Wóltaʼii 74
Diyin Yá Yáłtiʼí Joseph Smith díí diyingo bił ííshją́ą́ ályaa, Wayne County hahoodzohgi, New Yorkdi, 1830 yihahgo. Tʼahdoo sodizin áltso hadilnééhyę́ędą́ą́ʼ ndi, haitʼáo tó bee alzį́į́h álʼínígíí baa naʼádíkid ńtʼę́ę́ʼ, éí binahjįʼ Diyin Yá Yáłtiʼí díí baa yáʼátiʼígíí baa naʼídídóokił niizį́į́ʼ. Joseph Smith binákééʼ náháneʼ biyiʼ kóní éí díí diyingo ííshją́ą́ ályaaígíí éí 1 Corinthians 7:14 biyiʼ hazhóʼí yaa náhoolneʼ, éí Diyin bizaad awééʼ tó bee biʼdiilzį́hígíí tʼáá áko haʼníigo chooʼį́į́ ńtʼę́ę́ʼ.
1–5, Paul naagháháádą́ą́ʼ Sodizin Daʼatahígíí yichʼįʼ haadzííʼ Moses bibee hazʼáanii tʼáadoo bikʼeh dahonołʼíní yił níigo yee neineeztą́ą́ʼ; 6–7, Bąąhági Átʼéii Bikʼé Nináʼílyáhígíí binahjįʼ áłchíní yázhí hadaałtʼé dóó dadiyin.
1Háálá bahastiin doo oodlánígíí éí beʼasdzą́ą́ oodlánígíí binahjįʼ diyingo ábidiʼdoolnííł, tʼáá ákótʼéego beʼasdzą́ą́ doo oodlánígíí bahastiin oodlánígíí binahjįʼ diyingo áhodiʼdoolnííł; doo ákótʼéego éí haʼáłchíní danilíinii doo daʼoodlą́ą́ da dooleeł, ákondi kʼad éiyá hadaałtʼé.
2Kʼad, hastóí naakitsʼáadah bikʼidahodiiniiʼígíí nídahasdláʼą́ądą́ą́ʼ ąąh náhinilgish bibee hazʼáanii éí tʼáá ałtso Jew dineʼé doo Jesus Christ binaʼnitin bee yisdáʼiildéehii deiyoodlánígíí bitahgóó ádeiłʼį́į́ ńtʼę́ę́ʼ.
3Áádóó baa hoolzhiizh ąąh náhinilgish bibee hazʼáanii bídadéitʼiʼígíí diné bitahgóó baa saad hazʼlį́į́ʼ, háálá hahastiin doo daʼoodlánígíí baʼáłchíní éí ąąh náhinilgish bá ádadoolnííł danízin ńtʼę́ę́ʼ dóó éí binahjįʼ Moses bibeehazʼáanii bóhólnííh daniizį́į́ʼ, áko éí beehazʼáanii bohoolyaa.
4Áádóó baa hoolzhiizh éí áłchíní, Moses bibeehazʼáanii biyaa dabidiʼneeszánígíí, dabizhéʼéyę́ę bibee ádaʼoolʼįįł yikʼeh dahółʼį́į ńtʼę́ę́ʼ dóó Christ binahatʼá bee yisdáʼiildéehii tʼáadoo deiyoosdląąd da, éí biniinaa tʼáadoo hadaałtʼé daazlį́į́ʼ da.
5Ákohgo, díí biniinaa hastóí naakitsʼáadah bikʼihodiiniiʼígíí sodizin yichʼįʼ íʼiilaa, éí yinahjįʼ naʼneeztʼą́ą́ʼ, ákondi éí bí bitsʼą́ą́dóó átʼé, Diyin Bóhólníihii éí ndaga, áko oodlání nilínígíí éí doo oodlání nilínígíí yił ahíídooʼash da; tʼáá hazhóʼí Moses bibee hazʼáanii bitahdóó nahjįʼ kólyaago tʼéiyá,
6Áko baʼáłchíní ąąh náhinilgish doo bá ádoolnííł da; dóó éí óʼoolʼįįł nahjįʼ kódoolnííł, háálá éí áłchíní yázhí doo dadiyin da níí ńtʼę́ę́ʼ; éí Jew dineʼé bitah hólǫ́ǫ ńtʼę́ę́ʼ;
7Ákondi áłchíní yázhí éí dadiyin, éí Jesus Christ Bąąhági Átʼéii Yá Yikʼéh Nináʼnídláhígíí binahjįʼ hadaałtʼé daazlį́į́ʼ; áádóó díí éí Diyin bizaad yaa halneʼ.