1 Kʼad, áko shooh, ánihidishní, háálá Urim dóó Thummim binahjįʼ adziilii bee ataʼ hwíínílneʼgo éí ndaasdzohyę́ę, diné doo yáʼáshóonii bilákʼee yínínilgo, yóóʼíínjaaʼ.

2 Áádóó ni ałdóʼ tʼáá akweʼé hoolzhishgo ni aʼiilyéii nitsʼą́ą́ nínádiilyá, dóó níniʼ bił chahoołhéél.

3 Ákótʼée ndi, kʼad naanáʼnil; éí bąą neʼoodląʼ bee aʼíínílí dóó tʼáá binídinilnishyę́ęgiʼ átʼáo naanish yiidziihígíí tʼáá náás ałtso ádíílííł.

4 Neʼadziil tʼáadoo bilááhgóó yílwołí dóó nanilnishí dóó ataʼ hólneʼgo choidííłʼįįłígíí ałdóʼ; ákondi tʼáá ałtsojįʼ bidinilkaal.

5 Tʼáá áłahjįʼ sodílzin, áko bikʼehdidíídleeł; aooʼ, áko Chʼį́įdi bikʼehdidíídleeł, dóó Chʼį́įdi binaaltʼeʼ danilíigo yá ndaalʼaʼígíí bilákʼee hadíílwoł.

6 Áko shooh, háálá danidoołchxǫǫłgo niká ádaatʼį́; aooʼ, ázhą́ hastiin baa jiinílíhę́ę ndi nidoołchxǫǫłgo niká átʼį́.

7 Áádóó díí biniinaa Shí ádishní éí diné doo yáʼáshóonii nilį́, háálá naahniilyáhą́ą nigheidoolééłgo yíká átʼį́; áádóó ałdóʼ ni aʼiilyéii yidoołchxǫǫłgo yíką́ átʼį́.

8 Áádóó ndaasdzohyę́ę bilakʼee yínilígíí biniinaa, áko shooh, diné doo yáʼádaashóonii nighadeesnil.

9 Éí bąą, aooʼ, dadílzinée, doo yáʼádaashóonii béínínil.

10 Áádóó, áko shooh, Chʼį́įdii éí saad náhíínízoyę́ę łahgo átʼáo ádeidoolííłgo bijéí yiih yiyiizlá, doodago ataʼ hwíínílneʼ íínlaayę́ę da, éí nílákʼeedóó bidiníchid.

11 Áádóó áko shooh, Shí ánidishní, háálá saadígíí łahgo átʼáo ndeiyiizoh, ataʼ hwíínílneʼgo saad náhíínízohyę́ę doo ákótʼéego ádeiyiilaa;

12 Áádóó, díí kótʼéego, níłchʼi biʼiiníziinii binaʼagiz binahatʼá niidoolééłgo yíká átʼį́, áko díí naanish da nahjįʼ kwíídoolííł;

13 Háálá díí ákódeidoołííłgo bijéí yiih deiyiizlá, áko yoochʼííd bee da kódandidooniił díí saad doo ákótʼéego nisínízooígíí bee hadanidiilʼį́į́ʼ.

14 Tʼááʼaaníigo, Shí ánidishní, díí kótʼáo Chʼį́įdii doo yáʼáshǫ́ǫ́góó yináhaʼáhą́ą doo bá ahóótiʼgóó ádeishłííł.

15 Háálá áko shooh, éí niDiyin God Bóhólníihii nadiníítaałgo bijéí yiihyiizlá, éí ataʼ haneʼígíí ánáádíídlííłgo nabídidííłkił.

16 Áádóó índa, áko shooh, bijéí biyiʼdi ádaaní dóó kódeinízin—Haaʼíyeeʼ Diyin God daatsí ataʼ halneʼ adziilii beinílá; ákótʼéego éí, adziilii baa náánéídoodlééł;

17 Áádóó Diyin God adziilii baa náánéinídláago, doodago ataʼ haneʼ ánááneiyiidlaago, éí doodago, kótʼáo ááłdíshní, tʼáá éí saad daatsʼí ánááneidoodlííł, áko shooh, nihí tʼáá éí saad ndeilyé, dóó łah átʼéego ádeilyaa;

18 Éí bąą doo aheełtʼée da, áádóó ádadidiiʼniił biyoochʼíídgo saad áyiilaa, dóó áko bi aʼiilyéii ádin, dóó beʼadziilii ałdóʼ ádin;

19 Ákohgo dadiilchxǫǫł, áádóó naanishígíí ałdóʼ; dóó ákódadiilʼnííł áko ałtsogo doo ádaa yádadíníizįįł da, áko adahwiisʼáágóó bee nihaa dahaʼniih doo.

