1 E koaua, e taku te Uea nakoim au tia mwakuri ae Iotebwa, bwa ibukina bwa ko bubuti nakoiu ni kan ataia ao ni mataata n aron are Ngai, te Uea, I kariaia au taan mwakuri aika Aberaam, Itaaka, ao Iakobwa, ni ikotaki naba ma Mote, Tawita ao Toromon, au taan mwakuri, ni kaineti ma te tua ao te reirei ibukin ae na mwaiti buuna te aine ao buuna ni kewe—

2 Nooria, ao taraia, Ngai te Uea ae Atuam, N na kaekako ni kaineti ma te bwai aei.

3 Ngaia are, katauraoa nanom ni butimwaei ao n ongeaba ni kaetieti ake N nang anganiko; ibukina bwa ni kabane naake e kaotaki te tua aei nakoia a riai n ongeaba naba iai.

4 Bwa nooria, I kaota nakoimi te berita ae tabu ae boou ae akea tokina, ao ngkana kam aki maiuakina te berita ae tabu anne, ngkanne kam a kabuakakaaki; bwa akea ae kona ni kaakea te berita ae tabu aei ao e na kariaiakaki n rin ni mimitongiu.

5 Bwa ni kabane ake a tangira te kakabwaia mai irou a na ira nanon te tua are e rineaki ibukin te kakabwaia anne, ao bwaai aika kainnanoaki iai, n aron are e baireaki i mwain karikan te aonaba.

6 Ao ni kaineti ma te berita ae tabu ae boou ae akea tokina, e bon karaoaki ibukin bwaninin mimitongiu, ao ane e karekea bwaninin aio e riai ao e na ira nanon te tua, ke e na kabuakakaaki, e taku te Uea ae te Atua.

7 Ao e koaua ae I taekinna nakoimi, bwa bwaai aika kainnanoaki n te tua aei bon aikai: Ni kabane berita aika tabu, boraraoi, reitaki, tabera, tuea, berita, mwakuri aika karaoaki, irekerekera, iraorao, ke baika a kaantaningaaki, ake a aki karaoaki ao n rinanona ao ni kabaeaki iroun te Tamnei ae Tabu n te berita, iroun teuare e kabiraki, ibukin te tai aei ao ae akea tokina, ao anne naba moan te tabu, n te kaotioti ao te tua rinanon au aomata are kabiraki, are I a tia n rineia i aon te aonaba bwa e na taua te mwaaka aio (ao I a tia n angan au tia mwakuri ae Iotebwa bwa e na taua te mwaaka aio ni boong aika kaitira, ao bon ti temanna i aon te aonaba i nanon te tai teuana are e na anganaki te mwaaka aei ao kiingin te nakoanibonga aio), bon akea manenana, tamaroana, ke korakorana n te mangauti man te mate ke i mwina; bwa boraraoi ni kabane are a aki karaoaki n aron aio a bon toki ngkana a mate aomata.

8 Nooria, au auti bon te auti ae baireaki raoi, e taku te Uea ae te Atua, ao tiaki te auti ni kamangaongao.

9 N na butimwaea te karea, e taku te Uea, are e aki karaoaki n arau?

10 Ke N na butimwaia mai iroumi are I aki tuatua?

11 Ao N na anganingkami, e taku te Uea, ma ti n te tua, n aron are Ngai ao Tamau ti baireia nakoimi, i mwaain rikin te aonaba?

12 Ngai te Uea ae Atuam, ao I anga nakoimi te tua aei—bwa akea te aomata ae e na nakon te Tama ma ti irou ke man au taeka, are bon au tua, e taku te Uea.

13 Ao bwaai nako ake n te aonaba, are tao e baireaki irouia aomata, irouia ueea, ke tautaeka, ke mwaaka, ke bwaai aika tanoata taekaia, bwa tao tera, ake tiaki mai irou ke man au taeka, e taku te Uea, a na karenakoaki, ao e na aki tiku i mwin mateia aomata, ke n te mangauti ke i mwina, e taku te Uea ae Atuam.

