1. E teianei, te tata nei au ko Moronai i tetai nga mea tuatua ua a toku metua a Momoni, no runga i te akarongo, te manakonakoanga, e te aroa, ko tana oki teia i tuatua atu ki te tangata, i tona apii anga ia ratou i roto i te sunago, ta ratou i akatu ei ngai akamorianga.

2. E teianei te tuatua atu nei au ko Momoni kia kotou, e aku au taeake akaperepere e, na roto oki i te aroa ua o te Atua Metua, e to tatou Atu ia Iesu Mesia e tona inangaro tapu, no te oronga anga mai i teia kapikianga taua i oronga mai kiaku i raukaʼi iaku kia tuatua atu kia kotou i teia taime nei.

3. No reira, te inangaro nei au kia tuatua kia kotou e te au tangata o te akonoanga, te au pipi maru a te Mesia, e tei rauka te manakonakoanga tikai, e tomo ei kotou ki roto i te akangaroianga o to kotou Atu, mei teianei, e aere ua atu, kia noo atu ei kotou ma ïa katoa ki te rangi.

4. E teianei e aku au taeake, te tuatua atu nei au i taua au mea nei, no to kotou tu maru i te aaereanga ma te tamariki a te tangata.

5. Te akamaara nei au i te tuatua a te Atua, tei na ko mai e, ka kite kotou ia ratou i ta ratou angaanga, e me e angaanga meitaki ta ratou, te meitaki ra ratou.

6. E i na, kua tuatua mai ana te Atua e, kare rava e rauka i te tangata kino kia rave i te mea meitaki, e kia oronga aia i tetai apinga aroa, me kore ra, kia pure atu aia ki te Atua ma te manako kore, kare rava e puapingaia kiaia.

7. E i na, kare te reira e tatauia e, e tuatua tika nana.

8. I na, me apai mai te tangata viivii i tana apinga aroa ma te noinoi, ka akonoia rai te reira nana e mei te mea ra e, kare aia i oronga mai ana, no reira, ka tuatuaia te reira ei mea viivii ki mua i te aroaro o te Atua.

9. E mei te reira katoa kia tatauia to te tangata kino, e me pure aia ma te ngakau tae kore, kare rava te reira e puapinga kiaia, e kare rai oki te Atua e ariki mai i te reira.

10. No reira, kare rava e rauka i te tangata kino, kia rave i te meitaki, e kare rai aia e oronga i te apinga meitaki.

11. E i na, kare te punavai kava e omai i te vai meitaki, no reira, ko te tangata e tavini aia no te tiaporo, kare rava e tika kia aru aia i te Mesia, me ka aru ra aia i te Mesia kare aia i te tavini no te tiaporo.

12. No reira ko te au mea meitaki ravarai, no ko mai ïa i te Atua, e ko te au mea kino ravarai, no ko mai ïa i te tiaporo, e enemi oki te tiaporo i te Atua, e te kai tamaki ua nei rai aia kiaia, e te timata maira ma te taparu kia rave i te ara e te au mea kikino ravarai.

13. Ina ra, ko to te Atua ra, ko te mea ïa e akatupu i te inangaro kia rave i te meitaki, no reira, ko te au mea katoa tei akatupu i te inangaro kia rave i te meitaki e kia inangaro atu i te Atua, ma te tavini atu iaia, e mea akauruia mai ïa e te Atua.

14. No reira, kia matakite, e aku taeake akaperepere e, kia kore kotou e manako i te au mea kino e, no ko mai ïa i te Atua, e ko te mea meitaki no ko mai i te Atua ra, e no ko mai ïa i te tiaporo.

15. I na, e aku au taeake, kua orongaia mai te reira kia kotou kia kite ei kotou i te mea meitaki, e te mea kino, e ko te akara anga, e mea marama ua ïa, ka kite ua kotou i te reira, mei te marama o te rā i te ao, e mei te po poiri.

16. I na oki, kua orongaia mai te Vaerua o te Mesia ki te au tangata ravarai, kia kite ei aia i te meitaki mei te kino, no reira, e akakite atu au kia kotou e ka akapeea kia akara, ko te au mea katoa te ka akatupu mai i te inangaro kia rave i te meitaki, e kia akarongo ki te Mesia e mea ungaia mai te reira e te mana, e te aroa o te Mesia, no reira, ka kite ia kotou ma te marama pu tikai, e na te Atua ïa.

17. Kareka te au mea e oparaiaʼi te tangata kia rave i te kino e kia kore e akarongo atu i te Mesia, e kia patoi atu iaia, e ma te kore e tavini atu ki te Atua, ka kite ua kotou i reira e no te tiaporo ïa, ko te tu oki teia o ta te tiaporo angaanga, kare roa aia e inangaro i te tangata kia rave i te meitaki, kare takiri, kare tana au angela, kare rai oki tei kauraro kiaia.

