1 Chex’ab’inq, ex tenamit re lin iglees, chan li Qaawa’ lee Dios, ut cherab’i li raatin li Qaawa’ cherix—

2 Li Qaawa’ li taachalq chi jun xaqaamil sa’ lix santil ochoch; li Qaawa’ li taakub’eeq sa’ xb’een li ruchich’och’ rik’in jun majewank re raqok aatin; relik chi yaal, sa’ xb’eeneb’ chixjunil li tenamit li neke’sach sa’ xch’ool li Dios, ut sa’ xb’eeneb’ chixjunil li moko useb’ ta sa’ eeyanq.

3 Xb’aan naq a’an tixt’usub’ lix santil tel sa’ rilob’aaleb’ chixjunil li tenamit, ut chixjunileb’ lix maril li ruchich’och’ te’ril li kolb’a-ib’ re lix Dios.

4 Jo’kan ut, kawresihomaq eerib’, kawresihomaq eerib’, ex intenamit; santob’resihomaq eerib’, ch’utub’omaq eerib’, ex tenamit re lin iglees, sa’ xb’een li ch’och’ Sion, chejunilex li ink’a’ xextaqlaak ta chi kanaak.

5 Elenqex chaq Babilonia. Ch’ajb’ilaqex laa’ex li nekexk’amok re lix k’uleb’aal li Qaawa’.

6 B’oqomaqeb’ lee ch’utub’aj-ib’ re tiik ruhil k’a’uxlej, ut chex’aatinaq chi kok’ aj xsa’ cherib’il eerib’. Ut li junjunq chi winq chixpatz’ lix k’ab’a’ li Qaawa’.

7 Relik chi yaal, ninye chi yaal wi’chik eere, xtaw xq’ehil naq lix yaab’ xkux li Qaawa’ wan cheru: Elenqex chaq Babilonia; ch’utub’omaq chaq eerib’ sa’ xyanqeb’ chaq li jar tenamit, chalen chaq sa’ xkahichal li iq’, chalen junpak’al chaq li choxa toj chi junpak’al chik.

8 Taqlahomaqeb’ li xb’eenil re lin iglees toj sa’eb’ li tenamit li wankeb’ chi najt; toj sa’eb’ li ch’och’ sa’ xyi li palaw; taqlanqex toj sa’eb’ li jalanil ch’och’; b’oqomaqeb’ chixjunileb’ li tenamit, xb’een wa eb’ laj Gentil, ut chirix a’an eb’ laj Judio.

9 Ut k’ehomaq reetal, ut ilomaq, a’inaq lix yaab’eb’, ut lix yaab’ xkux li Qaawa’ choq’ re chixjunileb’ li tenamit: Ayuqex toj sa’ li ch’och’ Sion, re naq taanimob’resiiq ru lix nub’aaleb’ lin tenamit, ut re naq te’k’ehe’q xkawub’ li roqechal, ut re naq tixjek’i rib’ Sion sa’eb’ li na’ajej sa’ xsutam.

10 Relik chi yaal, chixik lix xyaab’ kuxej sa’ xyanq chixjunileb’ li tenamit: Ajenqex ut waklinqex ut ayuqex chixk’ulb’al li B’eelomej; k’ehomaq reetal ut ilomaq, chalk re li B’eelomej; elenqex chixk’ulb’al chaq. Kawresihomaq eerib’ choq’ re li xnimal ru xkutan li Qaawa’.

11 Chexyo’leq ut, xb’aan naq moko nekenaw ta li kutan chi moko li hoonal.

12 Jo’kan ut, eb’ li wankeb’ sa’ xyanqeb’ laj Gentil che’eeleliq toj sa’ Sion.

13 Ut eb’ lix komoneb’ laj Juda che’eeleliq toj Jerusalen, toj sa’ li tzuul re li rochoch li Qaawa’.

14 Elenqex chaq sa’ xyanqeb’ li tenamit, sa’ xyanq ajwi’ chaq Babilonia, sa’ xyanq chaq li maa’usilal, a’an li musiq’ejil Babilonia.

