1 Ne mpindiewu mema, Moloni, ndi mfunda miaku mikesa ya tatu wanyi Molomo, yakakulaye bitangila ditabuija, ditekemena, ne bunangi; bualu wakakula ku mushindu ewu kudi bantu, pavuaye ulongesha mu nsunagoga uvuabu bibaka bua ikala muaba wa tshitendelelu.

2 Ne mpindiewu mema, Molomo, ndi ngakula kunudi, bana betu bananga; ne ndi muanyishibua bua kuakula kunudi diba edi bua ngâsa wa Nzambi Tatu, ne Mukalenga wetu Yezu Kilisto, ne disua dienda dia tshijila, bua dipa dia dibikidibua dienda diakampeshaye.

3 Pananku, ndi musua kuakula nenu badi bikala bena ekelezia, badi balondi ba ditalala ba Kilisto, ne badi bapeta ditekemena dikumbana mu njila kayi nudi mua kubuela mu dikisha dia Mukalenga, katshia ku tshikondu etshi tô ne panuikisha nenda mu diûlu.

4 Ne mpindiewu bana betu, ndi ngela meji pa bintu ebi buenu bua bualu bua ngendelu yenu ya ditalala ne bana ba bantu.

5 Bualu ndi mvuluka dîyi dia Nzambi didi diamba ne nenubamanyina ku midimu yabu; bualu pikala midimu yabu mikala mimpa, badi bikala pabu bimpa.

6 Bualu monayi, Nzambi wakamba ne muntu udi muikala mubi kena mua kuenza tshintu tshidi tshikala tshimpa to; bualu yeya mufila mulambu, anyi musambila Nzambi, katshiena tshimupesha tshipeta tshimpa to, amu pa kumbusha yeya mutshienza ne dijinga dilelela.

7 Bualu monayi, katshiena tshimubadila bu buakana to.

8 Bualu monayi, muntu yeya muikala mubi mufila mulambu, udi uwufila ne kanyinganyinga; bua nanku tshidi tshimubadila momumua bu ne udi mulama mulambu; bua nanku udi mubadibua mubi kumpala kua Nzambi.

9 Ne mushindu umua kabidi, tshidi tshibadibua bubi kudi muntu, yeya musambila kadi kayi ne dijinga dilelela dia mutshima to; eyowa, ne katshiena tshimupesha tshipeta tshimpa to, bualu Nzambi kena witaba muntu wa nanku to.

10 Bua nanku, muntu muikala mubi kena mua kuenza tshintu tshidi tshimpa to; anyi kakufila mulambu muimpa to.

11 Bualu monayi, mpokolo wa bululu kena mua kutuala mâyi mimpa to; anyi mpokolo muimpa kena mua kutuala mâyi a bululu to; bua nanku, muntu udi muikala musadidi wa diabulu kena mua kulonda Kilisto to; ne pikalaye ulonda Kilisto kena mua kuikala musadidi wa diabulu to.

12 Bua nanku, bintu bionsu bidi bimpa bidi biluila kudi Nzambi; ne tshidi tshibi tshidi tshiluila kudi diabulu; bualu diabulu udi muena lukuna kudi Nzambi, ne udi utungunuka kumuluisha, ne ubikila ne ulobesha bua kuenza mibi, ne bua kuenza tshidi tshibi misangu yonsu.

13 Kadi monayi, tshidi tshia kudi Nzambi tshidi tshibikila ne tshilobesha bua kuenza bimpa misangu yonsu; bua nanku, tshintu tshionsu tshidi tshibikila ne tshilobesha bua kuenza bimpa, ne bua kunanga Nzambi, ne bua kumusadila, tshidi tshipetela meji kudi Nzambi.

14 Pananku, dimukayi, bana betu bananga, ne kanuambi ne tshintu tshidi tshibi tshidi tshia kudi Nzambi to, anyi ne tshidi tshimpa ne tshia kudi Nzambi ne tshidi tshia kudi diabulu to.

15 Bualu monayi, bana betu, nudi bapeshibua dianyisha bua nuenu kulumbuluisha, bua nujingulula buimpa ku bubi; ne mushindu wa kulumbuluisha udi patoka, bua ne numanya ne dimanya dijima, bu mudi bukenka bua mundamunya buikala bushilangana ne mîdima ya butuku.

16 Bualu monayi, Nyuma wa Kilisto udi mupeshibua kudi muntu yonsu, bua ajingulula buimpa ku bubi; pananku, ndi nuleja mushindu wa kujingulula; bualu tshintu tshionsu tshidi tshituma bua kuenza buimpa, ne tshitabujija bua kuitabuija mu Kilisto, tshidi tshitumibua ku bukola ne dipa dia Kilisto; bua nanku nudi mua kumanya ne dimanya dijima ne tshidi tshia kudi Nzambi.

17 Kadi tshionsu kayi tshidi tshitabujija bantu bua kuenza bibi, ne kupanga kuitabuija mu Kilisto, ne kumuvila, ne kupanga kusadila Nzambi, pashisha nudi mua kumanya ne dimanya dijima ne tshidi tshia kudi diabulu; bualu diabulu udi wenza mudimu ku mushindu ewu, bualu kena witabujija muntu nansha umua bua kuenza bimpa to, tô, nansha umua; nansha banjelu benda; nansha badi badibatshika kudiye.