18. E teianei e aku au taeake, ka kite kotou i te marama kia iki kotou, koia oki te marama o te Mesia, kia matakite ra, auraka kia tarevake ta kotou akaapaanga, ko ta kotou e akakino atu i etai ke ra, ko ta kotou rai ïa ka akakinoia mai.

19. No reira, te ako atu nei au ia kotou, e te au taeake, e kimi marie kotou i te marama o te Mesia, kia kite ei kotou i te meitaki e te kino e me mou kotou ki runga i te au mea meitaki, e ma te akaapa kore ka riro tikai kotou ei tamariki na te Mesia.

20. E teianei, e aku au taeake, ka naea ra kotou e mou ei ki runga i te au mea memeitaki?

21. E teianei, kua tae au ki te akarongo, taku i tuatua ana e, ka tuatua atu, e ka akakite atu au i te mataara e kite ei kotou i te mou i te au mea meitaki.

22. I na, kua kite te Atua i te au mea katoa, i vai ana aia mei muatangana maira e mutu kore ua atu, i na, kua tono mai aia i te au angela ei tauturu i te tamariki a te tangata, e ei akakite i te aereanga mai o te Mesia, e tei roto oki i te Mesia te au mea meitaki ravarai.

23. E kua akakite katoa te Atua ki te au peroveta, na roto mai i tona vaa tikai, e ka aere mai te Mesia.

24. E tuke ke te au mataara tana i akakite mai i te au mea meitaki ki te tamariki a te tangata nei e ko te au mea meitaki no ko mai ïa i te Mesia, e naringa kare, kua inga te tangata, e kare i reira e apinga meitaki e tae mai kia ratou.

25. No reira, na te matuapuru anga angela, e te au tuatua ravarai tei tae mai mei roto i te vaa o te Atua, i akamataʼi te tangata i te akarongo i te Mesia, e na roto i te akarongo i mou ei ratou i te au mea meitaki, e tae ua atu ki te aereanga mai o te Mesia.

26. E i muri ake i tona taeanga mai, kua ora katoa te tangata na roto i te akarongo i tona ra ingoa, e na roto i te akarongo i riro ei ratou ei tamariki na te Atua. E te ora ra te Mesia, i tuatuaʼi aia i teia nei au tuatua ki to tatou ai metua, ka na ko mai ei e, ko te au mea meitaki ta kotou e pati ki te Metua na roto i toku ingoa ma te akarongo e te irinaki e ka rauka mai, i na, ka rauka mai te reira ia kotou.

27. No reira, e aku au taeake akaperepere e, kua akakoreia aina te au semeio, no tei oki atu te Mesia ki te rangi e kua noo ki te rima katau o te Atua, kia pati atu ki tona Metua i tona tika anga i te aroa ua, tei vai ana ki runga i te tamariki a te tangata nei?

28. Kua riro oki aia, ei akatupu i te ture ra, e kua pati oki i te aronga tei akarongo iaia ra, e ratou oki te ka akarongo iaia, kia mou ki te au mea meitaki katoa, no reira, te tuatua ra aia i te tuatua a te tamariki a te tangata, e te noo ra aia i te rangi e mutu kore ua atu.

29. E no tei akapera oki aia, e aku au akaperepere e, kua akamutu ainei te au semeio? I na, te karanga atu nei au, kare, kare rai te au angela e akamutu i te tauturu i te au tangata.

30. I na, e kauraro oki ratou kiaia, me akaue aia ia ratou, i te akaarianga ia ratou ki te aronga e akarongo maroiroi to ratou, e e ngakau ngaueue kore to ratou i te au mea o te tuatua tika.

31. E ko te angaanga a to ratou au taoonga, kia tutu ïa i te tataraara e kia akatupu e kia rave i te angaanga a te koreromotu a te Metua, tana i papau ki te tamariki a te tangata nei, kia akateateamamao i te mataara i te akakite anga i te tuatua a te Mesia, ki te aronga ikiia o te Atu, kia riro oki ratou ei akakite i tana tuatua.

32. E na roto oki i te reira i teateamamao ei te Atu i tetai mataara, no te toenga o te tangata kia rauka te akarongo i te Mesia, kia rauka mai tetai ngai no te Vaerua Tapu i roto i to ratou ngakau, kia tau ki te mana o te reira, e kua na reira te Metua i te akatupu anga i te koreromotu tana i papau ki te tamariki a te tangata nei.

33. Kua na ko mai oki te Mesia e, me e akarongo to kotou iaku nei, ka rauka to kotou mana kia rave ua kotou i te au mea tei tau iaku kia rave.

34. E kua na ko katoa mai e, e tataraara e te au openga mai o te enua e, e ariu mai kiaku nei, e kia bapetizoia na roto i toku nei ingoa, e ma te akarongo mai iaku, kia akaoraia kotou.

