1. E taku tamaiti akaperepere e, te tata akaou atu nei au kia koe, kia kite mai oki koe e, te ora nei rai au, ina ra, te tata atu nei au i tetai au mea tumatetenga ra.

2. E i na, e tamakianga rikarika ta matou ki te ngati Lamana e kare rai matou i autu ana, kua puta oki a Atianita i te koke, e Lurama, e Emaroni, e kua mate atu tetai au tangata e manganui o matou.

3. E teianei e taku tamaiti, te mataku nei au ko te takoreia aea teia iti tangata e te ngati Lamana, kare oki ratou e tataraara, e kua akakoko oki a Satani ia ratou kia riri tetai ki tetai.

4. I na, te angaanga pakari nei au i rotopu ia ratou, e me tuatua pakari au i te tuatua a te Atua kia ratou, ka ru ratou e ka riri mai kiaku e me kore au e tuatua pakari, ka marokiakia akaou to ratou ngakau no reira te mataku nei au, ko te akamutu aea te vaerua o te Atua i te noo mai kia ratou.

5. No te maata o to ratou riri te akamanako nei au e, kare o ratou mataku i te mate, e kua ngaro ke to ratou aroa tetai ki tetai e kua kaki ratou i te toto ma te angaanga akaoko ra.

6. E teianei e taku tamaiti akaperepere, no atu rai to ratou marokiakia, kia angaanga maroiroi rai taua ma te akaea kore, me akamutu taua i te angaanga ka riro taua ki raro i te akaapaanga, no te mea, e angaanga ta taua kia rave ka oraʼi taua i teia oraanga, kia autu ei taua ki rungao i te au enemi o te au tuatua tika ravarai, e kia akangaroi to taua vaerua i te basileia o te Atua.

7. E teianei, ka tata au i tetai pae o te mate o teia au tangata, kia tau ki te kite tei rauka mai iaku mei ia Amorona, e i na, e manganui tikai ta te ngati Lamana mou auri ta ratou i apai mei te punanga i Seriza, te tane, te vaine e te tamariki.

8. E ko te au tane, e te au metua o taua au vaine ra, e te au tamariki ta ratou i ta, e kua angaiia te au vaine ki te kiko o ta ratou au tane, e te tamariki ki te kiko o to ratou au metua e kare oki e vai, mari ra, e meangiti ua, tei orongaia na ratou.

9. E maata rava teia angaanga kikino e raveia nei e te ngati Lamana, kare te reira i aite ki ta to tatou au tangata i Morianetuma. I na, e manganui te au tamaine a te ngati Lamana tei arataki mou auriia e kia oti ia ratou i te rave atu ia ratou i te mea tei tau e te meitaki roa atu i te au mea katoatoa, koia oki to ratou tu tiama e te akaturi kore.

10. E kia oti ia ratou i te rave i te reira, kua ta ratou ia ratou na roto i te au tu rikarika tikai, i te tamamae anga i to ratou au kopapa e mate ua atu, e kia oti i reira, kua kai iora i to ratou au kopapa, mei te tu o te manu taae, no te marokiakia o to ratou ngakau e kua rave ratou i te reira, ei akairo no te mataku kore.

11. E taku tamaiti akaperepere e, ka akapeea tikai teia tu tangata tei kore rava o ratou marama,

12. (E nga mataiti iti ua tei topa ki muri, e aronga marama tikai ratou e te manea.)

13. Ina ra, e taku tamaiti, ka akapeea ra te au tangata mei teia te tu, tei mataora ratou i te au mea rikarika maata,

14. Ka naea tatou e manako ei e, ka tāpū te Atua i tona rima i te akaapa anga ia tatou?

15. I na, te aue ua nei toku ngakau e, aue to teia au tangata, e aere mai i te akavaanga, e te Atua e, e uuna i ta ratou au ara, e te kino, e te au angaanga rikarika mei mua i toou na aroaro.