20 Tʼáá aaníí, tʼáá aaníigo, Shí ánidishní, Chʼį́įdii tʼóó bááhádzidgo bijéí deiyootʼą́ʼ; bijéí neiyiłnáago yáʼádaatʼééhyę́ę yikʼijįʼ bąąhági ádaatʼį́;

21 Áádóó bijéí dááchxǫʼ, dóó doo yáʼádaashóonii dóó ayóó átʼéego wolchʼį́dígíí biiʼ hadadeezbin; dóó chahałheełjí ayóó ádeiyóʼní adinídíínjí éí dooda, binaanish doo yáʼádaashónígíí biniinaa; éí bąą doo ndashídídóołkił da.

22 Chʼį́įdii éí ndabiiłná, áko biiʼ naazíinii yóóʼadeidiyooʼish biniyé.

23 Áádóó ákótʼáo binaʼagiz binahatʼá neinílá, Diyin God binaanish ádeishdįįł nízingo; ákondi díí yá ndaatłizhgo ádeishłííł, áádóó ánahootʼaah bijį́įdi yaa yá danízin doo dóó ádídahodiiłtiʼ doo.

24 Aooʼ, bijéí yiyiʼ hadahoniłchaad áko díí naanish yikʼijįʼ bá dahachįʼ doo.

25 Aooʼ, kwííłní: Nihinaʼadloʼ dóó ił dadidoodił biniyé aa ndaaʼnaʼ, áko daʼdoołchxǫǫł; áko shooh, díí tʼáadoo átʼéhí da. Áádóó ákótʼáo saad yee łídílchíídgo, diné łaʼ biyoochʼíídgo yił dadidoodił biniyé yaandaaʼnaʼgo éí doo bąąhági átʼée da yiłní, áko deidoołchxǫǫł.

26 Áádóó ákótʼáo saad yee łídílchíídgo, dóó náás yooʼishgo biiʼnaazíinii chʼį́įdiitah goyáaʼí ayiidzį́į́s; áádóó ákótʼáo beeʼódleehí ndeeznilyę́ę tʼáá bí yiihidoojah.

27 Áádóó ákótʼáo dego dóó yaago, nahasdzáán bikááʼgóó háádiidááh, nihokááʼ dineʼé biiʼ sizíinii atíyidoolííłgo yíká átʼį́.

28 Tʼáá aaníí, tʼáá aaníigo, Shí ánidishní, yíiyá háíshį́į́ yoochʼííd yee binaʼadloʼígíí háálá ákʼótʼáo nááná łaʼ yoochʼííd yee bindaʼadloʼ nízin, háálá ákódaatʼínígíí éí Diyin God biʼánahwiitʼaahii doo yikʼee ąąhadoogáał da.

29 Áko, shooh, díí saad łah átʼéego ádeiyiilaa, háálá Chʼį́įdii ábiłní: Ninaʼazloʼ—áádóó ákótʼáo saad yee łídílchíídgo yooʼayiiʼéésh áko bąąhági ádaatʼį́į doo, áko Bóhólníihii niDiyin God nabidíníítaał biniyé.

30 Áko shooh, Shí ándishní, áko ataʼ hwíínílneʼę́ę doo ánáádíídlííł da shą́ą́ʼ éí nílákʼeedóó bidííníchid neʼ;

31 Háálá, áko shooh, saad íínilaayę́ę yoochʼííd yee yikʼijįʼ yádaałtiʼ éí doo yáʼáshǫ́ǫgo yindáhaʼáhą́ą́ doo yedaʼdoolííł da. Háálá, áko shooh, tʼáá éí saad anáánéindlaago ni éí niyoochʼííd dóó ataʼ hwíínílneʼígíí tʼóó átʼé, ákondi tʼáá ni akʼijįʼ háínídzííʼ dandidooniił.