35. E teianei, e aku au taeake akaperepere e, mei te mea, e tika teia tuatua, e e tika oki taku e tuatua atu nei kia kotou, na te Atua ïa e akaari atu kia kotou ma te mana e te kaka maata i te ra openga, e e tuatua tika te reira, e me e tika, kua akamutu rai te au ra o te semeio?

36. Me kore ra, kua akamutu ainei te au angela i te aere mai ki te au tamariki a te tangata? Me kore ra, kua rave ke ainei aia i te mana o te Vaerua Tapu mei ia ratou? Me kore ra, ka na reira ainei aia i te roa anga, ka vai ei te enua, e ka riro e, ko tai tangata toe te ka akaoraia i runga i te enua nei?

37. I na, te karanga atu nei au, kare, na te akarongo oki e taangaanga i te semeio, e na te akarongo, i aere mai ei te au angela kia tauturu i te au tangata, no reira, me kua akamutu teia au mea nei, aue te tamariki a te tangata, no to ratou akarongo kore oki, e kua puapinga kore te au mea ravarai.

38. Kare rava e tangata e ora, mei ta te Mesia i tuatua mai, mari ua, ko te aronga e akarongo to ratou i tona ra ingoa, no reira, me kua akamutu teia au mea nei, kua akamutu rai te akarongo i reira, e rikarika rava te turanga o te tangata i reira, e mei te mea rai ra e, kare takiri e ravenga i akonoia e oraʼi te tangata.

39. Ina ra, e aku au taeaka akaperepere, te kimi nei au i te au mea meitaki no kotou e te manako nei au e, e akarongo to kotou i te Mesia no to kotou tu maru, e naringa e kare o kotou akarongo i roto iaia, kare kotou i reira e tau kia kapitiia ki rotopu i te au tangata o tana akonoanga.

40. Tera tetai e aku taeake akaperepere, ka tuatua au kia kotou no runga i te manakonakoanga, ka naea ra e raukaʼi ia kotou te akarongo, mari ra, kia rauka te manakonakoanga?

41. Eaa oki taau ka manakonako i reira? I na, e karanga atu au kia kotou, ei manakonakoanga to kotou na roto i te tapokianga ara o te Mesia, e te mana o tona tuakaouanga, kia akatuia ki te ora mutu kore, no to kotou akarongo i roto iaia, mei tei taputouia maira.

42. No reira me e akarongo to te reira tangata, e manakonakoanga katoa tona, no te mea, me kare e akarongo, kare katoa e manakonakoanga.

43. E tera tetai, i na oki, te karanga atu nei au kia kotou, kare e rauka ia kotou te akarongo, e te manakonakoanga, me kare kotou e maru ma te ngakau akaaka.

44. E naringa kare, e puapinga kore toou akarongo, e toou manakonakoanga, kare rava te Atua e ariki mai ia ratou, mari ua, ko tei maru ma te ngakau akaaka, me e tangata maru tetai e te ngakau akaaka, e kua aaki aia na roto i te mana o te Vaerua Tapu, e ko Iesu te Mesia, ka rauka iaia te aroa ua, me kare ona aroa e puapinga kore ua rai aia, no reira ei aroa rai tetai.

45. E akakoromakianga roa to te aroa, e te meitaki, e kare e noinoi kare oki e akamaata iaia, kare e kimi nona uaorai, kare e riri vave, kare e manako viivii, kare oki e rekareka i te rave ara, e rekareka ra i te tuatua tika, ma te tauta ua atu i te au mea katoa, e akarongo i te au mea katoa, e manakonako i te au mea katoa, e akakoromaki oki i te au mea katoa.

46. No reira, e aku au taeake akaperepere, me kare o kotou aroa e kare rai i kotou puapinga, kare oki te aroa e kore. No reira, e mou i te aroa, ko tei maata atu ïa i te au mea ravarai, ka kore oki te au mea ravarai,

47. Kareka te aroa ua, ko te inangaro mou ïa o te Mesia, ka vai rai te reira e tuatau ua atu, e ko te ka kitea, e tei iaia te reira me tae ki te ra openga, ka meitaki aia.

48. No reira e aku au akaperepere, e pure ki te Metua, ma te maroiroi katoa o te ngakau, kia akakiia kotou ki tona aroa ua tana i riringi mai ki runga i te aronga tika tei aru i tana tamaiti ko Iesu Mesia, kia riro mai oki kotou ei au tamariki na te Atua, e kia mama mai aia ra, e aite ia tatou mei iaia rai, e kite oki tatou iaia i tona tu tikai, ka rauka oki ia tatou teia manakonakoanga, koia oki kia tamaia oki tatou, mei iaia oki e ma.