15 A’ut chi yaal, jo’ka’in naxye li Qaawa’, mi’ux lee relik sa’ aanil; chikawresimanq b’an chixjunil li k’a’aq re ru chi rub’elaj cheru; ut ani naxik, mi’ilok chirix, maare anchal taachalq li junpaatil sache’k sa’ xb’een.

16 Chex’ab’inq ut ab’ihomaq, ex li ani wankex sa’ li ruchich’och’. Ab’inqex, ex xb’eenil re lin iglees sa’ junajil, ut cherab’i lix yaab’ xkux li Qaawa’; xb’aan naq a’an naxb’oq chixjunileb’ li winq, ut naxtaqlaheb’ chixjunil li winq yalaq b’ar chixjalb’aleb’ xk’a’uxl.

17 Xb’aan naq k’ehomaq reetal, li Qaawa’ Dios kixtaqla li anjel chixjapb’al re sa’ xyi li choxa, chixyeeb’al: Kawresihomaq lix b’e li Qaawa’, ut tiikob’resihomaq ru li ruq’ xb’e, xb’aan naq ak taahaye’q xhoonal lix k’ulunik—

18 Naq li Karneer taaxaqliiq sa’ xb’een li Tzuul Sion, ut rochb’een a’an kaahib’ xwaqxaqk’aal chi mil, chi tz’iib’anb’il xk’ab’a’ lix Yuwa’ a’an chiru xpeekemeb’.

19 Jo’kan ut, kawresihomaq eerib’ choq’ re lix k’ulunik li B’eelomej; elenqex, elenqex chaq chixk’ulb’al.

20 Xb’aan naq k’ehomaq reetal, a’an taaxaqliiq sa’ xb’een li tzuul Olivet, ut sa’ xb’een li nimla palaw, a’an li xnimal ru chamal ha’, ut sa’ xb’eeneb’ li ch’och’ sa’ xyi li palaw, ut sa’ xb’een li ch’och’ Sion.

21 Ut a’an tixyaab’asi chaq Sion lix yaab’ xkux, ut taa’aatinaq chalen chaq Jerusalen, ut taa’ab’iiq lix yaab’ xkux sa’ xyanqeb’ chixjunil li tenamit;

22 Ut a’anaq jun xyaab’ kuxej jo’ xyaab’ li k’iila ha’, ut jo’ xyaab’ jun nimla kaaq, li taajoroq chaq reheb’ li tzuul, ut eb’ li ru taq’a ink’a’ te’tawmanq.

23 A’an taataqlanq re li nimla chamal ha’, ut taatiikisimanq chi ixej toj sa’eb’ li ch’och’ sa’ xnim li saq’e, ut eb’ li ch’och’ sa’ xyi li palaw te’ok choq’ junaj chi ch’och’;

24 Ut li ch’och’ Jerusalen ut li ch’och’ Sion te’sutq’isiiq chi ixej toj sa’ tz’aqal lix na’ajeb’, ut li ruchich’och’ taawanq jo’ chanru naq kiwan sa’eb’ li kutan naq maji’ najache’ ru.

25 Ut li Qaawa’, li Kolonel ajwi’, taaxaqliiq sa’ xyiheb’ lix tenamit, ut taa’awa’b’ejinq sa’ xb’een chixjunil li tz’ejwalej.

26 Ut eb’ li wankeb’ sa’eb’ li ch’och’ sa’ xnim li saq’e te’wanq chi jultikeb’ re li Qaawa’; ut eb’ lix profeeteb’ te’rab’i lix yaab’ xkux a’an, ut ink’a’ chik te’xram rib’eb’; ut te’xsak’eb’ li pek, ut li saq ke taaha’resiiq chaq chiru li rilob’aaleb’.

27 Ut taayiib’amanq jun nim b’e sa’ xyi li nimla chamal ha’.

28 Li xik’ neke’ilok reheb’ te’wanq chi q’axb’il ru xb’aaneb’,

29 Ut sa’ li chaqi ch’och’ li maak’a’ na’uuchin wi’, te’elq chaq xsaab’ li yo’yookil ha’, ut li poqsil ch’och’ ink’a’ chik taawanq choq’ chaqi ehel ch’och’.

