Wóltaʼii 96
Diyin Yá Yáłtiʼí Joseph Smith díí diyingo bił ííshją́ą́ ályaa, kin dashijaaʼ bikʼehgo hadilyaaígíí éí doodago Zion bistake Kirtland, Ohiodi, Yaʼiishjááshchilí 4, 1833 yihahgo, éí Kirtlanddi Akééʼ Naazíinii náasdi yikʼehgo ádaʼałʼį́į doo biniyé. Biniyéhígíí éí high priests ałah silį́įgo, áádóó íiyisíí baa náhátʼínígíí éí kéyah nááná łaʼ baa náádahidootʼááłgo baa náhátʼį́, éí French farm wolyéego, éí Kirtland binaagóó Sodizin Bá Hooghan deiyiyéełyeedígíí yikʼi dadéezʼį́į́ ńtʼę́ę́ʼ. Áłah aleehdi háí dáʼákʼéh bee bóhólnííh dooleełgo chʼééh yaa yádááłtiʼ, Diyin Bóhólníihii éí díí tʼáá átʼé baa yáʼátiʼígíí bínabídídóolkił hoʼdooniid.
1, Ziondi Kirtland biStake éí bidziilgo ádoolnííł; 2–5, Bishop éí Akééʼ Naazíinii kéyah baa dahidootʼááłgo yá íídoolííł; 6–9, John Johnson éí united order yididoogááł.
1 Áko shooh, Shí nihichʼįʼ haasdziih, díí hódzáanii átʼé, áko binahjįʼ haitʼáo díí baa náhátʼínígíí ádadoołííł, háálá áko díí stake Zion yee bidziil dooígíí tʼáá íiyisíí yee bidziil doo nisin.
2 Éí bąą, bíniʼdii shá naalʼaʼí Newel K. Whitney kéyah nihitahgi bízhiʼ ályaaígíí yikʼi bóhólnííh dooleeł, éí bikááʼ shighan dílzinígíí nidootʼááłgo binahosíʼą́.
3 Áádóó ałdóʼ, bíniʼdii ałtsʼá hidoodzoh, hódzą́ągo bee nahastʼánígíí bikʼehgo, éí kéyah baa dahidoolyéełgo bíkáʼadoowołgo deinízinígíí bá, éí áłah soolį́įgo bindahisooʼánígíí bikʼehgo.
4 Éí bąą, díí baa náhátʼínígií hazhóʼí ádadoołííł, éí kéyah łahdóó baa dahidootʼááłgo United Order yíkáʼadoolwoł, háálá éí nihokááʼ dineʼé baʼáłchíní shizaad deididootsʼį́į́ł biniyé.
5 Háálá áko shooh, tʼáá aaníigo Shí nihichʼįʼ haasdziih, díí tsʼídá aláahdi shiiʼ siléí átʼé, éí éiyá shizaad nihokááʼ dineʼé baʼáłchíní bitahgóó kódoolnííł, háálá éí nihokááʼ dineʼé baʼáłchíní bijéí daalzhólígo nihá íídoolííł biniyé. Tʼáá ákótʼée doo. Amen.
6 Áádóó ałdóʼ, tʼáá aaníigo Shí nihichʼįʼ haasdziih, hódzą́ dóó tʼáá íiyisíí shí nisinígíí átʼé, áko shá naalʼaʼí John Johnson shichʼįʼ nááʼyiisniiʼígíí nídiilá, áádóó bisodizin sidétsʼą́ą́ʼ, éí kodóóʼ shibee hazʼáanii yikʼeh hółʼį́įgo tʼéiyá hoolʼáágóó iiná bee bichʼįʼ ádééhaasdzíʼígíí bí dooleeł—
7 Háálá Joseph éí yitsʼą́ą́dóó yigááł dóó dabizází yee ádéé hadaasdzíʼę́ę binahjįʼ bee bikʼidahojisdlíʼígíí beiyílyá—
8 Tʼáá aaníigo Shí nihichʼįʼ haasdziih, éí orderjí atah doogaałgo tʼáá íiyisíí bá nisin, áko nihokááʼ dineʼé baʼáłchíní shizaad yee neidínóotįįłgo ákáʼadoowoł.
9 Éí bąą díí akʼihojídlíhígíí bee yidíísįįł, áádóó nihitahgóó kin wóojįʼígíí éí bitsʼą́ą́dóó nihąąh hadaazʼáhígíí yéego yinaalnishgo ałtso nahjįʼ kwíídoolííł, áko bí éí yiiʼ bighan dooleeł. Tʼáá ákótʼée doo. Amen.