tuatau e tata akaou atu ei au kia koe, me kore ra, kia aravai akaou taua.