30 Ut te’xq’axtesi chaq lix ninqal ru xb’ihomaleb’ reheb’ lin moos, li ralal xk’ajol laj Efrain.

31 Ut lix nub’aaleb’ li tzuul li junelik neke’kana te’siksotq chiru li rilob’aaleb’.

32 Ut aran te’xkub’si chaq rib’ ut te’k’ehe’q xloq’al choq’ xkorooneb’, sa’ ajwi’ Sion, xb’aan ruq’eb’ lix moos li Qaawa’, a’eb’ li ralal xk’ajol laj Efrain.

33 Ut te’nujaq rik’in b’ich re sahil ch’oolejil li junelik nakana.

34 K’ehomaq reetal, a’in li rosob’tesihom li junelikil Dios sa’ xb’eeneb’ lix teepal Israel, ut xnimal ru wi’chik li osob’tesink sa’ xb’een xjolom laj Efrain ut eb’ lix komon.

35 Ut jo’kaneb’ ajwi’ li ani re lix teepal laj Juda, chirix chixjunil lix rahilaleb’, te’santob’resimanq sa’ santilal chiru li Qaawa’, re te’wanq chiru li rilob’aal chi kutan ut chi q’eq, chi junelik q’e kutan.

36 Ut anajwan, chi yaal jo’ka’in naxye li Qaawa’, re naq li k’a’aq re ru a’in taanawmanq sa’ eeyanq, ex li ani wankex sa’ li ruchich’och’, laa’in kintaqla lin anjel chi xik’ank sa’ xyi choxa, li nak’amok re li evangelio li junelik nakana, li kixk’ut rib’ chiru junjunq ut kixq’axtesi a’an reheb’ li winq, li tixk’ut chaq rib’ chiru naab’al li neke’wan sa’ li ruchich’och’.

37 Ut li evangelio a’in taajultikamanq chiru li junjunq chi tenamit, ut junkab’al, ut aatinob’aal, ut teepal.

38 Ut eb’ lix moos li Dios te’elq chaq, ut te’xye chi kaw xyaab’eb’ xkux: Chexuwa ru li Dios ut chek’e xloq’al a’an, xb’aan naq xchal xhoonal lix raqb’a-aatin;

39 Ut cheloq’oni li ani kiyiib’ank re li choxa, ut li ch’och’, ut li palaw, ut eb’ lix yo’leb’aal li ha’—

40 Ut chepatz’ xk’ab’a’ li Qaawa’ chi kutan ut chi q’eq, ut cheye: Chapeji taxaq li choxa; chatkub’eeq taxaq, re te’ha’resiiq chaq li tzuul chiru laa wilob’aal.

41 Ut sumenb’ilaq sa’ xb’een lix jolomeb’; xb’aan naq li rilob’aal li Qaawa’ chanchanaq li xam aj ha’ob’resinel li nak’atok, ut jo’ li xam li naxk’e chi woqxink li ha’.

42 At Qaawa’, tatkub’eeq chaq re xk’eeb’al chi nawmank laa k’ab’a’ chiruheb’ li xik’ neke’ilok aawe, ut chixjunileb’ li tenamit te’siksotq chiru laa wilob’aal—

43 Naq nakab’aanu li k’a’aq re ru li xuwajel, k’a’aq re ru li moko ke’royb’eni ta;

44 Relik chi yaal, naq nakatkub’e chaq, ut neke’ha’resiik chaq li tzuul chiru laa wilob’aal, taak’ul li ani nasaho’ xch’ool ut naxk’anjela li tiikilal, li nakatxjultika sa’eb’ laa b’e.

45 Xb’aan naq chalen chaq sa’ xtiklajik li ruchich’och’ ink’a’ xe’rab’i li winq chi moko xe’xnaw rik’in xxikeb’, chi moko xril junaq xnaq’ uhej, at Dios, ka’ajat wi’ laa’at, chanru xnimal ru li k’a’aq re ru kakawresi choq’ re li ani na’oyb’enink aawe.