14 Bwa bwaai nako ake a tiku bon mai irou; ao bwaai nako ake tiaki mai irou a na kamangaoaki ao ni kamaunaaki.

15 Ngaia are, ngkana te mwaane e mare ma buuna n te aonaba, ao e aki mare ma neienne irou ke man au taeka, ao e berita ma ngaia i nanon tikuna n te aonaba ao neienne ma teuanne, aia berita ao aia mare bon akea korakorana ngkana a mate, ao ngkana a kitana te aonaba; ngaia are, a bon aki kabaeaki n te tua teuana ngkana a kitana te aonaba.

16 Ngaia are, ngkana a kitana te aonaba a aki mare ke anga nako n te mare; ma a riki bwa anera i karawa, are anera ake taan mwakuri ni ibuobuoki, ni buokiia naake a tau ibukin ae korakora riki, ao e rianako, ao te mimitong ae akea tokin korakorana.

17 Bwa anera aikai aki ira nanon au tua, ngaia are, aki kona ni karakaaki, ma a na tiku n ti ngaia ao n akea toaia, n akea te karietataki, n aroia ngke a kamaiuaki, n aki tootoki, ao man te tai anne bon tiaki atua, ma bon ana anera te Atua n aki tootoki.

18 Ao e koaua ae I manga taekinna nakoimi, ngkana te mwaane e mare ma buuna te aine, ao e karaoa ana berita ae tabu ma neienne n te tai aei ao n aki totoki, ngkana te berita ae tabu anne bon tiaki irou ke man au taeka, are bon au tua, ao e bon aki kabaeaki iroun te Tamnei ae Tabu n te berita, rinanon teuare I a tia ni kabiria ao n rineia nakon te mwaaka aei, ngkanne e na aki bwainaki ke n aki kamatoaki ngkana a kitana te aonaba, ibukina bwa aki katiteuanaki irou, e taku te Uea, ke n au taeka; ngkana a kitana te aonaba e aki kona ni karekeaki ikekei, ibukina bwa anera ao atua a kateaki ikekei, ake a aki kona n riaoia; ngaia are, aki kona ni bwaibwai ni mimitongiu, bwa au auti bon te auti ae baireaki raoi, e taku te Uea ae te Atua.

19 Ao e koaua ae I manga taekinna nakoimi, ngkana e mare te mwaane ma buuna n au taeka, are bon au tua, ao n te berita ae tabu ae boou ae akea tokina, ao a kabaeaki iroun te Tamnei ae Tabu n te berita, iroun teuare e kabiraki, are I a tia n anganna te mwaaka aei ao kingin te nakoanibonga aei, ao e na taekinaki nakoia—Kam na ira te moan mangauti; ao ngkana i mwin te moan mangauti, n te maungauti are i mwina; ao a na bwain kaintokaniuea, abanuea, taabo aika a tautaekanaki, ao mwaaka, tautaeka, te kabanea n rietata ao n rinano ni kabane—ngkanne e na koreaki n ana Boki ni Maiu te Tiibu te Teei, bwa e na aki tiri aomata ike e na kawawaea raraan ae akea ana bure, ao ngkana ko kakaonimaki nakon au berita ae tabu, ao n aki tiri aomata ike e kawawaeaki raraan ae akea ana bure, e na karaoaki nakoia ni bwai ni kabane baike e angania au tia mwakuri, n taia, ao n aki totoki, ao e na teimatoa ngkana a kitana te aonaba; ao a na ri mataia anera, ao atua, ake a kateaki ikekei, nakon karietataia ao mimitongia ni bwaai ni kabane, n aron are tia ni kabaeaki i aon atuia, are te mimitong ae na bwanin ao reitakin aia kariki n aki totoki.

20 Ngkanne a na riki bwa atua, ibukina bwa akea tokiia; ngaia are ngaiia man ae akea tokina nakon ae akea tokina, ibukina bwa a waaki nako; ngkanne a na mena i etaia ni kabane, ibukina bwa bwaai nako a mena i aan mwaakaia. Ngkanne a na riki bwa atua, ibukina bwa iai irouia te mwaaka ni kabane, ao anera a mena i aan mwaakaia.

