Wóltaʼii 11
Diyin Yá Yáłtiʼí Joseph Smith díí diyingo bił ííshją́ą́ ályaa éí bínaaí Hyrum Smith yee yił hodoolnih biniyé, Harmony, Pennsylvaniadi, Tʼą́ą́tsoh 1829 yihahgo. Díí ił ííshją́ą́ ályaa Urim dóó Thummin biníkááʼgóneʼ éí Joseph naʼookąąh dóó naʼídíłkidgo bichʼįʼ kólyaa. Joseph Smith binákééʼ náháneʼ naʼasdzooígíí áníigo éí Diyin Bibeʼadziilii Aaronic Wolyéhígíí ninályá bikééʼdóó ííshją́ą́ ályaa.
1–6, Chʼil naʼatłʼoʼí kʼéédílyééhdi ndaalnishí yisdáʼiildééh nídeididoolééł; 7–14, Ééhózin biká ánítʼį́, ádaa náʼookąąh bee naʼnítin, Iiʼ Sizį́ Diyinii baʼíínílí; 15–22, Diyin bibee ndahazʼáanii bikʼeh honíłʼį́, dóó Diyin Bóhólníihii bizaad naniłkaah; 23–27, Diyingo ił ííshją́ą́ ályaaígíí dóó Diyin bikʼehgo áhodoonííł bee haʼoodzíʼígíí tʼáadoo nahjį́ʼ kóníłʼíní; 28–30, Christ dayoosdląądígíí Diyin God yiyeʼké daaleeh.
1Naanish tsʼídá ayóó átʼéego dóó ayóó ánoolningo kʼadę́ę́ʼ nihokááʼ dineʼé baʼáłchíní bichʼįʼ kólnééh.
2Áko shooh, shí éí Diyin God nishłį́; shizaad yéego bikʼeh honíłʼį́, éí hiiná dóó ayóó bidziil, béésh hał ałtsʼą́ą́ʼgo deinínígíí biláahgo hááheeshchxiiʼ, éí tʼáá áłah ahadaditʼą́ índa awol nidi ałtsʼáyiinííł; éí bąą shizaad yéego bikʼeh honíłʼį́.
3Áko shooh, daʼakʼehdi daʼiigai lá; éí bąą, naʼidiyeeshłah nízinígíí bíniʼdii yéego bee iigéshí yéego yee iigéésh doo, dóó tʼah ooʼááłgo adoołdah, áko biʼiisizíinii Diyin God bił hazʼą́ądi hoolʼáágóó yisdáʼiildééh ílíinii yá hashtʼehósin doo.
4 Aooʼ, tʼáá háíshį́į́ tłʼoh bee yilzhéhé yee daʼiishééhgo dóó ahaneiyiiłjoołgo, Diyin God tʼáá éí yikʼidiilniiʼ.
5Éí bąą, shíínóhkeedgo éí nihaa doolyééł, dááʼdílkał nanóhłtsʼingo nihichʼįʼ ąą ádoolnííł.
6Áko kʼad, díí bínaʼadíníłkidígíí biniinaa, áko shooh, Shí ándishní, shibee hazʼáanii bikʼeh honíłʼį́, dóó Zion bá ánítʼį́įgo hadííłwoł dóó níłdzilgo ádíílííł.
7Atʼį́ tʼáadoo bíkáʼánítʼíní ákondi bee hódzáanii tʼéiyá; áádóó, áko shooh, Diyin God binaʼnitin tʼahdoo béédahoozįįhígíí nihichʼįʼ ąąʼ ádadoolnííł, dóó áko índa ayóó nił ééhózin doo ítʼį́įgo ándandoolnííł. Áko shooh, tʼáá háíshį́į́ hoolʼáágóó iiná bee hólónígíi éí atʼį́į doo.
8Tʼáá aaníí, tʼáá aaníigo, Shí ánihidishní, haʼátʼííshį́į́ shitsʼą́ą́dóó nínízinígíí éí bikʼehgo áʼdoolnííł; áádóó, nínízingo, ninahjįʼ díí kʼad oochíłígíí biyiʼ ląʼígo yáʼátʼéehgo íʼdíílííł.
9Ákondi díí kʼad oochíiłii biyiʼ ádaa náʼookąąh tʼéiyá bee nanítin. Shibee hazʼáanii bikʼeh honíłʼį́, dóó shinaanish atah hadííłwoł, shibee hazʼáanii bikʼehgo, dóó áko nikʼihozhdoodliił.
10Áko shooh, aʼiilyéii neehólǫ́, doodago aʼiilyéii łaʼ naadoolyééł neʼoodląʼ bikʼeh ínínízingo, nijéí doo biyoochʼíídgóó, Jesus Christ bibeʼadziilii yinídlą́ągo, doodago sheʼadziilii bee éí nichʼįʼ yáłtiʼ;
11Háálá, áko shooh, Shí áshtʼį́ nichʼįʼ yáshtiʼ; áko shooh, Shí éí adinídíinii nishłį́ chahałheeł biyiʼdi shitsʼádiʼnídíín, áádóó sheʼadziilii bee díí saad naahashłé.
