Wóltaʼii 99
Diyin Yá Yáłtiʼí Joseph Smith díí diyingo bił ííshją́ą́ ályaa éí John Murdock yee yił hodoolnih biniyé, Biniʼantʼą́ą́tsʼózí 29, 1832 yihahgo, Hiram, Ohiodi. Nááhai dóó yíwohjįʼ, John Murdock éí Diyin binahatʼá bee yisdáʼiildéehii yee naʼnitin ńtʼę́ę́ʼ áádóó baʼáłchíní bimá—dóó bí bichʼooní, Julia Clapp wolyéego, Tʼą́ą́chil 1831 yihahgo bitsʼą́ą́ dahnídiidzá—áádóó baʼáłchíní éí Ohiodi nááná łaʼ hooghan hazʼą́ągi baa áháyą́ą́ ńtʼę́ę́ʼ.
1–8, John Murdock éí Diyin binahatʼá bee yisdáʼiildéehii yee naʼnitin dooleełgo bee bikʼihodiiniiʼ, áádóó tʼáá háiida bichʼįʼ kʼé nídzinígíí éí Diyin Bóhólníihii yichʼįʼ kʼéznídzin doo áádóó baa jidoobaał.
1 Áko shooh, Diyin Bóhólníihii éí shá naalʼaʼí John Murdock kwííłní—haʼaʼaahjigo hadahwiisdzogóó díínááł dahooghangóó, dóó kin dah naazhjaaʼgóó, dóó kin haalʼá dóó kin daałánígóó, éí áadi kéédahatʼínígíí shinahatʼá bee yisdáʼiildéehii bee nadíníítįįł, akʼijįʼ ídlį́ dóó doo yáʼáshǫ́ǫ́góó ádahoonííł ndi.
2 Áádóó tʼáá háiida nichʼįʼ kʼé nídzinígíí éí shí shichʼįʼ kʼé nídzin doo; áádóó Iiʼ Sizį́ Diyinii bibee adziilii binahjįʼ shizaad bee naʼnítin doo.
3 Áádóó tʼáá háiida áłchíní yázhí nilį́ nahalingo nichʼįʼ kʼé nídzingo, éí shóhólníihgo shił hazʼáadi yah ajidoogááł; dóó bikʼidahojidlíi doo, háálá éí baa aʼááh dahwiidínóodzįįł.
4 Áádóó tʼáá háiida shaa haneʼ doo deinízinígíí éí shiZhéʼé dóó bighandóóʼígíí ałdóʼ doo dabínízin da doo; ákondi nidanołʼingo nihikeeʼ łeezh bąąh táádadohgis áko díí kótʼáo bee bikʼijįʼ hadadoohdzih.
5 Áádóó áko shooh, dóó danółʼį́, tʼáá hooshchʼįʼ nahodeeshʼááł biniyé deeshááł, tʼáá ádzíłtso shichʼįʼ bąąhági ádajíítʼįįdii éí baa ákodazhdínóozįįł, tʼáá naaltsoos biyiʼ shee bee akʼeʼashchį́įgo bee siʼánígi átʼéego.
6 Áádóó áko, tʼáá aaníigo Shí nihichʼįʼ haasdziih, naʼáłchíní baa áhodooyąąłígíí hazhóʼí hasthʼeʼ yidzaago índa naʼnítingóó dahdidíínááł, áádóó naʼáłchíní ayóó ííníʼníigo Ziondi bishop baa dííʼish.
7 Áádóó díkwíí da nááhaigo, haʼátʼíí da shitsʼą́ą́dóó nínízingo, kéyah hózhǫ́ǫ́góó díínááł, éí kéyah naadeitʼánígíí biniyé;
8 Díí doo ákódzaagóó éí náániʼdiilyáajįʼ shinahatʼá bee yisdáʼiildéehii bee naʼnítin doo. Amen.