21 E koaua, e koaua, ae I a tuangkami, bwa ngkana kam aki ira nanon au tua kam na aki kona ni karekea te mimitong aei.

22 Bwa e wariki te mataroa, ao e irariki te kawai are kaineti nakon te karietataaki ao reitan taian maiu, ao a karako aika a kunea, ibukina bwa kam aki butimwaeai n te aonaba kam aki ataai.

23 Ma ngkana kam butimwaeai n te aonaba, ngkanne kam na ataai, ao e na reke karietatakimi; bwa ike I mena iai kam na mena naba iai.

24 Aio bon maiu aika akea tokia—te ata ti te Atua ae wanawana ao e koaua, ao Iesu Kristo, are e a tia ni kanakomaia. Bon Ngai ngaia. Ngaia are, kam na butimwaea au tua.

25 E warebwe te mataroa, ao e raababa te kawai are kaineti nakon taian mate; ao a mwaiti aika rin iai, ibukina bwa a aki butimwaeai, ao aki kakakonimaki i nanon au tua.

26 E koaua, e koaua, ae I a tuangkami, ngkana te mwaane e mare ma buuna n aron au taeka, ao a kabaeaki iroun te Tamnei ae Tabu n te berita, n aron are I tia n rineia, ao teuanne ke neienne e bure ke e riaon te tua n te berita ae tabu ae boou ae akea tokina, ao taetaebuakakin te Atua n aekana nako, ao ngkana a aki karaoa te tiri aomata ike a kawawaea raraan ae akea ana bure, a na ira te moan mangauti, ao n rin i nanon karietatakia; ma a na kamaunaaki n te rabwata, ao a na uotaki nakon ana karawawata Tatan ni karokoa bongin te kaboaki, e taku te Uea ae te Atua.

27 Taetaebuakakin te Tamnei ae Raoiroi, are e aki kona ni kabwaraki ana bure n te aonaba ke i tinanikun te aonaba, bon te tiri aomata ike kam kawawaea raraan ae akea ana bure, ao boutokaan tiringakiu, i mwin ae kam a tia ni butimwaea au berita ae tabu ae boou ae akea tokina, e taku te Uea ae te Atua; ao ane e aki ira nanon te tua aei e aki kona n rin ni mimitongiu, ma e na kabuakakaaki, e taku te Uea.

28 Ngai te Uea ae Atuami, N na anganingkami tuan au Nakoanibonga ae Tabu, n aron are e katabuaki irou ao Tamau i mwaain rikin te aonaba.

29 Aberaam e karekei bwaai ni kabane, bwaai nako are e karekei, n te kaotioti ao te tua, man au taeka, e taku te Uea, ao e a tia n rin i nanon karietatakina ao e tekateka i aon ana kaintokanuea.

30 Aberaam e karekei berita ni kaineti ma ana kariki, ao ni kaineti ma kanoana—are man kanoana ko riki mai iai, ngkoe, au tia mwakuri ae Iotebwa—are a na reitinako ngkai a mena n te aonaba, ao ni kaineti ma Aberaam ao ana kariki, a na reitinako ni kitanan te aonaba; n te aonaba ao ni kitanan te aonaba naba a na reitinako n aron itoi aika aki kona ni warekaki mwaitia, ke, ngkana ko na wareka tanon mataniwiin taari ko aki kona ni wareka mwaitiia.

31 Te berita aei bon ami bwai naba, ibukina bwa kam riki mai iroun Aberaam; ao te berita e karaoaki nakon Aberaam; ao man te tua aei e reke reitan ana mwakuri nako Tamau, ike e kamimitongnga i bon irouna.

32 Ngaia are, naako ngkami, ao karaoi ana mwakuri Aberaam; butimwaea au tua ao kam na kamaiuaki.

33 Ma ngkana kam aki butimwaea au tua kam aki kona ni karekea ana berita Tamau, are e karaoia nakon Aberaam.

34 Te Atua e tuanga Aberaam, ao Taara e anga Aka nakon Aberaam bwa buuna. Ao tera bukina ngkai e karaoia? Ibukina bwa aio bon te tua, ao mai iroun Aka a riki aomata aika mwaiti. Ngaia are, aio e bon kakoroa nanon taian berita, irarikin bwaai riki tabeua.