32 Áádóó, áko shooh, díí adahwiisʼáago yaa dahodoolnih, áádóó Chʼį́įdii éí diné bijéí yidóołtłʼis áko nikʼijįʼ bádahachįʼgo neiyiłnáa dooleeł, dóó shizaad doo deiyoodlą́ą da dooleeł.

33 Ákótʼáo kʼad óchíłígíí biyiʼ Chʼį́įdii tʼáá aaníinii bee háínídziʼígíí bikʼeh dideeshdleeł dínóozįįł, áko díí naanish doo bohodoolnííł da kʼad óchíłígíí biyiʼ.

34 Ákondi shooh, díí hódzą́ átʼé, háálá hódzą́ nił ííshją́ą́ ííshłaaígíí biniinaa, bee ndaahazʼáanii díí bídéítʼiʼígíí naanílá, éí haitʼáo ádííłíłígíí, díí ataʼ haneʼ binaʼanish nihokááʼ dineʼé doo bił ííshją́ą́ ádíílííł da ałtsó binishínílnishgo índa.

35 Díí bee nichʼįʼ haasdzííʼígíí tʼáadoo baa nił ahóóyóí: Díí hódzą́ átʼé, nihokááʼ dineʼé doo bił ííshją́ą́ ádíílííł da—háálá Shí ándííniid, nihokááʼ dineʼé doo bił ííshją́ą́ ádííłííł da, áko doo atíndiʼdoolnííł da.

36 Áko shooh, Diyinkʼehgo deiyíkááhígíí éí doo bił ííshją́ą́ ádíílííł nidishníi da;

37 Ákondi doo tʼáá áłahjįʼ Diyinkʼehgo deiyíkááhígíí nihił bééhózin da, éí doodago doo yáʼádaashóonii éí Diyinkʼehgo deiyíkáhígíí doo tʼáá áłahjįʼ ałʼąą átʼéego béédahózin da, éí bąą Shí ándishní, áłtsé tʼáadoo baa yáníłtiʼí kʼad niizį́įgo índa díí baa yááłtiʼígíí tʼáá ałtso nihokááʼ dineʼé bił ííshją́ą́ ádeishlííł.

38 Áádóó áko, tʼáá aaníigo shí andishní, éí haneʼ baa náʼíínízohígíí, éí tʼáá nílákʼeedóó bidíníchid, éí Nephi bibéésh tʼą́hí bikáá ndaháasdzoh;

39 Aooʼ, dóó béénílniih éí ndaháasdzohígíí biyiʼ aʼdooʼniid haneʼ hazhóʼó baa hodoonihígíí éí Nephi bibéésh tʼą́hí bikáá ndaháasdzoh.

40 Áádóó áko, éí haneʼ Nephi bibéésh tʼą́hí bikáá ndaháasdzohígíí hazhóʼó baa hóóneʼígíí biniinaa, shintsékees beełtʼéego, díí haneʼ íínlaaígíí éí nihokááʼ dineʼé bił béédahózingo ádeishłííł—

41 Éí bąą, Nephi bibéésh tʼą́hí bikáá ndaháasdzooígíí, tʼáá ńléídę́ę́ʼ dóó aláahdi naatʼáanii Benjamin hooʼááłjįʼ baa náʼiidíízoh, doodago ataʼ hwiinílneʼ íínlaayę́ęjįʼ níínyáago, jó éí tʼahdii nanijaah;

42 Áádóó áko shooh, díí Nephi baa haneʼ naaltsoos bee siʼą́ągo ádíílííł; áádóó ákótʼáo shizaad łahgo ádeiyiilaaígíí niʼ kódeeshłííł.

43 Shizaad deidoołchxǫǫłígíí doo bá hodeeshʼaał da; aooʼ, shí sheehódzáanii éí níłchʼi biʼiiníziinii binaʼadloʼ bilááhdi ábóodziil éí bił ííshjání ádeishłííł.

44 Áko shooh, łahdóó tʼéiyá ndeijaah, doodago Nephi baa haneʼ áłtsʼíísígo ályaayę́ę tʼéiyá.