18 Ne mpindiewu, bana betu, bu munudi bamanya bukenka bunudi mua nulumbuluisha nabu, bukenka budi buikala bukenka bua Kilisto, tangilayi ne kanulumbuluishi bibi to; bualu nebanulumbuluisha ne dilumbuluisha dia momumua dinudi nulumbuluisha nadi.

19 Bua nanku, ndi nusengelela, bana betu, bua nukeba bukenka bua Kilisto ne dinanukila bua nujingulula buimpa ku bubi; ne panuikala bapeta tshintu tshionsu tshimpa, ne kanuyi nutshipîsha to, bulelela nenuikala bana ba Kilisto.

20 Ne mpindiewu, bana betu, munyi munudi mua kupeta tshintu tshimpa tshionsu?

21 Ne mpindiewu ndi mfika ku ditabuija adi, dimvua muamba ne nengakula bualu buadi; ne nennuambila mushindu kayi unudi mua kupeta tshintu tshionsu tshimpa.

22 Bualu monayi, mudi Nzambi mumanya bintu bionsu, mudiyi muikalaku kashidi ne kashidi, monayi, wakatuma banjelu bua kusadilabu bana ba bantu, bua kumueneshabu malu adi matangila dilua dia Kilisto; ne bua kumuenesha ne tshintu tshionsu tshimpa netshiluila mu Kilisto.

23 Ne Nzambi wakamanyisha kabidi bambi, mukana muenda nkayenda, ne Kilisto nealua.

24 Ne monayi, kuvua mishindu mishilangana yakamueneshaye bintu kudi bana ba bantu, bintu bivua bikala bimpa; ne bintu bionsu bidi bikala bimpa bidi bifumina kudi Kilisto; bantu bavua bajimina, ne tshintu tshimpa nansha tshimua katshivua mua kulua kudibu to.

25 Pananku, ku disadila dia banjelu, ne ku dîyi dionsu diakapatukila mukana mua Nzambi, bantu bakabanga kuenzela ditabuija mu Kilisto; ne ki muakapetabu tshintu tshimpa tshionsu ku ditabuija nanku; ne ki muvuabi nanku tô ne ku dilua dia Kilisto.

26 Ne kunyima kua kuluaye bantu bakapandishibua kabidi mu dîna dienda ku ditabuija; ne ku ditabuija, badi balua bana ba baluma ba Nzambi. Ne bushuwa bu mudi Kilisto muikala ne moyo wakambila batatuetu miaku eyi, wamba ne: Tshintu tshionsu tshinualomba Tatu mu dîna dianyi, tshidi tshikala tshimpa, ne mu ditabuija nuitabuija ne nupeta, monayi, neanupeshatshi.

27 Pananku, bana betu bananga, bishima biajiki bualu bua Kilisto wabandi mu diûlu, ne wasombi ku tshianza tshia baluma tshia Nzambi, bua kulombolola kudi Tatu manema enda a lusa adiye nawu pa mutu pa bana ba bantu anyi?

28 Bualu uvua mukumbaja majinga a mikenji, ne udi ulombolola bunema pa mutu pa aba bonsu badi bikala ne ditabuija kudiye; ne aba badi bikala ne ditabuija kudiye nebalamata ku tshintu tshionsu tshidi tshikala tshimpa; bua nanku udi ulumbuluila bana ba bantu; ne udi usomba tshiendelela mu diûlu.

29 Ne bualu uvua muenza nanku, bana betu bananga, bishima biajiki anyi? Monayi ndi nnuambila ne, To; anyi banjelu kabena bajikija kusadila bana ba bantu to.

30 Bualu monayi, badi babatshikibua kudiye, bua kusadila bilondeshila ku dîyi dia mukenji wenda, badileja kudi badi bikala ne ditabuija dikola ne meji makamakana mu mushindu onsu wa dinemeka dia Nzambi.

31 Ne mudimu wa disadila diabu uvua wa kubikila bantu bua kukudimuna mutshima, ne wa kuenza mudimu wa bipungidi bia Tatu, bivuaye muenza ne bana ba bantu, bua kulongolola njila munkatshi mua bana ba bantu, mu kumanyisha kua dîyi dia Kilisto kudi mpanza misungula ya Mukalenga, bua ne bajadika buenda.

32 Ne ku dienza nanku, Mukalenga Nzambi udi ulongolola njila bua bantu badi bashala bikala ne ditabuija mu Kilisto, bua Nyuma wa Tshijila apeta muaba mu mitshima yabu, bilondeshila ku bukola buenda; ne ku mushindu ewu udi Tatu ukumbaja bipungidi bivuaye muenza ne bana ba bantu.

33 Ne Kilisto wakamba: Binuikala ne ditabuija kundi nenupeta bukola bua kuenza tshintu tshionsu tshidi tshikengedibua kundi.