35 Aberaam, ngkanne, e mena i aan te kabuakakaaki? E koaua ae I tuangkami, E aki, bwa Ngai, te Uea, I tuatua.

36 Aberaam e tuangaki bwa e na anga natina ae Itaaka; e ngae n anne, e koreaki: Ko na tai tiri aomata. E ngae n anne, Aberaam e aki rawa, ao e taekinaki i bukina bwa e raoiroi.

37 Aberaam e karekei buuna ni kewe, ao a karika natina, ao e taekinaki i bukina bwa e raoiroi, ibukina bwa e anganaki, ao e kakaonimaki i nanon au tua; n ai aron naba Itaaka ao Iakobwa are akea riki te bwai ae a karaoia irarikin are a tuangaki; ao ibukina bwa akea riki te bwai ae a karaoia irarikin are a tuangaki, a tia n rin i nanon karietatakia, n aron taian berita, ao a tekateka i aon aia kaintokanuea, ao bon tiaki anera ma bon taian atua.

38 Tawita naba e karekei buuna aika mwaiti ao buuna ni kewe, ao au tia mwakuri aika Toromon ao Mote naba, ni ikotaki naba ma au tia mwakuri aika mwaiti ake tabeman, mai moan karikan bwaai ni karokoa te tai aei; ao aki bure iai ma ti ni bwaai ake aki karekei mai irou.

39 Buun Tawita ao buuna ni kewe e bon anganaki irou, ni bain Natan, au tia mwakuri, ao tabeman mai buakoia burabeti ake iai irouia kingin te mwaaka aei; ao ni bwaai aikai e aki bure nakoiu ma ti ni kaineti ma Uria ma buuna; ao, ngaia are e a bwaka man karietatakina, ao e karekea tibwangana; ao a na aki reke irouna ngkana e kitana te aonaba, bwa I anga nakon temanna, e taku te Uea.

40 Ngai te Uea ae Atuam, ao I anganiko, au tia mwakuri Iotebwa, te nakoa, ao I kaoki bwaai ni kabane. Bubuti te bwai are ko tangira, ao ko na anganaki ni kaineti ma au taeka.

41 Ao ibukina bwa ko a tia n titiraki ni kaineti ma te wenenibure, e koaua, e koaua, ae I tuangko, ngkana te mwaane e karekea buuna n te berita ae tabu ae boou ae akea tokina, ao ngkana neienne e wenenibure ma te mwaane temanna, ao I aki angan neienne n te kabiraki ae tabu, e a tia ni wenenibure ao e na kamaunaaki.

42 Ngkana e tuai karaoa te berita ae tabu ae boou ae akea tokina, ao e wenenibure ma te mwaane temanna, e a tia ni wenenibure.

43 Ao ngkana buuna te mwaane e wenenibure ma te aine temanna, ao e a tia ni karaoa te berita, e a tia n urua ana berita ao e a tia ni wenenibure.

44 Ao ngkana neienne e tuai ni wenenibure, ma e aki bure ao e tuai n urua ana berita, ao e ataia, ao I kaotia nakoim au tia mwakuri ae Iotebwa, iai ngkanne mwaakam, ni mwaakan au Nakoanibonga ae Tabu, bwa ko na anaa neienne ao n angan teuanne are e tuai ni wenenibure ma e a tia ni kakaonimaki; bwa e na riki bwa te tia tautaeka i aoia aika mwaiti.

45 Bwa I a tia n anganiko taian kiing ao te mwaaka n te nakoanibonga, are I kaoki bwaai ni kabane iai, ao ni kaoti bwaai ni kabane nakoim n taina ae riai.

46 Ao e koaua, e koaua, ae I tuangko, bwa baike ko kabaei i aon te aba a na kabaeaki i karawa; ao baike ko kamatoa i aon te aba, n arau ao n au taeka, e taku te Uea, a na kamatoaki n akea tokina i karawa; ao ane ko kabwarai ana bure i aon te aba e na kabwaraaki n akea tokina i karawa; ao ane ko taui ana bure i aon te aba e na tauaki naba i karawa.