45 Áko shooh, tʼáá ląʼígo Nephi bibéésh tʼą́hí bikááʼ ndaháasdzoh éí shinahatʼá bee yisdáʼiildéehii hózhǫ́ yaa halneʼ; éí bąą, háálá hódzą́ shiiʼ siláhígíí bikʼehgo díí Nephi ałtsé néíyíízohígíí baa ataʼhodíílnih, dóó díí naanish biyiʼ baa haneʼgo ádíílííł.

46 Áádóó, áko shooh, díí naanish tʼáá ałtso yidziihígíí shinaʼnitin bee yisdáʼiildéehii tʼáá átʼé biyiʼ silá éí shá yádaałtiʼii dadiyinii, aooʼ, dóó shikééʼ naazíinii ałdóʼ, éí díí diné bichʼįʼ kódoolnííłgo yiká sodadilzin.

47 Áádóó Shí kóbidííniid, bisodizin deiyoodlánígíí bikʼehgo baa dahidoolyééł.

48 Aooʼ, áádóó díí éí beʼoodląʼ ádaatʼé—shinahatʼá bee yisdáʼiildéehii, éí baa nílá áko dabiyéíłkááhdi yee nidaʼnitin doo, áádóó bikʼéí Laman dineʼé da yaa deidoolééł, áádóó tʼáá átʼé Laman dineʼé yitah daazlíʼígíí ałdóʼ éí akʼijįʼ daazlį́ʼę́ę biniinaa.

49 Áko, díí doo tʼáá átʼé átʼée da—bisodizin deiyoodlánígíí bikʼehgo ałdóʼ díí Jesus Christ binaʼnitin bee yisdáʼiildéehii tʼáá áłtsoní bił ííshją́ą́ ádadoolnííł, áko bihónéedzą́ą́dą́ą́ʼ naana łáʼ diné dah dayikaahígíí da díí kéyah yikááʼ kéédahatʼį́į doo;

50 Áádóó ákótʼáo díí kéyah bikʼihojídlíi dooleełgo yá sodadoolzin, áko tʼáá háíshį́į́ díí kéyah bikááʼ nahatʼá bee yisdáʼiildéehii deiyoodlánígíí éí hoolʼáágóó iiná baa dahidoolyééł;

51 Aooʼ, áko da tʼáá áłtso ałʼąą dineʼé dah deiyíkahii, ałkʼéí danidliinii, bizaad ałʼąą adaatʼéii, dóó tʼáá áłtso dineʼé tʼáá bí bíniʼ bikʼehgo bichʼįʼ kódadoolnííł.

52 Áádóó áko, shooh, bisodizin deiyoodlánígíí bikʼehgo díí shinaʼnitin bee yisdáʼiildéehii naháasdzooígíí bił béédahózingo ádeishłííł. Áko shooh, baa dahaasyáhę́ę éí doo ádooldįįł biniyé baa níláa da, ndi bighą́ą́h adideestsih biniyé.

53 Áádóó díí biniinaa Shí ádíshní: Díí daʼáchíhígíí biyiʼ bijéí doo deistłʼisdą́ą́ʼ, shisodizin nihokááʼ dineʼé bitah siláago hadideeshłííł.

54 Áko shisodizin bá hooghan doolchxǫǫł doo biniye ádíshníi da, ákondi shisodizin daʼatahígíí ląʼí dooleełgo biniyé ádíshní;

55 Éí bąą, tʼáá háíshį́į́ shisodizin atah nilínígíí doo náldzid da doo, háálá éí yáʼąąshdi bee óhólníihgo bił hazʼáadi báhwiidooʼááł.

56 Ákondi doo shinídaaldzidígíí, doodaiiʼ shibee hazʼáanii doo yikʼeh dahółʼínígíí ákondi tʼáá bí bisodizin bá dahooghan bee ńdaʼdidoolyééłgo ádeiyiilaa, aooʼ, dóó tʼáá átʼé doo yáʼáshóonii ádaʼałʼínígíí dóó níłchʼi biʼiiníziinii bił hazʼą́ hadeididoolííłígíí—aooʼ, tʼáá aaníí, tʼáá aaníigo, Shí ándishní, áko éí baa ńdeeshtʼįįł, dóó daditłid dóó daditsizgo ádeishłíił dóó íiyisíí biyiʼ ałníidi dabidideeshnááł.

