1 Muananyi wa baluma munanga, ndi nkufundila kabidi bua umanya ne ntshidi ne moyo; kadi ndi mfunda kakesa bitangila tshidi tshikola.

2 Bualu mona, mvua muluangana mvita mikola ne Bena Lamana, ne katuakatshimuna to; ne Alekeantu udi mupona ku muela wa mvita, ne Lulama ne Emelona kabidi; eyowa, ne tudi bajimija bungi bunena bua bantu betu ba disungula.

3 Ne mpindiewu mona, muananyi wa baluma, ndi ntshina ne Bena Lamana kabalu kubutula bantu aba; bualu kabena bakudimuna mutshima to, ne Satana udi ubasonsola misangu yonsu bua kufîkilangana tshiji.

4 Mona, ndi ngenza nabu mudimu diba dionsu; ne pandi ngamba dîyi dia Nzambi ne mêyi matua badi bazakala ne bamfikila tshiji; ne pandi ntshiyi ngenzela mêyi matua to badi bapapisha mitshima yabu buadi; bua nanku, ndi ntshina ne Nyuma wa Mukalenga ukadi mulekela kuenda nabu.

5 Bualu badi bafika tshiji nanku menamena bua ne ndi mmona ne kabena ne bôwa bua lufu to; ne mbajimija dinangangana diabu; ne badi batungunuka kuikala ne nyota ya mashi ne ya disombuela.

6 Ne mpindiewu, muananyi wa baluma munanga, nansha mudibi bua dipapa diabu, tukuatayi mudimu ne dinanukila; bualu tuetu balekela kukuata mudimu, netupîshibua; bualu tudi ne mudimu wa kuenza patutshidi mu tshitanda etshi tshia dîma, bua ne tutshimuna muena lukuna wa buakana bonsu, ne bua ne tuikishisha anyima yetu mu bukalenga bua Nzambi.

7 Ne mpindiewu ndi nkufundila kakesa bitangila makenga a bantu aba. Bualu bilondeshila ku dimanya dindi mupeta kudi Amolono, mona, Bena Lamana badi ne bena lukanu ba bungi, bakakuatabu ku kaleya ka Sheliza; ne kuvua baluma, bakaji, ne bana.

8 Ne mbashipa ba bayenda ba bakaji abu ne batatuenda ba bana abu; ne badi badisha bakaji misunyi ya babayabu, ne bana misunyi ya batatuabu; ne kabena babapesha mâyi to, amu makesa.

9 Ne nansha mudibi bua bualu bubi bupita bua Bena Lamana bunena ebu, kabuena butamba bua bantu betu mu Moliantuma to. Bualu Mona, badi bakuata bana ba bakaji ba bungi ba Bena Lamana bena lukanu; ne kunyima mbabanyenga tshintu tshinangibua bikola ne tshia mushinga mupita bintu bionsu, tshidi tshikala bunonoka ne bupeluka—

10 Ne kunyima kua kuenzabu bualu ebu, bakabashipa mu mushindu wa lonji lupita bukola, bakengesha mibidi yabu tô ne ku lufu; ne kunyima kua kuenzabu nanku, badi bakusula misunyi yabu bu mudi nyama ya muitu, bua bupapa bua mitshima yabu; ne badi benza nanku bu mudi tshilejilu tshia dikima diabu.

11 Ô muananyi wa baluma munanga, munyi mudi bantu bu aba, badi kabayi ne nshidimukilu to—

12 (Ne amu bidimu bikesa bikadi bipita, ne bavua bikala bantu bashidimuka ne bimpa kumona)

13 Kadi Ô muananyi wa baluma, munyi mudi bantu bu aba, bena musangelu udi mu malu mapita bubi mavula nanku—

14 Munyi mutudi mua kutekemena ne Nzambi neatulaminyina tshianza tshienda mu tshilumbuluilu?

15 Mona, mutshima wanyi udi ubila: Diakabi kudi bantu aba. Patuka mu tshilumbuluilu, Ô Nzambi, ne sokoka mibi yabu, ne bubi buabu, ne malu mapita bubi abu kumpala kueba!