47 Ao e koaua ae I manga taekinna, ane ko kakabwaiaa N na kakabwaiaa, ao ane ko kamaraiaa N na kamaraiaa, e taku te Uea, bwa Ngai, te Uea, bon Atuam.

48 Ao teuana riki, e koaua ae I tuangko, au tia mwakuri Iotebwa, bwa baike ko anga i aon te aba, ao ane ko anga nakon temanna i aon te aba, n au taeka ao ni kaineti ma au tua, e na bon irianaki ma kakabwaia ao tiaki kamaraia, ao ma mwaakau, e taku te Uea, ao e na akea kabuakakaana i aon te aba ao i karawa.

49 Bwa Ngai te Uea ae Atuam, ao N na memena iroum ni karokoa tokin aonaba, ao rinanon ae aki totoki; bwa e koaua ae I kamatoa i aom karietatakim, ao ni katauraoa te kaintokanuea ibukim n abanuean Tamau, ma Aberaam are am bakatibu.

50 Nooria, I a tia n noori am anga nano, ao N na kabwarai am bure ni kabane; I a tia n noora am anga nano n te ongotaeka nakon te bwai are I a tia n tuangko. Ngaia are, naako, ao N na katauraoa te kawai ibukin biri nakom, n aron are I butimwaea ana karea Aberaam are natina ae Itaaka.

51 E koaua, ae I tuangko: Te tua ae I anga nakon au tia mwakuri te aine, Emma Timiti, are buum, are I a tia n anganiko, bwa e na tataninga moa ao e na aki butimwaea are I tuangko bwa ko na anganna, bwa I karaoia, e taku te Uea, bwa N na kataingkami ni kabane, n aron are I kata Aberaam, ao bwa I aonga ni kainnanoa te karea mai iroumi, n te berita ae tabu ao te anga nano.

52 Ao e riai au tia mwakuri te aine, Emma Timiti, ni butimwaai ni kabane ake e a tia n anganaki au tia mwakuri ae Iotebwa, ao ake a tamaroa ao a itiaki imatau; ao naake a aki itiaki, ao a taekinna bwa a itiaki, a na kamaunaaki, e taku te Uea ae te Atua.

53 Bwa Ngai te Uea ae Atuami, ao kam riai n ongeaba ni bwanaau; ao I anga nakon au tia mwakuri Iotebwa bwa e na riki bwa te mataniwi i aon bwaai aika a mwaiti; bwa e a tia ni kakaonimaki ni bwaai tabeua, ao man te tai aei N na kakorakora.

54 Ao I tua nakon au tia mwakuri te aine, Emma Timiti, bwa e na tiku ao n nim ma au tia mwakuri ae Iotebwa, ao akea riki. Ma ngkana e aki ira nanon te tua aei e na kamaunaaki, e taku te Uea, bwa Ngai te Uea ae Atuami, ao N na kamauna ngkana e aki ira nanon au tua.

55 Ma ngkana e aki ira nanon te tua aei, ngkanne e na karaoi bwaai ni kabane au tia mwakuri ae Iotebwa ibukina, n aron are tia n taekinna, ao N na kakabwaia ao ni kamwaita kanoana ao N na anga nakoina tebubua te tai mwaitina n te aonaba aei, irouia taama ao tiina, tarina ma mwaanena, taian auti ao aaba, buu aine ao naati, ao baunuea ni maiu aika akea tokiia n aonaba aika akea tokiia.

56 Ao teuana riki, e koaua ae I taekinna, e riai au tia mwakuri te aine ni kabwarai ana bure au tia mwakuri ae Iotebwa n ana kaairua nako; ao ngkanne e na kabwaraaki ana bure ibukin ana kaairua nako, ike e a tia ni kairua iai nakoiu; ao Ngai, te Uea ae Atuami, N na kakabwaia, ao ni kamwaita kanoana, ao N na karika te kimwareirei i nanona.

