1 Ket manen kakabsatko, kayatko nga awisen ti imatangyo, agsipud ta adu pay ti kayatko nga isao kadakayo; ta kitaenyo, adda dagiti banag nga ibagak kadakayo maipapan iti masakbayan.

2 Ket impakaammo kaniak babaen iti maysa nga anghel manipud iti Dios dagiti banag nga ibagakto kadakayo. Ket kinunana kaniak: Agriingka; ket nagriingak, ket nakitak a nagtakder iti sangok.

3 Ket kinunana kaniak: Agriingka, ket denggem dagiti balikas nga ibagak kenka; ta kitaem, immayak tapno ipakdaar kenka ti naragsak a damag ti naindaklan a rag-o.

4 Agsipud ta nangngeg ti Apo dagiti kararagmo, ket inukomna ti kinalintegmo, ket imbaonnak tapno ipakdaar kenka tapno makapagrag-oka; ket mabalinmo nga ipakdaar kadagiti taom, tapno mapnekda met iti rag-o.

5 Ta kitaen, umayto ti kanito, iti saan a mabayag, a ti addaan iti bileg, ti Apo a Mannakabalin nga agturay, nga isu idi, ken ita manipud iti amin nga agnanayon agingga iti amin nga agnanayon, bumabanto manipud iti langit kadagiti annak ti tattao, ket agtaengto iti tabernakulo a pitak, ken makilangento kadagiti tattao, agaramidto kadagiti naisangsangayan a milagro, kas iti mangbaimbag iti masakit, panangpagungar iti natay, panangpapagna kadagiti pilay, panangpasubli iti panagkita dagiti bulsek, ken pannakangngeg dagiti sul-ot, ken panagpaimbag iti amin a kita ti sakit.

6 Ket paksiatennanto dagiti sairo, wenno dagiti dakes nga espiritu nga agtaeng kadagiti puso dagiti annak ti tattao.

7 Ket kitaen, agsagabanto kadagiti sulisog, ken sakit ti bagi, panagbisin, pannakawaw ken bannog, nakarkaro pay ngem ti mabalin a panagsagaba ti tao, malaksid laeng iti patay; ta kitaem, agbulosto ti dara manipud iti tunggal bassit nga abut ti kudil, napalalonto unay ti leddaangna gapu iti kinadakes ken dagiti makarimon nga aramid dagiti taona.

8 Ket maawaganto iti Jesucristo, ti Anak ti Dios, ti Ama iti langit ken daga, ti Namarsua iti amin a banag manipud idi punganay; ket maawaganto ti inana iti Maria.

9 Ket kitaem, umayto iti bukodna, tapno umay ti pannakaisalakan dagiti annak ti tattao uray babaen ti pammati iti naganna; ket uray pay kalpasan amin dagitoy ibilangdanto a tao, ket ibagada nga adda kinasairona, ket saplitendanto ken ilansadanto iti krus.

10 Ket agungarto iti maikatlo nga aldaw manipud iti patay; ket kitaem, agtakderto a mangukom iti lubong; ket kitaem, mapasamakto amin dagitoy a bambanag tapno nalintegto ti pannakaukom dagiti annak ti tattao.

11 Ta kiaten, ket ti met darana ti mangsubbot kadagiti basol dagiti natnag babaen ti panagsilungasing ni Adan, a natay a saan a naammuan ti pagayatan ti Dios maipanggep kadakuada, wenno iti kinakuneng nagbassolda.

12 Ngem ay-ay pay, ay-ay pay ti makaammo nga isu ket simmuppiat iti Dios! Agsipud ta saan a mapasamak ti pannakaisalakan iti siasino man malaksid iti babaen ti panagbabawi ken pammati ken ni Apo Jesucristo.

13 Ket imbaon ti Apo a Dios dagiti nasantuan a propetana kadagiti annak ti tattao, tapno ipakdaar dagitoy a bambanag iti tunggal puli, pagilian, ken pagsasao, tapno iti kasta siasino man a mamati nga umayto ni Cristo, isunto ti umawat iti pannakapakawan iti basolda, ket agrag-onto iti napalalo, uray pay a kasla ketdin immayen kadakuada.

14 Ngem nakita ti Apo a Dios a nasukir dagiti taona, ket nangipaulog iti linteg nga agpaay kadakuada, uray pay iti linteg ni Moises.