16 Ne kabidi, muananyi wa baluma, kudi bakaji bakamba ne bana babu ba bakaji badi bashala mu Sheliza; ne tshitupa tshia biakudia tshivua Bena Lamana kabayi baya natshi to, mona, musumba wa basalayi ya Zenefi wayi natshi, ne mbabashiya bua kutambakanabu konsu kudibu mua kupeta biakudia; ne bakaji bakulakaja ba bungi badi bakuluka bajimija meji mu njila ne badi bafua.

17 Ne musumba wa basalayi undi nawu udi muteketa; ne misumba ya basalayi ya Bena Lamana idi pankatshi panyi ne Sheliza; ne bonsu bavua banyemena kudi musumba wa basalayi wa Alona bafu bua tshikisu tshiabu.

18 Ô dinyanguka dia bantu banyi! Kabena ne bulongama to ne kabena ne lusa to. Mona, ndi amu muntu, ne ndi amu ne makanda a muntu, ne ntshiena mua kubenzeja mikenji to.

19 Ne badi benza malu abu makonyangala bikola; ne badi momumua ne tshikisu, kabayi bapandisha nansha umua to, anyi mukola anyi muana to; ne badi basanka ne bualu bonsu amu pa kumbusha bualu buimpa; ne dikenga dia bakaji betu ne bana betu pa mpala onsu wa bulaba ebu ndipita malu onsu; eyowa, ludimi kaluena mua kuamba to, anyi kadiena mua kufundibua to.

20 Ne mpindiewu, muananyi wa baluma, ntshiena nsombela malu a bôwa â to. Mona, udi mumanya bubi bua bantu aba; udi mumanya ne bakadi bajimija bumuntu buabu, ne kabatshiena ne tshiumvuilu to; ne bubi buabu budi bupita bua Bena Lamana.

21 Mona, muananyi wa baluma, ntshiena mua kubakuila kudi Nzambi bua ne kalu kuntûta to.

22 Kadi mona, muananyi wa baluma, ndi nkuakuila kudi Nzambi, ne ndi ne ditekemena mu Kilisto ne neupandishibua; ne ndi nsambila Nzambi bua epelesha moyo weba, bua ne udimuena dipingana dia bantu benda kudiye, anyi dibutuka dijima diabu; bualu ndi mumanya ne badi ne tshia kufua pa kumbusha bobu bakudimuna mutshima ne bapingana kudiye.

23 Ne bikalabu bafua nebikala bu mudi Bena Yalede, bua dijinga dikola dia mitshima yabu, dia kukeba mashi ne disombuela.

24 Ne bikalabi ne badi bafua, tudi bamanya ne ba bungi ba ku bana betu mbanyemena kudi Bena Lamana, ne bakuabu ba bungi nebanyemena kudibu; pananku, funda bimua bintu bikesa, pawikala muepeleshibua ne pangikala mufua ne ntshiyi mukumona to; kadi ndi ne ditekemena ne nenkumona katataka; bualu ndi ne mifundu ya tshijila indi musua kukupesha.

25 Muananyi wa baluma, ikala ne lulamatu mu Kilisto; ne bintu bindi mufunda kabikupeshi mpaji to, bua kabikutondi ne bujitu tô ne ku lufu to; kadi Kilisto akukuatshisha, ne makenga enda ne lufu luenda, ne dileja dia mu mubidi wenda kudi batatuetu, ne lusa luenda ne bulekelelu buenda, ne ditekemena dia butumbi buenda ne dia moyo wa tshiendelela, bikala mu meji eba bua kashidi.

26 Ne ngâsa wa Nzambi Tatu, muena nkuasa wa butumbi udi mûlu mu diûlu, ne wa Mukalenga wetu Yezu Kilisto, udi usomba ku tshianza tshia baluma tshia bukola buenda, tô ne pâlua bintu bionsu kudibatshika kudiye, ne kushala neba bua kashidi. Amena.