12Áádóó áko, tʼáá aaníí, tʼáá aaníigo, ándishní, Iiʼ Sizį́ Diyinii baʼíínílí éí yáʼátʼééhj́igo aholóós—aooʼ, Diyin God joobaʼígíí átʼáó nanilnish, hajoobaʼ nínízingo hiiníná, yáʼátʼééhgo ánahwiiʼaah dooleeł; dóó díí shiʼIiʼ Sizį́ Diyinii átʼé.
13Tʼáá aaníí, tʼáá aaníigo, ándishní, shiʼIiʼ Sizį́ Diyinii nichʼįʼ kódeeshłííł, éí níniʼ biiʼ nił ííshją́ą́ áyósin doo, éí niiʼsizíinii íł hózhóonii yiiʼ haididoołbį́į́ł;
14Ákohgo índa nił ééhodoozįįł, doodago díí binahjįʼ nił ééhózin doo, éí tʼáá ałtsoní shitsʼą́ą́dóó nił bééhodoozįįł nínízingo, diyingo oodááł bídadéétʼiʼgo, oodląʼ bee shił chʼíhodootʼááł nínízingo shiinídlą́.
15Áko shooh, Nichʼįʼ haasdziih naʼnishtingo ashiʼdoolʼaad tʼáadoo níníziní tʼáá aaníí bee nikʼihodiiniiʼgo índa.
16Áłtsé tʼah, shizaad, shitsé, shisodizin, shinaʼnitin bee yisdáʼiildéehii neilyáago índa, áko shinaʼnitin tʼáá aaníigo bikʼiʼdiʼdíítį́į́ł.
17Ákohgo índa, áko shooh, ninízinígíí dabikʼehgo, aooʼ, iinídlánígíí bikʼehgo nichʼįʼ kódoolnííł.
18Shibee ndahazʼáanii bikʼeh honíłʼį́; ałtsé tʼáadoo yáníłtiʼí; shiʼIiʼsizʼį́ Diyinii bichʼįʼ náʼiiníkąąh;
19Aooʼ, nijéí tʼáá átʼéé ńtʼę́ę́ʼ bee yéego shíínítąʼ, áko bee haʼoodziʼę́ę baa ééhózingo bee ákaʼadíílwół—aooʼ, ataʼ haneʼ shinaanishígíí; tʼáá hazhoʼígo ałtso íinilaajįʼ índa.
20Áko shooh, díí ninaanish átʼé, shibee ndahazʼáanii bikʼeh honíłʼį́, aooʼ, neʼadziil, níniʼ, dóó nitsxeʼ tʼáá átʼé bee.
21Tʼáadoo shizaad baa hólneʼé, ákondi áłtsé shizaad nidiilé, áko índa nitsooʼ doo átʼéhígóó tʼáá bééhózínígo bee hadíídzih; áko índa, íinízingo, shiʼIiʼsizʼį́ Diyinii dóó shizaad naadoolyééł, aooʼ, Diyin God bibeʼadziil bee nihokááʼ dineʼé daʼiidoodląął.
22Ákondi kʼad éí ałtsé tʼáadoo yáníłtiʼí; shizaad yéego baa ntsíníkees éí nihokááʼ dineʼé baʼáłchíní bitahgóó kólyaa, doodago kʼad nááná łaʼ saadkʼehgo álnééh, aooʼ, díí tʼáá átʼé díí daʼoochííł biyiʼ nihokááʼ dineʼé baʼáłchíní bichʼįʼ kóshłaaígíí ńdiniláago índa, ákohgo índa tʼáá ałtsoní bił áhíidooʼnił.
23Áko shooh, ni éí, shiyeʼ, Hyrum ánítʼį́; Diyin God bił hazʼą́ bíká ánítʼį́, áko índa tʼáá ákogi átʼáo tʼáá áłtsoní ahiihdoolyééł.
24Shitsé bikááʼ dah adiitłʼin, éí shinaʼnitin bee yisdáʼiildéehii átʼé;
25Diyingo ił ííshją́ą́ ályaaígíí, doodaiiʼ Diyin bikʼehgo áhodoonííł bee haʼoodzíʼígíí tʼáadoo nahjį́ʼ kóníłʼíní, háálá díí háiida nahjįʼ kwííłʼínígíí yíi bichʼįʼ kódoolnííł;
26Ákohgo, shihódzą́ bikʼehgo dahdidíínááłjįʼ ahoolzhiizhgo índa nijéí biyiʼdi ílį́įgo ndíílééł.
27Áko shooh, tʼáá átʼé yáʼátʼéehii deinízinígíí bichʼįʼ yáshtiʼ, áádóó tłʼoh bee yilzhéhé yee daʼiishééhgo ahanideiyiiłjoołígíí.
28Áko shooh, Shí éí Jesus Christ áshtʼį́, Diyin God biYeʼ. Shí éí nahasdzáán beʼadinídíín dóó binahjįʼ daʼíináanii nishłį́.
29Tʼáá shíhígíí baa níyá éí shí áshtʼį́ dóó tʼáá shíhígíí doo dashiniizį́į́ʼ da;
30Ákondi tʼáá aaníí, tʼáá aaníigo, Shí ándishní, áko ląʼída shikééʼ dahdiikaiígíí, Diyin God yiyeʼké dadooleełgo adziilii baa dahideeshłééł, shizhiʼ deiyoodlánígíí ndi. Amen.