34 Ne wakamba ne: Kudimunayi mutshima nuenu bonsu ndekelu ya buloba, ne luayi kundi, ne tambuishibuayi mu dîna dianyi, ne ikalayi ne ditabuija kundi, bua ne nupandishibua.

35 Ne mpindiewu, bana betu bananga, pikalabi ne bintu binganuambidi ebi bidi bikala bilelela, ne Nzambi neanuleja, ne bukola ne butumbi bua bungi ku dituku dia ndekelu, ne bidi bikala bilelela, ne pikalabi bilelela dituku dia bishima dikadi dipita anyi?

36 Anyi banjelu bakadi balekela kumueneka kudi bana ba bantu anyi? Anyi ukadi mubapala bukola bua Nyuma wa Tshijila wenda anyi? Anyi neenza nanku patshikalaku diba, anyi patshikala buloba buikalaku, anyi patshikalaku muntu umua pa mutu pabu bua kupandishibua anyi?

37 Monayi ndi nnuambila ne, To; bualu bishima bidi bienzeka ku ditabuija; ne kudi bua ditabuija ne banjelu badi bamueneka kudi bantu ne badi babasadila; bua nanku, pikala bintu ebi bijika diakabi dikala kudi bana ba bantu, bualu mbua dipanga ditabuija diabu, ne bionsu bidi bikala tshianana.

38 Bualu muntu nansha umua kena mua kupandishibua to, bilondeshila ku mêyi a Kilisto, amu pa kumbusha bobu bikala ne ditabuija mu dîna dienda; bua nanku, pikala bintu ebi bijika, pashisha ditabuija didi dijika padi; ne ngikadilu wa muntu udi muikala utshinyisha bikola, bualu bidi bu ne kakuvua disungila dienzeka nansha.

39 Kadi monayi, bana betu bananga, ndi ngela meji bimpa bipita buenu, bualu ndi ngela meji ne nudi ne ditabuija mu Kilisto bua ditudija dienu; bualu binuikala kanuyi ne ditabuija kudiye to apu kanuena bakumbanyina bua kubadibua munkatshi mua bantu ba mu ekelezia wenda to.

40 Ne kabidi, bana betu bananga, ndi musua kunuambila bitangila ditekemena. Munyi munudi mua kupeta ditabuija, panuikala kanuyi ne ditekemena to?

41 Ne nenuikala ne ditekemena bua tshinganyi? Monayi, ndi nnuambila ne nenuikala ne ditekemena ku njila bupikudi bua Kilisto ne bukola bua dibika dienda ku lufu, bua kubishibua bua kupeta moyo wa tshiendelela, ne etshi bua ditabuija dienu kudiye bilondeshila ku dilaya.

42 Bua nanku, pikala muntu ne ditabuija bidi bikengela ne ikala ne ditekemena; bualu padiku kakuyi ditabuija to kakuena mua kuikala ditekemena to.

43 Ne kabidi, monayi ndi nnuambila ne kena mua kuikala ne ditabuija ne ditekemena to, amu pikalaye mutudiji, ne mupuekela mu mutshima.

44 Bikalabi nanku, ditabuija dienda ne ditekemena bidi tshianana, bualu nansha umua udi witabuijibua kumpala kua Nzambi, amu mutudiji ne mupuekela mu mutshima; ne bikala muntu mutudiji ne mupuekela mu mutshima, ne utonda ku bukola bua Nyuma wa Tshijila ne Yezu udi Kilisto, udi ne tshia kuikala ne bunangi; bualu bikalaye kayi ne bunangi to udi tshianana; bua nanku udi ne tshia kuikala ne bunangi.

45 Ne bunangi budi ne bulekelelu, ne budi ne kalolu, ne kabuena bualakana, ne kabuena buwulakana ne diditambisha, kabuena budikebela bintu, kabuena bukuatshika tshiji lukasa, kabuena buela meji mabi to, ne kabuena busanka mu malu a bubi kadi budi busanka mu bulelela, budi butuala malu onsu, budi buitabuija malu onsu, budi butekemena malu onsu, budi bunanuka mu malu onsu.

46 Bua nanku, bana betu bananga, binuikala kanuyi ne bunangi, nudi tshianana, bualu bunangi kabutu bushikila nansha. Bua nanku, kuatshilayi ku bunangi, budi bunena kupita bionsu, bualu bintu bionsu bidi ne tshia kushikila—

47 Kadi bunangi budi dinanga dikezuka dia Kilisto, ne budi bunanuka bua kashidi; ne ewu yonsu wasanganyibua nabu ku dituku dia ndekelu, nebikala bilengela buenda.

48 Bua nanku, bana betu bananga, sambilayi Tatu ne makanda onsu a mutshima wenu, ne nuwujibua ne dinanga edi, diakapeshaye bonsu bavua bikala balondi balelela ba Muanenda, Yezu Kilisto; bua nulua bana ba baluma ba Nzambi; ne pâmuenekaye netuikala bafuanangana nenda, bualu netumumona bu mudiye; bua tuikala ne ditekemena edi; bua tuikala bakezukibua mena bu mudiye mukezuka. Amena.