57 Áko shooh, Shí éí Jesus Christ áshtʼį́, Diyin God biYeʼ. Tʼáá shíhígíí baa níyá, dóó tʼáá shíhígíí doo dashiniizį́į́ʼ da.

58 Shí éí adinídíinii nishłį́ chahałheeł biyiʼdi shitsʼádiʼnídíín, áádóó éí chahałheeł doo yikʼiʼditįįh da.

59 Jó shí éí ádííniid—Łaʼ dibé shee nááhódlǫ́ éí éiyá doo kǫ́ǫ́ atah da—éí shikééʼ naazíinii bichʼįʼ, dóó áadi ląʼí da tʼáadoo shikʼidaʼdiitą́ą da.

60 Áádóó łaʼ dibé shee nááhódlónígíí éí díí dineʼé bił ííshjání ádeishłííł, áko éí Jacob bighandóó dineʼé bitsʼádáozá danilį́;

61 Áádóó ayóó átʼáó naʼanishyę́ę yitʼį́įʼgo ádeeshłííł, éí shizhiʼ binahjįʼ ádaʼiilaa;

62 Aooʼ, áádóó ałdóʼ shinaʼnitin bee yisdáʼiildéehii yikʼi daʼdiitįįhgo ádeishłííł éí bee ndabidiʼneestʼą́ą́ʼ, áádóó, áko shooh, naa dahaasyáhą́ą doo nahjįʼ kódeidoolííł da, ndi bighą́ą́hjįʼ daʼdidootsih, dóó shinaʼnitin tʼáá aaníí ádaatʼéhígíí bił béédahódoozįįł éí yitʼį́įʼgo ádeishłííł, aooʼ, dóó tʼáá éí tʼéiyá naʼnitin shiiʼ hólǫ́.

63 Áádóó díí kódeeshłííł áko shinaʼnitin bee yisdáʼiildéehii naalnishgo hadideeshłííł, áko doo ayóó saad ahétʼááh da doo; aooʼ, Chʼį́įdii éí shinaʼnitinígíí nihokááʼ dineʼé bijéí neiyiłnáago saad ałchʼįʼ adeiyiinííłgo ííłʼį́; áko díí éí yee doo ákódaʼiilaa da, háálá Diyin God bizaad nideigiz dóó doo yikʼidaʼdiitįįh da.

64 Éí bąą, díí ayóó átʼáo tʼáá aaníinii tʼah doo béédahoozįįhígíí bichʼįʼ ąąʼ ádeishłííł;

65 Háálá, áko shooh, doo bijéí deidoołtłʼisgóó, naʼahóóhai bitʼaʼ biyaa biyázhí ahąʼánéíyilʼįįhígiʼ átʼáo ahąʼádeishłííł;

66 Aooʼ, shaa hidookahgo, ádeinízingo, tó bee iináanii doo bą́ą́h ílínígóó deidoodlį́į́ł.

67 Áko shooh, díí éí shinaʼnitin átʼé—tʼáá háíshį́į́ ádaa náʼooskango dóó shaa níyáago, tʼáá éí shisodizingiʼ átʼé.

68 Tʼáá háíshį́į́ díí biláahgo índa biʼohgo baa hojilneʼígíí, éí doo shichʼijí jílį́į da, ndi éí shitsʼą́ą́jí jílį́; éí bąą doo shisodizinjí ajítah da.

69 Áádóó áko, shooh, Tʼáá háíshį́į́ shisodizinjí atah nilínígíí, dóó nihooníyá bijį́įjįʼ shisodizin yidiilkaalgo, éí shitsé bikááʼjįʼ yáʼátʼéehgo hojílǫ́ǫ doo, dóó chʼį́įdiitah bidáńdítį́hí doo bikʼehdidoodleeł da.

70 Áádóó áko, nahasdzáán beʼadinídíinii dóó binahjįʼ daʼiináanii bizaad béénílniih, ná Nináʼnídláii, niDiyin Bóhólníihii dóó niDiyin God. Amen.