16. Tera tetai, e taku tamaiti, e manganui te au takaua e ta ratou au tamaine, e toe mai ra i Seriza, i tera tuanga o te kai tei kore i apainaia e te ngati Lamana, i na, kua apainaia ïa e te nuku o Zenepi e kua akarukenaia ratou kia kimi i te ngai e rauka mai ei ta ratou kai, e e manganui oki te au vaine ruau tei apikepike e kua mate ua i te pae mataara.

17. Kua apikepike oki te au vaeau iaku nei, e ko te nuku o te ngati Lamana ra tei rotopu ïa iaku e Seriza, e ko ratou oki tei oro atu ki te nuku o Aarona, kua mateia ratou i ta ratou angaanga viivii.

18. Aue te kino maata o teia au tangata e, kare ua o ratou marikoanga kare oki e aroa, i na, e tangata oki au, e e maroiroi tangata oki toku, e kare oki e rauka akaou iaku kia akanoo i taku au akaueanga.

19. Kua ketaketa oki ratou i ta ratou angaanga viivii, e kua riro ratou mei te manu rai, kare e akaoraora, no atu e ruau e e mapu, e rekareka ratou i te au mea ravarai, mari ua ra ko te meitaki, e ko te mamae o ta matou au vaine e ta matou au tamariki i runga i te enua nei, kare e rauka i te vaa kia tuatua, kare oki e tika kia tataia.

20. E teianei, e taku tamaiti, kare rava au e noo ua atu ki runga i teia enua i teia tu rikarika. I na, kua kite koe i te tu kino o teia iti tangata, kua kite oki koe e, e marikonga kore ua ratou, e kare oki o ratou aroa, e to ratou kino kua maata atu i to te ngati Lamana.

21. I na, e taku tamaiti, kare rava au e akatika ia ratou ki te Atua ko te ta aea aia iaku.

22. Ina ra, e taku tamaiti, ka akatika au ia koe ki te Atua, e te irinaki nei au i te Mesia e kia ora koe, e ka pure au ki te Atua kia tiaki i toou oraanga, kia kite i te oki akaou anga mai o teia iti tangata kiaia, me kore ra, to ratou akapou angaia, kua kite au e, ka mate tikai ratou, mari ra, kia tataraara ratou, e kia ariu mai kiaia.

23. E me mate ratou ka aite rai ratou mei te ngati Iareta, no te inangaro maata oki o to ratou ngakau i te kimianga i te toto, e te akaokoanga.

24. E mei te mea oki e mate ratou, kua kite oki taua e, e manganui taua au taeake orureau, e kua piri atu ki te ngati Lamana, e e manganui atu rai te ka oro atu ki te ngati Lamana, no reira e tata koe i tetai au mea iti ua me ka ora ake koe e ka mate au e kare e kite akaou atu ia koe, ina ra, te inangaro nei au kia kite au ia koe kare e roa atu ana, e akapapaanga tapu oki tei ko nei iaku, e ka inangaro au kia oronga atu i te reira kia koe.

25. E taku tamaiti, e mou koe i te akarongo i te Mesia, e auraka te au mea tei tataia e au, e riro ei taitaiaanga noou, ei akateiaa ia koe ki raro i te mate, kia tika ra i te Mesia kia akatu ia koe ki runga, e kia vai te manako o tona tamamaeangaia, e tona mateanga, e te akaarianga i tona kopapa ki to tatou ai metua, e tona aroa ua, e te akakoromakianga roa, e te manakonakoanga i tona kaka, e te oraanga mutu kore, kia vai rai te reira au mea ki roto ia koe e tuatau ua atu.

26. Ei ia koe te aroa ua o te Atua Metua, tei noo ki runga i te terono teitei i te rangi, e to tatou Atu ko Iesu Mesia, tei noo ki te rima katau o tona ra mana, e tae ua atu ki te kauraroanga o te au mea ravarai ki raro iaia, e kia koe katoa e tuatau ua atu. Amene.