46 Ut taayeemanq: Ani a’in li nakub’e chaq chalen rik’in li Dios sa’ choxa chi b’onb’il li raq’; relik chi yaal, chalen chaq sa’eb’ li na’ajej li moko nawb’ileb’ ta, tiqto rik’in xloq’alil li raq’, li yoo chi xik rik’in xnimal lix metz’ew?

47 Ut a’an tixye: Laa’in li ki’aatinak sa’ tiikilal, li nim xwankil chi kolok.

48 Ut li Qaawa’ kaqaq sa’ li raq’, ut li raq’ jo’aq li ani nayeq’ok sa’ li yatz’leb’aal uva.

49 Ut k’a’jo’aq xnimal lix loq’al li rilob’aal, jo’kan naq li saq’e tixmuq li rilob’aal xb’aan xxutaan, ut li po ink’a’ tixk’e lix saqenkil, ut eb’ li chahim te’kutmanq chaq sa’ xna’ajeb’.

50 Ut taa’ab’imanq lix yaab’ xkux: Laa’in kinyeq’ok injunes sa’ li yatz’leb’aal uva, ut kink’am chaq li raqb’a-aatin sa’ xb’eeneb’ chixjunil li tenamit, ut maajun kiwan wochb’een;

51 Ut keb’inten chi woq sa’ xnimal injosq’il, ut kinyeq’iheb’ sa’ lin josq’il, ut lix kik’eleb’ kinrachle chiru li waq’, ut xch’ulako’ chixjunil lin t’ikr rik’in; xb’aan naq a’in xkutankil li eeqajunk li kiwan sa’ inch’ool.

52 Ut anajwan ak xtaw xchihab’il li tojb’il rix inb’aan; ut eb’ a’an te’xye resil li chaab’ilal ch’oolej aj rahonel re lix Qaawa’eb’, ut chixjunil li kixq’axtesi a’an sa’ xb’eeneb’ jo’ chanru lix chaab’ilal, ut jo’ chanru xchaab’ilal lix ch’ool aj rahonel, chi junelik q’e kutan.

53 Sa’ chixjunil lix tawajikeb’ kitawasiik a’an. Ut li anjel chiru li rilob’aal kixkoleb’; ut rik’in lix rahom, ut lix toq’ob’ahom, kixtojeb’ rix, ut kiriiqaheb’, ut kixk’ameb’ chiru chixjunil li najter kutan;

54 Relik chi yaal, ut jo’kan ajwi’ laj Enok, ut eb’ li ke’wan rik’in, eb’ li profeet li ke’wan chirix chaq a’an; ut laj Noe ajwi’, ut eb’ li ke’wan chirix chaq a’an; ut laj Moises ajwi’, ut eb’ li ke’wan chirix chaq a’an;

55 Ut chalen chaq aj Moises toj laj Elias, ut chalen chaq laj Elias toj laj Jwan, li ke’wan rik’in li Kristo sa’ lix waklijik chi yo’yo, ut eb’ li santil apostol, rochb’een laj Abraham, laj Isaak, ut laj Jakob, te’wanq chiru li Karneer.

56 Ut li muqleb’aal kamenaq reheb’ laj santil paab’anel te’teeliiq, ut te’elq chaq ut te’xaqliiq sa’ xnim uq’ li Karneer, naq a’an taaxaqliiq sa’ xb’een li Tzuul Sion, ut sa’ li santil tenamit, li Ak’ Jerusalen; ut eb’ a’an te’xb’icha lix b’ich li Karneer, chi kutan ut chi q’eq, chi junelik q’e kutan.

57 Ut choq’ re li ajom a’in, re naq eb’ li winq taaruuq te’tz’aqonq sa’ li loq’alil li taak’utb’esimanq, li Qaawa’ kixtaqla lix tz’aqalil lix evangelio, lix sumwank li junelik nakana, ut kina’leb’ank chi saqen ru ut chi ch’olch’o—

58 Re xkawresinkileb’ li q’uneb’ xmetz’ew choq’ re li k’a’aq re ru li chalk re sa’ li ruchich’och’, ut choq’ re li taqlaak xb’aan li Qaawa’ sa’ li kutan naq eb’ li q’uneb’ xmetz’ew te’xsach xna’leb’eb’ li ninqeb’ xna’leb’, ut li k’a’ru ka’ch’in taawanq choq’ jun kawil tenamit, ut wiib’ te’xk’e chi eelelik li lajetq mil reheb’.