15 Ket adu a pagilasinan, ken kinadatdatlag, ken langa, ken anniniwan ti imparangna kadakuada, maipanggep iti yaayna; ken kasta met nga nagsao dagiti nasantuan a propeta kadakuada ti maipapan iti yaayna; ngem pinatangkenda latta ti pusoda, ket saanda a naawatan nga awan ti maipaay ti linteg ni Moises malaksid iti pannubbot babaen ti darana.

16 Ket uray pay no mabalin nga agbasol dagiti babassit nga ubbing saanda a maisalakan; ngem ibagak kadakayo a naparaburanda; agsipud ta kitaen, kas ken ni Adan, wenno babaen iti nakainsigudandan, matinnagda, nupay kasta subboten ti dara ni Cristo dagiti basolda.

17 Ket kanayonanna, ibagak kadakayo, nga awanto iti sabali a nagan a maited wenno uray ania a pamay-an wenno wagas para iti pannakaisalakan dagiti annak ti tattao, isu laeng ken babaen iti nagan ni Cristo, ti Apo a Mannakabalin.

18 Ta kitaem isu ti mangukom, ket nalinteg ti panangukomna; ket saan a mapukaw ti maladaga a matay iti kinamaladagana; ngem inumen dagiti tattao ti pannakailunod ti kararuada malaksid no ipakumbabada ti bagbagida ket agbalinda a kas babassit nga ubbing, ket mamatida ti pannakaisalakan idi, ken ita, ken iti masakbayan, raman ken babaen iti pannubbot a dara ni Cristo, ti Apo a Mannakabalin.

19 Agsipud ta kabusor ti Dios ti nailubongan a tao, ket kastan manipud iti pannakatnag ni Adan, ket kastanto pay, iti agnanayon, malaksid no agtulok iti panangawis ti Nasantuan nga Espiritu, ken ikkatenna ti nailubongan a kinatao ket agbalin a santo babaen ti pannubbot ni Cristo nga Apo, ket agbalin a kasla ubing, natulok, naemma, napakumbaba, naanus, napnuan ayat, siaayat nga agpasakup iti amin a banag a makita ti Apo a rumbeng nga ipataw kenkuana, kas iti ubing nga agpasakup iti amana.

20 Ket kanayonanna, kunak kadakayo, a dumtengto ti kanito nga agwarasto ti pannakaammo iti Mangisalakan iti tunggal pagilian, puli, pagsasao, ken tattao.

21 Ket kitaen, no dumtengto dayta a kanito, awanto ti masarakan nga awan ti pakababalawanna iti sango ti Dios, malaksid dagiti babassit nga ubbing, babaen laeng iti panagbabawi ken pammati iti nagan ti Apo a Dios a Mannakabalin.

22 Ket kas iti daytoy a kanito, no naisuromton kadagiti taom dagiti banag nga imbilin kenka ti Apo a Diosmo, uray pay kasta saanda maibilang nga awan ti pakababalawanna iti imatang ti Dios, no la mayannurot kadagiti balikas a naisaokon kenka.

23 Ket ita naisaokon dagiti balikas nga imbilin kaniak ti Apo a Dios.

24 Ket kastoy ti kinuna ti Apo: Agtakderdanto a nalawag a pammaneknek a maibusor kadagitoy a tao, iti aldaw ti panangukom; nga isu ti pakaukomandanto, ti tunggal tao mayannurot kadagiti aramidna, naimbagda man, wenno dakesda.

25 Ket no dakesda maidatagda iti nakaal-alingget a buya ti bukodda a basol ken dagiti nakarimrimon nga aramid, a makaigapu iti panagkessenda manipud iti imatang ti Apo iti naladingit ken awan ti patinggana a panagtutuok a kasasaad, iti ayan a saanda pulos a makasubli; ngarud ininumdan ti pannakailunod ti kararuada.

26 Ngarud, immiinumdan manipud iti kopa ti pungtot ti Dios, a saanen a mabalin a maibabawi ti linteg kadakuada a mabalin a maibabawi a nasken a matnag ni Adan gapu iti pannanganna iti maiparit a bunga; ngarud, awanton ti pannakatunton ti asi kadakuada iti agnanayon.

27 Ket ti panagtuokda ket kas iti dan-aw ti apuy ken asupre, a saan a masebseban ti gil-ayabna, ket agpangato ti asukna iti agnanayon. Kastoy ti imbilin kaniak ti Apo. Amen.