57 Ao N na manga taekinna riki, e riai au tia mwakuri ae Iotebwa ni kanakoi ana bwai mai i nanoni baina, bwa e kawa n roko te kairiribai ni kamauna; bwa Tatan e ukoukora kamaunakina; bwa Ngai te Uea ae Atuam, ao boni ngaia au tia mwakuri; ao nooria, ao taraia, I memena irouna, n ai aron are I memena iroun Aberaam, am bakatibu, bwa e aonga ni karietataki ao ni mimitong.

58 Ngkai, ni kaineti ma tuan te nakoanibonga, a bon mwaiti bwaai aika a irekereke ma ngaia.

59 E koaua, ngkana e weteaki te mwaane iroun Tamau, n aron Aaron, n oin bwanaau, ao ni bwanaan teuare e kanakomaiai, ao I tia n anganna kiingin te mwaaka n te nakoanibonga aei, ngkana e karaoa te bwai teuana n arau, ao ni kaineti ma au tua ao man au taeka, e na bon aki karaoa te bure, ao N na karaoiroia.

60 Ngaia are, e riai n akea ae na tiriburea au tia mwakuri ae Iotebwa, bwa N na karaoiroia; bwa e na karaoa te karea are I kainnanoia mai irouna ibukin riaoan te tua irouna, e taku te Uea ae Atuami.

61 Ao teuana riki, ni kaineti ma tuan te nakoanibonga—ngkana iai te mwaane ae mare ma te kibono, ao e tangiria ni mare ma temanna riki, ao are te moan e anga ana kariaia, ao ngkane e mare ma te kauoman, ao bon taian kibono, ao aki tia ni berita ma temanna te mwaane, ngkanne e bon kariaiakaki; e aki kona ni wenenibure bwa a bon anganaki nakoina; bwa e aki kona ni wenenibure ma are e bwainiia ao akea riki.

62 Ao ngkana iai irouna tengaun kibono aika a anganaki nakoina n te tua aei, e aki wenenibure, bwa e bwainiia, ao a bon anganaki nakoina, ngaia are e kariaiakaki.

63 Ma ngkana iai temanna ke temanna i buakoia kibono ake tengaun, i mwin mareakina, e wenenibure ma te mwaane temanna, neienne e a tia ni wenenibure, ao e na kamaunaaki; bwa a tia n anganaki nakon teuarei bwa a na kariki ao ni kaona te aonaba, ni kaineti ma au tua, ao ni kakoroa nanon te berita are e anga Tamau i mwaain karikan te aonaba, ao ibukin karietatakia n aonaba ake akea tokiia, bwa a na kariki tamneia aomata; bwa aio bon ana mwakuri Tamau ae reitinako, bwa e aonga ni kamimitongaki.

64 Ao teuana riki, e koaua, e koaua, I taekinna nakoimi, ngkana iai buun te mwaane, are taui kiing n te mwaaka aei, ao e reireina neienne tuan au nakoanibonga, ni kaineti ma bwaai aikai, ngkanne e na kakoaua ao ni boutokaia, ke e na kamaunaaki, e taku te Uea ae Atuam; bwa N na kamauna; bwa N na kakorakora arau i aoia ni kabane naake a butimwaea ao ni kakaonimaki i nanon au tua.

65 Ngaia are, e bon ira nanon te tua irou, ngkana neienne e aki butimwaea te tua aei, bwa teuanne e na butimwaai bwaai ni kabane ake Ngai, te Uea ae Atuana, N na anganna, ibukina bwa neienne e aki kakoauaa ao ni boutoka teuanne ni kaineti ma au taeka; ao neienne ngkanne e riki bwa te tia urua te tua; ao teuanne e aki kabaeaki n ana tua Tara, are e buoka Aberaam ni kaineti ma te tua ngke I tuanga Aberaam bwa e na ana Aka bwa buuna.

66 Ao ngkai, ni kaineti ma te tua aei, e koaua, e koaua, ae I taekinna nakoim, N na kaota ae mwaiti riki nakoim, i mwin aio; ngaia are, e tau aei ibukin te tai aei: Nooria, Ngai te Arebwa ao te Omeka. Amen.