59 Ut rik’in li k’a’ru ka’ch’in xmetz’ew re li ruchich’och’ li Qaawa’ tixtz’ileb’ li tenamit rik’in lix wankil lix Musiq’.

60 Ut choq’ re li ajom a’in ke’k’eeman li jar taqlahom a’in; kitaqlaman naq te’k’uulamanq chaq chiru li ruchich’och’ sa’ li kutan naq ke’k’eeman, a’ut anajwan tento te’xik rik’in chixjunil li tz’ejwalej—

61 Ut a’in jo’ chanru lix k’oxlahom ut li rajom li Qaawa’, li nataqlan sa’ xb’een chixjunil li tz’ejwalej.

62 Ut re li ani naxjal xk’a’uxl ut naxsantob’resi rib’ chiru li Qaawa’ taak’eemanq li junelik yu’am.

63 Ut sa’ xb’eeneb’ li moko neke’ab’in ta chiru lix yaab’ xkux li Qaawa’ taatz’aqloq ru li k’a’ru tz’iib’anb’il chaq xb’aan li profeet aj Moises, naq te’isiiq chaq sa’ xyanq li tenamit.

64 Ut jo’kan ajwi’ li k’a’ru tz’iib’anb’il chaq xb’aan li profeet aj Malakias: Xb’aan naq k’ehomaq reetal, chalk re li kutan li taak’atoq jo’ k’atleb’aal; ut chixjunileb’ laj q’etq’et, relik chi yaal, ut chixjunileb’ li neke’b’aanunk re li maa’usilal, te’wanq choq’ roq waj; ut li kutan li taachalq tixk’ateb’, chan li Qaawa’ reheb’ li Teepal, jo’kan naq moko tixkanab’ ta choq’ reheb’ xxe’il chi moko ruq’il.

65 Jo’kan ut, a’inaq lix sumehom li Qaawa’ choq’ reheb’:

66 Sa’ li kutan naq kinchal rik’ineb’ li we, maajun winq sa’ eeyanq kinixk’ul, ut kextiikisiik chaq.

67 Naq kinb’oqok wi’chik maajun eere kiwan chi chaq’ok; a’b’anan ink’a’ kiwan chi k’osb’il li wuq’ chi yal ta ka’ch’in re naq ink’a’ ta tinruuq chi tojok-ix, chi moko lin wankilal chi kolok.

68 K’ehomaq reetal, rik’in lin ch’iilahom ninchaqihob’resi li palaw. Ninkanab’ choq’ chaqi ch’och’ li nima’; neke’chuho’ lix karileb’, ut neke’kam xb’aan chaqi-eel.

69 Nintiqib’ li choxa rik’in q’eq, ut choq’ xtz’apb’al ru nink’e li q’es ruhil t’ikr.

70 Ut a’in teek’ul sa’ wuq’—texyoklaaq sa’ rahil ch’oolejil.

71 K’ehomaq reetal, ut ilomaq, maajun wan re kolok eere; xb’aan naq ink’a’ kex’ab’in chiru lix yaab’ inkux naq kexinb’oq chaq sa’ choxa; ink’a’ kepaab’eb’ lin moos, ut naq ke’taqlaman eerik’in ink’a’ xek’uleb’.

72 Jo’kan naq ke’xtz’ap chaq li ch’olob’anb’il esil ut ke’xb’ak’ chaq li chaq’rab’, ut laa’ex kexq’axtesiik toj sa’ li q’ojyin.

73 Eb’ a’in te’xik toj sa’ li najtil aak’ab’, b’ar wan wi’ yaab’ak, ut ayaynak, ut k’uxuxink ruuch-e.

74 K’ehomaq reetal li Qaawa’ lee Dios kiyehok re. Amen.