1 Àti nísisìyí, ó sì ṣe lẹ́hìn tí Ábínádì ti sọ àwọn ọ̀rọ̀ yĩ ní ó na ọwọ́ rẹ̀ jáde, ó sì wípé: Àkokò nã mbọ̀wá tí ènìyàn gbogbo yíò rí ìgbàlà Olúwa; nígbàtí gbogbo orílẹ̀-èdè, ìbátan, èdè, àti àwọn ènìyàn yíò ríi ni ójúkojú, nwọn ó sì jẹ́wọ́ níwájú Ọlọ́run pé ìdájọ́ rẹ̀ jẹ́ èyítí ó tọ́.

2 Nígbànã ni a ó ju àwọn ènìyàn búburú jáde, nwọn yíò sì pohùn réré, wọn yíò sì sọkún, nwọn yíò sì payín kéké; èyí yĩ nítorípé nwọn kò ní fetísílẹ̀ sí ohùn Olúwa; nítorínã Olúwa kò ní rà nwọ́n padà.

3 Nítorítí wọn jẹ́ ti ara, nwọ́n sì jẹ́ ti èṣù, èṣù sì lágbára lórí nwọn; bẹ̃ni, àní ejò ìgbà àtijọ́ nì, èyítí ó tan àwọn obí wa àkọ́kọ́ jẹ; èyítí ó sì jẹ́ ìdí ìṣubú nwọn; èyítí ó mú kí gbogbo ènìyàn jẹ́ ti ara, ti ayé, ti èṣù, tí nwọ́n sì mọ búburú yàtọ̀ sí rere, tí nwọ́n sì fi ara nwọn sílẹ̀ fún èṣù.

4 Báyĩ sì ni ènìyàn gbogbo ṣègbé: sì kíyèsĩ, nwọn kò bá sì ti ṣègbé títí láéláé, bíkòṣepé Ọlọ́run ra àwọn ènìyàn rẹ̀ padà kúrò nínú ipò ìparun àti ìṣubú nwọn.

5 Ṣùgbọ́n ẹ rántí pé ẹnití ó bá tẹ̀síwájú nínú ipò ti ara rẹ̀, tí ó sì lọ ní ipa ẹ̀ṣẹ̀ àti ìṣọ̀tẹ̀ sí Ọlọ́run, wà nínú ipò ìṣubú, èṣù sì ní gbogbo agbára lórí rẹ̀. Nítorínã ó wà bí ẹnití a kò ṣe ìràpadà, nítorítí òun jẹ́ ọ̀tá sí Ọlọ́run; bẹ̃ èṣù sì ni ọ̀tá Ọlọ́run.

6 Àti nísisìyí, tí kò bá jẹ́ pé Krístì wá sínú ayé, tí ó nsọ̀rọ̀ nípa àwọn ohun èyítí mbọ̀ bí èyítí ó ti dé, kì bá ti sí ìràpadà.

7 Àti pé tí Krístì kò bá ti jínde kúrò nínú òkú, tàbí kí ó ti já ìdè ikú, kí ìsà-òkú má lè ní ìṣẹ́gun, àti kí ikú má lè ní oró, kì bá ti sí àjĩnde.

8 Ṣùgbọ́n àjĩnde wà, nítorínã, ìsà-òkú kò ní ìṣẹ́gun, oró ikú sì jẹ́ gbígbémì nínú Krístì.

9 Òun ni ìmọ́lẹ̀ àti ìyè ayé; bẹ̃ni, ìmọ́lẹ̀ tí ó wà láìnípẹ̀kun, tí a kò lè sọ di òkùnkùn; bẹ̃ni, àti pẹ̀lú iyé tí ó wà láìnípẹ̀kun, tí kò sì ní sí ikú mọ́.

10 Àti pãpã, ara kíkú yí, yíò gbé àìkú wọ̀, bẹ̃ni ìdíbàjẹ́ yĩ yíò gbé àìdíbàjẹ́ wọ̀, a ó sì mú u dúró níwájú itẹ Ọlọ́run kí a lè ṣe ìdájọ́ rẹ̀ gẹ́gẹ́bí iṣẹ́ nwọn yálà rere ni nwọ́n tàbí búburú ni nwọ́n í ṣe—

11 Tí nwọ́n bá jẹ́ rere, sí àjĩnde ayé àti ayọ̀ tí kò lópin; tí nwọ́n bá sì jẹ́ búburú, sí àjĩnde sí ègbé áìnípẹ̀kun, tí a ti jọ̀wọ́ nwọn fún èṣù, tí òun sì jọba lé nwọn lórí, èyítí iṣe ègbé—

12 Nítorítí nwọ́n ti lọ sí ipa ìfẹ́-ara nwọn; tí nwọn kò sì ké pé Olúwa nígbàtí a na ọwọ́ ãnú sí nwọn; nítorítí a na ọwọ́ ãnú sí nwọn, nwọn kò sì gbà á; a kìlọ̀ fún nwọn nítorí ẹ̀ṣẹ̀ nwọn, ṣùgbọ́n nwọn kò kọ̀ nwọ́n sílẹ̀; a sì pã láṣẹ pé kí ní wọ́n ronúpìwàdà, ṣùgbọ́n nwọn kò ronúpìwàdà.

13 Àti nísisìyí, njẹ́ kò ha yẹ kí ẹ̀yin wárìrì kí ẹ sì ronúpìwàdà kúrò nínú ẹ̀ṣẹ̀ nyín, kí ẹ̀yin kí ó sì rántí pé nínú Krístì àti nípasẹ̀ rẹ̀ nìkan ni ẹ̀yin lè gbàlà bí?

14 Nítorínã, tí ẹ̀yin bá nkọ́ni ní òfin Mósè, kí ẹ̀yin kí ó sì máa kọ́ni wípé ẹ̀yà àwọn ohun tí mbọ̀ wá ni íṣe—

15 Kí ẹ ṣe ìkọ́ni pé ìràpadà wá nípasẹ̀ Krístì Olúwa, ẹnití iṣe Bàbá Ayérayé. Àmín.